1 Pit 2 - RUAC KUƆTH IN RƐL RƆ

Päm in tëk kɛnɛ do̱r in rɛl rɔ

¹ Wuɔcɛ rɔ kä jiäk diaal, kä kac kɛɛliw, kɛnɛ mɛɛt kɛɛliw, kɛ tiɛɛl kɛnɛ guer.

² Ce̱tkɛ gaat ti ruɔri tin görkɛ ni cak ti wiɛc wiɛɛc, kä yɛn bä görɛ ni ŋi̱i̱c yieekä mi wic wic. Kɛ jɛn duɔ̱ɔ̱p ɛmɔ bia cu rɛy känä,

³ mi cia jɛ ŋa̱c kä cia jɛ nɛn ɛn ɣöö Kuäär ni Kuoth gɔaaɛ.

⁴ Bia kä Kuäär, jɛn päm teekä min ca lo̱k ɛ naath, kä duundɛ ɣöö ca jɛ mɛk ɛ Kuoth, kä jɛn tëë luɔt mi di̱i̱t.

⁵ Kä yɛn pua̱nykun ce̱t yɛn kɛ päm in tëk a yɛ ta̱thkɛ ala duel yieekä, kɛ ɣöö bi yɛn a bööth palä ti gɔw ti rɛ̈lkɛ rɔ̱, kɛ ɣöö bia muc yieekä ti nhɔakɛ thöp Kuoth kɛ Yecu Kritho.

⁶ Kɛ ɣöö ca jɛ gɔ̱r rɛy ruaacni Kuɔth i̱, “Nɛ̈nɛ jɛ, ɣän kuëŋä päm rɛy Dha-yɔn, min la päm gɔŋtɔtdä mi ca mɛk, mi tekɛ luɔt mi di̱i̱t, Kä ram ɔ wä jɛ ŋäth ɔ, /ca jɛ bi jakä po̱c.”

⁷ Kɛ kui̱dun, yɛn nɛy tin ŋa̱th, jɛn ɛ min gɔaa mi tekɛ luɔt. Kä duundɛ ɣöö kɛ kui̱ nɛɛni tin /ca jɛ ŋäth, “Päm in ca lo̱k ɛ ta̱a̱th duëli, ɛ jɛn päm in ci ben a päm gɔŋtɔtdä duëël.”

⁸ Kä, “Ɛ jɛn päm in jak naath kä kɔ̱a̱thkɛ kɔa̱a̱thikä, ɛ jɛn päm in jak naath kä tɛth.” Kɔ̱a̱thkɛ kɔa̱a̱thikä kɛ ɣöö /ka̱n ruaacni Kuɔth luɔ̱th, ce̱tkɛ min ca la̱tkɛ i̱ bi kɛn ɛ la̱t.

⁹ Yɛn lapɛ thok duëël mi ca mɛk, ti bööth palä, mi la do̱r mi rɛl rɔ, nɛɛ Kuɔth ti rɛlɛ, kɛ ɣöö dee yɛn lätkɛ tin buɔ̱m buɔ̱ɔ̱m lat jɛn ram min cɔl yɛ raar rɛy muɔ̱th, cɔlɛ yɛ rɛy buɔyädɛ min gɔaa.

¹⁰ Mëëdan /ci yɛn a do̱r, kä duundɛ ɣöö ɛn täämɛ kɛ yɛn nɛɛ Kuɔth. Kä mëëdan /ka̱nɛ kɔ̱a̱c lɔaacdɛ jek, kä duundɛ ɣöö ɛn täämɛ ci yɛn kɔ̱a̱c lɔaac jek.

Tëkni ce̱tkɛ läät Kuɔth

¹¹ Nhöökä, ɣän la̱ŋä yɛn tin ce̱tkɛ rööl kɛnɛ ja̱a̱l ti ci jiɛɛn ro̱o̱liɛn ɛn ɣöö /ci lo̱ckun bi di̱t kɛ nyin jiäkni pua̱a̱ny tin tɛ̈rkɛ ko̱r kɛ tieydun.

¹² Ciëŋɛ agɔaa rɛy Juri, kɛ ɣöö mi dee kɛ yɛ lat jɔ̱ɔ̱r i̱ lapɛ ji̱ nyuɔɔni, bikɛ lätkun tin gɔw nɛn kä bikɛ Kuoth liak kɛ cäŋ in bɛ ɣɔw ben gui̱l.

¹³ Kɛ kui̱ Kua̱r ni Yecu nhɔakɛ ruaacni nɛɛni diaal tin ruackɛ yɛ nhɔakɛ ruec kua̱r in di̱t ni jɛn kä ti diaal,

¹⁴ kiɛ ruëëc tin cɛ ja̱k kɛ ɣöö ba ji̱ dueeri ben duäc, kä ba nɛy ti la̱tkɛ cuŋ ben liak.

¹⁵ Kɛ ɣöö go̱o̱r Kuoth jɛ ɛn ɣöö ba ruac dɔa̱a̱ri ti kueckɛ ŋɔak jak kä bit kɛ lätni cuŋni.

¹⁶ Ciëŋɛ ala nɛy ti lɔr kä /cuarɛ lɔarun jak kä lät ti jiäk, kä duundɛ ɣöö ciëŋɛ ce̱tkɛ kuaany Kuɔth.

¹⁷ Luɔ̱thɛ nɛy diaal. Nhɔakɛ dämuɔɔri tin la ji̱ ŋäthä. Dualɛ kɛ Kuoth. Luɔ̱thɛ kuäär in di̱i̱t.

Nyuuth cucä Kritho

¹⁸ Kuaany, lua̱rɛ rɔ kua̱rkun kɛ luth mi di̱i̱t ɛlɔ̱ŋ, a /ci mɔ a kua̱r tin gɔw tin kɔ̱c lo̱ckiɛn kärɔ̱, amäni kua̱r tin ruac a jiäk.

¹⁹ Ɛn nɔmɔ ba cuɔ̱ɔ̱ŋ kä ji̱ mi rut raan ti bɛ̈c bɛ̈ɛ̈c kɛ ɣöö tiimɛ Kuoth, a cäŋ cucɛ kɛ mi thil luɔt.

²⁰ Kɛ ɣöö mi ruutdi duäc kɛ ɣöö ci duer la̱t, ɛ luɔt ŋukä ci jek ɔ? Kä duundɛ ɣöö mi lät yɛn ni cuŋ, kä cia cuuc kɛ kui̱dɛ, ɛ min gɔaa ɛlɔ̱ŋ nhiam Kuɔth.

²¹ Ca yɛ cɔl kɛ kui̱ kä mɛmɛ, kɛ ɣöö ci Kritho cuuc kɛ kui̱dun, kä cɛ yɛ ba̱ny nyuuth kɛ ɣöö bia guɔ̱ɔ̱r ni ciökɛ.

²² “Thilɛ duer mi cɛ la̱t, kä thilɛ ruac kacä mi ca met jek thokdɛ.”

²³ Mëë ca jɛ kuɛth /kenɛ naath luɔ̱c kuëth. Kä mëë ca jɛ yak, /kenɛ naath dhiät, kä duundɛ ɣöö cuɛ ŋäth ni Kuoth in la luk kɛ cuŋ.

²⁴ Jɛn puɔ̱nydɛ cɛ dueerkɔn kap, kɛ puɔ̱nydɛ mëë ca pua̱t jiaath, kɛ ɣöö bɛ kɔn lony a lɔr dueeri, kä banɛ tëk kɛ ciaŋ cuŋni. Ca yɛ jakä gɔw kɛ buɔ̱ɔ̱tkɛ.

²⁵ Kɛ ɣöö mëëdan ci yɛn bath dup ce̱tkɛ rɔɔm. Kä duundɛ ɣöö ɛn täämɛ cia luny ni kä yieen deet kä gääŋ tieynikun.