1 Tham 18 - RUAC KUƆTH IN RƐL RƆ

¹ Kä mëë cɛ thuɔ̱k kɛ ruac kɛ Thɔɔl, cu Jo-na-than Ɛ nhɔk ce̱tkɛ puɔ̱nydɛ.

² Kä cuɛ cu te kɛɛl kɛn ɛ Thɔɔl niɛ cäŋ ɔ, /kenɛ jɛ lɛ nhök loc dhɔr gua̱n.

³ Kä cu Jo-na-than ruac mat kɛnɛ Dee-bid, kɛ ɣöö nhɔkɛ jɛ ce̱tkɛ puɔ̱nydɛ.

⁴ Kä cu Jo-na-than bi̱i̱dɛ in te puɔ̱ɔ̱nydɛ ka̱m Dee-bid, kɛnɛ thɛpdɛ, kɛ bäärɛ, amäni la̱a̱kdɛ bä.

⁵ Kä gua̱th diaal tin la Thɔɔl Dee-bid a jäk kä thi̱n, la gɔwkɛ kɛ jɛ. Cu Thɔɔl jɛ cu jak kä bo̱o̱th rɛ̈m. Kä cu lo̱c nɛɛni diaal tɛɛth, amäni bööth Thɔɔl bä.

Nyi̱er Thɔɔl kɛ Dee-bid

⁶ Kä min luny Dee-bid jɔk näk ran Pi-li-thɛt, cu män ben raar rɛy wi̱i̱ni I-thɛ-rɛl diaal, bäkɛ kä kuäär ni Thɔɔl tuarkɛ kä duthkɛ, kɛ tuaari tɛthkä lɔaac kɛ buɔ̱l.

⁷ Kä min duthkɛ, cukɛ tuar i̱, “Ci Thɔɔl nɛy ti bathdɔɔr näk, Kä ci Dee-bid nɛy ti bathdɔɔri wäl näk.”

⁸ Kä cu Thɔɔl kɛ̈c ɛlɔ̱ŋ, kɛ ɣöö ci ruac ɛ mɔ lɔcdɛ lo̱k. Kä cuɛ wee i̱, “Laar kɛnɛ Dee-bid tëë bathdɔɔri wäl, kä ɣän ta̱a̱ kɛ bathdɔɔr. Kä ɛŋu derɛ ku lɛ jek ɔ ciɛ ni kuäär?”

⁹ Niɛ cäŋ ɛmɔ cu Thɔɔl Dee-bid tit.

¹⁰ Mëë ruɔ̱ndɛ cu yiëë mi jiääk mi bä kä Kuoth ben kä Thɔɔl, cuɛ yɔ̱ŋ niɛ dhɔrɛ, kä puɔ̱ɔ̱t Dee-bid thom ce̱tkɛ min wen. Kä Thɔɔl te mutdɛ tetädɛ,

¹¹ Kä cuɛ mutdɛ kal nhial kiɛ riw, larɛ jɛ kɛ lɔcdɛ i̱, “Bä Dee-bid yiath puɔ̱ɔ̱ny duëël.” Duundɛ ɣöö cu Dee-bid ɛ kɔl ni kä rɛɛw.

¹² Dual Thɔɔl kɛ Dee-bid, kɛ ɣöö ci Kuoth Nhial jiɛɛn kä jɛ, kä tëë kɛɛl kɛ Dee-bid.

¹³ Cu Thɔɔl Dee-bid woc kutdɛ, kä cuɛ jɛ jak kä bo̱o̱th bathdɔɔrä. Kä cu Dee-bid nɛɛkɛ bo̱th ko̱o̱r.

¹⁴ Kä cu tëë diaal tëë cɛ la̱t gɔw, kɛ ɣöö te Kuoth Nhial kɛɛl kɛ jɛ.

¹⁵ Kä mëë ci Thɔɔl ɛ nɛn i̱ gɔw ti diaal kɛ jɛ cuɛ dual kɛ Dee-bid.

¹⁶ Kä cua Dee-bid nhɔk ɛ ji̱ I-thɛ-rɛl diaal kɛnɛ ji̱ Juda. Kɛ ɣöö cɛ kɛ böth ko̱o̱r.

Kuën Dee-bid kɛ nyaa Thɔɔl

¹⁷ Ɛ jɛn cu Thɔɔl Dee-bid jiök i̱, “Nyaadä min di̱i̱t ni Me-rɛ̈b ɛn. Ɣän bä ka̱m ji̱ ala ciekdu. Bi lät ni ɣä ikä kɛ buɔ̱m, tɛr ko̱o̱ri Kuɔth Nhial.” Kɛ ɣöö car Thɔɔl ɛ kɛ lɔcdɛ i̱, “A jɛ /cä näk ɛ ɣän, a jɛ na̱kɛ ɛ ji̱ Pi-li-thɛt.”

¹⁸ Kä cu Dee-bid Thɔɔl loc i̱, “Ɛ ɣän ŋa kä ɛ dhɔra mia̱a̱ ni kä I-thɛ-rɛl, min dëë ɣän a cɔw nyaa Kua̱r kɛ jɛ?”

¹⁹ Kä kɛ gua̱a̱th in dëë Me-rɛ̈b nyaa Thɔɔl ka̱m Dee-bid, cua ka̱m Ɛ̈d-ri-el raan Mɛ-ɣo-lath ala ciekdɛ.

²⁰ Kä täämɛ cu Mi-kal nyaa Thɔɔl Dee-bid lɛ nhɔk. Kä cua la̱r Thɔɔl, kä cuɛ lɔcdɛ nhɔk.

²¹ Kä cu Thɔɔl ɛ lɛni car kɛ lɔcdɛ wee i̱, “A jɛ ka̱mä jɛ, dɔ̱ŋ ba mi ka̱a̱pä ni jɛ, dɔ̱ŋ ba jɛ cu näk ɛ ji̱ Pi-li-thɛt.” Kɛ kui̱c ɛmɔ cu Thɔɔl Dee-bid nyɔk kɛ jiök i̱, “Ɛn täämɛ bia̱ cɔw nyaadä.”

²² Kä cu Thɔɔl la̱a̱tkɛ jiök i̱, “Ruacɛ kɛ Dee-bid gekä, jiökɛ jɛ i̱ ‘Kuäär tɛth lɔcdɛ kɛ ji̱, kä bööthkɛ diaal nhɔakɛ ji̱ ɛn täämɛ, kua̱ cɔw nyaa kua̱r.’ ”

²³ Kä cu la̱a̱t kua̱r ruac ɛmɔ lat ji̱th Dee-bid. Kä cu Dee-bid wee i̱, “Guic yɛn ɛ täämɛ ɛ mi tɔt ɛn ɣöö bia̱ cɔw nyaa kua̱r, guɛcä jɛ kä ɣä /cɛ bi ben, ɛ ɣän can mi /ca ŋäc?”

²⁴ Kä cu bööth Thɔɔl la̱r min ci Dee-bid ɛ lar.

²⁵ Kä cu Thɔɔl kɛ jiök i̱, “Wiaa jiök ɛ jɛ i̱ ‘Ɛ kuäär i̱ thilɛ ɣɔ̱k kuën ti göörä, göörä ni ɣöö bi nɛy ti kuɔ̱r näk kä ji̱ Pi-li-thɛt ti /ka̱n cuɛl, kɛ ɣöö ba cut kua̱r kä ji̱ tɛ̈rɛ.’ ” Nɔmɔ ɛ ca̱p mi ci Thɔɔl ɛ la̱t kɛ ɣöö ba Dee-bid cu näk ɛ ji̱ Pi-li-thɛt.

²⁶ Kä min ci bööth Thɔɔl laat ti̱ti̱ ben la̱t Dee-bid, cuɛ lɔcdɛ nhɔk ɛlɔ̱ŋ kɛ ɣöö ba cɔw nyaa kua̱r, a /ken kuën ni ben.

²⁷ Cu Dee-bid kɛnɛ nɛɛkɛ wä cua ji̱ Pi-li-thɛt ti kur rɛw näk. Kä cuɛ nɛy ti /ka̱n cuɛl gupkiɛn ŋok kä cuɛ kɛ nööŋ, kä cuɛ kɛ thöp kuäär ni kɛ pekdiɛn kɛɛliw, kɛ ɣöö ba cɔw nyaa kua̱r. Kä cu Thɔɔl ɛ ka̱m nyadɛ ni Mi-kal ala ciekdɛ.

²⁸ Kä mëë ci Thɔɔl ɛ ŋa̱c ɛn ɣöö Kuoth Nhial te kɛɛl kɛ Dee-bid, kä nhɔakɛ jɛ ɛ nyadɛ ni Mi-kal,

²⁹ Cu Thɔɔl ŋot kɛ dual kɛ Dee-bid. Kä cua gua̱n tɛ̈rɛ ni ciaŋ.

³⁰ Kä la kua̱r rɛ̈m ji̱ Pi-li-thɛt a bä ko̱o̱r, ce̱tkɛ min wen, kä Dee-bid la nyinkɛ a reep ni rɔ kɛ gɔɔy kä bööth Thɔɔl tin kɔ̱ŋ. Kɛ kui̱c ɛmɔ cua ciötdɛ ŋa̱c ɛlɔ̱ŋ.