1 Tham 22 - RUAC KUƆTH IN RƐL RƆ

Näk bööthni palä

¹ Kä cu Dee-bid jiɛɛn ɛn wi̱ni barɛ rɔ kɔ̱kä mi thieek kɛ Ä-du-lam. Kä mëë ci gaatman kɛnɛ ji̱ dhɔaariɛn diaal ɛ liŋ, cukɛ ben kä jɛ.

² Kä cu nɛy diaal tëë ca ciɛŋ a jiäk, kɛnɛ tin tekɛ ŋuäl, kɛ nɛy tin kɛc lo̱ckiɛn rɔ̱ ma̱t jɛ. Kä cua bo̱o̱thdiɛn. Kä cu nɛy diaal tin te kɛɛl kɛ jɛ a nɛy ti kur ŋuaan.

³ Kä cu Dee-bid jiɛɛn ɛn wi̱ni cuɛ wä kä Midh-pee kä Mo-ab. Kä cuɛ kuäär Mo-ab jiök i̱, “Ɛ gua̱a̱r kɛnɛ maar cieŋ kɛɛl kɛ ji̱, amäni mi cä min bi Kuoth ɛ lät kä ɣä ŋa̱c.”

⁴ Kä cuɛ kɛ ba̱ny kuäär Mo-ab, cukɛ te kɛɛl kɛ jɛ kɛ pek ëë tekɛ Dee-bid rɛy kɔ̱a̱kni.

⁵ Kä cu gök ni Gad Dee-bid jiök i̱, “Cu te rɛy kɔ̱a̱kni, wër ro̱o̱l Juda.” Kä cu Dee-bid wä, cuɛ ben rɛy ruɔ̱ɔ̱p Ɣa-rɛth.

⁶ Täämɛ cu Thɔɔl ɛ liŋ ɛn ɣöö ci gua̱a̱th Dee-bid jɔɔc kɛnɛ nɛɛkɛ. Kä jɛn tëë nyuurä wi̱i̱ pa̱a̱m, thaar jiaath kɔat kä Giba, kä te mutdɛ te̱tkädɛ, kä te bööthkɛ diaal cuŋä gekädɛ.

⁷ Kä cu Thɔɔl bööthkɛ tin te cuŋä gekädɛ jiök i̱, “Liɛŋɛ jɛ lö ji̱ Ben-ya-min. Ɛn gat Jɛthi bɛ ramɔ moc kɛ kak ŋɔa̱a̱ri, kiɛ bɛ yɛ jak kä bööth bathdɔɔri kɛnɛ bööth kuri?

⁸ Ɛ jɛn ci yɛn diaal a ji̱ tɛ̈rä mɔ? A thil ram kɛl mi cu ɣä la̱r lär mëë ci gatdä mat kɛnɛ Dee-bid. Cuɛ thil ram mi diɛɛr kɛ kui̱dä, mi cu ɣä la̱r ɣöö gatdä cɛ läätdä cuɔ̱m näkdä, ce̱tkɛ mi lätdɛ ɛn walɛ mi.”

⁹ Kä cu Do-yeg raan Ɛ-dɔm min te cuŋä gekä Thɔɔl ɛ loc i̱, “Cä nɛn ɛn gat Jɛthi wëë kä bo̱o̱th palä ni Ä-ɣi-mɛ-lɛk gat Ä-ɣi-tub kä Nob,

¹⁰ min cu Kuoth Nhial thiec kɛ kui̱ Dee-bid, kä cuɛ jɛ moc mi̱eth kɛnɛ thɛp Gɔl-yath raan Pi-li-thɛt.”

¹¹ Kä cu kuäär nɛy ti wa Ä-ɣi-mɛ-lɛk bo̱o̱th palä, gat Ä-ɣi-tub kä Nob cɔl ja̱k, kɛnɛ ji̱ dhɔaariɛn diaal. Kä cu kɛn diaal ben kä kuäär.

¹² Cu Thɔɔl wee i̱, “Liŋɛ täämɛ lö gat Ä-ɣi-tub.” Kä cuɛ loc i̱, “Ɣän nɛn kuäärä.”

¹³ Kä cu Thɔɔl ɛ jiök i̱, “Ɛŋu tɛɛr kɔn ɛ mɔ, ji̱n yɛnɛ gat Jɛthi, mɔ curi jɛ ka̱m mi̱ethɔ kɛnɛ thɛp, kä curi Kuoth thiec kɛ kui̱dɛ, kɛ ɣöö bɛ ɣä ku lɛ tër tɛr, a bɛ ɣä ku nyurikä ce̱tkɛ walɛ?”

¹⁴ Kä cu Ä-ɣi-mɛ-lɛk kuäär loc i̱, “Kä ɛŋa rɛy bööthniku mi ŋa̱th ce̱tkɛ Dee-bid, ɛŋa la cɔw nyaa kua̱r ɔ, kä bööth yieyniku, kä luɔ̱thkɛ dhɔɔru?

¹⁵ Kä ɛ jɛn walɛ kärɔa thiecä Kuoth Nhial kɛ kui̱dɛ mɔ? Ëëy, kuäär cu jɛ läth wi̱i̱dä kiɛ dhɔr gua̱a̱r kɛɛliw. Kɛ ɣöö thilɛ mi ŋa̱cä kä kɛn ti diaal ti̱ti̱.”

¹⁶ Kä cu kuäär wee i̱, “Ɛ puc bi dhil li̱w lö Ä-ɣi-mɛ-lɛk, yɛnɛ ji̱ dhɔaar guur diaal.”

¹⁷ Kä cu kuäär yiëën tin te cuŋä gekädɛ jiök i̱, “Na̱kɛ bööth palä Kuɔth Nhial. Kɛ ɣöö cikɛ mat kɛ Dee-bid, ŋäc kɛn ɛ i̱ cɛ rɔ bar kä /ken kɛnɛ la̱r ɣä.” Kä duundɛ ɣöö /ken yiëën ɛ nhɔk i̱ ba bööth palä Kuɔth Nhial näk.

¹⁸ Kä cu kuäär Do-yeg jiök i̱, “Näk bööth palä. Kä cu Do-yeg raan Ɛ-dɔm bööth palä näk.” Ɛn cäŋ ɛmɔ cuɛ bööth palä ti ciaŋ kɛ bi̱i̱ kath ti jiɛɛn bädäk wi̱cdɛ dhieec näk.

¹⁹ Cuɛ Nob wec bööthni palä ji̱kɛ diaal näk, amäni män, dööth kɛ ti lueth, ɣɔ̱k kɛ muɔ̱li, kɛ det, cuɛ kɛn diaal näk.

²⁰ Kä cu gat kɛl kä gaat Ä-ɣi-mɛ-lɛk gat Ä-ɣi-tub, mi cɔali Ɛb-ya-thar rɔ lëny, cuɛ rɔ bar kɔɔr Dee-bid.

²¹ Kä cuɛ Dee-bid la̱r ɣöö ci Thɔɔl bööth palä Kuɔth Nhial näk.

²² Kä cu Dee-bid ɛ loc i̱, “Ɣän ŋa̱cä jɛ ɛn cäŋ ëë te Do-yeg raan Ɛ-dɔm thi̱n, ɛn ɣöö bɛ wä la̱r Thɔɔl. Ɛ riɛkdä ɛn lia̱a̱ ciek muɔɔri diaal.

²³ Cieŋni kɛɛl kɛ ɣä, cu dual. Kɛ ɣöö ɛn Thɔɔl go̱o̱rɛ näkdan. /Ci bi li̱w kɛ ta̱a̱dan kɛɛl.”