1 Tham 11 - RUAC KUƆTH IN RƐL RƆ

Juc Thɔɔl kɛ ji̱ A-mon

¹ Kä cu Na-ɣac raan A-mon Ya-bec-gil-yad ben göl. Kä cu ji̱ Ya-bec diaal Na-ɣac jiök i̱, “Mat ruac kɛ kɔ kɛ ɣöö ba̱kɔ ji̱ ku lɛ lätikä.”

² Kä cuɛ kɛ jiök i̱, “Ɣän bä ruac mat kɛ yɛ kɛ ɣöö bä wäŋ cuëcnikun diaal lo̱o̱l raar kä yɛn diaal kɛ ɣöö bɛ cua̱ pöc kä I-thɛ-rɛl kɛɛliw.”

³ Kä cu bööth Ya-bec ɛ jiök, “Moc nɛy kɛ ni̱n bärɔw kɛ ɣöö ba̱kɔ naath jäk kä I-thɛ-rɛl kɛɛliw. Mi wee wä thil ram mi luäk nɛy. Ba̱kɔ rɔ ben ka̱m ji̱.”

⁴ Kä mëë ci ja̱a̱k ben kä Giba wec Thɔɔl, cukɛ thok la̱t naath. Kä cu nɛy diaal wiee kɛ jɔw mi di̱i̱t.

⁵ Kä Thɔɔl bëë pur ka̱a̱kni kɛ thääkɛ. Kä Cuɛ wee i̱, “Ɛŋu mi wiee kɛ naath?” Kä cukɛ jɛ la̱t min ca lat ɛ ji̱ Ya-bec.

⁶ Kä cu buɔ̱m yieekä Kuɔth Nhial ben kä Thɔɔl min cɛ rieet ti̱ti̱ liŋ, kä cuɛ kɛ̈c ɛlɔ̱ŋ.

⁷ Kä cuɛ thääk da̱ŋ rɛw ka̱n, kä cuɛ kɛ ŋuɔ̱k ni dhoon kä cuɛ kɛ jäk kä rɛy wi̱i̱ni I-thɛ-rɛl diaal kɛ tet ja̱a̱kni wee i̱, “Mi wee wä tekɛ ram mi /ci Thɔɔl kɛnɛ Tha-muɛl guur, ba thääkɛ la̱t ni nɔ!” Kä cu naath dual kɛ Kuɔth Nhial, cukɛ ben raar ce̱tkɛ ram kɛl.

⁸ Kä mëë ci Thɔɔl kɛ dol kä Bɛ-dhɛk, cu ji̱ I-thɛ-rɛl a nɛy ti bathdɔɔri ti kur diɔ̱k, kä cu ji̱ Juda a nɛy ti bathdɔɔri ti jiɛɛn diɔ̱k.

⁹ Kä cukɛ ja̱a̱k tëë ci ben jiök i̱, “Jiökɛ ji̱ Ya-bec-gil-yad i̱, ‘Ruun kɛ cäŋ däär ba yɛ luäk.’ ” Mëë ci ja̱a̱k ɛ ben la̱t ji̱ Ya-bec, cu lo̱ckiɛn tɛɛth.

¹⁰ Kɛ kui̱ ɛmɔ cukɛ wee i̱, “Iruun ba̱kɔ rɔ ka̱m yɛ, kä bia nɛy lät kä mɔ gɔaa ɔ waaŋdun.”

¹¹ Kä mëë ruɔ̱ndɛ cu Thɔɔl naath dääk kä bun diɔ̱k. Kä kɛ runwaŋ cukɛ ji̱ A-mon ma̱k, cukɛ kɛ näk amäni cäŋ däär. Kä tëë cu kään cukɛ däk piny, a bɛ thil nɛɛ rɛw ti te kɛɛl.

Kuëny Thɔɔl ala kuäär

¹² Kä cu ji̱ I-thɛ-rɛl Tha-muɛl jiök i̱, “Ɛŋa ɛn nëë ri̱t i̱, ‘/Ci Thɔɔl bia̱ kuäära?’ Käm nikɛ nɛy, kɛ ɣöö ba̱kɔ kɛ näk.”

¹³ Kä cu Thɔɔl wee i̱, “Thilɛ ram mi ba näk ɛn walɛ, kɛ ɣöö ɛ cäŋ mi ci Kuoth Nhial ɛ kän ni ji̱ I-thɛ-rɛl.”

¹⁴ Kä cu Tha-muɛl naath jiök i̱, “Bia wanɛ kä Gil-gal banɛ kuäär wä nyɔk kɛ lätni thi̱n.”

¹⁵ Kä cu nɛy diaal wä kä Gil-gal, kä cukɛ Thɔɔl jak kä kuäär nhiam Kuɔth Nhial, kä cukɛ muc malä thöp Kuoth Nhial ɛn wi̱ni, kä cu Thɔɔl kɛnɛ ji̱ I-thɛ-rɛl diaal lo̱ckiɛn tɛɛth ɛlɔ̱ŋ.