1 Tham 29 - RUAC KUƆTH IN RƐL RƆ

Lo̱k ji̱ Pi-li-thɛt kɛ Dee-bid

¹ Täämɛ cu ji̱ Pi-li-thɛt rɛmdiɛn diaal mat kä Ä-pek. Kä ci ji̱ I-thɛ-rɛl pua̱t gekä waŋ Yidh-rɛɛl.

² Kä wä bööth ji̱ Pi-li-thɛt kɛ rɛmdiɛn ti bathdɔɔri kɛnɛ kur, cu Dee-bid ben kɛnɛ nɛɛkɛ kɛ rɛy rɛ̈m kua̱r ni A-kic.

³ Kä cu bööth rɛ̈m ji̱ Pi-li-thɛt wee i̱, “Ɛŋu lät ji̱ Ɣi-bɛ-ru ti̱ti̱ jɛ wa̱nɛ mi ɔ?” Kä cu A-kic ɛ loc i̱, “Latdi ni Dee-bid ɛmɔ kuany kua̱r I-thɛ-rɛl ni Thɔɔl, min ci te kɛɛl kɛ ɣä kɛ päth kɛnɛ run, ni mëë kua̱kɔ te kɛɛl thilɛ mi cɛ dui̱r mäni walɛ.”

⁴ Kä cu bööth rɛ̈m Pi-li-thɛt gaak kɛ A-kic, kä cua jɛ jiök i̱ “Jäk ni jɛ kä jɔk, guäth in ci ka̱m jɛ. /Cɛ bi wä ko̱o̱r kɛɛl kɛ kɔn, amäni mi derɛ rɔ riet kɔn rɛy ko̱o̱r. Kä derɛ lɔc kua̱rɛ jak kä tɛth kɛ näkdɛ kɛ nɛɛkun?

⁵ /Ciɛ jɛn Dee-bid ëë këtkɛ dit i̱, ‘Ci Thɔɔl nɛy ti bathdɔɔr näk, kä ci Dee-bid nɛy ti bathdɔɔri wäl näk?’ ”

⁶ Kä cu A-kic Dee-bid cɔl, kä cuɛ jɛ jiök i̱, “Nikɛ ciöt Kuɔth Nhial in tëk, ɛ ji̱n ram mi gɔaa, kä nhɔakä jɛ ɛn ɣöö dënɛ wä ko̱o̱r kɛɛl. Kɛ ɣöö thilɛ mi jiääk mi cä nɛn kä ji̱ ni mëë ku ben kä ɣä amäni walɛ. /Cɛ ku la jɛn. Ca ji̱ lo̱k ɛ kua̱r Pi-li-thɛt.

⁷ Täämɛ bi loc jɔk. Locni jɔk kɛ mal, kɛ ɣöö /ci lo̱c kua̱ri Pi-li-thɛt bi jiääk.”

⁸ Kä cu Dee-bid A-kic jiök i̱, “Ɛŋu cä la̱t ɔ? Ɛŋu mi cä dui̱r ni mëë kua̱ ben kä ji̱ cu mäni täämɛ, min deri ɣä pën wä ko̱o̱r kä ji̱ tɛ̈ru kuäärä?”

⁹ Kä Cu A-kic ɛ loc i̱, “Ce̱tdi ni kɛ jääk Kuɔth, thilɛ ji̱ bɛɛl kä ɣä. Kuɛ la ɣöö ci bööth rɛ̈m ji̱ Pi-li-thɛt wee i̱, ‘/Ci bi wä ko̱o̱r kɛɛl kɛ kɔ.’

¹⁰ Iruun nikɛ runwaŋ yɛnɛ nɛɛku tin la la̱a̱t kua̱ru tëë bä kɛɛl kɛ ji̱, bia jiɛɛn kɛ pɛ̈th ni po̱o̱tdä.”

¹¹ Cu Dee-bid jiɛɛn ni bakä kɛnɛ nɛɛkɛ, lockɛ wi̱i̱ ji̱ Pi-li-thɛt. Kä cu ji̱ Pi-li-thɛt wä kä Yidh-rɛɛl.