1 Tham 14 - RUAC KUƆTH IN RƐL RƆ

Mak Jo-na-than kɛ ji̱ Pi-li-thɛt

¹ Kɛ cäŋ kɛl cu Jo-na-than gat Thɔɔl ŋuɛ̈t in rɔm yio̱w köörɛ jiök i̱, “Bër wanɛ wi̱c ji̱ Pi-li-thɛt kui̱cɛ dɔŋ ɛ mi.” Kä /kenɛ jɛ la̱r gua̱n.

² Kä Thɔɔl tëë nyuurä piny wec Giba thaar jiaath nöör kä Mig-ron. Tëë kɛɛl kɛ nɛy ti kur bäkɛl.

³ Kä Ä-ɣi-yaa gat Ä-ɣi-tub, däman I-ka-bod, gat Pi-nɛ-ɣath, gat Eli bööth palä Kuɔth Nhial kä Cilo, kä Ä-ɣi-yaa cɛ bi̱i̱ kath la̱th. Kä /ka̱nɛ ŋa̱c ɛ naath ɛn ɣöö ci Jo-na-than wä.

⁴ Kä duɔ̱ɔ̱p in go̱o̱r Jo-na-than wä kɛ jɛ kä ji̱ Pi-li-thɛt, tëë kɛ pääm da̱ŋ rɛw ti di̱t. Cɔal kɛ kɛl i̱ Bo-dhedh, kä cɔal kɛ min dɔ̱ŋ i̱ Cɛ-nɛɛ.

⁵ Lot kɛl ni kui̱c caam nhiam Mik-mac, kä min dɔ̱ŋ tëë kui̱c cuëëc nhiam Gabä.

⁶ Kä cu Jo-na-than ŋuɛ̈t in rɔm mutdɛ jiök i̱, “Bër wanɛ wi̱c nɛɛni ti /ka̱n cuɛl ti. Dɔ̱ŋ bi Kuoth Nhial te kɛɛl kɛ kɔn. Thilɛ mi dëë Kuoth Nhial dhal kɛ ɣöö derɛ naath kän kɛ nɛy ti ŋuan kɛnɛ nɛy ti tɔt.”

⁷ Kä cu ro̱o̱m muɔ̱tdɛ jɛ loc i̱, “Lätni tɔ̱ diaal tɔ̱ te wi̱i̱du tɔ̱. Ta̱a̱ kɛɛl kɛ ji̱, mɔ te wi̱i̱du mɔ tëë wi̱i̱dä.”

⁸ Kä cu Jo-na-than wee i̱, “Nɛnɛ banɛ nɛy tɔ̱tɔ̱ bäl, kä ban rɔ cu nyuɔ̱th kɛ.

⁹ Kä mi wa kɔn jiök i̱, ‘Liɛpɛ kɔ amäni mi ca̱kɔ ben kä yɛ.’ Ban cuɔ̱ŋ gua̱a̱thdan, /can bi wä kä kɛ.

¹⁰ Kä mi wäkɛ wee i̱, ‘Bia kä nɛy,’ banɛ cu wä. Kɛ ɣöö ci Kuoth Nhial kɛ ka̱m kɔn. Ɛn nɔmɔ bɛ cua̱ nyuuth kä kɔn.”

¹¹ Kä cu kɛn da̱ŋ rɛw rɔ nyuɔ̱th ji̱ Pi-li-thɛt. Kä cu ji̱ Pi-li-thɛt wee i̱, “Nɛ̈nɛ ji̱ Ɣi-bɛ-ru bäkɛ raar rɛy kɔ̱a̱kni, guäth in cikɛ rɔ tɛ̱̈ɛ̱̈ thi̱n.”

¹² Kä cu ji̱ wec Jo-na-than kɛnɛ ro̱o̱m muɔ̱tdɛ cɔl i̱, “Bia kä nɛy ba̱kɔ yɛ ben nyuɔ̱ɔ̱th.” Kä cu Jo-na-than ro̱o̱m muɔ̱tdɛ jiök i̱, “Bër guuri ɣä, kɛ ɣöö ci Kuoth Nhial kɛ ka̱m ji̱ I-thɛ-rɛl.”

¹³ Kä cu Jo-na-than päm kɔt kä te ro̱o̱m Muɔ̱tdɛ kɔɔrɛ. Kä cukɛ tëth nhiam Jo-na-than. Kä näk ro̱o̱m Muɔ̱tdɛ kɛ kɔɔrɛ.

¹⁴ Kɛ mäk ɛ nhiam ɛ mɔ, cu Jo-na-than kɛnɛ ro̱o̱m muɔ̱tdɛ nɛy ti jiɛɛn da̱ŋ rɛw näk, Kɛ gua̱a̱th mi tɔt.

¹⁵ Kä cua dual mi di̱i̱t kä Ji̱ Pi-li-thɛt diaal tin te rɛy ka̱a̱kni kɛnɛ tin te kal, cu mäni ji̱ nyuɔɔni cuɛ kɛ lath kɛ dual. Kä cuɛ piny lath, kä cuɛ tekɛ dual mi di̱i̱t ɛlɔ̱ŋ.

Juc ji̱ Pi-li-thɛt

¹⁶ Kä cu gueec duɔ̱p Thɔɔl tin te kä Giba wec Ben-ya-min ji̱ pi-li-thɛt nɛn bar kɛ rɔ̱ kui̱ni diaal.

¹⁷ Kä cu Thɔɔl nɛy tin tekɛ jɛ kɛɛl jiök i̱, “Kuɛnɛ naath, ɛŋa mi ci jiɛɛn kä kɔn.” Kä min cikɛ rɔ kuɛn, cua Jo-na-than kɛnɛ ro̱o̱m muɔ̱tdɛ jek jɔ̱ɔ̱r.

¹⁸ Kä cu Thɔɔl Ä-ɣi-yaa jiök i̱, “No̱o̱ŋni thanduk matdä ruac Kuɔth wa̱nɛ mi.” Ɛn guäth ɛmɔ cu thanduk matdä ruac Kuɔth Nhial wä kɛɛl kɛ ji̱ I-thɛ-rɛl.

¹⁹ Kä min ruac Thɔɔl kɛ bööth palä, cu nuɛ̈ɛ̈n wec ji̱ Pi-li-thɛt rɔ rep ɛ Lɔ̱ŋ. Cu Thɔɔl bööth palä jiök i̱, “Päl la̱t.”

²⁰ Kä cuɛ nɛy tin te kɛɛl kɛ jɛ mat, kä cukɛ wä ko̱o̱r. Kä cukɛ ji̱ Pi-li-thɛt jëk nuɛ̈ɛ̈n mi di̱i̱t, ɛ na̱kɛ rɔ̱ ni kä rɔ̱.

²¹ Kä cu ji̱ Ɣi-bɛ-ru tin te kɛɛl kɛ ji̱ Pi-li-thɛt ni wen wi̱i̱nikiɛn, rɔ̱ ma̱t ji̱ I-thɛ-rɛl tin te kɛɛl kɛ Thɔɔl kɛnɛ Jo-na-than.

²² Kä mëë ci ji̱ I-thɛ-rɛl diaal tëë ca rɔ̱ tɛ̱̈ɛ̱̈ rɛy päämni wec Ɛ-pa-rim ɛ liŋ i̱ ci ji̱ Pi-li-thɛt rɔ̱ bar, cukɛ rɔ̱ cuɔm kɔɔriɛn kɛ ko̱r.

²³ Inɔ cu Kuoth Nhial I-thɛ-rɛl kän ɛn cäŋ ɛmɔ. Kä cu ko̱r räth a bɛ Beth-a-wɛn bäl.

Tëë ci tuɔɔk kɛ kɔr ko̱r

²⁴ Kä cu ji̱ I-thɛ-rɛl buɔth kɛ näk ɛn cäŋ ɛmɔ. Kɛ ɣöö ci Thɔɔl naath yac i̱, “Kueth akɛ ram ɔ bi mi̱th ɔ ɛn walɛ a /ka̱n rɔ ni col kä ji̱ tɛ̈rä.” Cuɛ thil ram mi läth mi̱eth thokdɛ.

²⁵ Kä cu nɛy diaal ben rɛy ruɔ̱ɔ̱p mi ci thia̱a̱ŋ kɛ tuaar.

²⁶ Mëë cikɛ coth ruup. Cua tuaar jëk pën ni jɛn, kä cuɛ thil ram mi me̱t jɛ, kɛ ɣöö dualkɛ kɛ ya̱c.

²⁷ Kä Jo-na-than /kenɛ ya̱c gua̱n kɛ naath liŋ. Ɛ jɛn cuɛ kɛɛt in te te̱tädɛ cuɔt thi̱i̱kä tuar, kä cuɛ mi̱th kɛ tuaar, a bi wäŋkɛ lɛp kä buɔth.

²⁸ Kä cu ram kɛl ɛ jiök i̱, “Ci guur naath luek kɛ ya̱c wee i̱, ‘Kueth akɛ ram ɔ bi mi̱th ɛn walɛ mɔ.’ ” Ɛ jɛn näk buɔth ɛ naath ɔ.

²⁹ Kä cu Jo-na-than wee i̱, “Kä gua̱a̱r cɛ wec yia̱r, nɛ̈nɛ jɛ ɣän ci waŋdä lɛp i̱di kä buɔth, kɛ ɣöö cä mi tɔt me̱t kä tuar.

³⁰ Derɛ ku lɛ gɔaa i̱di mi /ci naath mi̱th ɛn walɛ kɛ mi̱eth ji̱ tɛ̈riɛn in ca jëk. Kua lɛ mät car bɛ kɛ nɛy ti ku lɛ ŋuan i̱di ca näk tɔ̱ kä ji̱ Pi-li-thɛt.”

³¹ Kä cukɛ ji̱ Pi-li-thɛt joc ɛn cäŋ ɛmɔ ni kä Mik-mac amäni A-ya-lon. Ɛn guäth ɛmɔ cu naath buɔth kɛ näk ɛlɔ̱ŋ.

³² Kä cukɛ kac rɛy kä tin ca pɛ̈c, cua det kɛ ɣɔ̱k kɛ dɛy ɣɔ̱ɔ̱k ŋut kä piny. Kä cukɛ kɛ cam kɛɛl kɛ riɛm.

³³ Kä cukɛ jɛ ben la̱r Thɔɔl i̱, “Ci naath Kuoth Nhial duer duer, kɛ mi̱ethdiɛn kɛ riŋ a te riɛmdɛ thi̱n.” Kä cu Thɔɔl wee i̱, “/Ka̱nɛ ŋa̱th. Lërɛ ɣä päm mi di̱i̱t wa̱nɛ mi.”

³⁴ Kä cu Thɔɔl kɛ jiök i̱, “Da̱kɛ rɛy nath, la̱rɛ kɛ i̱ ‘Ɛ ramɔ nööŋ thääkdɛ kiɛ dɛlɛ, kä bia kɛ ben näk wa̱nɛ mi, kä bia cam. /Cuarɛ Kuoth Nhial dui̱rikä kɛ mi̱ethdun kɛ riŋ kɛɛl kɛ riɛmdɛ.’ ” Cu ram ɔ ben kɛ thääkdɛ kɛ wäär ɛmɔ, kä cua kɛ näk ɛn wi̱ni.

³⁵ Kä cu Thɔɔl Kuoth Nhial ta̱th yi̱k. Kä cua jɛn yi̱k in nhiam mëë cuɛ ta̱th Kuoth Nhial.

³⁶ Kä cuɛ wee i̱, “Guɔ̱ɔ̱rnɛ ji̱ Pi-li-thɛt ɛn wääri banɛ kɛ wä pɛ̈c mäni runwaŋ. Kä /cuanɛ raan päl kä kɛ.” Kä cukɛ wee “Lätni mɔ guici gɔaa ɔ.” Duundɛ ɣöö cu bööth palä wee i̱, “Thiëcnɛ Kuoth kɛ nhiam wa̱nɛ mi.”

³⁷ Kä cu Thɔɔl Kuoth thiec i̱, “Dëë wä kɔɔr ji̱ Pi-li-thɛt? Kä bikɛ ka̱m ji̱ I-thɛ-rɛl?” Kä duundɛ ɣöö /kenɛ jɛ loc ɛn cäŋ ɛmɔ.

³⁸ Kä cu Thɔɔl wee i̱, “Bia wa̱nɛ mi, yɛn bööth nath diaal. Kä biaa ŋa̱cnɛ jɛ, ɛ duer ŋukä ca la̱t ɛn walɛ mɔ.

³⁹ Kɛ ɣöö yacä rɔ kɛ Kuoth Nhial, in kään I-thɛ-rɛl, ɛn ramɔ ci duerɔ ba näk, a cäŋ ɛ gatdä ni Jo-na-than bä.” Kä cuɛ thil ram kɛl rɛy nath mi cu jɛ loc.

⁴⁰ Kä cuɛ ji̱ I-thɛ-rɛl diaal jiök i̱, “Bia te kui̱ kɛl, kä kɔnɛ Jo-na-than ba̱kɔ te kui̱c in dɔ̱ŋ.” Kä cu naath Thɔɔl loc i̱ “Lätni mɔ guici gɔaa ɔ.”

⁴¹ Kä cuɛ wee i̱, “Aɣ Kuoth Nhial ni Kuoth I-thɛ-rɛl, ɛŋu /keni ɣä loc ɔ ɛn walɛ? Mi duer ɛmɛ tëë kä ɣä kiɛ kä Jo-na-than gatdä, Aɣ Kuoth Nhial ni Kuoth I-thɛ-rɛl ŋun U-rim. Kä mi te duer kɛ ji̱ I-thɛ-rɛl, ŋun Tu-mim.” Kä cua Thɔɔl kɛnɛ Jo-na-than, duundɛ ɣöö cu naath thil thi̱n.

⁴² Kä cu Thɔɔl wee i̱, “Yuɔrɛ gaakni kamda kɔnɛ gatdä ni Jo-na-than.” Kä cua Jo-na-than.

⁴³ Kä cu Thɔɔl Jo-na-than jiök i̱, “Läri ɣä min ci la̱t.” Kä cuɛ la̱r jɛ i̱, “Cä tuaar mi tɔt gɔt kɛ wi̱c kɛɛtdä mi te te̱tädä, cä cu cam. Ɛ ɣän ɛ nɛ, a kua li̱w.”

⁴⁴ Kä cu Thɔɔl wee i̱, “Dee Kuoth ɣä näk. Mi /ka̱n ji̱ näk.”

⁴⁵ Kä cu naath Thɔɔl jiök i̱, “Ɛ ba Jo-na-than in ci luäk ɛ di̱i̱t ɛ mi nöŋ ji̱ I-thɛ-rɛl ku näk? Ba̱kɔ ya̱c nikɛ ciöt Kuɔth in tëk, ɛn ɣöö thilɛ miem kɛl mi bi pɛn piny kä jɛ. Kɛ ɣöö min cɛ la̱t walɛ, lätdɛ jɛ kɛ luäk Kuɔth.” Inɔ cu naath Jo-na-than cu kän li̱th.

⁴⁶ Kä /ken Thɔɔl ji̱ Pi-li-thɛt lɛ guɔ̱ɔ̱r. Kä cukɛ cu wä wi̱i̱nikiɛn.

Ruec Thɔɔl kɛnɛ ji̱ dhɔaarɛ

⁴⁷ Ni mëë ku Thɔɔl a kuäär kä I-thɛ-rɛl, cuɛ nyiëëny kɛ ji̱ tɛ̈rɛ diaal kui̱ni diaal, cɛ nyiëëny kɛ ji̱ Mo-ab kɛnɛ ji̱ A-mon, kɛ ji̱ Ɛ-dɔm, kɛnɛ kua̱r Dho-baa, kɛ ji̱ Pi-li-thɛt. Kä gua̱th diaal tɔ̱ cɛ nyiëëny kɛ kɛ tɔ̱, cɛ kɛ joc.

⁴⁸ Cuɛ nyiëëny kɛ kɛ a bum, cuɛ kɛ joc amäni ji̱ Ä-ma-lek, cuɛ ji̱ I-thɛ-rɛl luäk kä tin diaal tin cikɛ ma̱k.

⁴⁹ Kä täämɛ cu gaat Thɔɔl a Jo-na-than, kɛnɛ Ic-wi, kɛ Mal-ki-cuwa. Kä ciööt nyieetkɛ da̱ŋ rɛw a Me-rɛ̈b nyaadɛ min kɛ̱̈ɛ̱̈, kɛnɛ Mi-kal nyam in tɔtdiɛn.

⁵⁰ Kä cu ciöt ciek Thɔɔl a Ä-ɣi-no-am nyaa Ä-ɣi-madh. Kä ciöt kua̱r rɛ̈mdɛ a, Ä-bi-ner gat Ner in la gua̱nlen Thɔɔl.

⁵¹ Kä cu Kic a gua̱n Thɔɔl, kä Ner ɛ gua̱n Ä-bi-ner tin la gaat Ä-bi-el.

⁵² Kɛ ni̱n Thɔɔl cuɛ tekɛ ko̱o̱ri ti bɛ̈c bɛ̈ɛ̈c kɛ ji̱ Pi-li-thɛt. Kä mɔ cɛ wut mi gueth nɛn ɔ la ja matdɛ puɔ̱ɔ̱nydɛ.