1 Tham 25 - RUAC KUƆTH IN RƐL RƆ

Lia̱a̱ Tha-muɛl

¹ Täämɛ cu Tha-muɛl li̱w, cu ji̱ I-thɛ-rɛl rɔ dol kä cua jɛ par. Kä cua jɛ kony dhɔɔrɛ kä Rama. Kä cu Dee-bid jiɛɛn wee rɛy dɔaar kä Pa-ran.

Dee-bid kɛnɛ Ä-bi-ga-yil

² Kä tëë kɛ raan Ma-ɣon mi tekɛ ŋɔak kä Kar-mɛl. Ɛ wut mi riäŋ, tëë kɛ rɔɔm ti bathdɔɔri diɔ̱k kɛ böwni ti bathdɔɔr kɛl. Kä ŋukɛ miem deetkɛ kä Kar-mɛl.

³ Kä cɔal kɛ ciötdɛ i̱ Na-bal, kä ciöt ciekdɛ ɛ Ä-bi-ga-yil, ɛ ciek mi ŋäc ŋɔak ɛlɔ̱ŋ, kä gɔaa ɛ, kä cɔwdɛ, ɛ wut mi jiäk ciaŋdɛ, ɛ raan Ka-leb.

⁴ Kä cu Dee-bid ɛ liŋ rɛy dɔaar i̱ Na-bal ŋukɛ miem deetkɛ.

⁵ Cu Dee-bid ŋuɛ̈tni da̱ŋ wäl ja̱k, jiök ɛ kɛ i̱, “Wiaa kä Kar-mɛl kä Na-bal, wiaa la̱tdɛ jɛ malä.

⁶ Kä bia jɛ ner i̱ nɛ ‘A mal tekɛ ji̱, kä a mal te dhɔɔru, kä ɛ nyinku diaal tekɛ mal.

⁷ Ɣän cä liŋ i̱ ci miem deetku ŋuɔ̱k. Täämɛ medan yiëën deetku tekɛ kɛɛl kɛ nɛy, kä thilɛ mi jiääk mi ca̱kɔ lät kä kɛ, kä thilɛ mi ci bath kä kɛ, mëë te nɛy kɛɛl kɛ kä Kar-mɛl.

⁸ Thiec nɛɛku ba la̱r ji̱. Kɛ kui̱c ɛmɔ ɛ ŋuɛ̈tni kä jëkɛ gɔɔy kä ji̱. Kɛ ɣöö ci cäŋ ŋarä thia̱k. Mal ja̱a̱ŋku moc kɛ mɔ te thi̱n ɔ amäni gatdu ni Dee-bid.’ ”

⁹ Kä mëë ci ŋuɛ̈tni Dee-bid cop. Cukɛ ti diaal la̱t Na-bal kɛ ciöt Dee-bid. Kä cukɛ liep.

¹⁰ Kä cu Na-bal kɛ loc i̱, “Ɛŋa ɛn Dee-bid? Ɛŋa ɛn gat Jɛthi? Ɛn ni̱ni ti̱ti̱ tëëkɛ ja̱a̱ŋ ti ŋuan ti ci jiɛɛn kä kua̱rkiɛn.

¹¹ A dëë mi̱ethdä, kɛnɛ pi̱i̱kä, kɛ ri̱ŋdä min cä näk kɛ kui̱ ŋukni mieem deetkä, ben ka̱m nɛy ti kuecä gua̱a̱th ɛ bäkɛ thi̱n ɔ?”

¹² Cu ŋuɛ̈tni Dee-bid rɔ ri̱t cukɛ loc kä Dee-bid, kä cua jɛ la̱t ti diaal ti̱ti̱.

¹³ Kä cuɛ nɛɛkɛ jiök i̱, “Ɛ ramɔ kän thɛpdɛ!” Kä cu ramɔ thɛpdɛ ka̱n, amäni Dee-bid cuɛ thɛpdɛ ka̱n. Kä cu nɛy ti kur ŋuaan wä kɔɔr Dee-bid, kä cu nɛy ti kur rɛw duɔth kut kuakni.

¹⁴ Kä cu ŋuɛ̈t kɛl Ä-bi-ga-yil ciek Na-bal jiök i̱, “Nɛnɛ ci Dee-bid naath ja̱k ni rɛy dɔaar, ba kuääran ben lät kä malɛ. Kä cɛ Kuëth nikɛ ɛlɔ̱ŋ.

¹⁵ Kä kɛn nɛy tɔ̱tɔ̱ gɔwkɛ kɛ nɛy mëëdan, /ka̱n nɛy ciɛŋ ɛ jiäk, kä thilɛ mi ci bath kä nɛy mëë ta̱kɔ rɛy ka̱a̱ni, mëë ja̱l kɔ kɛɛl kɛ kɛ.

¹⁶ Kɛ wäär kɛnɛ cäŋ däär la gaŋ kɛ nɛy, mëë yien nɛy detkɔ.

¹⁷ Kɛ kui̱c ɛ mɔ ŋäcni min bi la̱t. Kɛ ɣöö mi jiääk a bi ben ni kä kuääran, kɛnɛ ji̱ dhɔaarɛ diaal, kä jɛn ɛ ram mi jiäk ciaŋdɛ thilɛ ram mi dëë ruac kɛ jɛ.”

¹⁸ Ɛ jɛn cu Ä-bi-ga-yil pɛ̈th, cuɛ jurayni ti kur rɛw ka̱n, kɛ ɣöök kɔaaŋni da̱ŋ rɛw, kɛ rɔɔm dhieec ti ca bul, kɛ took kuan da̱ŋ dhieec, kɛ kar dɛɛni jiɛɛn ti kuɔr, kɛ pat patni ŋɔa̱a̱p ti kur rɛw, kä cuɛ kɛ la̱th jio̱kni muɔ̱li.

¹⁹ Kä cuɛ ŋuɛ̈t in daan jiök i̱, “Wër nhiamdä. Kä bä ji̱ lɔ̱ɔ̱ guɔ̱ɔ̱r.” Kä /kenɛ cɔwdɛ ni Na-bal la̱r lär.

²⁰ Kä niɛ min cɛ muulɛ kɔt, wee jɔk pa̱a̱m, ɛn wa̱nɔ Dee-bid kɛnɛ nɛɛkɛ bäkɛ nhiamdɛ. Kä cuɛ röm kɛ kɛ.

²¹ Kä cu Dee-bid wee i̱, “Ɛ puc dëë guecdä a baŋ kɛ nyin nɛɛni ti̱ti̱ diaal rɛy dɔaar, kä thilɛ mi ci bath kä nyinkiɛn diaal. Kä cɛ mi gɔaadä loc kɛ mi jiääk.

²² Dëë Kuoth ɣä näk, mi tëë kɛ ram kɛl kä nɛɛkɛ mi dëë päl a tëk iruun kɛ runwaŋ.”

²³ Mëë ci Ä-bi-ga-yil Dee-bid nɛn, cuɛ pɛ̈th kä cuɛ ben piny jɔk muɔ̱l, kä cuɛ rɔ goŋ nhiam Dee-bid kɛ luth.

²⁴ Cuɛ rɔ yuɔr ciöknikɛ wee i̱, “Ala duerä ɣän kä rɔa kuäärä, kä liŋ ruacdä, a ruacä kɛ ji̱.

²⁵ Cu ruac Na-bal ɛ jiäk ciaŋdɛ mɔ liŋ. Kɛ ɣöö ce̱tdɛ nikɛ ciötdɛ, cɔal ciötdɛ dɔ̱a̱r, kä ɛ dɔ̱a̱r. Kä ɣän /ka̱n nɛɛku tin ci ja̱k nɛn.

²⁶ Kä täämɛ ɛ Kuoth Nhial gaŋ ji̱ mɔ kä näk nath kɛnɛ ɣöö bi rɔ col kɛ tëtdu, kä ɣän yacä rɔ kuäärä kɛ ciöt Kuɔth Nhial in tëk, ɛn ɣöö bi ji̱ tɛ̈ru kɛnɛ tin görkɛ ɣöö ba kuäärä lät kä mi jiääk ce̱tnikɛ Na-bal.

²⁷ Kä ɛ muc ɛ ci läätdu jɛ nöŋ kuäärɛ mi, ka̱m kɛ nɛɛ kua̱rä.

²⁸ La̱ŋä ni ji̱ päli ja̱ŋdu ikä. Kɛ ɣöö bi Kuoth Nhial ji̱ jak kä kuäär, kɛ ɣöö tɛɛri ko̱rɛ. Kä thilɛ mi jiääk mi ba jek kä ji̱ ni̱ni teekädu.

²⁹ Kä mi tëë kɛ nɛy ti görkɛ tëkdu, bi tëkdu te rɛy yieenä teekä min gaŋkɛ ɛ Kuoth Nhial Kuothdu. Kä tëk ji̱ tɛ̈ru ba jɛ yuɔr ce̱tkɛ min la bäär ɛ yuɔrkɛ.

³⁰ Kä mi wä Kuoth Nhial kuäärä wä lät kä gɔy diaal ce̱tkɛ mëë cɛ lar kɛ kui̱du, kä cɛ ji̱ jak kä kuäär I-thɛ-rɛl,

³¹ /Ci kuäärä lɔcdɛ bi jiath, a bɛ lɛ tim, kɛ ɣöö cɛ raan na̱k baŋ, kɛnɛ ɣöö cɛ rɔ col. Kä mi wä Kuoth Nhial lät agɔaa kɛ kuäärä, tim läätdu.”

³² Kä cu Dee-bid Ä-bi-ga-yil jiök i̱, “A puɔ̱th tekɛ Kuoth Nhial, Kuoth I-thɛ-rɛl, min jäk ji̱ ɛn walɛ a bi röm kɛ ɣä!

³³ Puɔ̱th akɛ ca̱ru mi gɔaa, kä puɔ̱th akɛ ji̱, ji̱n min ci ɣä gaŋ duerä na̱k nath, kɛnɛ cutdä kɛ rɔ kɛ tëtdä!

³⁴ Ɛ puc nikɛ ciöt Kuɔth Nhial Kuoth I-thɛ-rɛl in tëk, min ci ɣä gaŋ näkdun, kä ci ji̱ jak kä pɛ̈th a ci röm kɛ ɣä, kɛ thuɔ̱k iruun kɛ runwaŋ thilɛ nɛy ti ŋuan ti dëë duɔth a tëk kä nɛɛ Na-bal a cäŋɛ ram kɛl.”

³⁵ Kä cu Dee-bid tin ca nöŋ jɛ käp tetädɛ. Kä cuɛ jɛ jiök i̱ “Wër dhɔru nikɛ mal. Ɣän cä ruacdu liŋ, bä min go̱o̱ri la̱t.”

³⁶ Kä cu Ä-bi-ga-yil ben kä Na-bal. Min ci mi̱eth la̱t cieŋ ce̱tnikɛ kuäär. Kä tɛth lɔcdɛ, kɛ ɣöö cɛ yɔ̱ŋ kɛ kɔaŋ. Kä /ken Ä-bi-ga-yil ɛ la̱r duɔ̱ɔ̱r amäni runwaŋ.

³⁷ Kä kɛ runwaŋ, min ci yɔ̱ŋdɛ thuɔ̱k, cu ciekdɛ jɛ la̱t ti̱ti̱, kä cu lɔcdɛ kööt rɛydɛ, a bɛ ce̱tnikɛ päm.

³⁸ Kɛ kɔr ni̱ni da̱ŋ wäl, cu Kuoth Nhial Na-bal näk.

³⁹ Kä mëë ci Dee-bid ɛ liŋ i̱ ci Na-bal li̱w, cuɛ wee i̱, “Puɔ̱th akɛ Kuoth Nhial in ci Kuëthdä min cä jek kä Na-bal col, kä cɛ ja̱ŋdɛ gaŋ kä mi jiääk. Ci Kuoth Nhial jiäk Na-bal luɔc ni wi̱i̱dɛ.” Kä cu Dee-bid Ä-bi-ga-yil jäk kä riet, thiecɛ jɛ kɛ ɣöö derɛ jɛ kuɛn ala ciekdɛ.

⁴⁰ Kä mëë ci la̱a̱t Dee-bid ben kä Ä-bi-ga-yil kä Kar-mɛl, cua jɛ jiök i̱, “Ci Dee-bid nɛy ja̱k, ba̱kɔ ji̱ ben naŋ ala ciekdɛ.”

⁴¹ Cuɛ rɔ jiɛc kä cuɛ rɔ goŋ, kä cuɛ wee i̱, “Ɛ ɣän läät mi bi lak ni ciök la̱a̱tni kua̱rä.”

⁴² Kä cu Ä-bi-ga-yil rɔ jiɛc kɛ pɛ̈th kä cuɛ muulɛ kɔt, kä cu nyier läätädɛ da̱ŋ dhieec ben kɛɛl kɛ jɛ. Cuɛ ja̱a̱k Dee-bid guɔ̱ɔ̱r, kä cua ciekdɛ

⁴³ Kä cu Dee-bid Ä-ɣi-no-am kä Yidh-rɛɛl kuɛn bä. Cu kɛn da̱ŋ rɛw a mänkɛ.

⁴⁴ Kä cu Thɔɔl nyaadɛ ni Mi-kal ciek Dee-bid ka̱m Pɛ̈l-ti gat Lɛ̈-yic min te kä Gɛ̈-lim ala ciekdɛ.