1 Pit 1 - RUAC KUƆTH IN RƐL RƆ

¹ Ɛ ɣän Pi-tɔr in la jak Yecu Kritho, gɔ̱a̱rä yɛ warɛgak ɛmɛ yɛn nɛy tin la pɛ̈ɛ̈c kä Pɔn-täth, kɛnɛ Gä-lëë-cia, kɛ Ka-pa-do-cia, kɛnɛ E-cia, kɛ Bi-thi-nia.

² Kɛ yɛn nɛy ti ca mɛk ce̱tkɛ ca̱r Kuɔth in la Gua̱a̱r in te nhial, kä ca yɛ jakä nɛy ti gɔw kɛ Yiëë Kuɔth kɛ ɣöö ba Yecu Kritho luɔ̱th kä bakɛ lɛy kɛ riɛmdɛ. A puɔ̱th kɛnɛ mal mi di̱i̱t te kɛɛl kɛ yɛ.

Ŋa̱th mi tëk kɛ mi bi ben

³ A liak tekɛ Kuoth in la Gua̱n Kua̱ran ni Yecu Kritho! Kɛ kɔ̱a̱c lɔaacdɛ min di̱i̱t ca kɔn nyɔk kɛ di̱eth kɛ ŋa̱th mi tëk pa̱ny kɛ jiëc Yecu Kritho li̱th.

⁴ Kä ɛn täämɛ ŋa̱thnɛ puth tin tekɛ Kuoth kɛ kui̱ nɛɛnikɛ. Kɛn puth ɛ tɔ̱ ci Kuoth kɛ tɔ̱w kɛ kui̱dun nhial guäth in /cikɛ bi kɛɛth kä /cikɛ bi jiääk kä /ci gɔɔydiɛn bi jiääk thi̱n.

⁵ Ca yɛ gaŋ ɛ buɔ̱m Kuɔth kɛ kui̱ ŋäthädun amäni mi ca ka̱n nyoth kɛ gua̱a̱th guutdä ɣɔaa.

⁶ Ɛn nɛmɛ bɛ lo̱ckun jakä tɛth, a cäŋ ɛn täämɛ kɛ gua̱a̱th mi tɔt bi yɛn rik ti gööl rut.

⁷ Kä luɔt rikni ɛ ɣöö bɛ thuɔ̱k ŋäthädun ŋa̱c, min gɔaa ni jɛn kä da̱a̱p in la däk mi ca jɛ ɣɔ̱n kɛ mac. Ŋa̱thdun bɛ yɛn nöŋ liak kɛnɛ wuɔ̱t kɛ luth mi wa Yecu Kritho nyoth.

⁸ Cäŋ ni min /ken yɛn ɛ nɛn, nhɔk yɛn ɛ. Kä a cäŋ ni min /ken yɛ jɛ nɛn ɛn täämɛ, ŋäth yɛn ɛ, kä tɛth lɔcdun kɛ jɛ ɛlɔ̱ŋ kɛ tɛ̈th mi /cia dee met luäŋ kɛ lat.

⁹ Kɛ kui̱ ɛmɔ jek yɛn ni ka̱n yieynikun min la luɔt ŋäthädun.

¹⁰ Ci göök ɛ go̱r agɔaa kä cikɛ jɛ ɣɔ̱n ɛn ɣöö bikɛ duɔ̱ɔ̱r ŋa̱c kɛ kui̱ känä nɛmɛ. Kä cukɛ ruac go̱o̱kä lat kɛ kui̱ puthä min ka̱mkɛ yɛ.

¹¹ Kä cukɛ jɛ go̱r i̱ ba jɛ ŋa̱c ɛn ɣöö ɛ nɛy bi gua̱a̱th ben ɔ, kä bɛ ben i̱di. Ɛ jɛn gua̱a̱th in bi Yiëë Kritho in te rɛydiɛn ɛ nyuɔ̱thkɛ, min lat rik tin bi Kritho kɛ rut, kɛnɛ buay in bi ben kä jɛ.

¹² Ca jɛ nyuɔ̱th göök tɔ̱tɔ̱ ɛn ɣöö lätkɛ kɛ kui̱dun a /ci mɔ a kui̱diɛn. Cakɛ nyuɔ̱th ŋɔaani tin ca la̱r yɛ täämɛ ɛ kɛn nɛy tin la̱tkɛ yɛ thuk ti gɔw kɛ Yiëë in Gɔaa in Rɛl Rɔ, min ca ja̱k ni nhial. Kɛ kɛn ŋɔaani tin go̱o̱r ja̱a̱k nhial ɣöö bikɛ kɛ nɛn.

Cɔl rɛy teekä mi Rɛl Rɔ

¹³ Kɛ kui̱ ɛmɔ rialɛ ca̱run ikä kɛ kui̱ la̱t, kä a wi̱cdun te jinä. La̱thɛ ŋa̱thdun kɛɛliw kä puɔ̱th in ba nööŋ ɛ Yecu Kritho mi wëë wä jɔɔc.

¹⁴ Ce̱tdɛ kɛ gaat ti tekɛ luth, /cuarɛ tëkdun lɛ jakä la̱tkɛ ɛ di̱t lɔaac nyuɔɔnikun ëë wal mëë ŋuɔtdɛ a kui̱c yɛn ŋɔak.

¹⁵ Gɔaa ni jɛn ɛn ɣöö bi yɛn a nɛy ti rɛl gɔɔydun rɔ rɛy lätnikun diaal, ce̱tkɛ min Kuoth in cɔɔl yɛ rɛl gɔɔydɛ rɔ.

¹⁶ Kä ca jɛ gɔ̱r rɛy buɔk i̱, “A gɔɔydun rɔ rɛl kɛ ɣöö rɛl gɔɔydä rɔ.”

¹⁷ Kä mi cɔl yɛn ɛ ala Guurun, ɛn ram in luk nɛy diaal a päär kɛ pek lätnikiɛn pa̱ny, ciaŋɛ rɔ kɛ dual kɛ gua̱a̱th ɛ lapɛ rööl wi̱i̱ muɔ̱ɔ̱n ɛ.

¹⁸ Ŋa̱cɛ jɛ ɛn ɣöö ca yɛ luɛl kä ciaaŋ nyuɔɔni mëë cia jek kä guurdɔɔŋnikun, /ca yɛ luɛl kɛ ti däk ce̱tkɛ ciɛk in bo̱r kɛ da̱a̱p.

¹⁹ Kä duundɛ ɣöö ca yɛ luɛl kɛ riɛm Kritho mi gɔaa mi ce̱tkɛ riɛm ruath dɛ̈ɛ̈l rɔɔmä mi thil mɛ̈ɛ̈ny kiɛ gua̱r.

²⁰ Jɛn ca jɛ mɛk ɛ Kuoth a /ka̱n ɣɔw ni cak, kä duundɛ ɣöö ca jɛ nyoth kɛ gua̱a̱th ɛ jɔak ɛmɛ kɛ kui̱dun.

²¹ Kɛ jɛ ta̱yɛ kɛ ŋa̱th kɛ Kuoth, mi ci jɛ jiɛc li̱th, kä cuɛ jɛ ka̱m buay, kɛ ɣöö bi ŋa̱thdun kɛnɛ ŋa̱thdun kɛ ti bi ben te kä Kuoth.

²² Täämɛ kɛ kui̱ luthädun kɛ thuɔ̱k cia tieydun jakä wic wic, a cia tekɛ nhök mi thuɔ̱k kɛ dämuɔɔrikun tin Krith-cini. Inɔ nhɔakɛ rɔ̱ ɛlɔ̱ŋ kɛ lɔcdun kɛɛliw.

²³ Kä ca yɛ nyɔk kɛ da̱p, kä jɛn tëk ɛmɔ /cɛ bä kä mi bi li̱w, duundɛ ɣöö bëë kä mi /ci bi li̱w. Bëë kä ruac Kuɔth in tëk.

²⁴ Ci ruac Kuɔth wee i̱, “Ce̱t nɛy diaal kɛ juaac, kä ce̱t wuɔ̱t nath kɛ gaakni juaacni. Juaac la rɔlkɛ, kä la pɛn gaaknikiɛn,

²⁵ kä ruac Kuɔth tëë thi̱n a thil pek.” Ruac ɛmɔ ɛ jɛn thok in gɔaa min ca la̱t yɛ.