1 Tham 4 - RUAC KUƆTH IN RƐL RƆ

Käp thandukä matdä ruaacni

¹ Täämɛ cu ji̱ I-thɛ-rɛl wä nyiëëny kɛ ji̱ Pi-li-thɛt. Cukɛ wä pua̱t kä Ɛ-bɛn-e-dhɛr, kä cu ji̱ Pi-li-thɛt pua̱t kä Ä-pek.

² Cu ji̱ Pi-li-thɛt tuɔ̱ŋ kuany, kä mëë ci ko̱r röm, cu ji̱ Pi-li-thɛt ji̱ I-thɛ-rɛl joc, kä cukɛ ji̱ I-thɛ-rɛl näk nɛy ti bathdɔɔri ŋuaan ko̱o̱r.

³ Kä mëë ci ji̱ ko̱o̱r ben wi̱c, cu bööth I-thɛ-rɛl wee i̱, “Ɛŋu ci Kuoth Nhial kɔn lɛ jak kä juɔckɛ mɔ ɛ ji̱ Pi-li-thɛt ɛn walɛ? Wanɛ Thanduk matdä ruaacni Kuɔth Nhial nööŋ wa̱nɛ mi kä Cilo, kɛ ɣöö bɛ kɔn ben gaŋ kɛ gua̱n tɛ̈ran.”

⁴ Cua naath jäk kä Cilo, kä cua thanduk matdä ruac Kuɔth Nhial in di̱t ni jɛn nööŋ, min te kɔaam kuäärä kam pua̱nyni tin ce̱tkɛ pua̱ny Ja̱a̱kni. Kä te gaat Eli da̱ŋ rɛw Ɣɔp-ni kɛnɛ Pi-nɛ-ɣath kɛɛl kɛ thanduk matdä ruaacni Kuɔth.

⁵ Kä mëë ci thanduk matdä ruaacni Kuɔth Nhial cop rɛy wec, cu ji̱ I-thɛ-rɛl diaal rɔal ɛlɔ̱ŋ ɛ bɛ piny lath.

⁶ Kä mëë ci ji̱ Pi-li-thɛt rɔal liŋ, cukɛ wee i̱, “Ɛ rɔal ŋukä ɛ nɔ di̱i̱t ɛ te rɛy wec ji̱ Ɣi-bɛ-ru ɔ?” Kä mëë cikɛ jɛ ŋa̱c i̱ Ɛ thanduk matdä ruaacni Kuɔth Nhial ci cop rɛy wec ɔ,

⁷ Cu ji̱ Pi-li-thɛt dual. Kɛ ɣöö laar kɛn ɛ i̱, “Ɛ Kuoth ci ben wi̱c ɔ.” Kä Cukɛ wee i̱, “Riɛk akɛ kɔn, kɛ ɣöö thilɛ mi ce̱tkɛ nɛmɛ mi ci kɔn tuɔɔk.

⁸ Riɛk akɛ kɔn! Ɛŋu bi kɔn luäk ɔ kä buɔ̱m kuthni ti̱ti̱? Kɛ kɛn kuth tëë na̱kɛ ji̱ I-jëp kɛ jua̱th däär dɔaar.

⁹ Buɔ̱mɛ rɔ, kä tɛ̈rɛ ko̱r ce̱tkɛ wutni lö ji̱ Pi-li-thɛt, kiɛ banɛ la ja̱a̱ŋ kä ji̱ Ɣi-bɛ-ru, ce̱tkɛ mëë kɛ ja̱a̱ŋ kɔn. Tɛ̈rɛ ko̱r ce̱tkɛ wutni.”

¹⁰ Inɔ cu ji̱ Pi-li-thɛt ko̱r tɛr, kä cua ji̱ I-thɛ-rɛl joc, kä cukɛ rɔ bar, bar ramɔ rɔ ni cieeŋdɛ. Cuɛ tekɛ lia̱a̱ mi di̱i̱t, cua ji̱ I-thɛ-rɛl näk nɛy ti bathdɔɔri ti jiɛɛn diɔ̱k.

¹¹ Kä cua thanduk matdä ruaacni Kuɔth käp, kä cua gaat Eli da̱ŋ rɛw Ɣɔp-ni kɛnɛ Pi-nɛ-ɣath näk.

Lia̱a̱ Eli

¹² Cu raan ji̱ Ben-ya-min riŋ ni guäth ko̱o̱r, cuɛ ben ni kä Cilo kɛ cäŋ ɛ kɛlɔ, ci bieynikɛ rɛ̈t kä te wi̱cdɛ kɛ tur.

¹³ Mëë cɛ cop, Eli tëë nyuurä kɛ kɔmdɛ gekä duɔ̱p guicɛ, kɛ ɣöö ci lɔcdɛ ti̱r kɛ kui̱ thandukä matdä ruaacni Kuɔth. Kä min ci wut ɛ mɔ ben rɛy wec latdɛ thok, cu wec kɛɛliw wiee.

¹⁴ Kä mëë ci Eli wiee liŋ, cuɛ wee i̱, “Ɛ rɔal ŋu kä ɛ nɛ?” Ɛ jɛn cu wut ben kä Eli cuɛ jɛ ben la̱r thok.

¹⁵ Kä Eli tëë run ti jiɛɛn bäŋuan wi̱cdɛ bädäk di̱eeth, kä cɛ cɔr.

¹⁶ Kä cu wut Eli jiök i̱, “Ɛ jɛn ɣän ram in bä gua̱a̱th ko̱o̱r. Ɣän barä rɔ ko̱o̱r ɛn walɛ.” Kä cu Eli wee i̱, “Kuɛ lɛ tëë di, gatdä?”

¹⁷ Kä cu wut wee i̱, “Ci ji̱ I-thɛ-rɛl rɔ bar nhiam ji̱ Pi-li-thɛt, kä ca naath näk kɛ näk mi di̱i̱t. Gaatku da̱ŋ rɛw Ɣɔp-ni kɛnɛ Pi-nɛ-ɣath cikɛ li̱w, kä ca thanduk matdä ruaacni Kuɔth käp.”

¹⁸ Kä mëë cɛ thanduk matdä ruaacni Kuɔth kɛk, cu Eli tɛth jɔk kä kɔmdɛ min nyuurɛ thi̱n gekä thiek. Cu ŋuäkdɛ tööl, kä cuɛ li̱w, kɛ ɣöö ca wut mi dɔaaŋ, kä thiɛkɛ. Cɛ I-thɛ-rɛl ruac kɛ run ti jiɛɛn ŋuaan.

Lia̱a̱ ciek Pi-nɛ-ɣath

¹⁹ Täämɛ ciek gatdɛ ni Pi-nɛ-ɣath, ruëtdɛ kä cɛ thia̱k kɛ dap. Mëë cɛ thok liŋ i̱ ca thanduk matdä ruaacni Kuɔth käp, kä ci gua̱nthudɛ kɛnɛ cɔwdɛ li̱w, cuɛ rɔ ka̱m mua̱a̱l kɛ dap. Kɛ ɣöö ci mäc ɛ käp.

²⁰ Kä min liwɛ cu ciek in gam jɛ, jɛ jiök i̱, “Cu dual, ci dap kɛ dhɔl.” Duundɛ ɣöö /kenɛ jɛ loc.

²¹ Kä cuɛ gat cɔli I-ka-bod wee i̱, “Ci gɔɔy jiɛɛn kä I-thɛ-rɛl!” Kɛ ɣöö ca thanduk matdä ruaacni Kuɔth käp, kɛnɛ kui̱ gua̱nthudɛ kɛnɛ cɔwdɛ.

²² Kä cuɛ wee i̱, “Ci gɔɔy jiɛɛn kä I-thɛ-rɛl, kɛ ɣöö ca thanduk matdä ruaacni Kuɔth käp.”