1 Tham 2 - RUAC KUƆTH IN RƐL RƆ

Pal Ɣana

¹ Kä cu Ɣana Kuoth Nhial pal wee i̱, “Tɛth lɔcdä kɛ Kuoth Nhial. Kä buɔ̱mdä ca kap nhial ɛ Kuoth Nhial. Kä cä gua̱n tɛ̈rä dɔl, kɛ ɣöö ci lɔcdä tɛɛth rɛy känädɛ. Kä bok ëë wal wee i̱, thääk da̱ŋ diɔ̱k.

² “Thilɛ mi päär gɔɔydɛ kɛ Kuoth Nhial, thilɛ mi päär kɛ ji̱. Kä thilɛ gääŋ mi päär kɛ Kuothda.

³ /Cu lɛ ruac liaki rɔ kɛ nyin liakä /ci lɛ ben raar thokdu. Kɛ ɣöö Kuoth Nhial ɛ Kuoth mi ŋäc ŋɔak, jɛn päärɛ lät diaal.

⁴ Ci kuin kuiini ji̱ ko̱o̱r töl, kä ci nɛy tin kɔ̱c tekɛ buɔ̱m.

⁵ Kä nɛy tëë riäŋ kɔakɛ rɔ kɛ kui̱ mi̱eth. Kä nɛy tin ji̱ buath ci buɔthdiɛn thuɔ̱k. Kä tin /ci dap cikɛ dap nikɛ gaat bärɔw, kä ci mani gan ti ŋuan duɔth kɛ tetkiɛn.

⁶ Kä Kuoth Nhial näkɛ kä teekɛ naath, naŋɛ naath jɔɔkni kä jiɛɛcɛ naath.

⁷ Kuoth Nhial no̱ŋɛ can kɛnɛ ria̱ŋ, duinyɛ naath piny kä kapɛ kɛ nhial.

⁸ Kä kapɛ can nhial ni rɛy tupä. Kä kapɛ nɛy tin thil ŋu nhial rɛy ŋɛthä, cɛ kɛ kam kuäär kɛnɛ luth. Kɛ ɣöö te cuɔ̱ɔ̱ŋ piɛny kɛ Kuoth Nhial, kä cɛ ɣɔw la̱t thi̱n.

⁹ “Kä Kuoth Nhial gaŋɛ duɔ̱p ji̱ ŋäthädɛ. Kä nɛy tin thil ŋa̱th bitkɛ rɛy muɔ̱th, kɛ ɣöö ciɛ buɔ̱m ɛnɔ dëë ran puɔ̱t ɔ.

¹⁰ Kä ba nɛy tin lökɛ Kuoth Nhial däk. Kä bɛ kɛ jäk kä ma̱a̱r ni nhial. Kä bi Kuoth Nhial ɣɔw kɛɛliw luk. Kä bɛ kuäärɛ ka̱m buɔ̱m, kä bɛ buɔ̱m ka̱m kuäärɛ min cɛ kuany.”

¹¹ Ɛ jɛn cu Ɛl-ka-na wä cieŋ kä Rama. Kä cu gat lɔ̱ɔ̱ lät nhiam Kuɔth Nhial nhiam Eli bo̱o̱th palä.

Gaat Eli

¹² Täämɛ cu gaat Eli a nɛy ti thil luɔt. /Ca Kuoth Nhial ŋäc ɛ kɛn.

¹³ Kä la bo̱o̱th palä a bä kä naath mi tëë kɛ ram mi thöp mucdɛ, guäth in tuak ri̱ŋ. La läät bo̱o̱thä palä a bä a te tetdɛ kɛ jiath mi tuɔ̱ŋ diɔ̱k,

¹⁴ Kä bɛ jɛ cuɔt rɛy dhar, ri̱ŋ ɛ cɛ nööŋ raar ɔ, la bo̱o̱th palä jɛ a kän ala duŋdɛ. Inɔ cu kɛn ɛ lät kä ji̱ I-thɛ-rɛl diaal tin ci ben kä cilo.

¹⁵ Kä ciɛ jɛn thuɔ̱ɔ̱kdɛ, ni min ŋot thiɔl a /ka̱n jɛ ni waŋ, la läät bööthä palä ram in thöp mucdɛ a jiök i̱, “Moc bo̱o̱th palä kɛ ri̱ŋ mi bulɛ. Kɛ ɣöö /cɛ ri̱ŋ mi ci tuak go̱o̱r kä ji̱ ɛ ni ri̱ŋ mi tith.”

¹⁶ Kä mi ca jiök ɛ naath i̱, “Ɛ kɔ waŋkɛ thiɔl kɛ nhiam, bi rɔ kulɛ moc ce̱tkɛ min go̱o̱ri,” la wee i̱, “Eey ŋunɛ ɛn täämɛ. Kä mi /ciɛ bi ŋun bä ka̱n kɛ buɔ̱m.”

¹⁷ Inɔ cu duer ŋuɛ̈tni tɔ̱tɔ̱ di̱t ɛlɔ̱ŋ waaŋ Kuɔth Nhial. Kɛ ɣöö lät kɛn muc Kuɔth Nhial a jiäk.

¹⁸ Kä Tha-muɛl lätdɛ nhiam Kuɔth Nhial, Ɛ dho̱o̱l mi ciɛŋ ni bi̱i̱ kath mi gɔaa.

¹⁹ Run kä run la man jɛ a ko̱c bi̱i̱ mi tɔt kä bɛ jɛ nöŋ jɛ, mi wäkɛ muc runä thöp kɛnɛ cɔwdɛ.

²⁰ Kä la Eli Ɛl-ka-na kɛnɛ ciekdɛ a poth i̱, “Bi Kuoth Nhial yɛ moc gaat yɛnɛ ciek ɛ mi, kɛ min cɛ ka̱m Kuoth Nhial.” Kɛ kɔrɛ bikɛ loc dhɔɔriɛn.

²¹ Kä cu Kuoth Nhial Ɣana poth, cuɛ ruët kä cuɛ dap kɛ dhɔɔl diɔ̱k kɛ nyier da̱ŋ rɛw. Kä cu Tha-muɛl piith nhiam Kuɔth Nhial.

²² Kä täämɛ Eli cɛ dɔŋ, kä cɛ tin diaal tin lät gaatkɛ kɛ kä ji̱ I-thɛ-rɛl diaal liŋ, ɛn ɣöö la kɛn a tɔ̱ɔ̱c kɛ män tin la̱a̱t thok kɛmɛkä ro̱mä kɛ Kuoth Nhial.

²³ Kä cuɛ kɛ jiök i̱, “Ɛŋu la̱tdɛ mi ce̱tkɛ nɛmɛ ɔ? Cä lät jiäknikun liŋ kä nɛy diaal.

²⁴ /Ciɛ jɛn gaatkä, cɛ gɔaa ɛn min ci däk rɛy nɛɛni Kuɔth Nhial.

²⁵ Mi ci raan ram mi dɔ̱ŋ due̱r duer, la Kuoth Nhial kamdiɛn a rialikä. Kä mi ci raan due̱r ni Kuoth Nhial duer, ɛŋa dee jɛ käthikä mɔ?” Kä duundɛ ɣöö /kenkɛ ruac gua̱ndiɛn liŋ. Kɛ ɣöö ɛ ruac Kuɔth Nhial, kɛ ɣöö bɛ kɛ näk.

²⁶ Kä cu Tha-muɛl pi̱ethdɛ cuɔ̱p a jekɛ nhök kä Kuoth Nhial kɛnɛ naath.

Ruac go̱kä kɛ kui̱ dhɔaar Eli

²⁷ Kä cuɛ tekɛ gök Kuɔth mi cu ben kä Eli, kä cuɛ jɛ jiök i̱, “Nɛmɛ ɛ min ci Kuoth Nhial ɛ lar i̱ ‘Ɣän cä rɔ nyuɔ̱th kuayku mëë kɛ kuaany kä I-jëp wec Pɛro.

²⁸ Kä cua̱kɛ mɛk thuk duëli ji̱ I-thɛ-rɛl diaal kɛ ɣöö bikɛn a bööth palädä, kä bikɛ bi̱i̱ kath la̱th nhiamdä. Kɛnɛ ɣöö bikɛ muc tin waŋkɛ thöp wi̱i̱ yi̱kä. Kä cakɛ ka̱m muc diaal tin waŋkɛ ɛ ji̱ I-thɛ-rɛl.

²⁹ Kä ɛŋu guici muckä tin cä lar i̱ ba thöp ɣä, ɛ nɛɛkä kɛ waŋ mi jiääk ɔ? Kä ɛŋu ci luɔ̱th ni gaatku ɛlɔ̱ŋ kä ɣä mɔ, a mekɛ rɔ pek ri̱eŋ kä tin diaal tin thöpkɛ ɣä ɛ nɛɛkä ni ji̱ I-thɛ-rɛl ɔ?’

³⁰ Kɛ kui̱c ɛmɔ ɣän Kuoth Nhial Kuoth ji̱ I-thɛ-rɛl laarä jɛ i̱, ‘Cä lar ɛn ɣöö bi dhɔru kɛnɛ dhɔr guur ɣä lät ikä mäni cäŋ kɛl.’ Kä ɛn täämɛ ɣän Kuoth Nhial laarɛ jɛ i̱, ‘Ɛn nɔmɔ /cɛ lɛ ŋot thi̱n. Kɛ ɣöö bä luɔ̱th ni nɛy tin luɔ̱thkɛ ɣä, kä tin lökɛ ɣä bäkɛ ciɛŋ a jiäk.

³¹ Kä nɛnɛ, ci ni̱n tin bä buɔ̱mdu kɛnɛ buɔ̱m guuri woc, kä bɛ cu thil ram mi dɔaaŋ dhɔru.

³² Kä bi bo̱o̱th palä mi dɔ̱ŋ quic kɛ gɔy diaal tin bä ka̱m ji̱ I-thɛ-rɛl. Kä /ci dhɔɔru bi me̱t tekɛ ram mi dɔaaŋ amäni cäŋ kɛl.

³³ Kä nɛy tin /ka̱n pën ben wi̱i̱ yi̱kädä kä ji̱, bi ka nyin cio̱o̱rädu kɛnɛ pa̱ru. Kä bi kuayku diaal li̱w kɛ rur bumädiɛn ko̱o̱r.

³⁴ Kä bi nɛmɛ a nyuuth kä ji̱. Mi wä gaatku da̱ŋ rɛw Ɣɔp-ni kɛnɛ Pi-nɛ-ɣath li̱w kɛ cäŋ kɛl.

³⁵ Kä bä rɔ cu kuëny bo̱o̱th palä mi ŋa̱th, mi bi la̱t ni min te lɔɔcdä kɛnɛ min caarä. Kä bä jɛ moc kuay, kä bɛ lät nhiam kua̱rä min cä kuany amäni cäŋ kɛl.

³⁶ Kä ramɔ bi duɔth dhɔru mɔ, bɛ jɛ ben thiec kɛ yio̱w kɛnɛ mi̱eth, kä bɛ thiec kɛ ɣöö bɛ jɛ luäk kɛ la̱t palä, kɛ ɣöö dëërɛ rɔ jek mi̱eth mi camä.’ ”