1 Tham 10 - RUAC KUƆTH IN RƐL RƆ

¹ Kä cu Tha-muɛl liɛɛth ɣo̱kä wuɔc wi̱i̱ Thɔɔl, kä cuɛ jɛ cim kä cuɛ wee i̱, “Ci Kuoth Nhial ji̱ yier kɛ ɣöö bia̱ kuäär nɛɛnikɛ ni ji̱ I-thɛ-rɛl.

² Mi wä kɔn däk piny ɛn walɛ, bi ro̱m kɛ wutni da̱ŋ rɛw gekä wec muɔ̱ɔ̱n Re-cɛl kä Dhɛl-dhak rööl Ben-ya-min, kä ba ji̱ jiök i̱, ‘Muɔ̱li tëë ci wä go̱r ca kɛ jek, ɛn täämɛ guur /cɛ lɛ ca̱r kɛ kui̱ muɔ̱li, diɛɛrni jɛn kɛ kui̱du, carɛ ni mɔ derɛ la̱t ɔ kɛ kui̱du.’

³ Kä ŋotdi wi̱i̱ kɛ wä mäni mi ci ben jiaath Ta-bor in di̱i̱t. Kä bi röm thi̱n kɛ wutni da̱ŋ diɔ̱k ti wa Kuoth thöp muc kä Beth-ɛl, ti kap ram kɛl dɛy deet böwni da̱ŋ diɔ̱k, kä kap min dɔ̱ŋ jurayni diɔ̱k kä kap min dɔ̱diɛn ɣök kɔaŋ.

⁴ Kä ba ji̱ lät kä malɛ, kä ba ji̱ moc jurayni rɛw, kä bikɛ nhɔk tetnikiɛn.

⁵ Kä kɛ kɔrɛ bi ben kä Gib-ɛ̈th-ɛlo-ɣim, min ci ji̱ Pi-li-thɛt pua̱t thi̱n. Ɛn wi̱ni guäth in wi̱i̱ wi̱c, bi röm kɛ buɔ̱n göökni ti bä nhial guäth palä kä pua̱tkɛ thuɔmni, kɛ buɔ̱l nhiamdiɛn, kä latkɛn ruaacni go̱o̱kä.

⁶ Kä bi buɔ̱m yieekä Kuɔth Nhial cu ben kä ji̱, kä bi ruac go̱o̱kä cu lat kɛɛl kɛ kɛ. Kä bi luɔc ala radɔ̱diɛn.

⁷ Mi wi̱i̱ nyuuthni tɔ̱tɔ̱ wä jëk, lätni mɔ luäŋ tëtdu jɛ mɔ, kɛ ɣöö te Kuoth kɛɛl kɛ ji̱.

⁸ Kä bi cu wä kä Gil-gal nhiamdä. Kä nɛnɛ ɣän bä ben kä ji̱ kɛ ɣöö bä muc tin waŋkɛ wä thöp kɛnɛ muc malä. Kä lipä kɛ ni̱n bärɔw, mäni mi cä ben kä ji̱, bä ji̱ ben la̱t mɔ bi la̱t ɔ.”

⁹ Kä mëë cɛ jɔkdɛ riet Tha-muɛl a wëëkɛ. Cu Kuoth ɛ moc kɛ ciaaŋ mi dɔ̱ŋ. Kä cu nyuuthni tɔ̱tɔ̱ a thuɔ̱ɔ̱k ɛn cäŋ ëë.

¹⁰ Kä mëë cikɛ cop kä Giba. Cuɛ röm kɛ buɔ̱n göökni. Kä cu buɔ̱m yieekä Kuɔth ben kä jɛ, kä cuɛ ruaacni go̱o̱kä lat rɛydiɛn.

¹¹ Kä mëë ca jɛ nɛn ɛ nɛy tëë ŋa̱c kɛ jɛ ni wen ɛ latdɛ nyin go̱o̱kä, cukɛ ruac kä rɔ̱ i̱, “Ɛŋu ci ben kä gat Kic ɔ? Ɛn Thɔɔl cɛ ben ɛ gök bä nu?”

¹² Kä cu ram kɛl kä ji̱ wec ɛ loc i̱, “Kä go̱o̱k tɔ̱ kɔŋ tɔ̱tɔ̱ ku gua̱nikiɛn la ŋa?” Kɛ kui̱ ɛ mɔ cuɛ cua̱ cäät ɛn ɣöö, “Ɛn Thɔɔl cɛ ben ɛ gök bä nu?”

¹³ Kä mëë cɛ thuɔ̱k kɛ ruaacni go̱o̱kä, cuɛ ben nhial guäth palä.

¹⁴ Kä cu när Thɔɔl, Thɔɔl kɛnɛ läätdɛ jiök i̱, “Cia wä nikä?” Kä cu Thɔɔl wee i̱, “Ca̱kɔ muɔ̱li wä go̱r. Kä mëë /ka̱n kɔ kɛ jëk cua̱kɔ cu wä kä Tha-muɛl.”

¹⁵ Kä cu närɛ wee i̱, “Läri jɛ ɣä, ɛŋu ci Tha-muɛl ɛ la̱r ji̱ mɔ.”

¹⁶ Kä cu Thɔɔl närɛ jiök i̱, “Cɛ kɔ jiök i̱ ca muɔ̱li jëk.” Kä kɛ kui̱ kuäärä min ca la̱t jɛ ɛ Tha-muɛl, thilɛ mi cuɛ lat thi̱n.

Nhök Thɔɔl kɛ kuäär

¹⁷ Täämɛ cu Tha-muɛl naath dol guäth kɛl nhiam Kuɔth kä Midh-pa.

¹⁸ Kä cuɛ ji̱ I-thɛ-rɛl jiök i̱, “Nɛmɛ ɛ jɛn min ci Kuoth Nhial ɛ lar, Kuoth I-thɛ-rɛl i̱, ‘Cä I-thɛ-rɛl ka̱m raar kä I-jëp, kä cä yɛ kän te̱tni ji̱ I-jëp, kɛnɛ tet kua̱ri tëë ciaŋkɛ yɛ a jiäk.’

¹⁹ Kä täämɛ cia Kuothdun lo̱k, mëë kään yɛ kɛ rikun diaal kɛnɛ tin ga̱ykɛ yɛ. Kä cuarɛ wee i̱, ‘Eey! Kä duundɛ ɣöö moc ni kɔ kɛ kuäär.’ Kä täämɛ kua ben nhiam Kuɔth Nhial kɛ thuk duëlikun kɛnɛ karkun.”

²⁰ Kä ɛnɔ cu Tha-muɛl thuk duëli I-thɛ-rɛl diaal nööŋ thiekä, kä cua thok duëël Ben-ya-min kuany kɛ yor gaakni.

²¹ Cuɛ thok duëël Ben-ya-min ti̱eec thie̱kä kɛ dho̱rkiɛn, kä cua dhɔr Matri kuany kɛ yor gaakni. Kä cuɛ Thɔɔl gat Kic kuany kɛ yor gaakni. Kä mëë cikɛ jɛ go̱r, /ka̱nɛ jëk.

²² Cukɛ Kuoth Nhial thiec i̱, “Ɛn duɔ̱ɔ̱r tëë kɛ raam /ken ni ben ɛn wa̱nɛ?” Kä cu Kuoth Nhial wee i̱, “Guɛcɛ jɛ, jɛn cɛ rɔ tɔ̱w rɛy kuakni.”

²³ Kä cukɛ riŋ cukɛ jɛ wä nööŋ ɛn wi̱ni. Kä mëë cɛ cuɔ̱ŋ rɛy nath, cu bär ni jɛn kä nɛy diaal.

²⁴ Kä cu Tha-muɛl nɛy diaal jiök i̱, “/Ka̱nɛ jɛ nɛn ɛn min ca kuany ɛ Kuoth Nhial? Kä thilɛ ram mi päär kɛ jɛ kä nɛy diaal.” Kä cu nɛy diaal köök i̱, “Bi kuäär jääny kɛ tëk!”

²⁵ Kä cu Tha-muɛl naath la̱t cuŋ kɛnɛ lät kuäärä. Kä cuɛ kɛ gɔa̱r rɛy buɔk kä cuɛ jɛ la̱th nhiam Kuɔth Nhial. Kä cuɛ naath jak kä däk piny, wä ramɔ dhɔɔrɛ.

²⁶ Kä cu Thɔɔl wä dhɔrɛ bä kä Giba kɛɛl kɛ nɛy ti ji̱ ko̱o̱r ti ci Kuoth wä lɔɔcdiɛn.

²⁷ Kä cu tha̱a̱ŋ nath ti jiäk wee i̱, “Dëë ram ɛmɔ nɛy kän i̱di?” Cukɛ jɛ lo̱k, kä /ken kɛ jɛ nöŋ muc. Kä cuɛ biɛt bä.