1 Kuɛ̈n 20 - RUAC KUƆTH IN RƐL RƆ

Käpi Dee-bid kɛ wec Rɛ̈-baa

¹ Kä kɛ thuɔ̱k runä, kɛ gua̱a̱th in la kua̱r a nyiëëny, cu Yo-ab wä kɛ rɛm, cuɛ wec ji̱ A-mon wä däk, kɛnɛ Rɛ̈-baa wä go̱l. Duundɛ ɣöö cu Dee-bid duɔth ka Jɛ-ru-tha-lɛm. Kä cu Yo-ab wec Rɛ̈-baa mak kä cuɛ ka̱n.

² Kä cu Dee-bid kum kua̱riɛn ka̱n wi̱i̱dɛ. Cuɛ jek tëë kɛ ki̱luni dääpä ti jiɛɛn diɔ̱k wi̱cdɛ ŋuaan, kä tëë kɛ päm mi te kök mi di̱i̱t. Kä cu Dee-bid jɛ la̱th wi̱i̱dɛ. Kä cuɛ pɛ̈ɛ̈c ti ŋuan nööŋ wi̱c.

³ Kä cuɛ nɛy tëë te wi̱c nööŋ, cuɛ kɛ la̱a̱t ŋät jiɛɛn kɛnɛ ta̱th korɛkni, kɛ thoriyni, kɛnɛ jiöpni. Kä cu Dee-bid ɛ lät kä wi̱i̱ ji̱ A-mon diaal. Kä cuɛ rɔ ri̱t kɛnɛ nɛy diaal wäkɛ kä Jɛ-ru-tha-lɛm.

Ko̱r kɛ ji̱ Pi-li-thɛt

⁴ Kɛ kɔr kä mɛmɛ cuɛ lɛ tekɛ ko̱r kɛ ji̱ Pi-li-thɛt wi̱c kä Gɛ-dhɛr. Kä cu Thi-bɛ-kay raan Ɣu-cay ni Thip-pay näk ram kɛl kä nɛy tin di̱t. Kä cu ji̱ Pi-li-thɛt a kuaany ji̱ I-thɛ-rɛl.

⁵ Kä cuɛ lɛ tekɛ ko̱r kɛ ji̱ Pi-li-thɛt. Kä cu Ɛl-ɣa-nan gat Ya-ir, La̱mi däman Gɔl-yath raan wec Gɛ̈th mi ce̱t taŋ muɔ̱tdɛ kɛ thi̱r näk.

⁶ Kä cuɛ lɛ tekɛ ko̱r wi̱c kä Gɛ̈th, kä tëë kɛ wut mi di̱i̱t puɔ̱nydɛ mi te yiɛt tetni da̱ŋ bäkɛl, kɛnɛ yiɛt ciökni da̱ŋ bäkɛl, kä matdiɛn diaal kɛ yɛt ti jiɛn da̱ŋ rɛw wi̱cdɛ ŋuaan. Kä jɛn ɛ kuɛ̈ɛ̈ nɛɛni ti di̱t.

⁷ Kä min cɛ ji̱ I-thɛ-rɛl dɛp, cua jɛ näk ɛ Jo-na-than gat Cima gat däman Dee-bid ni.

⁸ Kä cu kɛn a kuay nɛɛni tin di̱t pua̱nykiɛn wi̱c kä Gɛ̈th. Cua kɛ näk ɛ Dee-bid kɛnɛ nɛɛkɛ.