1 Tham 6 - RUAC KUƆTH IN RƐL RƆ

Loc thandukä matdä ruac kä I-thɛ-rɛl

¹ Cu thanduk matdä ruac Kuɔth Nhial tekɛ ji̱ Pi-li-thɛt kɛ päth bärɔw.

² Cu ji̱ Pi-li-thɛt bööth palä kɛnɛ ji̱ ti̱t cɔl, kä cua kɛ thiec i̱, “Ɛŋu ba̱kɔ la̱t kɛ thanduk matdä ruac Kuɔth Nhial ɔ? La̱rɛ jɛ kɔ ɛŋu ba̱kɔ jäk kä gua̱thdɛ kɛ jɛ mɔ.”

³ Kä cukɛ wee i̱, “Mi jäk yɛn thanduk matdä ruac Kuɔth ji̱ I-thɛ-rɛl. /Cuarɛ jɛ jäk baaŋ, ja̱kɛ jɛ kɛ muc kɛ kui̱ dui̱rä. Inɔ bia cu ŋɔ̱a̱th, kä bia cu ŋa̱c ɛŋu duääcɛ yɛ mɔ.”

⁴ Kä cukɛ wee i̱, “Ɛ muc kɛ kui̱ dui̱rä mi tëë di ba̱kɔ luɔc jɔk kɛ jɛ mɔ?” Kä cukɛ jɛ loc i̱, “Bia dhok da̱ŋ dhieec la̱t kɛ da̱a̱p kɛ kuɔ̱ɔ̱n dääpä da̱ŋ dhieec. Ce̱tkɛ pek kua̱ri ji̱ Pi-li-thɛt. Kɛ ɣöö juey tëë kɛ yɛn diaal amäni kua̱rkun.

⁵ Inɔ bia dhokun la̱t kɛnɛ kuɔ̱ɔ̱nkun tëë da̱kɛ wec. Kä ka̱mɛ liak Kuoth I-thɛ-rɛl. Dɔ̱ŋ bɛ duäcdɛ jak kä kuiy kɛ yɛ kɛ kuthkun amäni wecdun.

⁶ Ɛŋu jakɛ lo̱ckun kä bum ɔ ce̱tkɛ ji̱ I-jëp kɛ Pɛro tëë ci lo̱ckiɛn jak kä bum? Kä mëë cɛ kɛ ciɛŋ ɛ bɛc, /ken kɛ naath jak kä wä, a bikɛ jiɛn?

⁷ Täämɛ rialɛ thurbiɛɛlikä kɛnɛ ɣɔ̱k da̱ŋ rɛw ti la̱a̱r ti /ka̱n me̱t moc gök, yianɛ ɣɔ̱k thurbiɛɛl, kä wuɔcɛ dɛykiɛn, naŋɛ kɛ cieŋ.

⁸ Kä ka̱nɛ thanduk matdä ruac Kuɔth Nhial kä la̱thɛ jɛ rɛy thurbiɛɛl, kä la̱thɛ thanduk in dɔ̱diɛn gekädɛ min te da̱a̱p thi̱n, min luɔcɛ jɛ jɔk ala muc kɛ kui̱ dui̱rä. Kua jak kä wä, kä jakɛ jɛ kä wä kä rɔaadɛ.

⁹ Kä guɛcɛ jɛ. Mi wee wec wä ɛ lotdɛ ni duɔ̱ɔ̱p wecdɛ ni Beth-cɛ-mɛc, ɛ jɛn ɛ nin lät kɔn kä riɛk ɛ di̱i̱t ɛ mi ɔ. Kä mi wee rɔ ca̱k duɔ̱ɔ̱p mi dɔ̱ŋ, banɛ jɛ cu ŋa̱c ɛn ɣöö /ciɛ jɛn ɛn ni̱n duääc kɔn, ɛ mi ci ben ni jɛn kä kɔn.”

¹⁰ Kä cukɛ la̱t ni min ca la̱r kɛ. Cukɛ ɣɔ̱k da̱ŋ rɛw ti la̱a̱r ka̱n kä cua kɛ yian thurbiɛɛl, kä cua dɛykiɛn ga̱k luaak.

¹¹ Kä cukɛ thanduk matdä ruac Kuɔth Nhial la̱th rɛy thurbiɛɛl, kɛ thanduk in te kuɔ̱ɔ̱n dääpä thi̱n kɛnɛ dhokiɛn.

¹² Kä cu ɣɔ̱k cuŋ ni duɔ̱ɔ̱pdiɛn wäkɛ kä Beth-cɛ-mɛc. Mi̱ethnikɛn min wäkɛ. Cukɛ cuŋ ni duɔ̱ɔ̱p /ka̱n rɔ gɔ̱a̱ŋ gekä, kä cu kua̱r ji̱ Pi-li-thɛt kɛ guɔ̱ɔ̱r mäni ke̱y Beth-cɛ-mɛc.

¹³ Kä ji̱ Beth-cɛ-mɛc ŋɛ̈rkɛ bɛlkiɛn rɛy lo̱o̱lä. Mëë cikɛ wuɔ̱thkiɛn kap nhial cukɛ thanduk matdä ruac nɛn, cu lo̱ckiɛn tɛɛth kɛ nëndɛ.

¹⁴ Kä cu thurbil ben rɛy kakä Jɔ-cua kä Beth-cɛ-mɛc, cuɛ cuɔ̱ŋ thi̱n, gekä pa̱a̱m mi di̱i̱t. Kä cu naath jiath woc kä thurbil kä cua ɣɔ̱k thöp ala muc mi waŋkɛ Kuoth Nhial.

¹⁵ Kä cu ji̱ Lii-bay thanduk matdä ruac Kuɔth Nhial kɛnɛ thanduk in te da̱a̱p thi̱n ka̱p piny, kä cuakɛ la̱th wi̱i̱ pa̱a̱m in di̱i̱t. Kä cu ji̱ Beth-cɛ-mɛc muc ti waŋkɛ kɛnɛ luuri thöp Kuoth Nhial ɛn cäŋ ëë.

¹⁶ Kä mëë ci kua̱r ji̱ Pi-li-thɛt tɔ̱ diaal tɔ̱tɔ̱ nɛn, cukɛ rɔ riet kä Ɛk-ron ɛn cäŋ ɛmɔ.

¹⁷ Kä cu tɔ̱tɔ̱ a kɛn pua̱ny dääpä tëë ca täth, kä ca thöp ɛ ji̱ Pi-li-thɛt ala muc Kuoth Nhial kɛ kui̱ dui̱rä. Cu kɛl a duŋ Ac-dod, kä min dɔ̱ŋ ɛ duŋ Gadha, kä diɔ̱kdiɛn cua duŋ Ac-kɛ-lon, kä cu min dɔ̱ŋ a duŋ Gɛ̈th, kä cu dhieecdiɛn a duŋ Ɛk-ron.

¹⁸ Kä cu pua̱ny dääpä da̱ŋ dhieec tin ca la̱t ce̱tkɛ kuɔ̱ɔ̱n pa̱a̱r nikɛ pëk wi̱i̱ni ji̱ Pi-li-thɛt diaal nikɛ kua̱rkiɛn da̱ŋ dhieec, kɛn wi̱i̱ diaal tin ca ta̱th pa̱nyni kɛnɛ tin /ka̱n ta̱th pa̱nyni. Kä cu pääm tin di̱t tëë ca la̱th gekä thandukä a nëën mäni walɛ rɛy kakä Jɔ-cua, min te kä Beth-cɛ-mɛc.

¹⁹ A /Ca jɛ ŋäc a gɔaa kä Ɣi-bɛ-ru, kä ɛ jɛn i̱ nɛy ti bathdɔɔri ti jiɛn dhieec. Kä cu Kuoth Nhial naath näk kä Beth-cɛ-mɛc, kɛ ɣöö ca thanduk matdä ruac Kuɔth Nhial gui̱l. Cuɛ nɛy ti jiɛɛn bärɔw näk kä kɛ, kä cu naath pa̱r kɛ ɣöö cɛ nɛy ti ŋuan näk.

²⁰ Kä cu ji̱ Beth-cɛ-mɛc wee i̱, “Kä ɛŋa mi bi cuɔ̱ŋ nhiam Kuɔth Nhial, ɛn Kuoth ɛ rɛl gɔɔydɛ rɔ mi? Kä ɛŋa bi jɛ wä woc ɔ kɛ kui̱dan?”

²¹ Kä cukɛ naath jäk kä ji̱ Kir-yath-ya-rim wäkɛ i̱, “Ci ji̱ Pi-li-thɛt thanduk matdä ruac Kuɔth Nhial luɔ̱ɔ̱c jɔk. Bia naŋɛ jɛ.”