1 Kuɛ̈n 23 - RUAC KUƆTH IN RƐL RƆ

Thok duëël Lii-bay kɛnɛ lätkɛ

¹ Kä mëë ci Dee-bid a wut mi ci dɔŋ, cuɛ gatdɛ ni Thɔ-lo-mon jak kä kuäär I-thɛ-rɛl.

² Cu Dee-bid bööth I-thɛ-rɛl diaal kɛnɛ bööth palä kɛ ji̱ Lii-bay mat.

³ Cuɛ ji̱ Lii-bay tin tekɛ run ti jiɛn diɔ̱k a wä nhial kuɛn, kä cu pekdiɛn a nɛy ti bathdɔɔri ti jiɛn diɔ̱k wi̱cdɛ bädäk.

⁴ Kä cuɛ wee “Bi nɛy ti bathdɔɔri, ti jiɛn da̱ŋ rɛw wi̱cdɛ ŋuaan la̱t luaak Kuɔth la̱t, kä bi nɛy ti bathdɔɔri bäkɛl a kua̱r kɛnɛ ruëëc.

⁵ Kä bi nɛy ti bathdɔɔri ŋuaan a ga̱a̱ŋ thuɔk luaak, kä bi bathdɔɔri tin kɔ̱ŋ Kuoth Nhial puany kɛ thuɔmni tëë ca la̱t kɛ kui̱ puɔnyä.”

⁶ Kä cu Dee-bid ji̱ Lii-bay dääk kɛ bun diɔ̱k, ce̱tnikɛ dho̱rkiɛn, Ger-com, kɛ Kɛ-ɣath kɛ Mɛ-ra-ri.

Ji̱ Ger-com

⁷ Kä cu gaat Ger-con a La-dan kɛnɛ Cimi.

⁸ Kä cu La-dan tekɛ gaat diɔ̱k, kɛ̱̈ɛ̱̈ ni Yɛ-ɣe-li kɛnɛ Dhe-tham kɛ Yo-el.

⁹ Kä cu gaat Cimi a Cɛ-lo-moth kɛnɛ Ɣä-dhi-yel kɛ A-ran. Kä kɛn kɛ bööth thok duëël La-dan.

¹⁰ Kä cu gaat Cimi a Yɛ̈-ɣɛ̈th kɛnɛ Dhina kɛ Yuc kɛnɛ Bɛ-ri-ya.

¹¹ Cu Yɛ̈-ɣɛ̈th a kɛ̱̈ɛ̱̈ kä cua guɔ̱ɔ̱r ɛ Dhidhaa. Duundɛ ɣöö thilɛ Yuc kɛnɛ Bɛ-ri-ya gaat ti ŋuan, kɛ kui̱c ɛ mɔ cua kɛ kuɛn ala thok duëël kɛl.

Ji̱ Kɛ-ɣath

¹² Kä cu gaat Kɛ-ɣath a Am-ram kɛnɛ Yidh-ɣar kɛ Ɣɛb-ron kɛnɛ U-dhi-el.

¹³ Kä cu gaat Am-ram a Ä-ron kɛnɛ Muthɛ. Kä cua Ä-ron lɛy kɛnɛ gaatkɛ ala ti rɛl kɛ rɔ amäni cäŋ kɛl, kɛ ɣöö bikɛ muc tin rɛ̈l kɛ rɔ̱ thöp Kuoth Nhial, kä bikɛ jɛ pal, kä latkɛ puɔ̱th kɛ ciötdɛ amäni cäŋ kɛl.

¹⁴ Kä gaat Muth raan Kuɔth cua kɛ mat thok duëël Lii-bay.

¹⁵ Kä cu gaat Muthɛ a Ger-com kɛnɛ Ɛ-li-dhɛr.

¹⁶ Kä cu gaat Ger-com a Cɛ-bu-el min la bo̱o̱th.

¹⁷ Kä cu gat Ɛ-li-dhɛr a Rɛ-ɣɛ̈b-yaa min mɔ bo̱o̱th. Kä cuɛ thil gat mi dɔ̱ŋ, duundɛ ɣöö cu gatdɛ ni Rɛ-ɣɛ̈b-yaa tekɛ gaat ti ŋuan.

¹⁸ Kä cu gat Yidh-ɣar a Cɛ-lo-mith min mɔ bo̱o̱th thuɔk duëëlɛ.

¹⁹ Kä cu gaat Ɣɛb-ron a Yɛ-ri-yaa kɛnɛ Ä-mɛ̈r-yaa kɛ Yä-dhi-el kɛnɛ Yɛ-kɛ̈-mam.

²⁰ Kä cu gaat U-dhi-el a Mikaa kɛnɛ Yi-ci-yaa.

Gaat Mɛ-ra-ri

²¹ Kä cu gaat Mɛ-ra-ri a Mɛ̈k-li kɛnɛ Muci. Kä cu gaat Mɛ̈k-li a Ɛl-a-dhar kɛnɛ Kic.

²² Kä cu Ɛl-a-dhar li̱w a thilɛ jɛ dhɔɔl. Cu te ni jɛn kɛ nyi̱er. Kä cua nyieekɛ kuɛn ɛ gaat däman ni Kic.

²³ Kä cu gaat Muci a Mɛ̈k-li kɛnɛ E-dɛr kɛ Yi-re-moth.

²⁴ Cu kɛn ti̱ti̱ a gaat Lii-bay kɛ thuk duëli gua̱ni, tëë la bööth dööri ce̱tnikɛ ciöötkiɛn te ca gɔ̱r gööli, a känɛ ni kä run ti jiɛn da̱ŋ rɛw a wä nhial ti lua̱ŋkɛ la̱t rɛy luaak Kuɔth Nhial.

²⁵ Kä cu Dee-bid wee “Kuoth Nhial min la Kuoth I-thɛ-rɛl cɛ nɛɛkɛ ka̱m mal. Kä bɛ cieŋ kä Jɛ-ru-tha-lɛm amäni cäŋ kɛl.

²⁶ Kä /ci ji̱ Lii-bay kɛmɛkä ro̱mä kɛ Kuoth Nhial bilɛ kap kiɛ tin la pal kɛ jɛ.”

²⁷ (Kɛ ɣöö riet Dee-bid in jɔak ɛ pek ji̱ Lii-bay a känɛ nikä run ti jiɛn da̱ŋ rɛw a wä nhial.)

²⁸ Duundɛ ɣöö bi la̱tdiɛn a luäk gan Ä-ron kɛ la̱t rɛy luaak Kuɔth Nhial. Bikɛ tit ni rɛy kal luaak kɛnɛ duel rɛy luaak kɛ la̱k kä tin diaal tin rɛ̈l kɛ rɔ. Kɛ lät tin kɔ̱ŋ rɛy luaak Kuɔth.

²⁹ Kä bikɛ luäk bäkɛ la̱t jurayä wec tharbëtkä kɛ nup kɛ kui̱ mucä kɔaŋ, kɛ juray mi thil thuɔp, kɛ mi ca lia̱a̱p kɛ liɛɛth, kɛ theemni diaal.

³⁰ Kä bikɛ Kuoth Nhial a palkɛ kä puanykɛ jɛ ni ciaŋ kɛ runwaŋ kɛnɛ thiaŋ.

³¹ Kɛnɛ mi thöpkɛ muc tin wa̱ŋkɛ Kuoth Nhial kɛ cäŋ lɔ̱ŋä kɛnɛ cäŋ ŋarä tëth path kɛ ni̱n ŋarä tin ca mɛk. Bikɛ lät nhiam Kuɔth Nhial a thil lɔ̱a̱ŋ nikɛ pek in görkɛ kä kɛ.

³² Inɔ cu ji̱ Lii-bay lät rɛy kɛmɛkä ro̱mä kɛ Kuoth Nhial kɛ gua̱th in rɛl gɔɔydɛ rɔ lua̱kɛ gaatmanikiɛn ni gaat Ä-ron kɛ lät luaak Kuɔth Nhial.