1 Tham 1 - RUAC KUƆTH IN RƐL RƆ

Ɛl-ka-na kɛnɛ ji̱ dhɔaarɛ kä Cilo

¹ Ɛ jɛn cuɛ tekɛ raan Ra-ma-tha-yim-dho-pim rööl päämni Ɛ-pa-rim, mi cɔal i̱ Ɛl-ka-na gat Yɛ-ro-ɣaam gat Ɛ-liɣu, gat To-ɣu, gat Dhup raan Ɛ-pa-rim.

² Jɛn tëë kɛ män da̱ŋ rɛw. Cɔal kɛl i̱ Ɣana kä min dɔ̱ŋ cɔalɛ Pɛ-ni-naa. Kä Pɛ-ni-naa tëë kɛ gaat, kä thilɛ Ɣana gaat.

³ Täämɛ wut ɛ mɔ runi diaal la jiɛyɛ wi̱i̱dɛ wee Kuoth Nhial in Di̱t ni jɛn pal kä wee jɛ thöp muc kä Cilo, kä gaat Eli da̱ŋ rɛw, Ɣɔp-ni, kɛnɛ Pi-nɛ-ɣath kɛ bööth palä Kuɔth Nhial.

⁴ Kä cäŋ ëë thöp Ɛl-ka-na muckɛ, la ciekdɛ ni Pɛ-ni-naa a mocɛ kɛ ri̱ŋ kɛnɛ gaatkɛ diaal.

⁵ Kä jɛn bä nhɔkɛ Ɣana, kä la mocɛ ni jɛ kɛ dhuɔn ri̱eŋ mi gɔaa, kɛ ɣöö ci Kuoth Nhial jɛ pen dap.

⁶ Kä la nyäkdɛ jɛ a yɔŋ kɛ ɣöö /kenɛ dap, kuɛ lɔcdɛ la jak kä jiäk.

⁷ La jɛ a lätdɛ run kä run, mɔ wäkɛ palä mɔ luaak Kuɔth Nhial. Ɛn cäŋ ɛmɔ cu Ɣana wiee kä /kenɛ mi̱th.

⁸ Kä cu cɔwdɛ ni Ɛl-ka-na jɛ jiök i̱, “Ɣana, ɛŋu wiee i̱ mɔ? Kä ɛŋu ci mi̱th ɔ? Ɛŋu gaki mɔ? A /ci ku gɔaa ni ɣän kä gaat da̱ŋ wäl?”

Ɣana kɛnɛ Eli

⁹ Kɛ kɔr kä min cikɛ mi̱th kä cikɛ maath kä cilo cu Ɣana rɔ jiɛc, kä te Eli nyuurä kɛ kɔm thok luaak Kuɔth Nhial.

¹⁰ Kɛ jiath lɔaac mi di̱i̱t cu Ɣana Kuoth Nhial pal kɛ wiee.

¹¹ Kä cuɛ ya̱c i̱, “Aɣ Kuoth Nhial in leny buɔ̱mdɛ ti diaal, mal riɛk jäŋädu guic, kä ti̱mä, cu ja̱ŋdu päl ruëëc, mocä kɛ gat, kä dëë jɛ ka̱m ji̱ kɛ nin teekädɛ diaal, kä /ci reet wi̱cdɛ dëë nɛn.”

¹² Kä min palɛ Kuɔth Nhial, cu Eli thokdɛ tit.

¹³ Kä Ɣana ruacɛ kɛ lɔcdɛ. Kä te ni thokdɛ ɛ niɛw niɛw, kä ca jɔwdɛ liŋ. Kɛ kui̱ ɛ mɔ cu Eli jɛ cɔli ciek mi yɔ̱ŋ kɔaŋ.

¹⁴ Kä cu Eli jɛ jiök i̱, “Kä ɛn duɔ̱ɔ̱r bi yɔ̱ŋ amäni nɛy? Ɛ kɔaŋdu ku jiɛɛn kä ji̱.”

¹⁵ Kä cu Ɣana jɛ loc i̱, “Eey kuäärä, ɛ ɣän ram mi te ni jɛn kɛ riɛk. Thilɛ kɔaŋ mi cä math, duundɛ ɣöö latdä ni lɔcdä nhiam Kuɔth Nhial.

¹⁶ Cu kuanydu cɔl ram mi jiääk, kɛ ɣöö ɣän latdä ni jiath lɔacdä wa̱nɛ mi.”

¹⁷ Kä cu Eli ɛ loc i̱, “Wër kɛ mal, bi Kuoth I-thɛ-rɛl ji̱ ka̱m min ci thiec kä jɛ.”

¹⁸ Kä cu Ɣana wee i̱, “Ɛ ja̱ŋdu jek nhök kä ji̱.” Kä cuɛ wä dupdɛ kä cuɛ mi̱th, kä /cɛ lɛ ŋot kɛ gak.

Da̱p Tha-muɛl kɛnɛ lëydɛ

¹⁹ Kä cukɛ rɔ jiɛc nikɛ runwaŋ kä cukɛ Kuoth Nhial pal. Kä cukɛ loc dhɔriɛn kä Rama, kä cu Ɛl-ka-na tɔ̱ɔ̱c kɛ ciekdɛ ni Ɣana, kä cu Kuoth Nhial jɛ tim.

²⁰ Kä cu Ɣana ruët kä cuɛ dap kɛ gat, kä cuɛ ciötdɛ cɔl i̱ Tha-muɛl, kɛ ɣöö ɛ jɛn i̱, “Thiëëcä jɛ kä Kuoth Nhial”

²¹ Kä cu Ɛl-ka-na kɛnɛ ji̱ dhɔaarɛ diaal wä, wa muc runi thöp Kuoth Nhial kɛnɛ ya̱c.

²² Duundɛ ɣöö /ken Ɣana wä, kɛ ɣöö cɛ cɔwdɛ jiök i̱, “Mi wa gat wä do̱th, bä nööŋ, kɛ ɣöö bɛ wä te nhiam Kuɔth Nhial, bɛ wä cieŋ ɛn wi̱ni amäni cäŋ kɛl.”

²³ Kä cu Ɛl-ka-na jɛ loc i̱, “Lätni mɔ guici gɔaa ɔ, li̱pni amäni mi ciɛ do̱th. Ɛ ni ɣöö bi Kuoth Nhial rietdɛ la̱t.” Kä cuɛ duɔth rɔmɛ gatdɛ, amäni mëë cɛ do̱th.

²⁴ Kä mëë cɛ gatdɛ do̱th, cuɛ jɛ naŋ kɛɛl kɛ jɛ, kɛ thäk mi tekɛ run da̱ŋ diɔ̱k kɛ nup, kɛ ɣök kɔaŋ. Kä cuɛ luaak Kuɔth Nhial kä cilo. Kä ŋot gat kɛ kukɛ.

²⁵ Kä cukɛ thäk näk, kä cukɛ gat nöŋ Eli.

²⁶ Kä cuɛ wee i̱, “Aɣ, kuäärä, ɛ jɛn ɣän ciek ëë cuŋ nhiamdu wa̱nɛ mi, mëë pal Kuoth Nhial.

²⁷ Ɛ jɛn gat ɛ mi ɛn nëë palä. Kä ci Kuoth Nhial ɣä ka̱m mëë cä thiec kä jɛ.

²⁸ Kɛ kui̱c ɛmɔ, cä jɛ ka̱m Kuoth Nhial. Nikɛ pek teekädɛ kɛɛliw cä ka̱m Kuoth Nhial kä cukɛ Kuoth Nhial pal ɛn wi̱ni.”