1 Tham 21 - RUAC KUƆTH IN RƐL RƆ

Ba̱r Dee-bid kɛ rɔ kä Thɔɔl

¹ Kä cu Dee-bid wä kä bo̱o̱th palä ni Ä-ɣi-mɛ-lɛk kä Nob. Kä cuɛ Dee-bid lor kɛ dual thiecɛ jɛ i̱, “Ɛŋu jäli kä rɔa mɔ, a thilɛ ram jäl kɛɛl kɛ ji̱?”

² Kä cu Dee-bid ɛ loc i̱, “Ci kuäär ɣä ja̱k kɛ duɔ̱ɔ̱r, kä cɛ ɣä jiök i̱, ‘A thil ram mi ŋäc duɔ̱ɔ̱r kä min ja̱kä ji̱ kɛ jɛ.’ Tëë kɛ gua̱a̱th mi cä lat kɛ ŋuɛ̈tni i̱ ba̱kɔ röm thi̱n.

³ Kä täämɛ ɛŋu tëë ji̱ mɔ? Mocä kɛ jurayni da̱ŋ dhieec kiɛ mɔ te thi̱n ɔ.”

⁴ Kä cu bo̱o̱th palä Dee-bid loc i̱, “Thilɛ ɣä jurayni baaŋ, te ni jurayni tin rɛ̈l kɛ rɔ̱ thi̱n. Ɛ ni mi ŋuɛ̈tni tɔ̱tɔ̱ /ka̱n rɔ thieek kɛ män.”

⁵ Kä cu Dee-bid ɛ loc i̱, “Kɛ thuɔ̱k na̱n män kɛ nɛy ce̱tnikɛ ta̱a̱ in wen mi wa̱kɔ ja̱l. Kɛn kuak ŋuɛ̈tni rɛ̈l kɛ rɔ̱, a cäŋɛ ja̱l baaŋ bä. Kä dëë gɔɔydiɛn ku lɛ ce̱tkɛ ŋu ɛn walɛ?”

⁶ Inɔ cu bo̱o̱th palä jɛ ka̱m jurayni tin rɛ̈l kɛ rɔ̱, kɛ ɣöö thilɛ jurayni ti kɔ̱ŋ, ɛ ni kɛn jurayni tin rɛ̈l kɛ rɔ, tin /ca woc nhiam Kuɔth Nhial, tin la gua̱a̱thdiɛn a gua̱lkɛ kɛ jurayni ti lëth lëëth kɛ cäŋ in wuɔckɛ nikɛ.

⁷ Kä ɛn cäŋ ɛmɔ tëë kɛ läät Thɔɔl mi te thi̱n, mi lät nyin palä Kuɔth Nhial. Ɛ raan Ɛ-dɔm mi cɔali Do-yeg, kuäär yieen ɣɔ̱ɔ̱k Thɔɔl.

⁸ Kä cu Dee-bid Ä-ɣi-mɛ-lɛk jiök i̱, “Kä thilɛ ji̱ mut kiɛ thɛp mi te kuthdu? Kɛ ɣöö/ka̱n mutdä kiɛ thɛpdä nööŋ kɛ ɣä kɛɛl, kɛ ɣöö kuäär go̱o̱rɛ nɔmɔ kɛ pɛ̈th.”

⁹ Kä cu bo̱o̱th palä jɛ loc i̱, “Thɛp Gɔl-yath raan Pi-li-thɛt mëë näk i̱ lo̱o̱lä Elaa, ja wa̱nɛ ca rith kɛ bi̱i̱ jɔk gaakni. Mi go̱o̱ri jɛ käni jɛ kɛ ɣöö thilɛ mi dɔ̱ŋ, te ni jɛn thi̱n.” Kä cu Dee-bid wee i̱, “Thilɛ mi cäät kɛ jɛ. Käm ni jɛ ɣä.”

¹⁰ Kä cu Dee-bid rɔ bar ɛn cäŋ ɛmɔ kɛ Thɔɔl, cuɛ wä kä A-kic Kuäär Gɛ̈th.

¹¹ Kä cu läät A-kic wee i̱, “Ɛn nɛmɛ /ciɛ Dee-bid kuäär wec? /Ciɛ jɛn ɛ nëë puanykɛ kɛ diit buul i̱, ‘Ci Thɔɔl nɛy ti bathdɔɔr näk. Kä Dee-bid cɛ bathdɔɔri wäl näk’?”

¹² Kä cu Dee-bid rieet tɔ̱tɔ̱ la̱th lɔɔcdɛ, kä cuɛ dual ɛlɔ̱ŋ kɛ A-kic kuäär Gɛ̈th.

¹³ Kä cuɛ ciaŋdɛ päl nhiamdiɛn, kä cuɛ rɔ jak kä yɔ̱ŋ rɛydiɛn, gɔ̱rɛ thiekni thukni duëli, kä thiäŋ ti̱kdɛ kɛ läk.

¹⁴ Kä cu A-kic läätdɛ jiök i̱, “Guicɛ, ɛn raan ɛ yɔ̱ŋ. Ɛŋu nöŋi jɛ ɣä mɔ?

¹⁵ A kua̱ thil nɛy ti yɔ̱a̱ŋ, mɔ curi ɣä nöŋ ram mi bä nyin yɔ̱ɔ̱ŋä ben la̱t nhiamdä mɔ? Ɛ luɔt ɛn ɣöö bi ram ɛmɛ ben dhɔɔrä?”