1 Tham 9 - RUAC KUƆTH IN RƐL RƆ

Röm Thɔɔl kɛnɛ Tha-muɛl

¹ Tëë kɛ wut rööl Ben-ya-min mi cɔal i̱ Kic, gat Ä-bi-el, gat Dhɛ-ror, gat Bɛ-ko-rɛ̈th, gat Ä-pi-ɛ̈k, raan Ben-ya-min mi riäŋ riäŋ.

² Kä Kic tëë kɛ gat mi cɔali Thɔɔl, ɛ ŋuɛ̈t mi gɔaa. Thilɛ ram mi lëny jɛ kɛ gɔɔy rɛy I-thɛ-rɛl. Jɛn cɛ käkjiɛrkɛ kap nhial kä tëë kɛ ŋuäk mi bäär, bäri jɛn kä nɛy diaal.

³ Täämɛ cu muɔ̱li gua̱n Thɔɔl ni Kic bath. Kä cu Kic gatdɛ ni Thɔɔl jiök i̱, “Moc rɔ kɛ läät kɛl, wiaa go̱rɛ muɔ̱li.”

⁴ Cukɛ wä kɛ wec päämni Ɛ-pa-rim kɛnɛ mun Ca-li-ca, duundɛ ɣöö /ken kɛn kɛ jëk. Kä cukɛ wä muun Cɛ̈-lim, cukɛ thil thi̱n bä. Kä cukɛ ben muun Ben-ya-min, /ken kɛn kɛ jek.

⁵ Kä mëë cikɛ ben muun Dhup, cu Thɔɔl läätdɛ min te kɛɛl kɛ jɛ jiök i̱, “Bër luɔcnɛ jɔk, amäni mi bi gua̱a̱r ca̱r muɔ̱li päl a bɛ tim ni kɔn.”

⁶ Duundɛ ɣöö cu läätdɛ jɛ jiök i̱, “Nɛnɛ, tëë kɛ raan Kuɔth mia̱a̱ wi̱c ɛ mɔ, luɔ̱thkɛ jɛ ɛlɔ̱ŋ Kä mi cɛ lar lapɛ a thuɔ̱k. Wanɛ thi̱n ɛn täämɛ. Dɔ̱ŋ bɛ kɔn wä la̱r luɔt ja̱lan ɛ te kɔn thi̱n ɛ.”

⁷ Kä cu Thɔɔl läätdɛ jiök i̱, “Mi wä kɔn wä wä, ɛŋu mi ban wä ka̱m ɛn wut ɛ mɔ? Kä ci jurayni kɔn thuɔ̱k rɛy cuaalä, thilɛ kɔn muc mi ban ka̱m ɛn raan Kuɔth. Ɛŋu mi tekɛ kɔn?”

⁸ Kä cu läätdɛ jɛ nyɔk kɛ luɔ̱c i̱, “Ta̱a̱ kɛ yiëëth mi tɔ̱t, bä ka̱m jɛn raan Kuɔth, kɛ ɣöö bɛ kɔn nyuɔ̱th duɔ̱pdan.”

⁹ (Ni wen kä I-thɛ-rɛl, mi wä raan Kuoth thiec, la wee i̱ “Bër, wanɛ kä ti̱et.” Min kua lɛ cɔl ɛn täämɛ i̱ go̱k, ni wen cɔal kɛ jɛ i̱ ti̱et.)

¹⁰ Kä cu Thɔɔl läätdɛ jiök i̱, “Ɛ ruac mi gɔaa. Bër wanɛ.” Cukɛ wä wi̱c in te raan Kuɔth thi̱n.

¹¹ Min cikɛ ben dho̱nyä wäkɛ wi̱c, cukɛ röm kɛ la̱a̱t nyieet ti ci ben jiɔam kɛ pi̱, kä cukɛ kɛ thiec i̱, “Te ti̱et ɛn wa̱nɛ?”

¹² Kä cukɛ kɛ loc i̱, “Ja thi̱n. Jɛn ɛ nhiamdun, malɛ wä. Payɛ wä wi̱c ɛn täämɛ, kɛ ɣöö te naath kɛ muc ɛn walɛ ti wa thöp wi̱i̱ yi̱kä guäth palä.

¹³ Niɛ cuɔ̱pdun wi̱c bia jɛ jek a /kenɛ ni wä guäth palä wädɛ mi̱th. Kɛ ɣöö /ci naath bi mi̱th amäni mi cɛ ben, kɛ ɣöö bɛ muc poth. Kɛ kɔrɛ bi nɛy tin ca cɔl kulɛ mi̱th. Wiaa ɛn täämɛ bia jɛ wä jëk.”

¹⁴ Ɛ jɛn cukɛ wä wäkɛ wi̱c. Niɛ min cuɔpkɛ wec, cukɛ Tha-muɛl nɛn bëë raar wi̱c ro̱mɛ kɛ kɛ wädɛ guäth palä.

¹⁵ Kä täämɛ cu cäŋ Thɔɔl cop, cu Kuoth Nhial ɛ nyuɔ̱th Tha-muɛl i̱,

¹⁶ “Iruun kɛ gua̱a̱th mi ce̱tkɛ gua̱a̱th ɛmɛ bä ji̱ jäk kä raan rööl Ben-ya-min, kä bi jɛ lɛy ala kuäär nɛɛnikä ni ji̱ I-thɛ-rɛl. Bɛ nɛɛkä kän te̱tni ji̱ Pi-li-thɛt. Kɛ ɣöö cä riɛk nɛɛnikä nɛn, kä cä jɔwdiɛn liŋ”

¹⁷ Mëë ci Tha-muɛl Thɔɔl nɛn, cu Kuoth Nhial ɛ jiök i̱, “Nɛmɛ ɛ jɛn ram in la̱tdä ji̱! Ɛ jɛn ram in bi nɛɛkä ruac.”

¹⁸ Kä cu Thɔɔl ben kä Tha-muɛl thok rɛ̈ɛ̈k, kä cuɛ wee i̱, “Ci Ɣä dëë malɛ nyuɔ̱th dhɔr ti̱et?”

¹⁹ Kä cu Tha-muɛl ɛ loc i̱, “Ɛ jɛn ɣän ti̱et. Wër nhial nhiamdä guäth palä, kɛ ɣöö ɛn walɛ ban mi̱th kɛɛl, i̱ ruun bä ji̱ la̱t tin diaal tin caari kä bä ji̱ cu jak kä wä.

²⁰ Kä mi ɛ kui̱ muɔ̱liku tëë ci bath, kɛ ni̱n da̱ŋ diɔ̱k tëë ci wä, cu diɛɛr, kɛ kɛ, ca kɛ jëk. Kä ɛŋa ɛ ni̱n go̱o̱r ji̱ I-thɛ-rɛl ɛ? /Ciɛ ji̱n yɛnɛ dhɔr guur kɛɛliw?”

²¹ Kä cu Thɔɔl ɛ loc i̱, “A /ci ɣän kua̱ raan ji̱ Ben-ya-min, nɛy tin kuiy ni kɛn kä thuk duëli I-thɛ-rɛl? Kä kuiy ni dhɔra rɛy thuɔk duëël Ben-ya-min kɛɛliw Kuɛ la ŋu ruaci kɛ ɣä inɔ mɔ?”

²² Ɛ jɛn cu Tha-muɛl Thɔɔl kɛnɛ läätdɛ nööŋ duëël mi di̱i̱t cuɛ kɛ moc gua̱a̱th nhiam nɛɛni tin ca cɔl, nɛy ti jiɛɛn diɔ̱k.

²³ Kä cu Tha-muɛl thäät cɔl i̱, “No̱o̱ŋni dhon ri̱eŋ tin cä ka̱m ji̱, min cä la̱r ji̱ i̱, ‘Läthni kɛ gekä.’ ”

²⁴ Kä cu thäät cio̱o̱k ka̱n kɛnɛ tat, kä cuɛ kɛ ben la̱th nhiam Thɔɔl. Kä cu Tha-muɛl wee i̱, “Nɛnɛ, min ca tɔ̱w ca la̱th nhiamdu mɔ. Mi̱thni, kɛ ɣöö tɔ̱a̱wkɛ jɛ kɛ kui̱du mäni mi ci gua̱a̱thdɛ ben, kɛ ɣöö deri cu mi̱th kɛɛl kɛ ja̱a̱l.” Inɔ cu Thɔɔl mi̱th kɛɛl kɛ Tha-muɛl.

²⁵ Kä min cikɛ ben piny guäth palä wäkɛ wi̱c. Cukɛ wä ruac wi̱i̱ duëël nhial.

²⁶ Bakä ɣɔaa cu Tha-muɛl Thɔɔl cɔl wi̱i̱ duëël nhial i̱, “Riali rɔ ikä kɛ ɣöö bä ji̱ ben jak kä wä dupdu.” Kä cu Thɔɔl rɔ jiɛc, kä cu kɛn da̱ŋ rɛw wä raar dup.

Yier Tha-muɛl kɛ Thɔɔl ala kuäär

²⁷ Kä min wäkɛ raar piny wec, cu Tha-muɛl ruac kɛ Thɔɔl i̱, “Jiök ni läätdu a jɛ wä nhiamdan, mi cɛ wä nhiam ku cuɔ̱ŋ puɔ̱nydu kä mi tɔt, kɛ ɣöö bä ji̱ la̱t ruac Kuɔth.”