1 Kuɛ̈n 19 - RUAC KUƆTH IN RƐL RƆ

Juc Dee-bid kɛ ji̱ A-mon kɛnɛ ji̱ Thi-ri-ya

¹ Täämɛ kɛ kɔr kä min ci Na-ɣac kuäär ji̱ A-mon li̱w, kä cu gatdɛ ruëc kɛ gua̱thdɛ.

² Kä cu Dee-bid wee “Ɣän bä lät agɔaa kɛ Ɣa-nun gat Na-ɣac, kɛ ɣöö ci gua̱n lät agɔaa kɛ ɣä.” Cu Dee-bid ɛ jäk kä naath lätdɛ tɛth lɔaacdɛ kɛ kui̱ gua̱n. Kä cu ji̱ kɔar Dee-bid ben kä Ɣa-nun muun ji̱ A-mon, kɛ ɣöö ba jɛ wä la̱t ruac.

³ Duundɛ ɣöö cu bööth ji̱ A-mon Ɣa-nun jiök i̱, “Diiwi jɛ ɛn ɣöö Dee-bid, jäkɛ ni ji̱ kä tɛ̈th lɔaacdɛ kɛ kui̱ guur? A /ci nɛɛkɛ ku ben kɛ ɣöö ba wec ben lim, kɛnɛ ɣöö ba ben ka̱n?”

⁴ Inɔ cu Ɣa-nun kuaany Dee-bid ti̱kkiɛn mut, kä cuɛ bieynikiɛn rɛ̈t dääriɛn, kɛnɛ jolkiɛn, kä cuɛ kɛ jak kä wä,

⁵ kä cukɛ jiɛɛn. Kä mëë ca Dee-bid la̱r ruac nɛɛni tɔ̱tɔ̱, cuɛ kɛ jäk kä nɛy ti waa kɛ lor, kä cukɛ pöc ɛlɔ̱ŋ kɛn nɛy tɔ̱tɔ̱. Kä cu kuäär wee i̱, “Ta̱yɛ kä Jɛ-ri-ko amäni mi ci tikkun do̱ny, bia ku lɛ ben.”

⁶ Kä mëë ci ji̱ A-mon ɛ ŋa̱c ɛn ɣöö cikɛ a ji̱ tɛ̈r Dee-bid, cu Ɣa-nun kɛnɛ ji̱ A-mon ciɛk in bo̱r mi tëë ki̱luni ti bathdɔɔri ti jiɛɛn diɔ̱k wi̱cdɛ ŋuaan wi̱cdɛ kur diɔ̱k ja̱k, ti wa kɔk thurbiɛɛli kɛnɛ jiöŋkööri kä Mɛ-tho-po-ta-mia kɛ wec Ä-ram-maa-kaa kɛnɛ wec Dho-baa.

⁷ Cukɛ thurbiɛɛli ti bathdɔɔri ti jiɛɛn diɔ̱k wi̱cdɛ rɛw kɔk amäni kuäär Maakaa kɛnɛ rɛmdɛ bä tëë cu ben pua̱t nhiam Me-dɛ-ba. Kä cu ji̱ A-mon tuɔ̱ŋ ko̱o̱r kuany ni rɛy wi̱i̱nikiɛn, kä cukɛ wä ko̱o̱r.

⁸ Kä mëë ci Dee-bid ɛ liŋ, cuɛ Yo-ab ja̱k kɛnɛ ji̱ ko̱o̱r diaal.

⁹ Kä cu ji̱ A-mon ben raar, cua tuɔ̱ŋ ko̱o̱r ben car thok duɔ̱p wec, kä cu kua̱r tin ci ben, ben cuɔ̱ŋ kärɔ̱ kueer wec.

¹⁰ Kä mëë ci Yo-ab ɛ nɛn ɛn ɣöö ba kɛ ma̱k kɛ nhiam kɛnɛ jɔk, cuɛ naath kuany kä ji̱ I-thɛ-rɛl, kä cuɛ kɛ la̱th lotdä ji̱ Thi-ri-ya.

¹¹ Kä cuɛ duɔth nath ka̱m däman ni Ä-bi-cay, kä cuɛ kɛ ka̱m ji̱ A-mon.

¹² Kä cuɛ kɛ jiök i̱, “Mi wä ji̱ Thi-ri-ya ɣä wä tiam, lua̱kɛ ɣä. Kä mi wa yɛ wä tiam ɛ ji̱ A-mon, bä yɛ luäk.

¹³ Cuɔmɛ rɔ̱ agɔaa, kä buɔ̱mnɛ rɔ̱ kɛ kui̱ nɛɛni kɔn kɛnɛ wec Kuɔthdan. Kä bi Kuoth Nhial la̱t ni min gɔaa kɛ jɛ.”

¹⁴ Kä cu Yo-ab kɛnɛ nɛɛkɛ wä nyiëëny kɛ ji̱ Thi-ri-ya. Kä cukɛ rɔ̱ bar kɛ Yo-ab.

¹⁵ Kä mëë ci ji̱ A-mon ɛ nɛn ɛn ɣöö ci ji̱ Thi-ri-ya rɔ̱ bar, cukɛ rɔ̱ bar bäkɛ Ä-bi-cay, däman Yo-ab, cukɛ riŋ rɛy wec. Kä cu Yo-ab ben kä Jɛ-ru-tha-lɛm.

¹⁶ Kä mëë ci ji̱ Thi-ri-ya jɛ nɛn i̱ ca kɛ joc ɛ ji̱ I-thɛ-rɛl, cukɛ naath jäk kä ji̱ Thi-ri-ya tin te jɔk kiɛɛr Yu-pɛ-ree-tidh, cukɛ ben böthkɛ kɛ ɛ Co-pak bo̱o̱th rɛ̈m Ɣä-dɛ̈d-ɛdhɛr.

¹⁷ Kä mëë ca la̱r Dee-bid, cuɛ ji̱ I-thɛ-rɛl diaal ma̱a̱t, kä cuɛ jiɛth kui̱ Jɔr-dɛn. Kä cuɛ wä kä kɛ a cɛ tuɔ̱ŋkɛ kuany, kä cu kɛ nyiëëny kɛ jɛ.

¹⁸ Kä cu ji̱ Thi-ri-ya rɔ bar kɛ ji̱ I-thɛ-rɛl. Kä cu Dee-bid ji̱ thurbiɛɛli ti bathdɔɔri bärɔw, kɛ rɛm ti bathdɔɔri ti jiɛɛn ŋuan näk kä ji̱ Thi-ri-ya, amäni Co-pak bo̱o̱th rɛ̈mdiɛn cua jɛ näk bä.

¹⁹ Kä mëë ci ji̱ kɔar Ɣä-dɛ̈d-ɛdhɛr ɛ nɛn ɛn ɣöö cakɛ joc ɛ ji̱ I-thɛ-rɛl, cukɛ mal lat kɛ Dee-bid, kä cu ka kuaany kɛ. Kä /ken ji̱ Thi-ri-ya jɛ lɛ luäŋ kɛ ɣöö dëë ji̱ A-mon lɛni luäk.