1 Tham 24 - RUAC KUƆTH IN RƐL RƆ

Päl Dee-bid kɛ näk Thɔɔl

¹ Mëë ci Thɔɔl luny jɔk kɔɔr ji̱ Pi-li-thɛt, cua jiök i̱, “Dee-bid a rɛy dɔaar Een-gɛ-di.”

² Cu Thɔɔl wutni ti bathdɔɔri diɔ̱k ti ca kuany rɛy ji̱ I-thɛ-rɛl diaal ka̱n, kä cuɛ wä, wëë Dee-bid go̱r kɛnɛ nɛɛkɛ nhiam Pa̱a̱m Rɔam Dɔaar.

³ Kä cuɛ ben kɔ̱kä mi thieek kɛ duɔ̱ɔ̱p rɛ̈ɛ̈k deet. Cu Thɔɔl wä thi̱n, wee rɔ luäk. Kä te Dee-bid kɛnɛ nɛɛkɛ rɛy kɔ̱kä ni rɛc ɛ mi.

⁴ Kä cu nɛɛ Dee-bid, Dee-bid jiök i̱, “Ɛ jɛn cäŋ ëë ci Kuoth Nhial ɛ la̱r ji̱ i̱, ‘Bä ji̱ ka̱m gua̱n tɛ̈ru, kä bi jɛ lät kä mɔ guici gɔaa waaŋdu mɔ.’ ” Kä cu Dee-bid rɔ jiɛc a määth kä cuɛ thok biey Thɔɔl tɛm.

⁵ Kɛ kɔrɛ cu lɔc Dee-bid kaac, kɛ ɣöö cɛ thok biey Thɔɔl tɛm.

⁶ Kä cuɛ nɛɛkɛ jiök i̱, “Lo̱k Kuoth Nhialɛ, ɛn ɣöö dëë nɛmɛ lät kä kuäärä, min ci Kuoth Nhial ɛ kuany, ɛn ɣöö dëë jɛ näk, kä ca kuany ɛ Kuoth Nhial.”

⁷ Kɛn rieet ti̱ti̱ cu Dee-bid nɛɛkɛ luek, /kenɛ kɛ nhök ɣöö ba Thɔɔl ma̱k. Kä cu Thɔɔl wä raar rɛy kɔ̱kä, kä cuɛ wä dupdɛ.

⁸ Kɛ kɔrɛ bä cu Dee-bid wä raar, kä cuɛ Thɔɔl cɔli, “Kuäärä, kuäär!” Kä min ci Thɔɔl jɔkdɛ liɛc, cu Dee-bid rɔ goŋ luthä.

⁹ Kä cu Dee-bid ɛ jiök i̱, “Ɛŋu liŋi ruac nɛɛni tin lar kɛ jɛ i̱ ‘Ɣän göörä näkdu mɔ’?

¹⁰ Kä ɛn walɛ ciɛ ku nɛn nikɛ waŋdu, ɛn ɣöö ci Kuoth Nhial ji̱ ka̱mä rɛy kɔ̱kä. Kä ci tha̱a̱ŋ naath ɣä com i̱ bä ji̱ näk, duundɛ ɣöö cä ji̱ päl. Cä wee i̱, ‘/Cä kuäärä dëë näk. Kɛ ɣöö ca kuany ɛ Kuoth Nhial.’

¹¹ Nɛnɛ gua̱di̱n, nɛn ŋuɔk bieydu te tetädä mi. Cä tɛm ni thok bieydu /ka̱n ji̱ näk, deri jɛ ŋa̱c ɛn ɣöö thilɛ dueer kiɛ mi jiääk mi cä la̱t. Thilɛ duer mi cä duer ji̱ cäŋ ni mɔ go̱o̱ri näkdä mɔ.

¹² Bi Kuoth Nhial kamdan guic, bi Kuoth Nhial ji̱ cuɔ̱l dueer tin ci lät kä ɣä. Duundɛ ɣöö /cä ji̱ bi näk.

¹³ Ce̱tkɛ mëë la lar kɛ walkä i̱, ‘Mi jiääk bëë kä lät jiäkni.’ Duundɛ ɣöö /cä ji̱ bi näk.

¹⁴ Kä ɛŋa go̱o̱r kuäär I-thɛ-rɛl näkdɛ mɔ? Kä ɛŋa joci mɔ? Guuri ni jio̱k mi ci li̱w! Guuri ni ram ci rɔ bar.

¹⁵ Kɛ kui̱c ɛmɔ bi Kuoth Nhial kamdan luk, kä bɛ jɛ guic, bɛ ɣä gaŋ, kä bɛ ɣä kän kä ji̱.”

¹⁶ Mëë ci Dee-bid thuɔ̱k kɛ lät Thɔɔl rieet ti̱ti̱, cu Thɔɔl wee i̱, “Ɛ jɛn ruacdu ɛ nɛ Dee-bid gatdä?” Kä cu Thɔɔl wiee.

¹⁷ Kä cuɛ Dee-bid jiök i̱, “Te ni ji̱n kɛ cuɔ̱ɔ̱ŋ kä ɣä. Kɛ ɣöö ci ɣä cuɔ̱l mi gɔaa, guäth in kua̱ lɛ cuɔ̱l ni ji̱ mi jiääk.

¹⁸ Kä ciɛ nyoth ɛn walɛ ci lät agɔaa kɛ ɣä, kɛ ɣöö /keni ɣä näk min ci Kuoth Nhial ɣä ka̱m ji̱.

¹⁹ Kɛ ɣöö mi ci raan gua̱n tɛ̈rɛ jek, /cɛ jɛ me̱t pa̱l wä a tëk? Bi Kuoth Nhial ji̱ moc mi gɔaa, kɛ kui̱ kä min ci lät kä ɣä ɛn walɛ.

²⁰ Kä täämɛ nɛnɛ, ɣän ŋa̱cä jɛ, ɛn ɣöö bi ji̱n a kuäär, kä bä kuäär I-thɛ-rɛl lät kä ji̱.

²¹ Kä yac rɔ nhiamdä kɛ ciöt Kuɔth Nhial kɛ ɣöö bi kuaykä lɔ̱ɔ̱ päl kɔɔrä, kä /ci ciötdä bi lɔ̱ɔ̱ bath dhɔr gua̱a̱r.”

²² Kä cu Dee-bid nɔmɔ ya̱c Thɔɔl. Kä cu Thɔɔl wä cieŋ. Kä cu Dee-bid kɛnɛ nɛɛkɛ wä rɛy kɔ̱a̱kni.