1 Kuɛ̈n 9 - RUAC KUƆTH IN RƐL RƆ

Nɛy tëë luny jɔk Pɛɛcä

¹ Inɔ cua ji̱ I-thɛ-rɛl diaal gɔa̱r rɛy buɔk kua̱ri I-thɛ-rɛl ce̱tnikɛ thuk duëlikiɛn. Kä cua Juda naŋ kä Bɛ̈-bi-lɔn ala pɛ̈c kɛ kui̱ thil ŋäthädiɛn.

² Kä nɛy tëë nhiam tëë cu wecdiɛn nyɔk kɛ cieŋ, cukɛ a bööth palä kɛ ji̱ Lii-bay kɛ la̱a̱t luaak Kuɔth.

³ Tha̱a̱ŋ nɛɛni tëë cieŋ kä Juda kɛnɛ Ben-ya-min kɛ Ɛ-pa-rim kɛ ji̱ Ma-na-thɛ tëë cieŋ kä Jɛ-ru-tha-lɛm, cua,

⁴ U-thay gat A-mi-ɣud, gat döö Ɔmri gat Im-ri gat Bani tin la kuay Pɛ-rɛdh min la gat Juda.

⁵ Kä gaat Cilo cua Ä-tha-yaa min la kɛ̱̈ɛ̱̈ kɛnɛ gaatkɛ.

⁶ Kä gaat Dhɛra cua Yɛ-i-el kɛnɛ ji̱ maarädɛ ti kur bäkɛl wi̱cdɛ jiɛɛn bä ŋuan.

⁷ Kä gaat Ben-ya-min cua Thɛ̈lu gat Mɛ-cu-lam, gat Ɣo-dɛ̈w-yaa gat Ɣɛ̈-thɛ-nua.

⁸ Kɛ Yib-nɛ-yaa gat Yɛ-ro-ɣaam. Kɛ Ɛla gat Udhi gat Mik-ri, kɛ Mɛ-cu-lam Cɛ-pɛ̈t-yaa gat Rɛ-u-el gat Yib-ni-yaa.

⁹ Kä cu pekdiɛn a nɛy ti kur bäŋuan wi̱cdɛ jiɛn da̱ŋ dhieec wi̱cdɛ bäkɛl. Kä kɛn diaal bööth thuk duëlikiɛn.

Dho̱r bööthni palä

¹⁰ Kä cu bööth palä cieŋ kä Yɛ-dɛ̈-yaa kɛnɛ Yɛ-ɣo-ya-rib kɛ Ya-kin.

¹¹ Kɛn nɛy tëë cieŋ cua Ä-dhar-yaa gat Ɣil-ki-yaa, gat Mɛ-cu-lam gat Dha-dok gat Mɛ-ra-yoth gat Ä-ɣi-tub tëë ca ka̱m la̱t rɛy luaak Kuɔth.

¹² Kä cu Ä-da-yaa gat Yɛ-ro-ɣaam gat Pɛ̈c-ɣur gat Mɛ̈l-ki-yaa, kɛ Mɛ̈-thay gat Ä-di-el gat Ya-dhe-ra gat Mɛ-cu-lam gat Mɛ-ci-lɛ-mith gat I-mer.

¹³ Kä cu pek bööthni palä tëë la bööth thuk duëlikiɛn a nɛy ti bathdɔɔr kɛl wi̱cdɛ kur bärɔw wi̱cdɛ jiɛɛn bäkɛl. Kä cukɛ a nɛy ti lua̱ŋkɛ la̱t rɛy luaak Kuɔth.

Wi̱i̱ ji̱ Lii-bay

¹⁴ Kä cu ji̱ Lii-bay tin cieŋ kä Jɛ-ru-tha-lɛm a Cɛ-mɛ̈-yaa gat Ɣɛ̈-cub gat Ɛ̈dh-ri-kɔm gat Ɣä-cɛ̈b-yaa raan Mɛ-ra-ri,

¹⁵ kɛ Bɛ̈k-bɛ̈-kar kɛ Ɣa-rɛc kɛ Ga-lal kɛ Mɛ̈-tɛ̈n-yaa gat Mika gat Dhik-ri gat A-thap,

¹⁶ kɛ O-bad-yaa gat Cɛ-mɛ̈-yaa gat Ga-lal gat Yɛ-du-thun kɛ Bɛ-rɛk-yaa gat Atha gat Ɛl-ka-na mëë cieŋ wi̱i̱ni Nɛ-to-paa.

Ga̱a̱ŋ thuɔk luaak Kuɔth

¹⁷ Kä cu ga̱a̱ŋ thuɔk luaak Kuɔth tëë cieŋ kä Jɛ-ru-tha-lɛm a. Cɛ̈-lum kɛ Ɛ̈-kub kɛ Tɛ̈l-mon kɛ Ä-ɣi-man kɛ ji̱ maarädiɛn (ku Cɛ̈-lum la bo̱o̱th).

¹⁸ Cukɛ ciɛŋ ni thok duëël kua̱r min ti kui̱ käny ca̱ŋ. Kä ni wen la gaŋkɛ ni thok rɛ̈ɛ̈k wec ji̱ Lii-bay.

¹⁹ Kä cua Cɛ̈-lum gat Kore gat Ɛb-ya-thap gat Kora kɛn ji̱ thuɔk duëël gua̱n ni Kora ka̱m ga̱a̱ŋ thuɔk kɛmɛ ro̱mä kɛ Kuoth Nhial, ce̱tkɛ mëë la gua̱ni thok wec Kuɔth Nhial a gaŋ.

²⁰ Kä ni wal la Pi-nɛ-ɣath gat Ɛl-a-dhar ga̱a̱ŋ thuɔk luaak Kuɔth a guic thi̱n. Kä la Kuoth Nhial a te kɛɛl kɛ jɛ.

²¹ Kä Dhɛ-kar-yaa gat Mɛ-cɛ-lɛm-yaa la gaŋɛ thok kɛmɛkä ro̱mä kɛ Kuoth Nhial.

²² Kä kɛn nɛy diaal tëë ca kuany ala ga̱a̱ŋ thuɔk luaak Kuɔth, kɛ nɛy ti kur rɛw wi̱cdɛ nɛy da̱ŋ wäl rɛw. Cakɛ gɔ̱r kɛ wi̱i̱kiɛn tëë ciaŋkɛ ɛ Dee-bid kɛnɛ gök ni Tha-muɛl kɛn tëë käm gua̱ni ɛn la̱t ɛmɛ.

²³ Cu kɛn kɛ gaatkiɛn lät ala ga̱a̱ŋ thuɔk luaak Kuɔth Nhial.

²⁴ Kä kɛn ga̱a̱ŋ thuɔk luaak, cukɛ te thukni da̱ŋ ŋuaan, thok kuec käny ca̱ŋ kɛ thok kuec kony ca̱ŋ kɛ kui̱c cuëëc kɛnɛ kui̱c caam.

²⁵ Kä la ji̱ maarädiɛn tin cieŋ wi̱i̱nikiɛn a ben te kɛɛl kɛ kɛ, kɛ kɔr ni̱ni da̱ŋ bärɔw.

²⁶ Kä bööth ga̱a̱ŋni da̱ŋ ŋuaan kɛ ji̱ Lii-bay, cakɛ ka̱m la̱t duëli rɛy luaak kɛnɛ gua̱th tɔ̱wä yio̱o̱ni luaak Kuɔth.

²⁷ Kä cieŋ kɛn gekä luaak Kuɔth, kɛ ɣöö bikɛ luak gaŋ, kä bikɛ jɛ a lɛpkɛ ni ciaŋ kɛ runwaŋ.

Ji̱ Lii-bay tin kɔ̱ŋ

²⁸ Cua ji̱ Lii-bay tin kɔ̱ŋ ka̱m la̱t kuakni tin lät kɛ naath rɛy luaak, la kɛn kɛ a kuɛɛn min nööŋkɛ kɛ rɛy luaak, kɛnɛ min luɔckɛ kɛ raar.

²⁹ Kä cua tin kɔ̱ŋ ka̱m la̱t kuakni tin papkɛ rɛy luaak kɛnɛ kuak diaal tin rɛl kɛ rɔ, kɛnɛ nup kɛ kɔaŋ kɛ liɛɛth kɛ wäl in kur kur kɛ wal tin kɔ̱p.

³⁰ Kä la tha̱a̱ŋ gan bööthni palä wal a liɔɔm.

³¹ Kä la raan Lii-bay mi cɔali Mɛ̈-tith-yaa kɛ̱̈ɛ̱̈ Cɛ̈-lum thok duëël Kora pat patni a lät.

³² Kä la ji̱ thuɔk duëël Kɛ-ɣath jurayni wec tharbëtdä a lät ni ciaŋ kɛ cäŋ lɔ̱ŋä.

³³ Kä täämɛ cu ti̱ti̱ a këët din bööth thuk duël ji̱ Lii-bay, tin cieŋ duëli rɛy luaak Kuɔth, kä cakɛ pa̱l raar lätni tin kɔ̱ŋ, kɛ ɣöö lätkɛ kɛ wäär kɛnɛ cäŋdäär.

³⁴ Kɛn nɛy tɔ̱tɔ̱ kɛ bööth thuk duëli ji̱ Lii-bay, ce̱tnikɛ ri̱ckiɛn, kɛ bööth tëë cieŋ kä Jɛ-ru-tha-lɛm.

Kar kɛnɛ gaat kua̱r ni Thɔɔl

³⁵ Kä cu ram ëë yiɛɛth wec Gib-yon ni Yi-el cieŋ kä Gib-yon, kä cua ciekdɛ cɔl i̱ Maakaa.

³⁶ Kä cu gatdɛ min kɛ̱̈ɛ̱̈ a Ab-don cua guɔ̱ɔ̱r ɛ Dhur kɛnɛ Kic kɛ Baal kɛnɛ Ner kɛ Na-dab,

³⁷ kɛnɛ Gɛ-dhor kɛ Äyo kɛnɛ Dhɛ-kar-yaa kɛ Mik-loth.

³⁸ Kä cu Mik-loth a gua̱n Ci-mam. Kä cu gaatkiɛn cieŋ thieekä ji̱ maarädiɛn kä Jɛ-ru-tha-lɛm.

³⁹ Kä cu Ner a gua̱n Kic, kä cu Kic a gua̱n Thɔɔl, kä cu Thɔɔl a gua̱n Jo-na-than kɛnɛ Mal-ki-cuwa kɛ Ä-bi-na-dab kɛnɛ Ɛc-baal.

⁴⁰ Kä cu gat Jo-na-than a. Mɛ-rib-baal, kä cu Mɛ-rib-baal a gua̱r, Mikaa.

⁴¹ Cu gaat Mikaa a Pi-thon kɛnɛ Mɛ-lɛk kɛ Ta-re-ya kɛnɛ A-ɣadh.

⁴² Kä cu A-ɣadh a gua̱n Yaraa kä cu Yaraa a gua̱n A-lɛ-mɛth kɛnɛ Ɛ̈dh-ma-wɛth kɛ Dhim-ri. Kä cu Dhim-ri a gua̱n Modha.

⁴³ Kä cu Modha a gua̱n Bina, Rɛ-pa-yaa min la gua̱n Ɛl-a-thaa min cu la gua̱n A-dhel.

⁴⁴ Kä cu A-dhel a gua̱n Ɛ̈dh-ri-kɔm kɛnɛ Bo-kɛ-ru kɛ I-ca-mel kɛnɛ Cɛ-ar-yaa kɛ O-bad-yaa kɛnɛ Ɣa-nan.