1 Tham 13 - RUAC KUƆTH IN RƐL RƆ

Ko̱r kɛ ji̱ Pi-li-thɛt

¹

² Kä cu Thɔɔl nɛy ti bathdɔɔri diɔ̱k kuany kä ji̱ I-thɛ-rɛl. Cu nɛy ti bathdɔɔri rɛw te kɛɛl kɛ Thɔɔl kä Mik-mac, kɛnɛ wec päämni Beth-ɛl, kä cu nɛy ti bathdɔɔr te kɛɛl kɛ Jo-na-than kä Giba wec Ben-ya-min. Kä cuɛ duɔth nath jak kä wä dho̱rikiɛn.

³ Kä cu Jo-na-than ji̱ Pi-li-thɛt tin te kä Gabä joc, kä cu ji̱ Pi-li-thɛt ɛ liŋ. Kä cu Thɔɔl kaaŋ koth rɛy wec kɛɛliw wee i̱ “Ɛ ji̱ Ɣi-bɛ-ru liŋ jɛ.”

⁴ Kä cu ji̱ Pi-li-thɛt diaal ɛ liŋ ɛn ɣöö ci Thɔɔl ji̱ Pi-li-thɛt joc, kɛnɛ ɣöö ca ji̱ I-thɛ-rɛl lo̱k ɛ ji̱ Pi-li-thɛt. Kä cu ji̱ I-thɛ-rɛl rɔ cɔl kɛ ɣöö bikɛ rɔ̱ ma̱t Thɔɔl kä Gil-gal.

⁵ Kä cu ji̱ Pi-li-thɛt rɔ dol kɛ ɣöö bikɛ nyiëëny kɛ I-thɛ-rɛl, thurbiɛɛli ti bathdɔɔri ti jiɛɛn diɔ̱k, kɛ jiöŋkööri ti bathdɔɔri bäkɛl, kɛ rɛm mi di̱i̱t ce̱tdɛ nikɛ liɛt yiëër kɛ ŋuan. Cukɛ ben pua̱t kä Mik-mac, nhiam ɣɔaa kä Beth-a-wɛn.

⁶ Mëë ci ji̱ I-thɛ-rɛl ɛ nɛn i̱ ci ciaaŋdiɛn bɛ̈c, (Kɛ ɣöö ci naath cuuc), cukɛ rɔ tɛ̱̈ɛ̱̈ rɛy kɔ̱a̱kni, kɛ rɛy päämni.

⁷ Kä cu tha̱a̱ŋkiɛn kir Jɔr-dɛn jiath kui̱c, wäkɛ muun Gad kɛnɛ Gil-yad. Cu Thɔɔl ŋot kä Gil-gal, kä nɛy diaal tëë te kɛɛl kɛ jɛ cuɛ kɛ lath kɛ dual.

⁸ Cuɛ liep ɛn wi̱ni kɛ ni̱n bärɔw, tëë ca lar ɛ Tha-muɛl. Duundɛ ɣöö /Ken Tha-muɛl ben kä Gil-gal, kä cu naath wee däk piny kä jɛ.

⁹ Kä cu Thɔɔl wee i̱, “Nöŋɛ ɣä muc in waŋkɛ, kɛnɛ muc malä.” Kä cuɛ muc in waŋkɛ thöp.

¹⁰ Kä niɛ min thukɛ kɛ thöp mucä in waŋkɛ, cu Tha-muɛl cop. Kä cu Thɔɔl ɛ wä lor kä cuɛ jɛ ner.

¹¹ Kä cu Tha-muɛl wee i̱, “Ɛŋu ci la̱t ɔ?” Kä cu Thɔɔl ɛ loc i̱, “Min cä nath nɛn däkɛ piny kä ɣä, kä /keni ben kɛ ni̱n tëë ci lar, kä ci ji̱ Pi-li-thɛt rɔ̱ dol kä Mik-mac,

¹² Cua̱ cu wee i̱, ‘Dɔ̱ŋ bi ji̱ Pi-li-thɛt ɣä ben ma̱k kä Gil-gal, a /ka̱n Kuoth Nhial pal.’ Cua̱ cu jëk ni ɣöö bä muc in waŋkɛ thöp.”

¹³ Kä cu Tha-muɛl ɛ jiök i̱, “Ci lät ni dɔ̱ɔ̱rä, /keni lueek Kuɔth Nhial Kuothdu tit, tëë cɛ la̱t ji̱. Kɛ ɣöö dëë Kuoth Nhial ji̱ jak kä kuäär kä I-thɛ-rɛl amäni cäŋ kɛl.

¹⁴ Duundɛ ɣöö täämɛ /ci kuääru bi cuɔ̱p. Ci Kuoth Nhial raan lɔacdɛ go̱r. Kä cɛ jɛ kuany ala bööth nɛɛnikɛ, kɛ ɣöö /Keni min ca la̱r ji̱ ɛ Kuoth Nhial liŋ.”

¹⁵ Kä cu Tha-muɛl jiɛɛn kä Gil-gal wee kä Giba wec Ben-ya-min. Kä cu Thɔɔl nɛy tin te kɛɛl kɛ jɛ kuɛn ala nɛy ti kur bäkɛl.

¹⁶ Kä cu Thɔɔl kɛnɛ Jo-na-than gatdɛ, kɛ nɛy tin te kɛɛl kɛ kɛ cieŋ kä Gabä wec Ben-ya-min. Kä cu ji̱ Pi-li-thɛt pua̱t kä Mik-mac.

¹⁷ Kä cu ji̱ nyuɔɔni ben raar wi̱c ji̱ Pi-li-thɛt kɛ bun da̱ŋ diɔ̱k. Cu buɔ̱n kɛl wä lotdɛ ni Ɔp-ra mun Cu-al,

¹⁸ Kä cu buɔ̱n in dɔ̱ŋ wä lotdɛ ni Beth-o-ron, kä buɔ̱n in dɔ̱ŋ cuɛ lot ni ke̱y in te lotdä lo̱o̱lä Dhɛ-bo-im min wä därdɔaar.

¹⁹ Kä täämɛ thilɛ dëth ti te muun I-thɛ-rɛl Kɛɛliw. Kɛ ɣöö laar ji̱ Pi-li-thɛt ɛ i̱, “/Ci ji̱ I-thɛ-rɛl rɔ bi lɛ ta̱th mutni.”

²⁰ Duundɛ ɣöö ku ji̱ I-thɛ-rɛl puɔ̱rikiɛn, kɛ carcaarikiɛn, kɛ jiöpnikiɛn kɛ cɔapnikiɛn la wä thɛr kä ji̱ Pi-li-thɛt.

²¹ Ku kɛ yiëëth la thöp kɛ pa̱t cueecä ɣɔ̱ɔ̱k kɛnɛ thër puɔ̱r, yio̱w da̱ŋ rɛw kɛ thër jiöp kɛnɛ carcaar.

²² Inɔ kɛ ni̱n ko̱o̱r thilɛ ram mi te tëtdɛ kɛ mut kä nɛy tin te kɛɛl kɛ Thɔɔl kɛnɛ gatdɛ ni Jo-na-than ɛ ni Thɔɔl puɔ̱nydɛ kɛnɛ gatdɛ ni Jo-na-than.

²³ Kä cu ji̱ Pi-li-thɛt wä wa duɔ̱ɔ̱p Mik-mac yien.