1 Tham 30 - RUAC KUƆTH IN RƐL RƆ

Juc Dee-bid kɛ ji̱ Ä-ma-lek

¹ Täämɛ mëë ci Dee-bid ben kä Dhik-lag kɛnɛ nɛɛkɛ. Kɛ diɔ̱ɔ̱k ni̱ni, cu ji̱ Ä-ma-lek Nɛ-gɛb kɛnɛ Dhik-lag ma̱k. Cukɛ Dhik-lag joc kä cukɛ wec waŋ,

² Cukɛ män pɛc kɛnɛ tin diaal tin te thi̱n, kä cuɛ thil ram mi cua näk, cukɛ naŋ ni ti diaal, kä cukɛ wä dupdiɛn.

³ Kä mëë ci Dee-bid kɛnɛ nɛɛkɛ ben wi̱c, cukɛ jɛ jek a cɛ waaŋ, kä ca mänkiɛn kɛ gaatkiɛn naŋ ala pɛ̈ɛ̈c.

⁴ Cu Dee-bid kɛnɛ nɛɛkɛ wiee kɛ jɔw mi di̱i̱t. Amäni mëë cɛ ro̱lkiɛn thɔ̱t.

⁵ Kä män Dee-bid da̱ŋ rɛw cakɛ pɛc bä, Ä-ɣi-no-am kä Yidh-rɛɛl kɛnɛ Ä-bi-ga-yil ciek Na-bal ëë ci li̱w kä Kar-mɛl.

⁶ Kä cu Dee-bid riɛk ɛlɔ̱ŋ. Duundɛ ɣöö cu Dee-bid rɔ bum kɛ Kuoth Nhial Kuothdɛ.

⁷ Kä cu Dee-bid Ɛb-ya-thar bo̱o̱th palä gat Ä-ɣi-mɛ-lɛk jiök i̱ “No̱ŋ ni ɣä gaakni.” Cu Ɛb-ya-thar jɛ nöŋ gaakni.

⁸ Kä cu Dee-bid Kuoth Nhial thiec i̱, “Ɣän bä nɛy tɔ̱tɔ̱ guɔ̱ɔ̱r?” Kä cu Kuoth ɛ loc i̱, “Guuri kɛ. Bikɛ cop, kä bi nɛy tin ca pɛc luäk.”

⁹ Kä cuɛ jiɛɛn kɛnɛ nɛɛkɛ ti kur bäkɛl, kä cukɛ ben thok yiëër Bɛ-thor, cu tha̱a̱ŋdiɛn duɔth thi̱n.

¹⁰ Kä cu Dee-bid kɛ guɔ̱ɔ̱r kɛnɛ nɛy ti kur ŋuaan. Cu nɛy ti kur rɛw duɔth ti /ka̱n yier Bɛ-thor jiath kui̱c kɛ ɣöö cikɛ cuuc.

¹¹ Kä cukɛ raan I-jëp jek thok wec, kä cua jɛ nöŋ Dee-bid. Kä cukɛ jɛ moc mi̱eth mi camɛ, kɛnɛ pi̱ ti bɛ math,

¹² Kä cukɛ jɛ moc kɛ töl patdä buɔ̱ɔ̱kä kɛnɛ kar dɛɛni jiɛɛn da̱ŋ rɛw. Kä min cɛ thuɔ̱k kɛ mi̱eth cuɛ yieykɛ jek. Kɛ ɣöö /kenɛ mi̱th kä /kenɛ maath kɛ pi̱ kɛ cäŋdääri diɔ̱k kɛ wääri diɔ̱k.

¹³ Kä cu Dee-bid ɛ thiec i̱, “Ɛ ji̱n raan nikä? Kä bi nikä?” Kä cuɛ loc i̱, “Ɛ ɣän raan I-jëp, mi läät ji̱ Ä-ma-lek. Ci kuäärä ɣä ba̱ny jɔk kɛ ɣöö cɛ ɣä moc kɛ juey kɛ ni̱n diɔ̱k tëë ci wä.

¹⁴ Ca̱kɔ wec ji̱ Kɛ-rith min la duŋ Juda, kɛnɛ wec Ka-leb wä ma̱k, kä ca̱kɔ Dhik-lag cua̱th kɛ mac.”

¹⁵ Kä cu Dee-bid ɛ jiök i̱, “Deri ɣä nöŋ nɛy tɔ̱tɔ̱?” Kä cuɛ loc i̱, “Yac rɔ kɛ ciöt Kuɔth Nhial, ɛn ɣöö /ci ɣä bi näk, kä /ci ɣä bi ka̱m kuäärä kɛ ɣöö bä ji̱ ku lɛ nöŋ buɔ̱n ɛ mɔ.”

¹⁶ Kä min cɛ Dee-bid naŋ, ɛn buɔ̱n ɛmɔ cikɛ rɔ da̱k piny kɛn diaal rɛy wec. Mi̱thkɛ, kä mäthkɛ, kä ŋarkɛ, kɛ kui̱ kä tin diaal tin ca pɛc wi̱i̱ni Pi-li-thɛt kɛnɛ wec Juda.

¹⁷ Kä cu Dee-bid nyieenykɛ kɛ ni mi̱rä, cu mäni mëë ruɔ̱ndɛ kɛ thiaŋ thiaŋ. Kä cu kään ni ŋuɛ̈tni ti kur ŋuaan, ti ca rɔ bar kɛ thɔ̱a̱rɔa̱a̱li.

¹⁸ Kä cuɛ tëë diaal tëë ci ji̱ Ä-ma-lek kɛ ka̱n luɔ̱c jɔk kä cuɛ mänkɛ da̱ŋ rɛw kän bä.

¹⁹ Kä cuɛ thil mi te jɔ̱ɔ̱r, mi di̱i̱t kiɛ mi tɔt, kä kɛn tëë diaal tëë ca pɛc. Cu Dee-bid kɛn diaal nööŋ.

²⁰ Kä cuɛ ɣɔ̱k kɛnɛ det lɛni pɛc. Kä cu nɛɛkɛ kɛ cuac nhiam ɣɔ̱ɔ̱kiɛn, kä cuɛ wee i̱, “Kɛ pɛ̈ɛ̈c Dee-bid kɛn ti̱ti̱.”

²¹ Kä cu Dee-bid ben kä nɛy ti kur da̱ŋ rɛw tëë ci cuuc, kä ci duɔth thok yiëër Be-dhor. Cukɛ ben ba Dee-bid ben lor kɛnɛ nɛy tin ci wä kɛɛl kɛ jɛ. Kä min cɛ cop kutdiɛn, cuɛ kɛ ner.

²² Kä cu tha̱a̱ŋ nath ti camjiɛɛc kä nɛy tin ci wä kɛɛl kɛ Dee-bid wee i̱, “Kɛ ɣöö/ken kɛ wä kɛɛl kɛ kɔn, /canɛ kɛ bi moc kɛ pɛ̈ɛ̈c tin canɛ wä pɛc, bi ramɔ ka̱n ni ciekdɛ kɛnɛ gaatkɛ kä rɔ.”

²³ Duundɛ ɣöö cu Dee-bid wee i̱, “/Cuarɛ nɔmɔ lät, kuɛ la ŋu moc Kuoth Nhial kɔn kɛ jɛ mɔ gaatmaar. Cɛ kɔn gaŋ kä cuɛ buɔ̱n nɛɛni tin ca kɔn ma̱k ka̱m kɔn.

²⁴ Thilɛ ram mi bi mat kɛ yɛ kä min lat yɛnɛ? Kä min bia̱ kui̱c raam mi ci wä ko̱o̱r, ɛ jɛn bia̱ kui̱c raam in ci duɔth kut kuakni ɔ. Bi kɛn diaal pa̱a̱r.”

²⁵ Kä cu Dee-bid nɔmɔ la̱t ala ŋuɔ̱t kä I-thɛ-rɛl ɛn cäŋɛ mɔ mäni walɛ.

²⁶ Kä mëë ci Dee-bid ben kä Dhik-lag, cuɛ tha̱a̱ŋ kuakni tin ca Pɛc jäk kä mäthnikɛ, ni bööth Juda, wee i̱, “Nɛmɛ ɛ mucdun kä tin ca pɛc kä ji̱ tɛ̈r Kuɔth Nhial.”

²⁷ Cuɛ jäk kä nɛy tin te kä Beth-ɛl kɛnɛ ji̱ Ra-moth kä Nɛ-gɛb, kɛ Ya-tir,

²⁸ Kɛnɛ ji̱ Ä-ro-er kä Thip-moth, kɛ Ɛc-tɛ-mo-ä,

²⁹ kɛ Ra-kal, kɛnɛ wi̱i̱ Ya-ra-mɛ-ɛl, rɛy cieŋ ji̱ Kɛɛn,

³⁰ kɛnɛ ji̱ Ɣɔr-ma, kɛ ji̱ Bor-a-can, kɛ ji̱ Ä-thak,

³¹ kɛ ji̱ Ɣɛb-ron, cuɛ kɛ jäk kä gua̱thni diaal tin ci Dee-bid kɛnɛ nɛɛkɛ wä thi̱n.