1 Pit 3 - RUAC KUƆTH IN RƐL RƆ

Män kɛnɛ cɔw

¹ Kɛ jɛn duɔ̱ɔ̱p ɛmɔ män, lua̱rɛ rɔ cɔwkun, a cäŋ thilɛ tha̱a̱ŋkiɛn luth kɛ ruac Kuɔth. Kɛ ɣöö dɔ̱ŋ ba lo̱ckiɛn ri̱t ɛ ciɛŋ määnkiɛn a thil ruac,

² mi wäkɛ ciaŋ luthädun kɛ Kuoth kɛnɛ ciaŋ yupä pua̱a̱nydun wä nɛn.

³ /Cuarɛ maandun jakä gɔaa raar kɛ ta̱k mi̱emkun kiɛ pi̱ek pua̱ny kɛ da̱a̱p, kiɛ kɛ läth bieyni da̱p da̱a̱p.

⁴ Kä a maandun te rɛc lo̱cnikun. Kä a jɛ la gɔɔy mi kɔ̱c kɛnɛ yiëë mi bit, min tekɛ luɔt mi di̱i̱t nhiam Kuɔth.

⁵ Kɛ jɛn duɔ̱ɔ̱p ɛmɔ, mëëdan cu män tin rɛ̈lkɛ rɔ̱ tin ci ŋa̱thdiɛn la̱th kä Kuoth rɔ pik kɛ maan ruac cɔɔnikiɛn nhɔk.

⁶ Ɛ jɛn ta̱a̱ ëë tekɛ Thara mëë cuɛ A-bɛ-ram luɔ̱th a cɔlɛ jɛ i̱, “Kuäärä.” Kɛ yɛn nyieekɛ pa̱ny, mi lät yɛn ni cuɔ̱ɔ̱ŋ, kä thilɛ mi dual yɛn kɛ jɛ.

⁷ Kɛ jɛn duɔ̱ɔ̱p ɛmɔ yɛn wutni, ciëŋɛ kɛɛl kɛ mänkun kɛ ŋäc mi gɔaa ɛn ɣöö kɛ nɛy ti kɔ̱c. Ciaŋɛ kɛ luthä, kɛ ɣöö nyuakɛ puɔ̱th teekä Kuɔth kɛɛl kɛ kɛ. La̱tdɛ nɔmɔ kɛ ɣöö thilɛ mi bi palun gaŋ.

Cuɔ̱c kɛ kui̱ lätni kä mi gɔaa

⁸ Kɛ jɔakdɛ bi yɛn diaal tekɛ mat rɛy yieekä, kɛnɛ ca̱r kɛl, kä nhɔakɛ rɔ ala ji̱ ciëŋ kɛ lo̱c ti kɔ̱c kɛnɛ cär ti mua̱l mua̱a̱l.

⁹ /Cuarɛ mi jiääk col kɛ mi jiääk, kiɛ kuëth kɛ kuëth, kä duundɛ ɣöö cuɔ̱lɛ naath ni mi gɔaa. Kɛ ɣöö ca yɛ cɔl kɛ jɛn nɛmɛ, kɛ ɣöö dee yɛn puɔ̱th jek.

¹⁰ Kä ca jɛ gɔ̱r i̱, “Ram mi go̱o̱r ɣöö bi lɔcdɛ tɛɛth kɛ tëk, kä go̱o̱rɛ ɣöö bɛ tekɛ ni̱n ti gɔw, a jɛ tiit lɛpdɛ kä ruac mi jiääk, kä a jɛ gaŋ thokdɛ kä lat ka̱a̱cni.

¹¹ A rɔ ri̱i̱tdɛ kä jiäk, kä a jɛ lät cuŋ. A jɛ go̱o̱r mal, kä a jɛ do̱tdɛ lɛɛr.

¹² Kɛ ɣöö waŋ Kua̱r ni Kuoth guɛcɛ ni ji̱ cuŋni, kä la ji̱thkɛ a lɛpɛ kɛ ɣöö bɛ paliɛn liŋ. Kä duundɛ ɣöö gak Kua̱r ni Kuoth kɛ nɛy tin la̱tkɛ jiäk.”

¹³ Täämɛ, ɛŋa mi bi yɛ lät kä mi jiääk mi görɛ ni lätni kä mi gɔaa?

¹⁴ A cäŋɛ mi cuc yɛn kɛ lätnidun kɛ ciaaŋ cuŋni, ba yɛ poth. /Cuarɛ dual kɛ min dual kɛ kɛ, kä /cuarɛ diɛɛr.

¹⁵ Kä duundɛ ɣöö luɔ̱thɛ Kritho ala Kuäär ni Yecu rɛy lo̱cnikun. Ni ciaŋ rialɛ rɔ̱ ikä kɛ ɣöö bia tekɛ mi luc yɛn ɛ ram mi thieec yɛ kɛ ŋa̱th in tekɛ yɛ,

¹⁶ kä latdɛ jɛ kɛ lɔc mi gɔaa mi tekɛ luth mi di̱i̱t. Jakɛ ca̱r lo̱cnikun kä buɔy, kɛ ɣöö mi cäŋ ca yɛ kuëth, bikɛ pöc kɛn nɛy tin ci ruac a jiäk kɛ kui̱ teekädun mi gɔaa rɛy Kritho.

¹⁷ Mi go̱o̱r Kuoth ɛ ɛn ɣöö bia cuuc, gɔaa ni ɣöö bia cuuc kɛ lätni kä mi gɔaa, kä ɣöö bia cuuc kɛ lätni kä mi jiääk.

¹⁸ Kɛ ɣöö ci Kritho cuuc bä kɛ duer ni kä kɛɛl kɛ nɛɛni diaal, ɛn ram mi gua̱n cuŋni cɛ cuuc kɛ kui̱ nɛɛni ti thil cuŋ, kɛ ɣöö bɛ yɛ naŋ nhiam Kuɔth. Cua puɔ̱nydɛ näk, kä cua jɛ jakä tëk kɛ yiëë.

¹⁹ Kä kɛ ta̱a̱dɛ thi̱n kɛ yiëëdɛ cuɛ wä kɛ ɣöö bɛ ruac Kuɔth wä la̱t yiey tin te guäth yieenä.

²⁰ Kɛ yiey nɛɛni tëë /ka̱n Kuoth luɔ̱th mëëdan, mëë tëë li̱pä bitdä kɛ ni̱n tëë lät Nowa murkäbdɛ in di̱i̱t. Rɛy murkäbä cu nɛy ti tɔt ti pekdiɛn nɛy da̱ŋ bädäk kä rɔ̱, cukɛ kään thi̱n kɛ pi̱w.

²¹ Kɛn pi̱w tɔ̱tɔ̱ kɛ nyuuth la̱k nath in ci yɛ kän täämɛ. Kä /ciɛ lak nitdä raar puɔ̱nydun, duundɛ ɣöö ɛ ruac mi ca la̱r Kuoth kɛ lo̱c ti gɔw min ci yɛ kän kɛ jiëc Yecu Kritho li̱th.

²² Jɛn cɛ wä nhial a nyuurɛ cueec Kuɔth a ruaacɛ ja̱a̱k nhial, kɛnɛ kua̱r nhial diaal kɛnɛ bum.