1 Tham 15 - RUAC KUƆTH IN RƐL RƆ

Ko̱r kɛ ji̱ Ä-ma-lek

¹ Kä cu Tha-muɛl Thɔɔl jiök i̱, “Ci Kuoth Nhial ɣä jäk kä ji̱, bä ji̱ yier ala kuäär nɛɛnikɛ ni ji̱ I-thɛ-rɛl. Täämɛ liŋ ruaacni Kuɔth Nhial.

² Nɛmɛ ɛ min laar Kuoth Nhial in la Ruey Ɣɔaa ɛ i̱, ‘Bä ji̱ Ä-ma-lek duäc kɛ mëë cikɛ ji̱ I-thɛ-rɛl päth dup, mëë bäkɛ raar kä I-jëp.

³ Wër ɛn täämɛ wër näk ji̱ Ä-ma-lek, näk tin diaal tin tekɛ kɛ. Cu duɔ̱ɔ̱r päl thi̱n, näk wutni diaal kɛ män, kɛ gaat, ɣɔ̱k, kɛ muɔ̱li kɛ det kɛ thɔ̱a̱rɔa̱a̱li.’ ”

⁴ Kä cu Thɔɔl naath cɔal kä Tɛ-la-im, kä cuɛ kɛ kuɛn ala nɛy ti bathdɔɔri ti kur rɛw, kɛ nɛy ti bathdɔɔri da̱ŋ wäl kä Juda.

⁵ Kä cu Thɔɔl ben liep tɔ̱ɔ̱cä rɛy lo̱o̱lä wec ji̱ Ä-ma-lek.

⁶ Kä cuɛ ji̱ Kɛɛn jiök i̱, “Wuɔcɛ rɔ rɛy ji̱ Ä-ma-lek, kiɛ bä yɛ näk kɛ kɛ kɛɛl. Kɛ ɣöö cia ji̱ I-thɛ-rɛl diaal lät kä mi gɔaa mëë bäkɛ raar kä I-jëp.” Cu ji̱ Kɛɛn jiɛɛn rɛy ji̱ Ä-ma-lek.

⁷ Kä cuɛ ji̱ Ä-ma-lek joc ni kä Ä-wi-la a räth ni kä Cur min la nhiam I-jëp.

⁸ Kä cuɛ Ä-gag käp a tëk, kä cuɛ nɛy diaal näk ko̱o̱r.

⁹ Duundɛ ɣöö /ken Thɔɔl Ä-gag näk, kɛnɛ det tin gɔw, kɛnɛ ɣɔ̱k, kɔa̱a̱l tin ci buuth kɛnɛ rueeth deet rɔɔmni, kɛ tin diaal tin gɔw /kenɛ kɛ näk. Kä cuɛ tin diaal tin thil luɔt näk.

Lo̱k Thɔɔl ala kuäär

¹⁰ Kä cu ruac Kuɔth Nhial ben kä Tha-muɛl wee i̱,

¹¹ “Cä duer kɛ ɣöö cä Thɔɔl jak kä Kuäär. Cɛ kac jɔk kä ɣä, kä /cɛ lät ni luëëkä.” Kä cu lɔc Tha-muɛl jiääk, kä cuɛ Kuoth Nhial pal kɛ wäär kɛɛliw.

¹² Ni kɛ runwaŋ cu Tha-muɛl keer kɛ ɣöö bɛ Thɔɔl wä lor kä cua jiök i̱, “Ci Thɔɔl wä kä Kar-mɛl. Kä cɛ rɔ ta̱th cuut ɛn wi̱ni, kä cuɛ rɛ̈t kä Gil-gal.”

¹³ Cu Tha-muɛl ben kä Thɔɔl, kä cu Thɔɔl ɛ jiök i̱, “Ɛ puɔ̱th Kuɔth Nhial tekɛ ji̱. Cä ruac Kuɔth Nhial la̱t.”

¹⁴ Kä cu Tha-muɛl ɛ loc i̱, “Kä ɛŋu liɛŋä ce̱tkɛ muaar ɣɔ̱ɔ̱k kɛnɛ det ɛ?”

¹⁵ Kä cu Thɔɔl ɛ loc i̱, “Nööŋ kɛn kɛ kä ji̱ Ä-ma-lek. Ca ɣɔk tin gɔw kɛnɛ det päl, kɛ ɣöö bakɛ thöp Kuoth Nhial Kuothdu ala muc. Kä cakɔ duɔthkiɛn näk ni kɛn diaal.”

¹⁶ Kä cu Tha-muɛl ɛ jiök i̱, “Cuŋni! Bä ji̱ la̱r min ci Kuoth Nhial ɛ la̱tdä min wa̱r.” Kä cu Thɔɔl ɛ jiök i̱, “Latdɛ.”

¹⁷ Kä cuɛ wee i̱, “A cäŋ guici rɔɔdu a kuiyi waaŋdu, /ciɛ ji̱n bööth thuk duëli I-thɛ-rɛl? Ci Kuoth Nhial ji̱ yier ala kuäär I-thɛ-rɛl.

¹⁸ Kä cɛ ji̱ ja̱k i̱, ‘Wër däk nɛy tɔ̱ ji̱ dueeri tɔ̱tɔ̱, ji̱ Ä-ma-lek, wër nyieenyni kɛ kɛ amäni mi cikɛ thuk.’

¹⁹ Kuɛ la ŋu /keni ruac Kuɔth Nhial liŋ ɔ? Ɛŋu curi ku lɛ la̱t ni mi jiääk waaŋ Kuɔth Nhial ɔ, a bi kɔŋ ni kuak ɔ?”

²⁰ Kä cu Thɔɔl Tha-muɛl jiök i̱, “Ɣän cä ruac Kuɔth Nhial liŋ, cä wä jäkädɛ, cä ji̱ Ä-ma-lek näk kɛn diaal, kä cä Ä-gag kuääriɛn nööŋ.

²¹ Kä /kenɛ naath ɣɔ̱k tin ca pɛ̈c näk, kɛ ɣöö bakɛ ben thöp Kuoth Nhial Kuothdu ala muc kä Gil-gal.”

²² Kä cu Tha-muɛl wee i̱, “A ku Kuoth Nhial nhɔk ni luuri kɛnɛ muc, Ɛ lɔŋ kä ɣöö ba jɔwdɛ luɔ̱th? nɛnɛ, luth gɔaa ni jɛn kä muc, Kä lieŋ gɔaa ni jɛn kä thiɔl rueeth rɔɔmni.

²³ Lo̱kdɛ ce̱tdɛ kɛ duer ti̱tni, kä buɔ̱m wec ce̱tdɛ kɛ jiääk kuthni guäyni. Kɛ ɣöö ci ruac Kuɔth Nhial lo̱k amäni jɛn bä cɛ ji̱ lo̱k ala kuäär.”

²⁴ Kä cu Thɔɔl Tha-muɛl jiök i̱, “Ɣän cä duer. Kɛ ɣöö cä ruac Kuɔth Nhial lo̱k kɛnɛ ruacdu, kɛ ɣöö cä dual kɛ naath a cä liŋ ni ruacdiɛn.

²⁵ Kɛ kui̱c ɛmɔ, ɣän la̱ŋä ni ji̱, päli ɣä duerä, kä luɔcnɛ jɔk kɛɛl kɛ ɣöö dëë Kuoth Nhial wä pal.”

²⁶ Kä cu Tha-muɛl ɛ loc i̱, “Cä bi loc jɔk kɛɛl kɛ ji̱ kɛ ɣöö ci riet Kuɔth Nhial lo̱k, kä cɛ ji̱ lo̱k kɛ ɣöö bia̱ kuäär kä I-thɛ-rɛl.”

²⁷ Kä min jiɛɛn Tha-muɛl, cu Thɔɔl bi̱i̱dɛ käp, kä cuɛ rɛ̈ɛ̈t.

²⁸ Kä cu Tha-muɛl ɛ jiök i̱, “Ci Kuoth Nhial kuäär I-thɛ-rɛl rɛ̈t kä ji̱ ɛn walɛ kä cɛ jɛ ka̱m gua̱n thieekädu, mi gɔaa ni jɛn kä ji̱.

²⁹ Kä ci Kuoth I-thɛ-rɛl kac bi kac, kä cɛ rɔ bi ri̱t. Kɛ ɣöö ciɛ raan, ɛ derɛ rɔ ri̱t.”

³⁰ Kä cu Thɔɔl wee i̱, “Ɣän cä duer. Kä täämɛ ku ɣä moc kɛ luth nhiam bööthnikä kɛnɛ nhiam ji̱ I-thɛ-rɛl, rietnɛ rɔ kɛɛl, kɛ ɣöö dëë Kuoth Nhial Kuothdu wä pal.”

³¹ kä cu Tha-muɛl wä kɛɛl kɛ jɛ, kä cu Thɔɔl Kuoth Nhial pal.

³² Kä cu Tha-muɛl wee i̱, “Nöŋ ni ɣä Ä-gag kuäär ji̱ Ä-ma-lek.” Kä cu Ä-gag ben kä jɛ kɛ ŋa̱th wee i̱, “Ɛ puc ci gua̱a̱th li̱eth thuɔ̱k.”

³³ Kä cu Tha-muɛl wee i̱, “Ce̱tnikɛ mëë ci thɛpdu män jak kä thil gaat, inɔ bä bi muɔɔr thil gat rɛy mään.” Cu Tha-muɛl Ä-gag näk nhiam Kuɔth Nhial kä Gil-gal.

³⁴ Kä cu Tha-muɛl cu wä kä Rama. Kä cu Thɔɔl wä wi̱i̱dɛ kä Giba.

³⁵ Kä /ken Tha-muɛl Thɔɔl lɛ nɛn amäni ni̱n lieth Thɔɔl, duundɛ ɣöö cu Tha-muɛl Thɔɔl par. Kä cu Kuoth Nhial duer kɛ ɣöö cɛ Thɔɔl jak kä kuäär kä I-thɛ-rɛl.