1 Tham 27 - RUAC KUƆTH IN RƐL RƆ

Dee-bid rɛy ji̱ Pi-li-thɛt

¹ Kä cu Dee-bid ca̱r kɛ rɛy lɔacdɛ i̱, “Bä dhil li̱w cäŋ kɛl kɛ tet Thɔɔl. Thilɛ mi bi gɔaa kɛ ɣä ɛ ni ɣöö bä rɔ lɛ̱̈ny ji̱ Pi-li-thɛt. Bi Thɔɔl go̱rä cu päl rɛy I-thɛ-rɛl, bä rɔ bar kä jɛ.”

² Cu Dee-bid jiɛɛn kɛnɛ nɛɛkɛ ti kur bäkɛl, cukɛ ben kä A-kic gat Ma-ɣok kuäär Gɛ̈th.

³ Cukɛ cieŋ kɛɛl kɛ A-kic kä Gɛ̈th, jɛn kɛnɛ nɛɛkɛ, kɛ ji̱ gɔalikiɛn, kɛ Dee-bid kɛnɛ mänkɛ da̱ŋ rɛw, Ä-ɣi-no-am kä Yidh-rɛɛl kɛnɛ Ä-bi-ga-yil kä Kar-mɛl mëë la ciek Na-bal.

⁴ Kä mëë ca la̱r Thɔɔl i̱ ci Dee-bid rɔ bar kä Gɛ̈th, /kenɛ jɛ lɛ nyɔk kɛ go̱r.

⁵ Kä cu Dee-bid A-kic jiök i̱, “Mi jekä gɔɔy kä ji̱, ɛŋu ci ɣä moc kɛ wec ɔ rɛy wi̱i̱niku mi dëë cieŋ thi̱n. Kɛ ɣöö /cä dëë cieŋ wi̱c kuäärä min ti thi̱n?”

⁶ Kä cu A-kic ɛ ka̱m Dhik-lag, kɛ kui̱c ɛmɔ ɛ jɛn cu Dhik-lag cua̱ wec kua̱r Juda mäni walɛ.

⁷ Kä cu Dee-bid cieŋ wi̱c ji̱ Pi-li-thɛt kɛ ruɔ̱n wi̱cdɛ päth ŋuaan.

⁸ Kɛ pek ɛ mɔ Dee-bid kɛnɛ nɛɛkɛ la ji̱ Gɛ-cur kɛnɛ ji̱ Gɛra kɛ ji̱ Ä-ma-lek, tëë ciaŋkɛ mun in tɛmɛ nikä Cur a räth ni kä I-jëp wa̱a̱ mäk.

⁹ Kä cu Dee-bid kɛ näk, wutni kɛnɛ män thilɛ mi cuɛ päl a tëk, kä cuɛ ɣɔ̱k, kɛ det kɛ muɔ̱li, kɛ thɔ̱a̱rɔa̱a̱li, kɛ bieyni pɛ̈c, kä cuɛ luny kä A-kic.

¹⁰ Kä mëë ci A-kic ɛ thiec i̱, “Ɛ winith ci pɛc ɛn walɛ mɔ?” Cu Dee-bid ɛ loc i̱, “Ɛ rɛy dɔaar Juda.” Kiɛ, “Ɛ wec ji̱ Yɛ-ra̱-mel.” Kiɛ, “Wec ji̱ Kɛɛn.”

¹¹ Kä cuɛ thil ram mi cuɛ päl a tëk, ciek kiɛ wut, mi dëë thok naŋ kä Gɛ̈th, a bɛ kɛ wä lat i̱, “Ci Dee-bid nɛmɛ la̱t.” Cuɛ nɔmɔ a lätdɛ kɛ pek ëë cieŋ kɛ jɛ rɛy ji̱ Pi-li-thɛt.

¹² Kä cu A-kic ɛ ŋäth ɛlɔ̱ŋ carɛ jɛ i̱, “Dee-bid ca lo̱k ɛlɔ̱ŋ ɛ nɛɛkɛ ni ji̱ I-thɛ-rɛl. Kɛ kui̱c ɛmɔ ba läätdä ni ciaŋ.”