1 Tham 31 - RUAC KUƆTH IN RƐL RƆ

Lia̱a̱ Thɔɔl kɛnɛ gaatkɛ

¹ Täämɛ cu ji̱ Pi-li-thɛt nyiëëny kɛ ji̱ I-thɛ-rɛl. Kä cua ji̱ I-thɛ-rɛl joc, kä cua kɛ näk ɛlɔ̱ŋ pääm Gil-bwä.

² Kä cu ji̱ Pi-li-thɛt Thɔɔl cop kɛnɛ gaatkɛ. Kä cukɛ Jo-na-than, kɛnɛ Ä-bi-na-dab, kɛ Mal-ki-cuwa, gaat Thɔɔl näk.

³ Kä ko̱r cuɛ bɛ̈c ɛlɔ̱ŋ kä Thɔɔl, kä cua jɛ moc buɔ̱t mi di̱i̱t kɛ bäär.

⁴ Kä cuɛ ro̱o̱m muɔ̱tdɛ jiöök i̱, “Käni mutdu, kä näk ɣä kɛ jɛ, kɛ ɣöö ci nɛy ti /ka̱n cuɛl thil Kuoth, ti ɣä bi ben yaak ɛ kɛn, ɛ ba̱a̱ lɛ kuëth.” Duundɛ ɣöö /ken ro̱o̱m muɔ̱tdɛ jɛ la̱t. Kɛ ɣöö cɛ dual ɛlɔ̱ŋ. Kɛ kui̱c ɛ mɔ cu Thɔɔl mutdɛ ka̱n kä cuɛ rɔ pi̱em thi̱n.

⁵ Kä mëë ci ro̱o̱m muɔ̱tdɛ jɛ nɛn i̱ ci Thɔɔl li̱w, cuɛ rɔ pi̱em kä muɔ̱tdɛ bä, kä cuɛ li̱w kɛɛl kɛ jɛ.

⁶ Inɔ cu Thɔɔl li̱w, kɛnɛ gaatkɛ da̱ŋ diɔ̱k, kɛ ro̱o̱m muɔ̱tdɛ, amäni nɛɛkɛ diaal, cukɛ li̱w kɛɛl ɛn cäŋ ɛmɔ.

⁷ Kä mëë ci ji̱ I-thɛ-rɛl tin te kui̱ lo̱o̱lä kɛnɛ tin te kui̱ yiëër Jɔr-dɛn ɛ nɛn i̱ ɛn ɣöö ci ji̱ I-thɛ-rɛl rɔ bar kä ca Thɔɔl kɛnɛ gaatkɛ näk, cukɛ wi̱i̱kiɛn päl, cukɛ rɔ bar. Kä cu ji̱ Pi-li-thɛt ben cieŋ thi̱n.

⁸ Kä mëë ruɔ̱ndɛ, mëë ci ji̱ Pi-li-thɛt ben ba nɛy tin ci li̱w ben guic, cu kɛ Thɔɔl kɛnɛ gaatkɛ da̱ŋ diɔ̱k jek cikɛ li̱w pääm Gil-bwä.

⁹ Kä cukɛ wi̱cdɛ ŋok, kä cua giw giwdɛ ka̱n, kä cua naath jäk kä rɛy cieŋ ji̱ Pi-li-thɛt diaal, nöŋkɛ ŋɛc thuk kuthkiɛn kɛnɛ naath.

¹⁰ Kä cu kɛ giw giwdɛ la̱th duëël kuɔth Ac-ta-roth. Kä cukɛ puɔ̱ny Thɔɔl la̱th pääny Beth-can.

¹¹ Kä mëë ci ji̱ Ya-bec-gil-yad min ca lät kä Thɔɔl ɛ ji̱ Pi-li-thɛt liŋ,

¹² cu wutni ko̱o̱r diaal ben jiɛɛn kɛ wäär, cukɛ ri̱ŋ Thɔɔl kɛnɛ ri̱ŋ gankɛ wä ka̱n pääny Beth-can kä cukɛ kɛ ben waŋ kä Ya-bec.

¹³ Kä cukɛ cɔ̱wkiɛn ben kony thaar jiaath kɔat kä Ya-bec, kä cukɛ thɛɛk kɛ ni̱n bärɔw.