1 Pit 5 - RUAC KUƆTH IN RƐL RƆ

Yiëën deet Kuɔth

¹ Ɛn täämɛ ta̱a̱kɛ mi bä la̱r yɛ ɛldɛri. Ɣän bä ɛ ɣän ɛldɛr puɔ̱nydä, kä ɛ ɣän neen cucä Kritho. Kä ɣän bä buay nyuak kɛɛl kɛ yɛ.

² Yienɛ det Kuɔth tin ca ka̱m yɛ, kä la̱tdɛ ce̱tkɛ yuɔ̱ɔ̱p ti gɔw. La̱tdɛ jɛ, kä /ciɛ ɣöö kuɔkɛ ni yɛ, ɛ ɣöö nhɔk yɛn ɛ i̱ bia jɛ la̱t ce̱tkɛ min go̱o̱r Kuoth ɛ. Kä /cuarɛ jɛ lät kɛ ɣöö bia yio̱w jek thi̱n, kä ɛ ɣöö go̱o̱r yɛnɛ i̱ bia jɛ la̱t kɛ lɔcdun kɛɛliw.

³ /Cuarɛ jɛ go̱r ɛn ɣöö bi yɛn a ruëëckiɛn, duundɛ ɣöö jakä rɔ̱ kä nyuuth mi gɔaa kä kɛ.

⁴ Kɛ ɣöö mi wä Yieen Deet in di̱i̱t wä jɔɔc bia kum kuäärä mi buɔy mi /ci bi met yaaw jek.

⁵ Kɛ jɛn duɔ̱ɔ̱p ɛmɔ yɛn tin la ŋuɛ̈tni kɛn, nhɔakɛ ruac nɛɛni tin di̱t ni kɛn kä yɛ. Kä yɛn diaal la̱thɛ ni ciaŋ mi kɔ̱c kɔ̱c kɛ ɣöö bia rɔ̱ lätikä, kɛ ɣöö ci Ruac Kuɔth wee i̱, “Kuoth gaakɛ nɛy ti liakɛ rɔ̱, kä duundɛ ɣöö tho̱pɛ puɔ̱th ram mi kɔ̱c.”

⁶ Kɛ kui̱ ɛmɔ jakɛ rɔ kä kuiy tetdä Kuɔth in bum, kɛ ɣöö bɛ yɛ kap nhial kɛ gua̱a̱th in lot rɔ.

⁷ Ka̱mɛ jɛ ti diaal tin diɛrkɛ yɛ, kɛ ɣöö diɛɛrɛ kɛ kui̱dun.

⁸ Ruɔ̱tdɛ rɔ̱ɔ̱dun, kä ta̱yɛ jinä. Gua̱n tɛ̈run in la gua̱n jiäkni wurɛ ce̱tkɛ lony mi ŋa̱a̱r kä go̱o̱rɛ ram mi bɛ roc.

⁹ /Cuarɛ rɔ̱ luär jɛ, cuɔ̱ŋɛ a bum rɛy ŋäthädun kɛ ɣöö ŋa̱cɛ jɛ i̱ te dämuɔɔri rɛy ŋäthä diaal tin te wi̱i̱ muɔ̱ɔ̱n kɛn a rɛy cucä mi päär kɛ cuɔ̱c ɛmɛ.

¹⁰ Kɛ kɔr kä mi cia cuuc kä mi tɔt, bi Kuoth in tekɛ puth diaal min ci yɛ cɔal rɛy buɔyädɛ min do̱raar rɛy Kritho, jɛn puɔ̱nydɛ bɛ yɛ luäk kä bɛ yɛ jakä bum, kä bɛ yɛ jakä cuŋ a bum.

¹¹ A buɔ̱m tekɛ jɛ amäni cäŋ kɛl. Inɔnɔ.

Ner in jɔak

¹² Cä yɛ gɔ̱a̱r warɛgak ɛ ciɛk ɛmɛ kɛ luäk Thil-ba-näth, min caarä ɛn ɣöö ɛ dämandan mi ŋa̱a̱thä. Ɣän cuɔmä yɛ kä latdä ŋäcdä ɛn ɣöö nɛmɛ ɛ puɔ̱th Kuɔth in thuɔ̱k. Cuɔ̱ŋɛ rɛydɛ a bum.

¹³ Kä ji̱ dolä Kuɔth in te kä Bɛ̈-bi-lɔn min ca mɛk ce̱tkɛ yɛ, ja̱kɛ yɛ kä maalɛ, kä nërkɛ yɛ ɛ gatdä ni Mak.

¹⁴ Nërɛ rɔ kamnikun, kɛ ci̱em nho̱kä Krith-cini. A mal tekɛ yɛn diaal tin te rɛy Kritho.