1 Tham 17 - RUAC KUƆTH IN RƐL RƆ

Dɛp Gɔl-yath kɛ ji̱ I-thɛ-rɛl

¹ Täämɛ cu ji̱ Pi-li-thɛt nɛɛkiɛn dol kɛ kui̱ ko̱o̱r, kä cukɛ rɔ̱ dol kä Tho-ko wec Juda, kä cukɛ ben pua̱t kam Tho-ko kɛnɛ Ä-dhe-ka rɛy cieŋ Ɛ-pɛc-da-mim.

² Kä cu Thɔɔl kɛnɛ ji̱ I-thɛ-rɛl rɔ dol, kä cukɛ pua̱t lo̱o̱lä Elaa, kä cukɛ tuɔ̱ŋ kööriɛn kuany kɛ ji̱ Pi-li-thɛt.

³ Cu ji̱ Pi-li-thɛt cuɔ̱ŋ wi̱i̱ pa̱a̱m kui̱ lo̱o̱lä, kä te ji̱ I-thɛ-rɛl wi̱i̱ pa̱a̱m kui̱ lo̱o̱lä kui̱c in dɔ̱ŋ, ku lööl lɛ te kamdiɛn.

⁴ Kä cuɛ tekɛ wääth ko̱o̱r mi cu ben raar tuuŋ ji̱ Pi-li-thɛt, mi cɔali Gɔl-yath mi mɔ raan Gɛ̈th, wut mi päär bärɛ kɛ jua̱th te̱tni da̱ŋ bäkɛl.

⁵ Kä te wi̱cdɛ kɛ kum yieethä min yian. Kä cɛ puɔ̱nydɛ moc kɛ köt yieethä, kä ɛn yiëëth ɛ mɔ päär thiakdɛ kɛ yio̱w gi̱eriekni ti bathdɔɔri dhieec.

⁶ Kä cɛ ciökɛ po̱th yiëëth in yian, kä te wuɔ̱ɔ̱kɛ kɛ yiëëth in yian mi cɛ la̱th thi̱n.

⁷ Kä mutdɛ ce̱t taŋdɛ ni kɛ ri̱i̱w jiöŋ, Kä thiak muɔ̱tdɛ päärɛ ni kɛ thiak yio̱o̱ni landiini ti kur bäkɛl. Kä te ro̱o̱m muɔ̱tdɛ nhiamdɛ.

⁸ Cuɛ cuɔ̱ŋ kä cɔɔlɛ tuɔ̱ŋ I-thɛ-rɛl i̱, “Ɛŋu cia cuɔ̱ŋ ɛ cia tuɔ̱ŋ ko̱o̱r kuany ɔ? Kä ciɛ ɣän raan Pi-li-thɛt täämɛ, kä kɛ yɛn nɛɛ Thɔɔl? Kuënyɛ rɔ raan, kä a jɛ bä kä ɣä.

⁹ Mi wee ko̱rä wä luäŋ a bɛ ɣä näk, kä bi nɛy cua̱ ja̱a̱ŋkun. Kä mi wa̱a̱ jɛ wä puɔ̱t a bä näk, kä bi yɛn a ja̱a̱ŋkɔ, bia nɛy lätikä.”

¹⁰ Kä cu raan Pi-li-thɛt wee i̱, “Cä tuɔ̱ŋ I-thɛ-rɛl dɛ̈p ɛn walɛ. Muɔcɛ ɣä raan mi nyiëëny kɛ ɣä.”

¹¹ Kä mëë ci Thɔɔl kɛnɛ ji̱ I-thɛ-rɛl diaal ruac ran Pi-li-thɛt liŋ, cukɛ dual ɛlɔ̱ŋ.

Dee-bid däärwec Thɔɔl

¹² Täämɛ cu Dee-bid a gat wutdä mi raan Ɛp-rath kä Beth-lɛ-ɣɛm ro̱o̱l Juda, mi cɔali Jɛthi, mi tekɛ gaat bädäk. Kä ca wut mi ci dɔŋ mëë Thɔɔl ɛ kuäär.

¹³ Kä gaatkɛ da̱ŋ diɔ̱k tin di̱t cikɛ wä ko̱o̱r kɛɛl kɛ Thɔɔl. Kä kɛn gaatkɛ da̱ŋ diɔ̱k tin ci wä ko̱o̱r ɛ, Ɛli-ab gatdɛ min kɛ̱̈ɛ̱̈, kɛnɛ Ä-bi-na-dab, kɛ Camaa.

¹⁴ Kä Dee-bid ɛ gat in tɔtdiɛn. Kä cu gatdi da̱ŋ diɔ̱k tin di̱t Thɔɔl guɔ̱ɔ̱r,

¹⁵ duundɛ ɣöö Dee-bid la bëë kä wee kä Thɔɔl, kɛ ɣöö bɛ det gua̱n ben la̱a̱k kä Beth-lɛ-ɣɛm.

¹⁶ Kä la raan Pi-li-thɛt ji̱ I-thɛ-rɛl ben a dɛp, kɛ runwaŋ kɛnɛ thiaŋ kɛ ni̱n ti jiɛɛn ŋuaan.

¹⁷ Kɛ cäŋ kɛl, cu Jɛthi gatdɛ ni Dee-bid jiök i̱, “Käni dieny nuɔ̱p mɔ ci tuakɔ, kɛnɛ jurayni da̱ŋ wäl ti̱ti̱, nöŋnikɛ gaatmuɔɔr wi̱c kɛ pɛ̈th.

¹⁸ Kä nöŋni bööth rɛ̈mdiɛn ruɔt caak da̱ŋ wäl ti̱ti̱ bä, kä guic ta̱a̱ ganmuɔɔr, kä nöŋni ŋɔak kä kɛ.”

¹⁹ Kä kɛn kɛ Thɔɔl kɛ ji̱ I-thɛ-rɛl diaal, tekɛ lo̱o̱lä Elaa nyieenykɛ kɛ ji̱ Pi-li-thɛt.

²⁰ Kä nikɛ runwaŋ cu Dee-bid det ba̱ny yieen deet, cuɛ kuakɛ yian, kä cuɛ wä ce̱tnikɛ min ci Jɛthi ɛ la̱r jɛ cuɛ cop wi̱c kä wä naath ko̱o̱r ɛ cuakɛ cio̱k ko̱o̱r.

²¹ Kä cu ji̱ I-thɛ-rɛl kɛnɛ ji̱ Pi-li-thɛt tuɔ̱ŋ ko̱o̱r kuany a guɛckɛ ni rɔ.

²² Kä cu Dee-bid ŋɔak ba̱ny nɛy tin gueec kuakni, kä cuɛ riŋ tuɔ̱ŋni ko̱o̱r, cuɛ wä jek kɛ gaatman.

²³ Kä min ruacɛ kɛ kɛ, nɛnɛ, cu wääth ni Gɔl-yath raan Pi-li-thɛt kä Gɛ̈th, ben raar tuuŋ ji̱ Pi-li-thɛt, latdɛ tëë cɛ kɔn lat kɛ nhiam. Kä cu Dee-bid ɛ liŋ.

²⁴ Kä mëë ci ji̱ I-thɛ-rɛl diaal ɛ nɛn, cukɛ dual ɛlɔ̱ŋ kä cukɛ rɔ bar kɛ jɛ.

²⁵ Kä cu ji̱ I-thɛ-rɛl wee i̱, “Nɛɛni wut ɛ bëë mɔ? Ɛ puc bëë kɛ ɣöö bɛ ji̱ I-thɛ-rɛl ben dɛ̈p. Kä ram ɛ bi jɛ näkɔ, bi kuäär ni Thɔɔl jɛ moc ria̱ŋ mi di̱i̱t, kä bɛ jɛ ka̱m nyaadɛ bä, kä ci dhɔr gua̱n tho̱lbo̱k bi luny, kä I-thɛ-rɛl.”

²⁶ Kä cu Dee-bid nɛy tin te cuŋä kuthdɛ thiec i̱, “Ɛŋu mi ba lät kä ram mi ci jɛ näk, ɛn raan Pi-li-thɛt ɛmɔ, a cɛ po̱c I-thɛ-rɛl woc? Kä ɛŋa ɛn raan Pi-li-thɛt ɛ /ka̱n cuɛl ɔ, min dëë nɛɛ Kuɔth mi tëk ben dɛ̈p ɔ?”

²⁷ Kä cu naath ɛ luɔ̱c ni min ci kɛn ɛ kɔn lar i̱, “Nɛmɛ ɛ jɛn min ba lät kä ram in bi jɛ näk.”

²⁸ Täämɛ cu däman in di̱i̱t ni Ɛli-ab ɛ liŋ min ruacɛ kɛ naath. Kä cuɛ kɛ̈c kɛ Dee-bid, kä cuɛ wee i̱, “Ɛŋu nööŋ ji̱ ɛn wa̱nɛ mi ɔ? Kä ɛŋa ci ba̱ny det tin tɔt tin kɔɔn ɔ rɛy dɔaar? Ŋa̱cä liakdu, kɛnɛ thil lɔaacdu. Bi nikɛ ɣöö bi ko̱r ben nɛn.”

²⁹ Kä cu Dee-bid wee i̱, “Ɛŋu cä lɛlɔ ɛn täämɛ? Ci ɣän lar ni riet kä rɔa?”

³⁰ Kä cuɛ jiɛɛn kä jɛ wee kä radɔ̱diɛn, kä cuɛ ruac kɛ jɛ nikɛ jɛn duɔ̱ɔ̱p in nhiam. Kä cua jɛ loc bä nikɛ jɛn duɔ̱ɔ̱p in wen.

³¹ Kä mëë ca ruac ëë lat Dee-bid ɛ liŋ, cuakɛ ben la̱t Thɔɔl. Kä cuɛ jɛ jäk kä raan.

³² Kä cu Dee-bid Thɔɔl jiök i̱, “A thil ram mi dual kɛ kui̱ ran Pi-li-thɛt. Bi ja̱ŋdu wä nyiëëny kɛ jɛ.”

³³ Kä cu Thɔɔl Dee-bid jiök i̱, “/Ci ro̱ŋ kɛ ɣöö bi wä nyiëëny kɛ jɛn raan Pi-li-thɛt ɛmɔ. Kɛ ɣöö ɛ ji̱n gat, kä jɛn ɛ raan ko̱o̱r ni kuɛ̈ɛ̈kädɛ.”

³⁴ Duundɛ ɣöö cu Dee-bid Thɔɔl jiök i̱, “Ɣän la yienä det gua̱a̱r. Mi ci lony kiɛ kuaylɛt dɔ rɔɔmä käp rɛy deet.

³⁵ La jɛ a guɔ̱ɔ̱rä kä bä nyiëëny kɛ jɛ mäni mi cä ɣar thokdɛ. Kä mi cɛ rɔ riet ɣä la ka̱a̱pä jɛ ti̱kdɛ, bä yiath a bä näk.

³⁶ Ɣän cä lony kɛnɛ kuaylɛt näk. Ɛn raan Pi-li-thɛt ɛ /ka̱n cuɛlɛ bɛ ce̱tkɛ kɛl kä kɛ, kɛ ɣöö cɛ nɛɛ Kuɔth in tëk dɛ̈p.”

³⁷ Kä cu Dee-bid wee i̱, “Bi Kuoth Nhial ëë käänä kä lony kä käänä kä kuaylɛt, bɛ ɣä kän tetdä ran Pi-li-thɛt ɛ mi.” Kä cu Thɔɔl ɛ jiök i̱, “Wër, kä bi Kuoth Nhial tekɛ ji̱!”

³⁸ Kä cu Thɔɔl Dee-bid kum kɛ kuak köörɛ. Cuɛ wi̱cdɛ moc kum yieethä min yian, kä cuɛ puɔ̱nydɛ po̱th yiëëth.

³⁹ Kä cu Dee-bid thɛpdɛ yian jɔkdiɛn kä cuɛ ja̱l ɣɔ̱n kɛ kɛ, kɛ ɣöö /ken kɛ me̱t ciɛŋ. Cuɛ Thɔɔl jiök i̱, “/Cä bi wä kɛ kɛn ti̱ti̱. Kɛ ɣöö /ka̱n kɛ me̱t ciɛŋ.” Kä cuɛ kɛ ka̱m raar.

⁴⁰ Kä cuɛ kuakɛ ka̱n, kä cuɛ rɔ kuëny guiy da̱ŋ dhieec ti puath puaath rɛy waŋ, kä cuɛ kɛ la̱th rɛy gökädɛ. Kä te bäärɛ te̱tädɛ, kä cuɛ ben thiekä ran Pi-li-thɛt.

Juc Dee-bid kɛ Gɔl-yath

⁴¹ Kä cu raan Pi-li-thɛt ben thiekä Dee-bid, a te ro̱o̱m muɔ̱tdɛ nhiamdɛ.

⁴² Kä mëë cɛ Dee-bid guic, cuɛ jɛ cany. Kɛ ɣöö ɛ dhɔl, mi gɔaa guecdɛ.

⁴³ Kä cuɛ Dee-bid jiök i̱, “A ku ɣän ɛ jio̱k, mɔ bëë kä ɣä mɔ kɛ kɛtni?” Kä cuɛ Dee-bid kuɛth nikɛ kuthkɛ.

⁴⁴ Kä cuɛ Dee-bid jiök i̱, “Bër kä ɣä, bä ri̱ŋdu ben ka̱m diit nhial kɛnɛ lëy dɔaar.”

⁴⁵ Kä cu Dee-bid ɛ jiök i̱, “Bër kä ɣä kɛ mut kɛnɛ thɛp kɛ yiëëth in gaŋi ciöku. Kä bä ben kä ji̱ kɛ ciöt Kuɔth Nhial in la Ruey Ɣɔaa, Kuoth ji̱ I-thɛ-rɛl, tin ci dɛ̈p.

⁴⁶ Ɛn walɛ bi Kuoth Nhial ji̱ ka̱m ɣä, kä bä ji̱ näk, a bä wi̱cdu ŋuɔ̱k raar. Kä bä riŋ nɛɛni Pi-li-thɛt ka̱m diit nhial kɛnɛ lëy dɔaar ɛn walɛ. Kä ba jɛ cu ŋa̱c ɛ ji̱ wec muɔ̱ɔ̱n diaal Ɛn ɣöö te I-thɛ-rɛl kɛ Kuoth,

⁴⁷ Kä ba ŋa̱c ɛ duɔl ɛ mi ɛn ɣöö /ciɛ thɛp kä /ciɛ mut kän Kuoth Nhial ɛ nɛɛkɛ mɔ. Kɛ ɣöö ɛ ko̱r Kuɔth Nhial bɛ yɛ ka̱m nɛy.”

⁴⁸ Kä mëë ci raan Pi-li-thɛt ben kä Dee-bid, cu Dee-bid ben kɛ pɛ̈th nhiam ko̱o̱r a römɛ kɛ raan Pi-li-thɛt.

⁴⁹ Kä cu Dee-bid tetdɛ la̱th rɛy go̱kä kä cuɛ guɛɛy ka̱m raar, kä cuɛ jɛ yuɔr kɛ piwit, cuɛ raan Pi-li-thɛt bök ni nhiam kaandɛ. Kä cu guɛɛy coth ni däärɛ, kä cuɛ tɛɛth kɛ nhiamdɛ.

⁵⁰ Inɔ cu Dee-bid raan Pi-li-thɛt joc kä cuɛ jɛ näk kɛ bäär kɛnɛ guɛɛy. Kä thilɛ mut mi te tetädɛ.

⁵¹ Kä cu Dee-bid riŋ, cuɛ wä cuɔ̱ŋ wi̱i̱ ran Pi-li-thɛt, kä cuɛ thɛpdɛ gueeth raar gökädɛ, cuɛ jɛ näk kä cuɛ wi̱cdɛ ŋok kɛ jɛ. Mëë ci ji̱ Pi-li-thɛt ɛ nɛn ɛn ɣöö ci wääthdiɛn li̱w, cukɛ rɔ bar.

⁵² Kä cu ji̱ I-thɛ-rɛl kɛnɛ ji̱ Juda rɔ jiɛc kɛ ko̱o̱k guɔ̱ɔ̱rkɛ ji̱ Pi-li-thɛt a räth ni lo̱o̱lä amäni thok cieŋ Ɛk-ron, cua ji̱ Pi-li-thɛt näk dup in jiɛc ni kä Cä-ra-yim aräth ni kä Gɛ̈th kɛnɛ Ɛk-ron.

⁵³ Kä cu ji̱ I-thɛ-rɛl rɔ ri̱t jucädiɛn, kä cukɛ wecdiɛn ben pɛc.

⁵⁴ Kä cu Dee-bid wi̱c ran Pi-li-thɛt naŋ kä Jɛ-ru-tha-lɛm. Kä cuɛ mutdɛ la̱th kɛmɛkädɛ.

Ŋäc Thɔɔl kɛ Dee-bid

⁵⁵ Mëë ci Thɔɔl ɛ nɛn i̱ ci Dee-bid nyiëëny kɛ raan Pi-li-thɛt, cuɛ Ä-bi-ner bööth rɛm thiec i̱, “Ɛ gat ŋa ɛn dhɔl ɛ mi?” Kä cu Ä-bi-ner wee i̱, “Ce̱tnikɛ ciöt Kuɔth, ɣän kuecä jɛ.”

⁵⁶ Kä cu kuäär wee i̱, “Go̱rɛ jɛ ɛ gat ŋa ɛn dhɔl ɛ mi.”

⁵⁷ Kä mëë ci Dee-bid luny jɔk näk ji̱ Pi-li-thɛt, cu Ä-bi-ner ɛ nööŋ nhiam Thɔɔl te wi̱c ran Pi-li-thɛt tetädɛ.

⁵⁸ Kä cu Thɔɔl ɛ thiec i̱, “Ɛ ji̱n gat ŋa, ma̱a̱th dhɔlɛ?” Kä cu Dee-bid ɛ loc i̱, “Ɛ ɣän gat jäŋädu ni Jɛthi raan Beth-lɛ-ɣɛm.”