1 Tham 5 - RUAC KUƆTH IN RƐL RƆ

Thanduk matdä ruaacni rɛy ji̱ Pi-li-thɛt

¹ Mëë ci ji̱ Pi-li-thɛt thanduk matdä ruac kuɔth käp, cukɛ jɛ kap kä Ɛ-bɛn-e-dhɛr naŋ jɛ kä Ac-dod.

² Kä cu ji̱ Pi-li-thɛt thanduk matdä ruac Kuɔth ka̱n, kä cua naŋ ni duëël kuɔth Da-gon. Cua jɛ ben la̱th gekädɛ.

³ Mëë ci ji̱ Ac-dod rɔ jiɛc mëë ruɔ̱ndɛ kɛ runwaŋ, nɛnɛ jɛ, Da-gon cɛ tɛɛth cɛ nhiamdɛ yiath piny nhiam thandukä matdä ruac Kuɔth Nhial. Cukɛ Da-gon ka̱n kä cua luɔc gua̱a̱thdɛ.

⁴ Mëë cikɛ rɔ jiɛc mëë ruɔ̱ndɛ kɛ runwaŋ, cukɛ Da-gon nɛnɛ, cɛ tɛɛth kɛ nhiamdɛ piny nhiam thandukä matdä ruac Kuɔth Nhial, kä wi̱c Da-gon kɛnɛ te̱tkɛ da̱ŋ rɛw cikɛ töl puɔ̱ɔ̱nydɛ tekɛ piny rɛy döör. Cu duɔth ni puɔ̱nydɛ.

⁵ Ɛ jɛn /ci bööth Da-gon kɛnɛ nɛy tëë ci coth duëël Da-gon kä Ac-dod jäl do̱o̱r Da-gon mäni walɛ.

⁶ Kä cu tet Kuɔth Nhial thiak ɛlɔ̱ŋ kɛ ji̱ Ac-dod, kä cuɛ kɛ jak kä dual, kä cuɛ kɛ duäc kɛ muɔ̱c ji̱ Ac-dod kɛ dhok.

⁷ Kä mëë ci ji̱ Ac-dod ɛ nɛn i̱ te ŋɔak inɔ, cukɛ wee i̱, “/Ci thanduk matdä ruac Kuɔth ji̱ I-thɛ-rɛl bi duɔth kɛ kɔ. Kɛ ɣöö tet Kuɔth cɛ thiak ɛlɔ̱ŋ kɛ kɔ kɛ Da-gon kuothda.”

⁸ Inɔ cukɛ naath ja̱k kä cua Kua̱r ji̱ Pi-li-thɛt diaal mat guäth kɛl, kä cukɛ wee i̱, “Ɛŋu mi ba̱kɔ lät kä thanduk matdä ruac Kuɔth ji̱ I-thɛ-rɛl?” Kä cu kua̱r kɛ loc i̱, “A thanduk matdä ruac Kuɔth ji̱ I-thɛ-rɛl nööŋkɛ kä Gɛ̈th.” Cua thanduk matdä ruac Kuɔth ji̱ I-thɛ-rɛl naŋ ɛn wi̱ni.

⁹ Kä kɛ kɔr kä min ci kɛn ɛ nööŋ, cu Kuoth Nhial wec duäc, kɛ muɔ̱cdiɛn riɛk mi di̱i̱t. Cuɛ ji̱ wec moc kɛ dhok, nɛy ti di̱t amäni gaat, cuɛ kɛ moc kɛ dhok.

¹⁰ Inɔ cukɛ thanduk matdä ruac Kuɔth jäk kä Ɛk-ron, kä cu ji̱ Ɛk-ron wiee i̱, “Cikɛ kɔn nöŋ thanduk matdä ruac Kuɔth ji̱ I-thɛ-rɛl kɛ ɣöö bɛ kɔn ben näk mäni nɛɛkɔn.”

¹¹ Kɛ kui̱ ɛmɔ cukɛ kua̱r ji̱ Pi-li-thɛt diaal cɔl guäth kɛl, kä cukɛ wee i̱, “Wuɔcɛ thanduk matdä ruac Kuɔth ji̱ I-thɛ-rɛl, luɔcɛ jɛ guäthdɛ, kɛ ɣöö /cɛ nɛy bi lɛ näk kɛ nɛɛkɔ kɛɛl.” Kɛ ɣöö näk juey naath rɛy wec kɛɛliw. Ci tet Kuɔth thiak thi̱n ɛlɔ̱ŋ.

¹² Cu nɛy tin /Ken li̱w tekɛ dhok ti di̱t, cu wiee wec pal ni pua̱a̱r