1 Thɛ 1 - RUAC KUƆTH IN RƐL RƆ

¹ Ɛ ɣän Puɔl kɔnɛ Thay-läth kɛ Ti-mo-thi, gɔ̱a̱rkɔ warɛgak ɛmɛ ji̱ duëël Kuɔth kä Thɛ-tha-lo-ni-ka rɛy Kuɔth in la Gua̱a̱ra kɛnɛ Kuäär ni Yecu Kritho. A puɔ̱th kɛnɛ mal te kɛɛl kɛ yɛ.

Tëk kɛnɛ ŋa̱th ji̱ Thɛ-tha-lo-ni-ka

² La la̱rkɔ Kuoth tɛ̈th lɔaac ni ciaŋ kɛ kui̱dun diaal kä la nɛy yɛ a tiim rɛy paläda ni ciaŋ.

³ Kä la tiim nɛy la̱t in cia la̱t kɛ kui̱ ŋäthädun nhiam Kuɔth in la Gua̱a̱ra kɛnɛ la̱t in cia la̱t kɛ kui̱ nho̱kädun. Kä lär nɛy ɛ tɛ̈th lɔaac kɛ ɣöö cia cuɔ̱ŋ a bum ŋäthädun rɛy Kua̱ran ni Yecu Kritho.

⁴ Ŋa̱ckɔ jɛ, dämaari, ɛn ɣöö nhɔk Kuoth yɛ, kɛ ɣöö cɛ yɛ mɛk,

⁵ kɛ ɣöö /ken thuk ti gɔw ben kä yɛ kɛ riet kärɔa, cɛ ben bä kɛ buɔ̱m kɛnɛ Yiëë in Gɔaa in Rɛl Rɔ, amäni cuɔ̱pdɛ rɛy lɔaacdun kɛ thuɔ̱k. Ŋäc yɛn ciaŋ ëë cieŋ kɛ kɔ mëë ta̱kɔ rɛydun, kä ɛ kui̱ gɔɔyädun.

⁶ Kä cu yɛn kɔ nyiath kɛnɛ Kuäär ni Yecu, kä cäŋɛ mëë ca yɛ ciɛŋ a jiäk cia ruac Kuɔth jek kɛ tɛ̈th lɔaac min bä kä Yiëë in Gɔaa in Rɛl Rɔ.

⁷ Kä cu yɛn a nyuuth mi gɔaa kä ji̱ ŋäthä diaal tin te kä Ma-tha-do-nia kɛnɛ A-ke-ya.

⁸ Kä cu ruac Kua̱r ni Yecu wä raar kä yɛ a /ciɛ rɛy Ma-tha-do-nia kɛnɛ A-ke-ya kärɔa, kä duundɛ ɣöö ci kɛ̈k ŋäthädun rɛy Kuɔth räth gua̱thni diaal, kä ɛnɔ thilɛ duɔ̱ɔ̱r mi dëëkɔ lɛ lat kɛ kui̱dɛ.

⁹ Kɛ ɣöö kɛn ji̱ gua̱thni tɔ̱tɔ̱ cikɛ jɛ lat ɛn ɣöö cia kɔ nyuɔ̱ɔ̱r i̱di, amäni ɣöö cia lo̱ckun riet Kuoth kä kuth guäyni, kɛ ɣöö bia lätni Kuoth mi tëk kä thuɔ̱k ikä,

¹⁰ kɛnɛ ɣöö bia lip ni Gatdɛ nhial, mëë cɛ jiɛc li̱th ala Yecu, min ci kɔn kän kä waŋ lɔaac in bi ben.