1 Tham 28 - RUAC KUƆTH IN RƐL RƆ

¹ Ɛn ni̱ni tɔ̱tɔ̱, cu ji̱ Pi-li-thɛt rɔ mat, kɛ ɣöö bikɛ nyiëëny kɛ I-thɛ-rɛl. Kä cu A-kic Dee-bid jiök i̱, “Ŋäc ni jɛ ɛn ɣöö ji̱n yɛnɛ nɛɛku banɛ wä ko̱o̱r.”

² Kä cu Dee-bid ɛ loc i̱, “Gɔaaɛ ɛlɔ̱ŋ, kɛ ɣöö biɛ ŋa̱c ɛn min dëë läätdu jɛ la̱t.” Kä cu A-kic wee i̱, “Gɔaaɛ ɛlɔ̱ŋ Dee-bid, ɣän bä ji̱ jak kä gääŋdä kɛ pek teekä.”

Thɔɔl kɛnɛ ti̱et

³ Täämɛ ci Tha-muɛl li̱w, kä ca jɛ par ɛ ji̱ I-thɛ-rɛl diaal, kä ca jɛ kony kä Rama, wecdɛ. Kä ci Thɔɔl ti̱t kɛnɛ ji̱ kuthni näk rɛy wec.

⁴ Cu ji̱ Pi-li-thɛt rɔ dol kä cukɛ ben pua̱t kä Cu-nem, kä cu Thɔɔl ji̱ I-thɛ-rɛl diaal dol, kä cukɛ pua̱t kä Gil-bwä.

⁵ Kä mëë ci Thɔɔl rɛm ji̱ Pi-li-thɛt nɛn, cuɛ dual a bɛ lɔcdɛ lath ɛlɔ̱ŋ.

⁶ Kä mëë cɛ Kuoth Nhial thiec, /ken Kuoth Nhial ɛ loc, a cäŋɛ la̱k kiɛ kɛ tueth guiikni, kiɛ kɛ go̱o̱k.

⁷ Kä cu Thɔɔl ji̱ kɔarɛ jiök i̱, “Go̱rɛ ɣä ciek mi ti̱et, kɛ ɣöö dëë jɛ wä thiec.” Kä cu raan kɔarɛ jɛ jiök i̱, “Tëë kɛ ti̱et mia̱a̱ kä Een-dor.”

⁸ Kä cu Thɔɔl rɔ jay, cuɛ la̱th ni bi̱i̱ mi dɔ̱ŋ kä cuɛ wä kɛɛl kɛ wutni da̱ŋ rɛw. Kä cukɛ ben kä ciek kɛ wäär. Kä cuɛ jiök i̱, “Thiec yiëë kɛ kui̱dä, kä nöŋ ni ɣä ram in bä ji̱ la̱r ciötdɛ.”

⁹ Kä cu ciek ɛ loc i̱, “Ɛ ɣän i̱ ŋäci min ci Thɔɔl ɛ lät kä ti̱t kɛnɛ ji̱ kolaaŋni, ɛn ɣöö cɛ kɛ näk rɛy wec. Ɛŋu ku ɣä lɛ dɛ̈p ɔ kɛ ɣöö ba̱a̱ näk?”

¹⁰ Kä cu Thɔɔl rɔ yac kɛ ciöt Kuɔth Nhial i̱, “Ce̱tkɛ ciöt Kuɔth Nhial in tëk, thilɛ riɛk mi bi ben kä ji̱ kɛ kui̱ kä nɛmɛ.”

¹¹ Kä cu ciek wee i̱, “Ɛŋa no̱ŋä ji̱ mɔ?” Kä cu Thɔɔl wee i̱, “No̱ŋ ni ɣä Tha-muɛl.”

¹² Kä min ci ciek Tha-muɛl nɛn, cuɛ wak kɛ jɔw mi di̱i̱t. Kä cuɛ Thɔɔl jiök i̱, “Ɛŋu kaaŋi ɣä mɔ? Kä ɛ ji̱n Thɔɔl.”

¹³ Kä cu kuäär ni Thɔɔl ɛ jiök i̱, “Cu dual. Ɛŋu ci nɛnɔ?” Kä cu ciek ɛ jiök i̱, “Cä yiëë nɛn bëë raar piny.”

¹⁴ Kä cu Thɔɔl ɛ jiök i̱, “Nɛɛni jɛ ɛ mi tëë di?” Kä cuɛ loc i̱, “Ɛ wut mi dɔaaŋ bëë mɔ. Kä cɛ rɔ rith kɛ bi̱i̱.” Kä cu Thɔɔl ɛ ŋa̱c i̱ ɛ Tha-muɛl, kä cuɛ rɔ ka̱m mua̱a̱l goŋɛ jɛ luthä.

¹⁵ Kä cu Tha-muɛl Thɔɔl jiök i̱, “Ɛŋu jutdi ɣä mɔ, kɛ no̱o̱ŋdu kɛ ɣä raar?” Kä cu Thɔɔl ɛ loc i̱, “Ta̱a̱ kɛ riɛk mi di̱i̱t. Ji̱ Pi-li-thɛt nyieenykɛ kɛ ɣä, kä ci Kuoth gaak kɛ ɣä kä /cɛ ɣä lɛn loc, kɛ thuk göökni kiɛ kɛ la̱a̱k. Kɛ kui̱c ɛmɔ cä ji̱ cɔl kɛ ɣöö bi ɣä la̱r min dëë la̱t.”

¹⁶ Kä cu Tha-muɛl wee i̱, “Kä ɛŋu ku ɣä lɛ thiec ɔ mi ŋäci jɛ ɛn ɣöö ci Kuoth Nhial ji̱ lo̱k a ca gua̱n tɛ̈ru?

¹⁷ Lät Kuoth Nhial ni ji̱ kä mëë cä la̱t ji̱. Ɛn ɣöö ci Kuoth Nhial kuäär I-thɛ-rɛl woc kä ji̱, kä cɛ jɛ ka̱m gua̱n thieekädu ni Dee-bid.

¹⁸ Kɛ ɣöö /keni jɔw Kuɔth Nhial liŋ, kä /keni ruacdɛ liŋ kɛ ɣöö /keni ji̱ Ä-ma-lek näk kɛn diaal. Kɛ kui̱c ɛmɔ ci Kuoth Nhial ji̱ lät kä nɛmɛ walɛ.

¹⁹ Inɔ bi Kuoth Nhial ji̱ I-thɛ-rɛl ka̱m ji̱ Pi-li-thɛt kɛɛl kɛ ji̱ bä. Kä iruun bia rɔ ma̱tdä yɛnɛ gaatku. Kä bɛ rɛm I-thɛ-rɛl ka̱m ji̱ Pi-li-thɛt bä.”

²⁰ Kä cu Thɔɔl riny ni rɔ ɛ cuat piny, cɛ dual kɛ ruac Tha-muɛl. Cuɛ kɔ̱a̱c ɛ they. Kɛ ɣöö thilɛ mi cɛ cam kɛ cäŋdäär kɛnɛ wäär kɛɛliw.

²¹ Kä cu ciek ben kä Thɔɔl, mëë cɛ jɛ nɛn cɛ dual ɛlɔ̱ŋ, cuɛ jɛ jiök i̱, “Nɛnɛ, ɣän cä ji̱ liŋ, a cä tëkdä thöp, kɛ ɣöö cä min ci la̱rä la̱t.

²² Kɛ kui̱c ɛmɔ täämɛ, lɛni ɣä lɛ liŋ bä. Ɛ ji̱ muɔɔcä kɛ mi̱eth mi bi cam. Kɛ ɣöö bɛ ji̱ kulɛ moc buɔ̱m mi bi luäŋ ni ja̱l.”

²³ Kä cuɛ jɛ lo̱k, wee i̱, “Ɣän cä bi mi̱th.” Kä cua jɛ com ɛ ji̱ kɔarɛ kɛɛl kɛ ciek ɛmɔ. Kä cuɛ ruacdiɛn liŋ. Kä cuɛ rɔ jiɛc piny cuɛ nyuur wi̱i̱ dhaŋä.

²⁴ Kä cu ciek kɔ̱a̱l dɔa mi ci buuth cieŋdɛ näk kɛ pɛ̈th, kä cuɛ nup ka̱n, kä cuɛ kuän mi /ka̱n läny thal kɛ jɛ.

²⁵ Kä cuɛ jɛ la̱th nhiam Thɔɔl kɛnɛ ji̱ kɔarɛ. Kä cukɛ mi̱th. Kä cukɛ jiɛɛn kɛ wäär ɛmɔ.