1 Thɛ 3 - RUAC KUƆTH IN RƐL RƆ

¹ Kɛ kui̱ ɛmɔ mëë /ka̱nkɔ jɛ luäŋ kɛ ruɔ̱t, cuakɔ jɛ nhɔk ɛn ɣöö bakɔ duɔth kärɔ̱ kä A-thɛn,

² kä cuakɔ Ti-mo-thi min la dämandan kä läät Kuɔth kɛɛl kɛ kɔ rɛy thukni Kritho tin gɔw ja̱k. Kä jäk nɛy ɛ kɛ ɣöö bɛ yɛ wä bum kä bɛ yɛ com rɛy ŋäthädun,

³ kɛ ɣöö bɛ thil ram mi loc jɔk kɛ kui̱ rikni ti̱ti̱. Ŋäc yɛn ɛ pua̱nykun ɛn ɣöö banɛ kɛn rik ti̱ti̱ dhil jek.

⁴ Kä kɛ thuɔ̱k mëë ta̱kɔ kɛɛl kɛ yɛ, cuakɔ jɛ la̱r yɛ nikɛ nhiam ɛn ɣöö bakɔ riɛk rut, kä cuɛ ben tuɔɔk ala jɛn, ce̱tkɛ min ŋäc yɛn ɛ.

⁵ Kɛ luɔt ɛmɛ, mëë /ka̱n jɛ luäŋ kɛ ruɔ̱t, cua̱ raan ja̱k, kɛ ɣöö bä ŋa̱thdun ŋa̱c. Kä ɣän dualä ɛn ɣöö dɔ̱ŋ ci gua̱n mɛɛtdä yɛ ɣɔam, a dee la̱tda cua̱ ni baŋ.

⁶ Kä täämɛ ci Ti-mo-thi luny jɔk, kä cɛ kɔ nöŋ thuk ti gɔw kɛ kui̱ ŋäthädun kɛnɛ nhökdun. Kä cɛ la̱r kɔ bä ɛn ɣöö la yɛn kɔ a tiim ni ciaŋ agɔaa, kä go̱o̱r yɛn ɣöö dërɛ kɔ nɛn ce̱tkɛ min görkɔ nëndun.

⁷ Kɛ kui̱ ɛmɔ, dämaari, cuakɔ buɔ̱m kɛ yɛ kɛ kui̱ ŋäthädun rɛy bɛ̈c bɛ̈ɛ̈cnikɔ kɛnɛ rikɔ diaal.

⁸ Kä täämɛ, cakɔ tëk, mi cuŋ yɛn a bum rɛy Kua̱r ni Yecu.

⁹ Ɛ tɛ̈th lɔaac mi te di mi dëëkɔ la̱r Kuoth kɛ kui̱dun mi ro̱ŋ mi dëëkɔ luɔ̱c yɛ kɛ kui̱ tɛthä lɔaac min cakɔ jek nhiam Kuɔthdan?

¹⁰ Palkɔ Kuoth kɛ wäär kɛnɛ cäŋ kɛ lɔcdä kɛɛliw, kɛ ɣöö dɔ̱ŋ dëëkɔ yɛ nɛn a guɛcnɛ rɔ̱, kä dëëkɔ yɛ luɔ̱c min te jɔ̱ɔ̱r rɛy ŋäthädun.

¹¹ Täämɛ, a Kuothdan in la Gua̱ndan puɔ̱nydɛ kɛnɛ Kuääran ni Yecu rial duɔ̱ɔ̱pdä ikä kɛ ɣöö bakɔ ben kä yɛ.

¹² Kä a Kuäär jak yɛ kä bia rɔ̱ rep a bia thia̱a̱ŋ kɛ nhökdun kɛ rɔ̱ kamnikun kɛnɛ nɛy diaal, ce̱tnikɛ min nhɔk nɛy yɛ.

¹³ Kä derɛ lo̱ckun jakä bum a bi yɛn a nɛy ti rɛl rɔ ti thil bɛ̈ɛ̈l nhiam Kuɔthdan in la Gua̱ndan, kɛ gua̱a̱th benä Kua̱ran ni Yecu kɛɛl kɛnɛ nɛɛkɛ diaal tin ci Kuoth kɛ lɛy.