1 Tham 12 - RUAC KUƆTH IN RƐL RƆ

Ruac Tha-muɛl kɛ nath mëë jiɛyɛ

¹ Kä cu Tha-muɛl ji̱ I-thɛ-rɛl jiök i̱, “Nɛ̈nɛ jɛ, ɣän cä tin diaal tin cia la̱tdä liŋ, kä cä yɛ moc kuäär.

² Kä täämɛ kuäär tëë nhiamdun. Kä ɣän cä dɔŋ a ci wi̱cdä low, kä gaatkä te kɛɛl kɛ yɛ ti. Kä ɣän cä te nhiamdun ni mëë ɛ ɣän ŋuɛ̈t mäni walɛ.

³ Kä ɣän yaacä rɔ nhiam Kuɔth Nhial kɛnɛ nhiam kua̱rɛ min cɛ kuany. Ɛ thäk ŋa cä ka̱n ɔ? Kiɛ ɛ muul ŋa cä ka̱n ɔ? Kiɛ ɛŋa mi cä kök ka̱n te̱tkädɛ mɔ? Ɛ rɔ latdɛ nhiamdä kɛ ɣöö bä luɔ̱c jɛ.”

⁴ Kä cukɛ wee i̱, “Thilɛ ram mi ci mac, kiɛ ci yaak, kiɛ ci kän ni duɔ̱ɔ̱r, kiɛ ci kök ka̱n tetkädɛ.”

⁵ Kä cuɛ kɛ jiök i̱, “Kuoth Nhial kɛnɛ kuäärɛ min cɛ kuany kɛ nëënkun ɛn walɛ, kɛ ɣöö thilɛ mi cia jëk kä ɣä.” Kä cukɛ jɛ loc i̱, “Ɛ neenda ɛn Kuoth Nhial.”

⁶ Kä cu Tha-muɛl naath jiök i̱, “Kuoth Nhial ëë kuany Muthɛ kɛnɛ Ä-ron ɛ jɛn ɛn ëë käm guurikun raar muun I-jëp.

⁷ Täämɛ kua cuɔ̱ŋ wa̱nɛ mi bä yɛ la̱t ti̱ti̱ nhiam Kuɔth Nhial lät tëë kän Kuoth Nhial kɛ yɛ kɛ guurikun.

⁸ Mëë ci Je-kɔb wä kä I-jëp kä ca kɛ ciɛŋ ɛ jiäk, cukɛ wiee görkɛ luäk kä Kuoth Nhial, kä cuɛ kɛ jäk kä Muthɛ kɛnɛ Ä-ron tëë nööŋkɛ guurikun raar kä I-jëp, kä cua kɛ jak kä cieŋ ɛn wa̱nɛ.

⁹ Duundiɛn ɣöö cua Kuoth Nhial Kuothdiɛn pa̱l rueec. Kä cuɛ kɛ kɔak tëtdä Ci-cɛ-ra kuäär rɛ̈m Ya-bin kuäär Ɣa-dhor, kɛnɛ ji̱ Pi-li-thɛt, kɛ kuäär Mo-ab. Cukɛ nyiëëny kɛ kɛ.

¹⁰ Kä cukɛ wiee nhiam Kuɔth Nhial ɛ laar kɛnɛ i̱, ‘Ca̱kɔ duer kɛ ɣöö ca̱kɔ Kuoth Nhial päl, a pal nɛy ni kuth Baal kɛnɛ kuth Ac-ta-roth. Kän nɛy ɛn täämɛ kä ji̱ tɛ̈ra, kä ba̱kɔ ji̱ pal.’

¹¹ Kä cu Kuoth Nhial Yɛ-rub-baal kɛnɛ Ba-rak dan kɛ Yip-ta, kɛ ɣän Tha-muɛl Ja̱k, kä cua yɛ ben luäk te̱tni ji̱ tɛ̈run kuiini diaal, kä cuarɛ cieŋ kɛ mal.

¹² Kä mëë cia ŋa̱c i̱ Na-ɣac kuäär ji̱ A-mon bëë ben nyiëëny kɛ yɛ, cuarɛ ɣä jiök i̱, ‘Eey, ba̱kɔ tekɛ kuäär mi ruaac kɔ.’ Mëë Kuoth Nhial Kuothdun ɛ kuäärun.

¹³ Kä täämɛ nɛ̈nɛ jɛ kuäär in cia thiëc, ci Kuoth Nhial ɛ kuany wi̱i̱dun.

¹⁴ Kä mi wä yɛn Kuoth Nhial luɔ̱th, kä bia pal kä bia jɔwdɛ liŋ, ɛ /cia rɔ bi ri̱t lueeknikɛ, ɛ bia guɔ̱ɔ̱r ni Kuoth Nhial Kuothdun kɛɛl kɛ kuäärun derɛ gɔaa.

¹⁵ Kä mi /cia jɔwdɛ bi liŋ ɛ bia rɔ ri̱t kä lueek Kuɔth Nhial, bi Kuoth Nhial yɛ duäc amäni guuri.

¹⁶ Täämɛ kua cuɔ̱ŋ ni gua̱thnikun, kä guɛcɛ ti bi Kuoth Nhial kɛ la̱t ni waaŋdun ti.

¹⁷ /Ciɛ gua̱a̱th ŋër bɛɛl ɛn walɛ? Bä Kuoth Nhial thiec kɛ ɣöö bɛ nhial jak kä dɛm. Bia jiäkdun cu ŋa̱c, tin cia la̱t nhiam Kuɔth Nhial, kɛ kui̱ thiecädun kɛ rɔ kuäär.”

¹⁸ Kä cu Tha-muɛl Kuoth Nhial thiec, kä cu Kuoth Nhial Nhiaal jak kä dɛm ɛn cäŋ ëë. Kä cu nɛy diaal dual kɛ Kuoth Nhial kɛnɛ Tha-muɛl.

¹⁹ Kä cu nɛy diaal Tha-muɛl jiök i̱, “Pal Kuoth Nhial Kuothdu kɛ kui̱ la̱a̱tniku, kɛ ɣöö /ca̱kɔ bi li̱w. Kɛ ɣöö ca̱kɔ dueerkɔ diaal rep kɛ jiäk ti̱ti̱, kɛ thiecda kɛ rɔ kuäär.”

²⁰ Kä cu Tha-muɛl kɛ loc i̱, “/Cuarɛ dual, kɛ jiäk diaal ti cia la̱t ti, kä /cuarɛ rɔ ri̱t jɔk kä Kuoth Nhial, palɛ jɛ kɛ lɔcdun kɛɛliw.

²¹ /Cuarɛ rɔ ri̱t kuth guäyni ti /ca yɛ dëë lät kä gɔy, kɛ ɣöö thilɛ kɛ luɔt.

²² Kɛ kui̱ ciötdä Kuɔth Nhial, /Cɛ nɛɛkɛ bi lo̱k, kɛ ɣöö nhɔk Kuoth Nhial ɛ bɛ yɛ jak kä ji̱ pua̱a̱nydɛ.

²³ Kä a jɛ na̱n kɛ ɣä, ɛn ɣöö dëë duer lät kä Kuoth Nhial kɛ palä kɛ kui̱dun. Kä bä yɛ ŋi̱eec kɛ duɔ̱ɔ̱p in gɔaa kä thuɔ̱k.

²⁴ Luɔ̱thɛ ni Kuoth Nhial kä palɛ ni jɛ kɛ lɔcdun kɛɛliw. Kä ŋa̱cɛ tin di̱t tin cɛ lät kä yɛ.

²⁵ Kä mi wiaa ŋot kɛ mi la̱tdɛ jiäk, ba yɛ puɔc jɔ̱ɔ̱r kɛɛl kɛ kuäärun.”