1 Tham 16 - RUAC KUƆTH IN RƐL RƆ

Kuëny Dee-bid ala kuäär

¹ Kä cu Kuoth Nhial Tha-muɛl jiök i̱, “Ɛ bi Thɔɔl ku par amäni nɛy, kä nɛɛni jɛ cä lo̱k ɛn ɣöö ba kuäär kä I-thɛ-rɛl? Thieŋ tuuŋdu kɛ liɛɛth, kä bi̱i̱ ben jäk kä Jɛthi raan Beth-lɛ-ɣɛm kɛ ɣöö cä rɔ moc kuäär rɛy gankɛ.”

² Kä cu Tha-muɛl wee i̱, “Kä bä ku lɛ wä i̱di? Kɛ ɣöö mi wä Thɔɔl ɛ wä liŋ, bɛ ɣä näk.” Kä cu Kuoth Nhial wee i̱, “Naŋ thäk kɛ ji̱ kɛɛl, kä bi cu wee ‘Ba̱kɛ ɣöö bä Kuoth Nhial ben thöp muc.’

³ Kä cɔl Jɛthi kɛ muc, kä bä ji̱ nyuɔ̱th min bi la̱t. Kä biɛ cu yi̱r ala kuäär ɛn ram min bä la̱r ji̱.”

⁴ Cu Tha-muɛl la̱t ni min ci Kuoth Nhial ɛ lar, cuɛ ben kä Beth-lɛ-ɣɛm. Kä cu bööth wec ɛ ben lor kɛ dual, kä cukɛ wee i̱, “Ɛ mal bëë ji̱ mɔ jɔɔk?”

⁵ Kä cuɛ wee i̱, “Ɛ mal. Ɣän ba̱a̱ kɛ ɣöö bä Kuoth Nhial ben thöp muc. Lɛ̈yɛ rɔ, kä bia wanɛ muc thöp kɛɛl.” Kä cuɛ Jɛthi lɛ̈y kɛnɛ gaatkɛ, kä cuɛ kɛ cɔal guäth mucä.

⁶ Mëë cikɛ ben, cuɛ Ɛli-ab guic kä cuɛ wee i̱, “Ɛ puc min ci Kuoth Nhial ɛ yi̱r te nhiamdɛ mi.”

⁷ Duundɛ ɣöö cu Kuoth Nhial ɛ jiök i̱, “Cu pëk kɛ nëndɛ kɛnɛ bärɛ, ɣän cä lo̱k. Kɛ ɣöö ɣän cä guic ni min nɛɛn naathɛ. Kɛ ɣöö guic naath ni min te raar, kä ɣän kua̱ lɛ guic ni lɔc.”

⁸ Kä cu Jɛthi Ä-bi-na-dab cɔl, kä cuɛ wä kɛ nhiam Tha-muɛl. Kä cu Tha-muɛl wee i̱, “Ɛ ɣän i̱ /ken Kuoth Nhial ɛ kuany bä ɛn ram ɛmɛ.”

⁹ Kä cu Jɛthi Camaa jak kä wä. Kä cu Tha-muɛl wee i̱, “Ɛ ɣän i̱ /ken Kuoth Nhial ɛ kuany bä ɛn nɛmɛ.”

¹⁰ Kä cu Jɛthi gaatkɛ da̱ŋ bärɔw jak kä wä kɛ nhiam Tha-muɛl. Kä cu Tha-muɛl ɛ jiök i̱, “/Ken Kuoth Nhial kɛ kuany kɛn nɛy ti̱ti̱.”

¹¹ Kä cu Tha-muɛl ɛ thiec i̱, “Kɛ kɛn gaatku diaal tëë wa̱nɛ ti?” Kä cuɛ loc i̱, “Ci duɔth ni gat in tɔtdiɛn jɔ̱ɔ̱r, ɛ jɛn guic det ɔ.” Kä cu Tha-muɛl wee i̱, “Jäk niɛ kä raan a jɛ bä. Kä canɛ bi nyuur amäni mi cɛ ben wa̱nɛ mi.”

¹² Kä cuɛ raan ja̱k kä cuɛ ben. Kä jɛn tëë kɛ nhiam mi gɔaa, kɛ wäŋ ti gɔw, kä gɔaa puɔ̱nydɛ. Kä cu Kuoth Nhial wee i̱, “Jiɛc rɔ, kä yi̱rɛ, ɛ jɛn.”

¹³ Kä cu Tha-muɛl tuŋ in te liɛɛth thi̱n ka̱n, kä cuɛ jɛ yier rɛy gan man. Kä cu buɔ̱m yieekä Kuɔth Nhial ben kä Dee-bid ɛn cäŋ ɛmɔ a wee wä. Kä cu Tha-muɛl wä kä Rama.

Lät Dee-bid kɛ Thɔɔl ikä

¹⁴ Täämɛ cu yiëë Kuɔth Nhial jiɛɛn kä Thɔɔl, kä cu yiëë mi jiääk mi bä kä Kuoth Nhial ben kä jɛ.

¹⁵ Kä cua Thɔɔl jiök ɛ la̱a̱tkɛ i̱, “Nɛnɛ ci yiëë mi jiääk mi bä kä Kuoth ben kä ji̱.

¹⁶ Kä jio̱kni nɛy kɔn la̱tku ti te nhiamdu ti, kɛ ɣöö ba̱kɔ ram mi ŋäc puɔ̱t thuɔɔm go̱r. Kɛ ɣöö mi wä yiëë in jiääk in bä kä Kuoth Nhial ben kä ji̱, bɛ thom puɔ̱t, kä bɛ cu jiɛn.”

¹⁷ Kä cu Thɔɔl la̱a̱tkɛ ku jiök i̱, “Go̱rɛ ɣä ram mi ŋäc puɔ̱t thuɔɔm agɔaa, kä nöŋɛ jɛ ɣä.”

¹⁸ Kä cu ŋuɛ̈t kɛl ɛ loc i̱, “Ɣän Cä gat Jɛthi raan Beth-lɛ-ɣɛm nɛn, jɛn ŋäcɛ puɔ̱t agɔaa, ɛ wut mi gɔaa kä ŋɛ̈ny, ɛ wut ko̱o̱r kä ŋäcɛ ruac. Kä te Kuoth Nhial kɛɛl kɛ jɛ.”

¹⁹ Kɛ kui̱ ɛmɔ, cu Thɔɔl Ja̱a̱k jäk kä Jɛthi wee i̱, “Jäk ni ɣä kä gatdu ni Dee-bid min guic det.”

²⁰ Kä cu Jɛthi muul ka̱n, kä cuɛ jɔkdɛ moc kɛ juray kɛnɛ ɣök kɔaŋ, kɛ dɛy deet böwni cuɛ kɛ jäk kä Thɔɔl kɛ gatdɛ ni Dee-bid.

²¹ Kä cu Dee-bid ben kä Thɔɔl, kä cuɛ jɛ lät ikä. Kä cu Thɔɔl ɛ nhɔk ɛlɔ̱ŋ, kä cua ro̱o̱m muɔ̱tdɛ.

²² Kä cu Thɔɔl Jɛthi jäk kä raan jiök ɛ jɛ i̱, “Ɛ Dee-bid lätdä i̱ kä, kɛ ɣöö nhɔakä jɛ.”

²³ Kä mɔ ci yiëë in jiääk in bä kä Kuoth ben kä Thɔɔl ɔ, la Dee-bid thom a puɔ̱ɔ̱t. La yiëë in jiääk a jiɛɛn kä jɛ, kä bɛ cu jiɛn.