1 Tham 8 - RUAC KUƆTH IN RƐL RƆ

Thiec ji̱ I-thɛ-rɛl kɛ kuäär

¹ Mëë ci Tha-muɛl dɔŋ cuɛ gaatkɛ jak kä ruackɛ I-thɛ-rɛl.

² Cɔal gatdɛ min kɛ̱̈ɛ̱̈ i̱ Yo-el, kä gatdɛ min dɔ̱ŋ cɔalɛ Ä-bi-yaa. Cukɛ ruec kä Ber-cɛ-ba.

³ Duundɛ ɣöö /ken gaatkɛ guɔ̱ɔ̱r ni duɔ̱ɔ̱pdɛ, cukɛ nhɔk ni ɣöö bikɛ tekɛ ŋɔak. Ca nhɔk ni kök /ca thuɔ̱k lat.

⁴ Ɛ jɛn cu bööth I-thɛ-rɛl diaal rɔ mat kä cukɛ ben kä Tha-muɛl kä Rama.

⁵ Kä cukɛ jɛ jiök i̱, “Nɛn ɛ, ci dɔŋ kä gaatku /ca guur ni lätku. Täämɛ kuenyni nɛy kuäär mi bikɔ ruac ce̱tkɛ nɛy diaal tin kɔ̱ŋ.”

⁶ Duundɛ ɣöö cu lɔc Tha-muɛl jiääk mëë cɛ kɛ liŋ wäkɛ i̱, “Moc nɛy kuäär mi bikɔ ruac.” Kä cuɛ Kuoth Nhial pal.

⁷ Kä cu Kuoth Nhial ɛ jiök i̱, “Liŋ naath kɛ tin diaal tin la̱tkɛ ji̱. Kɛ ɣöö /ca lo̱k ni ji̱ lökɛ ni ɣä, kɛ ɣöö dëë a kuääriɛn.

⁸ Kɛ kui̱ kä ti diaal tin ci kɛn kɛ lät kä ɣä, nikɛ cäŋ ëë ka̱mä kɛ raar kä I-jëp amäni walɛ, lo̱k kɛn ɣä wa pal ni kuth ti kɔ̱ŋ. Inɔ bä lät kɛn ɛ kä ji̱.

⁹ Ku kɛ liŋ ɛn täämɛ. Kä läri kɛ läär, kä nyuth nikɛ ciaaŋ kua̱r ɛ go̱o̱r kɛnɛ mɔ.”

¹⁰ Cu Tha-muɛl ruaacni Kuɔth Nhial diaal la̱t nɛy tëë thieckɛ kuäär kä jɛ.

¹¹ Cuɛ wee i̱, “Nɛmɛ ba jɛn ta̱a̱ kua̱r in bi yɛ ruac. Bɛ gaatkun ka̱n kä bɛ kɛ jak kä ji̱ thurbiɛɛlikɛ kɛnɛ jio̱ŋko̱o̱rikɛ, kä bikɛ wur nhiam thurbiɛɛlikɛ.

¹² Kä bɛ rɔ kuëny rueec bathdɔɔri kɛnɛ rueec jiɛɛn dhieec, kä bi tha̱a̱ŋkiɛn a puɔ̱ɔ̱r ka̱a̱knikɛ, kä bi tha̱a̱ŋkiɛn tin kɔ̱ŋ a ŋëër bɛɛl, kä bi tha̱a̱ŋkiɛn yio̱w ko̱o̱r täth kɛnɛ yio̱w thurbiɛɛli.

¹³ Bɛ nyieekun ka̱n kɛ ɣöö ba lät kä liɛɛth yi̱i̱rä pua̱a̱ny, bi tha̱a̱ŋkiɛn ɛ tha̱a̱t kɛnɛ buɔ̱ɔ̱l jurayni.

¹⁴ Kä bɛ ka̱a̱kun tin gɔw ka̱n kɛnɛ dɛy Ɔ-lip, bɛ kɛ ka̱m la̱a̱tkɛ.

¹⁵ Kä bɛ wa̱l wa̱a̱li bɛɛlkun kɛnɛ ŋɔa̱a̱rkun ka̱n, bɛ kɛ ka̱m ji̱ kɔaarɛ kɛnɛ la̱a̱tkɛ.

¹⁶ Kä bɛ ja̱a̱ŋ wutnikun kɛnɛ ja̱a̱ŋ määnkun ka̱n, kɛ ŋuɛ̈tniku kur kɛ muɔ̱likun. Bɛ kɛ wä lät ni la̱tdɛ.

¹⁷ Kä bɛ wa̱l wa̱a̱li deetkun ka̱n, kä bi yɛn a la̱a̱tkɛ.

¹⁸ Ɛn cäŋ ɛ mɔ bia wiee kɛ kui̱ kua̱run ëë cia kuëny rɔ̱. Duundɛ ɣöö ci Kuoth Nhial yɛ bi loc ɛn cäŋ ɛ mɔ.”

¹⁹ Duundɛ ɣöö cu naath ɛ lo̱k i̱ liɛŋkɛ ruac Tha-muɛl. Kä cukɛ wee i̱, “Eey! Ba̱kɔ tekɛ kuäär mi ruaac nɛy.

²⁰ Kɛ ɣöö ba̱kɔ ce̱tkɛ nɛy diaal tin kɔ̱kiɛn, ba̱kɔ tekɛ kuäär mi ruaac nɛy kä tɛɛr ko̱ra.”

²¹ Kä mëë ci Tha-muɛl ruac nɛɛni diaal liŋ, cuɛ kɛ wä la̱t Kuoth Nhial.

²² Kä cu Kuoth Nhial Tha-muɛl jiök i̱, “Liŋ ruacdiɛn, kuëny nikɛ kuäär.” Kä cu Tha-muɛl ji̱ I-thɛ-rɛl jiök i̱, “Ɛ ram ɔ wä wi̱i̱dɛ.”