1 Tham 20 - RUAC KUƆTH IN RƐL RƆ

Määth Dee-bid kɛnɛ Jo-na-than

¹ Kä cu Dee-bid rɔ bar kä Na-yoth kä Rama, kä cuɛ ben kä Jo-na-than, cuɛ jɛ jiök i̱, “Ɛŋu mi cä la̱t? Kä ɛŋu la duerä mɔ? Kä ɛŋu cä duer guurɔ, mɔ go̱o̱rɛ näkdä mɔ?”

² Kä cu Jo-na-than ɛ loc i̱, “Thilɛ mi bi tuɔɔk! Ci bi li̱w. Kä nɛnɛ thilɛ mi tɔt kiɛ mi di̱i̱t mi /ken gua̱a̱r ɛ me̱t la̱rä. Kuɛ la ŋu dëë gua̱a̱r ɣä tëë kä nɛmɛ ɔ? Ɛ ɣän i̱ /ciɛ thuɔ̱k.”

³ Kä cu Dee-bid ɛ loc i̱, “Ŋäc guurɛ agɔaa ɛn ɣöö nhɔki ɣä. Kä cɛ cu car ɛn ɣöö bɛ min cɛ car la̱t a/cɛ jɛ lär ji̱, kɛ ɣöö mi ciɛ ŋa̱c deri gaak. Ɛ puc nikɛ ciöt Kuɔth Nhial in tëk kä nikɛ tëkdu, thilɛ ŋu ɛni lia̱a̱ kɛnɛ tëk kamda.”

⁴ Kä cu Jo-na-than Dee-bid jiök i̱, “Mɔ bi larɔ, bä lät kä ji̱.”

⁵ Kä cu Dee-bid ɛ loc i̱, “Nɛnɛ, i̱ ruun ɛ cäŋ ŋarä tëth path, kä dëë mi̱th kɛɛl kɛ kuäär. Jakni ɣä kä wä, dëë rɔ wä tɛ̱̈ɛ̱̈ rɛy ka̱a̱ni amäni cäŋ in diɔ̱kdiɛn kɛ thiaŋ.

⁶ Kä mi ci guurɛ ŋa̱c i̱ thilɛ ɣä, biɛ cu la̱r jɛ i̱ ‘Dee-bid cɛ ɣä thiec kɛ ɣöö bɛ riŋ wi̱i̱diɛn kä Beth-lɛ-ɣɛm. Kɛ ɣöö tëë kɛ muc runä mi thöpkɛ ɛ ji̱ dhɔaariɛn diaal.’

⁷ Mi wee jɛ nhɔk, bɛ cu gɔaa kɛ läätdu. Kä mi wee jɛ wä lo̱k, biɛ cu ŋa̱c i̱ bɛ ɣä lät kä mi jiääk.

⁸ Kɛ kui̱ ɛmɔ lätni agɔaa kɛ läätdu, kɛ ɣöö can mat ruac lat nhiam Kuɔth Nhial. Kä mi ta̱a̱ kɛ duer, näk ɣä ɛ ji̱n. Ɛŋu bi ɣä lɛ nöŋ guurɔ?”

⁹ Kä cu Jo-na-than ɛ jiök i̱, “Thilɛ mi bi tuɔɔk kä ji̱, ɣän mi ŋa̱cä jɛ teekɛ mi bi gua̱a̱r ɛ lät kä ji̱, cä dëë la̱r ji̱?”

¹⁰ Kä cu Dee-bid ɛ loc i̱, “Ɛŋa dëë jɛ la̱r ɣä mɔ mi ci guuri loc a jiäk?”

¹¹ Kä cu Jo-na-than ɛ jiök i̱, “Bër jiɛc rɔ, wanɛ rɛy ka̱a̱ni.” Kä cu kɛn da̱ŋ rɛw wa rɛy ka̱a̱ni.

¹² Kä cuɛ Dee-bid jiök i̱, “Ɛ Kuoth Nhial, Kuoth I-thɛ-rɛl la neendan, ɣän i̱ ruun kɛ gua̱a̱th mi ce̱tkɛ nɛ, bä gua̱a̱r thiec, kiɛ kɛ diɔ̱ɔ̱k ni̱ni, mi wa̱a̱ jɛ wä jek agɔaa ta̱a̱dɛ kɛ ji̱, /cä ji̱ bi ben luɔ̱c thokdɛ?

¹³ Kä mi lot gua̱a̱r ni mi jiääk kɛ ji̱, ce̱tnikɛ ciöt Kuɔth Nhial, bä li̱w, mi /ka̱n jɛ la̱r ji̱ kä bä ji̱ jak kä wä kɛ mal. Ɛ Kuoth Nhial tekɛ ji̱ kɛɛl, ce̱tkɛ mëë tëë kɛɛl kɛ gua̱a̱r.

¹⁴ Kä mi ŋuɔtdä kɛ tëk, nyuthni ɣä nhök Kuɔth Nhial in tekɛ ji̱, kɛ ɣöö cä dëë lɛ li̱w.

¹⁵ Kä cu gɔɔydu päl kɛ ji̱ dhɔaarä mäni cäŋ kɛl. Mi wä Kuoth Nhial ji̱ tɛ̈ru diaal wä däk wi̱i̱ muɔ̱ɔ̱n.”

¹⁶ Kä cu Jo-na-than mat ruac la̱th piny kɛnɛ dhɔr Dee-bid wee i̱, “Bi Kuoth Nhial ji̱ tɛ̈r Dee-bid thiec.”

¹⁷ Kä cu Jo-na-than rɔ nyɔk kɛ mi yaacɛ rɔ, kɛ kui̱ nhökdɛ kɛ Dee-bid. Kɛ ɣöö nhɔkɛ jɛ ce̱tnikɛ puɔ̱nydɛ.

¹⁸ Kä cuɛ Dee-bid jiök i̱, “Iruun ɛ cäŋ ŋarä tëth path. Ba̱kɔ ji̱ tim, kɛ ɣöö bi kɔmdu te baaŋ.

¹⁹ Kä kɛ diɔ̱ɔ̱k ni̱ni ba ji̱ tim ɛlɔ̱ŋ. Kä wër guäth in bi rɔ wä tɛ̱̈ɛ̱̈ thi̱n, wër teni thaar pa̱a̱m ɛn wi̱ni.

²⁰ Kä bä kuin kui̱ni da̱ŋ diɔ̱k yuɔr gekädɛ, bɛ ku lɛ ciek mi ba̱a̱rä ni jɛ.

²¹ Kä nɛnɛ bä dho̱o̱l ja̱k i̱, ‘Wër no̱o̱ŋni dɛy kuin kuɛɛn.’ Kä mi wa̱a̱ jɛ wä jiök i̱, ‘Nɛnɛ, kɛn dɛy kuin kuɛɛn kɛnɛ kui̱du kui̱c ɛmɛ, kuany kɛ.’ Ɛn wa̱nɔ bi cu ben, luɔtdɛ ɣöö ci kään, ce̱tkɛ ciöt Kuɔth Nhial in tëk, thilɛ mi jiääk kɛ kui̱du.

²² Kä mi cä dho̱o̱l jiök i̱, ‘Nɛnɛ kɛn dɛy kuin kuɛɛn ka nhiamdu,’ wërɛ. Kɛ ɣöö ci Kuoth Nhial ji̱ jak kä wä.

²³ Kä kɛ kui̱ kä min canɛ la̱t rɔ, nɛnɛ, Kuoth Nhial a kamdan amäni cäŋ kɛl.”

²⁴ Inɔ cu Dee-bid rɔ tɛ̱̈ɛ̱̈ rɛy ka̱a̱ni. Kä mëë ci cäŋ ŋarä tëth path ben, cu kuäär nyuur kɛ ɣöö bɛ mi̱eth cam.

²⁵ Cuɛ nyuur wi̱i̱ kɔamdɛ, ce̱tkɛ min wen, kɔm in te puɔ̱ɔ̱ny duëël. Kä cu Jo-na-than rɔ jiɛc, kä cu Ä-bi-ner nyuur gekä Thɔɔl, kä cu gua̱a̱th Dee-bid te baaŋ.

²⁶ Duundɛ ɣöö cuɛ thil mi laar Thɔɔl ɛ ɛn cäŋ ëë. Kɛ ɣöö ɛ jɛn i̱, “Tëë kɛ mi ci jɛ yia̱r, ɛ puc /cɛ gɔaa jiäkɛ.”

²⁷ Kä mëë ruɔ̱ndɛ kɛ cäŋ in rɛwdɛ kä tëth path, cu gua̱a̱th Dee-bid te baŋ. Cu Thɔɔl gatdɛ ni Jo-na-than thiec i̱, “Ɛŋu ken gat Jɛthi ben mi̱th ɔ, ni pan mäni walɛ?”

²⁸ Kä cu Jo-na-than ɛ loc i̱, “Kɛ thuɔ̱k Dee-bid cɛ ɣä thiec kɛ ɣöö derɛ wä kä Beth-lɛ-ɣɛm.

²⁹ Cɛ wee i̱, ‘A wa̱a̱kɛ kɛ ɣöö ji̱ dhɔaara tekɛ kɛ muc ɛn wi̱c, kä ci dämaar ɣä jiök i̱ bä te thi̱n. Ɛn täämɛ mi deri jɛ nhɔk, a ɣä wa̱a̱kɛ kɛ ɣöö bä gaatmaar wä nɛn.’ Kɛ kui̱c ɛmɔ /kenɛ ben wi̱i̱ tokädu.”

³⁰ Kä cu Thɔɔl kɛ̈c kɛ Jo-na-than, kä cuɛ jɛ jiök i̱, “Gat ciek, gat läkä mi gua̱n nyuɔɔni, ŋa̱cä jɛ ɛn ɣöö ta̱yɛ kui̱ kɛl yɛnɛ gat Jɛthi min yäri ni rɔ kɛ jɛ yɛnɛ muɔɔr?

³¹ Min cak gat Jɛthi tëk wi̱i̱ muɔ̱ɔ̱n ɛmɛ, /ci Kuääru bi me̱t yiath piny. Ɛn täämɛ wër no̱ŋ ni jɛ ɣä, kɛ ɣöö bä jɛ ben näk ɛ puc.”

³² Kä cu Jo-na-than gua̱n loc i̱, “Ɛŋu mɔ dëë näk ni jɛ mɔ? Ɛŋu cɛ la̱t ɔ?”

³³ Kä cu Thɔɔl ɛ kui̱rikä kɛ mut. Kä cu Jo-na-than ɛ ku ŋa̱c ɛn ɣöö go̱o̱r gua̱n näk Dee-bid.

³⁴ Kä cu Jo-na-than rɔ jiɛc wi̱i̱ mi̱eth kɛ ŋɛ̈ɛ̈ny. Kä /kenɛ mi̱th kɛ jɛn rɛw ni̱nä teth path, kɛ kui̱ Dee-bid, kɛ ɣöö ci gua̱n ɛ kueth.

³⁵ Kä mëë ruɔ̱ndɛ kɛ runwaŋ cu Jo-na-than wä rɛy ka̱a̱ni guäth ëë ci kɛnɛ lat kɛnɛ Dee-bid kä cukɛ wä kɛɛl kɛnɛ dhɔl mi tɔt.

³⁶ Kä cuɛ dho̱o̱l jiök i̱, “Riŋni wër no̱o̱ŋni dɔw kuin kuɛɛn in cä yuɔr.” Kä min wä dho̱o̱l cuɛ dɔw kuin kuɛɛn yuɔr nhiamdɛ.

³⁷ Kä min ci dho̱o̱l cop guäth dɔa kuin kuɛɛn in cɛ yuɔr, cuɛ dho̱o̱l jiök i̱, “Ɛn dɔw kuin kuɛɛn cɛ te nhiamdu inu?”

³⁸ Kä cuɛ dhɔl cɔl i̱, “Mali wä kɛ pɛ̈th, cu cuŋ.” Cu dho̱o̱l kuin kui̱ni kuany kä cuɛ ben kä kuäärɛ.

³⁹ Kä cuɛ thil mi cu dho̱o̱l ɛ ŋa̱c ɛni Jo-na-than kɛnɛ Dee-bid ŋa̱ckɛ min ci kɛn ɛ lat ɔ.

⁴⁰ Kä cu Jo-na-than yio̱o̱kɛ ka̱m dho̱o̱l, kä cuɛ jiök i̱, “Wër naŋ ni kɛ wi̱c.”

⁴¹ Kä niɛ min ci dho̱o̱l wä, cu Dee-bid rɔ jiɛc thaar pa̱a̱m kui̱c cuëëc, kä cuɛ rɔ goŋ nikä diɔ̱ɔ̱k nhiam Jo-na-than. Kä cu kɛ rɔ ciɛm, kä cu kɛ wiee, duundɛ ɣöö cu ku lɛ wiee ni Dee-bid ɛlɔ̱ŋ

⁴² Kä cu Jo-na-than Dee-bid jiök i̱, “Wër Kɛ mal, kɛ ɣöö can mäth mat kɛ ciöt Kuɔth Nhial, laar kɔn ɛ i̱ ‘A Kuoth Nhial te kamdan, kɛnɛ kam kuaynikɔn amäni cäŋ kɛl.’ ” Kä cu Dee-bid rɔ jiɛc, kä cuɛ wä. Kä cu Jo-na-than loc wi̱c.