1 Kuɛ̈n 17 - RUAC KUƆTH IN RƐL RƆ

Mat ruac Kuɔth kɛ Dee-bid

¹ Täämɛ min ci Dee-bid ku cieŋ dhɔrɛ, cuɛ gök ni Na-than jiök i̱, “Guicɛ ɣän cieŋä duëël jiɛɛn thëëp, kä thanduk matdä ruac Kuɔth Nhial cieŋɛ rɛy kɛmɛkä.”

² Kä cu Na-than Dee-bid jiök i̱, “Wër lätni tin diaal tin te lɔɔcdu, kɛ ɣöö te Kuoth kɛ ji̱ kɛɛl.”

³ Kä kɛ wäär ɛmɔ cu ruac Kuɔth Nhial ben kä Na-than i̱,

⁴ “Wër kä ja̱ŋdä ni Dee-bid, jiök ni jɛ ɛn ɣöö nɛmɛ ɛ min laar Kuoth Nhial ɛ i̱, ‘/Ciɛ ji̱n bi ɣä lät kä duel mi bä cieŋ thi̱n ɔ.

⁵ Ɣän /ka̱n met cieŋ duëël ni mëë ka̱mä ji̱ I-thɛ-rɛl raar amäni walɛ, ɣän ja̱a̱lä ni kɛmɛni ala gua̱th cieŋädä.

⁶ Gua̱thni diaal tëë ja̱lä thi̱n kɔnɛ ji̱ I-thɛ-rɛl diaal, ɣän ca met ruac kɛ ruëëc I-thɛ-rɛl, tëë ca lar ɣöö ba nɛɛkä ni ji̱ I-thɛ-rɛl met thiec i̱, “Ɛŋu /ken yɛn ɣä lät kä duel jiɛɛn thëëp ɔ?” ’

⁷ Kɛ kui̱c ɛmɔ täämɛ ti̱ti̱ bikɛ la̱t ja̱ŋdä ni Dee-bid ɛn ɣöö, ci Kuoth Nhial in la Ruey Ɣɔaa ɛ lar i̱, ‘Ɣän ca ji̱ ka̱n ni rɛy tɔ̱ɔ̱rä, yien deet kɛ ɣöö bi ben a bo̱o̱th nɛɛnikä ni ji̱ I-thɛ-rɛl.

⁸ Kä ɣän ta̱a̱ kɛɛl kɛ ji̱ gua̱thni diaal tin ci wä thi̱n, kä ca ji̱ tɛ̈ru diaal näk nhiamdu. Kä bä ciötdu jak kä tekɛ kɛ̈k, ce̱tkɛ ciöt nɛɛni tin bumnikɛn wi̱i̱ muɔ̱ɔ̱n.

⁹ Kä bä nɛɛkä ni ji̱ I-thɛ-rɛl moc gua̱a̱th kä bäkɛ pith, bikɛ cieŋ guäthdiɛn mi ca kɛ bi jut thi̱n. Kä /ci nɛy tin buɔ̱m buɔ̱ɔ̱m kɛ bilɛ ciɛŋ a jiäk, ce̱tkɛ mëë dan,

¹⁰ kä kɛ gua̱a̱th in bä nɛɛkä ni ji̱ I-thɛ-rɛl kuëny ruëëc. Kä bä ji̱ tɛ̈run diaal jak kä kuaany. Kä ɣän Kuoth Nhial bä dhɔru jak kä di̱t.

¹¹ Kä mi wä ni̱nku wä thuuk bi rɔ ma̱t guuri, bä gatdu lɔ̱ kap nhial kɔɔru, ram kä gaatku, kä bä kuäärɛ raan kä gaatku jak kä te thi̱n.

¹² Kä bɛ duel lɔ̱ la̱t kɛ ciötdä, kä bä kɔm kuäärädɛ jak kä te thi̱n amäni cäŋ kɛl.

¹³ Bi ɣän a gua̱n, kä bɛ la gatdä. Kä ca nhökdä min thil pek bi woc kä jɛ, ce̱tkɛ mëë ca woc kä ram mëë te nhiamdu,

¹⁴ kä bɛ te rɛy cieŋ kuäärädä amäni cäŋ kɛl. Kä bi kɔm kuäärädɛ te thi̱n amäni cäŋ kɛl.’ ”

¹⁵ Kɛ kui̱ rieetni ti̱ti̱ diaal, kɛnɛ nyuuthni ti̱ti̱ diaal, cu Na-than kɛ la̱t Dee-bid.

Pal tɛthkä lɔaac Dee-bid

¹⁶ Kä cu kuäär ni Dee-bid wä nhiam Kuɔth Nhial, kä cuɛ wee “Ɛ ɣän ŋa, lö Kuoth Nhial, kä ɛ kui̱ dhɔaarä min mi̱th, mɔ curi ɣä nööŋ nhial i̱ nɔmɔ?

¹⁷ Kä ŋotdɛ kɛ mi lätdi ɣä ti ŋuan lö Kuoth, kä ci ruac lat kɛ kui̱ dhɔaarä kɛ gua̱a̱th ɔ bi ben ɔ, kä ci ɣä ciɛŋ ce̱tkɛ ram mi luɔ̱thkɛ lö Kuoth Nhial!

¹⁸ Kä ɛŋu dëë lɛ la̱r ji̱ mɔ? Kä ŋäci ɣän ja̱ŋdu.

¹⁹ Ɛ ruacdu kä ɛ ca̱r lɔaacdu, ɛn ɣöö bi kɛn ti diaal ti̱ti̱ la̱t lö Kuoth Nhial, kɛ ɣöö bäkɛ ŋa̱c.

²⁰ Kä thilɛ mi päär kɛ ji̱ lö Kuoth Nhial, kä thilɛ Kuoth mi dɔ̱ŋ mi ce̱tkɛ ji̱, kä tin diaal tin cakɔ liŋ kɛ ji̱thkɔ.

²¹ Kä kɛ nɛy tin tith wi̱i̱ muɔ̱ɔ̱n, cäät kɛ nɛɛku ni ji̱ I-thɛ-rɛl tɔ̱, tëë ci luɛl ala nɛɛku mi ci rɔ moc kɛ̈k, kä lät ti buɔ̱m buɔ̱ɔ̱m ti di̱t kɛ joc nath raar nhiam nɛɛniku tëë ci luɛl kä I-jëp?

²² Kä curi ji̱ I-thɛ-rɛl jak kä nɛɛku amäni cäŋ kɛl. Kä ji̱n Kuoth Nhial curi cua̱ Kuothdiɛn.

²³ Kä täämɛ lö Kuoth Nhial, ku ruacdu min ci lat kɛ kui̱dä kɛnɛ kui̱ gankä jak kä thuɔ̱k amäni cäŋ kɛl. Kä lät ni jɛ ce̱tkɛ min ci lat.

²⁴ Kä bi kɛ̈kdu jɔɔc amäni cäŋ kɛl, lar kɛ jɛ i̱, ‘Kuoth Nhial in la Ruey Ɣɔaa ni Kuoth ɛ Kuoth I-thɛ-rɛl,’ kä ba dhɔr jäŋädu ni Dee-bid la̱t nhiamdu.

²⁵ Kɛ ɣöö ci rɔ nyuɔ̱th ɣän ja̱ŋdu lö Kuothdä, bä ji̱ lät kä duel. Kɛ kui̱c ɛmɔ ɣän ca buɔ̱m mi bä pal ni ji̱ jek.

²⁶ Kä täämɛ lö Kuoth Nhial, ɛ ji̱n Kuoth, kä ci ɣä la̱t ruac mi gɔaa.

²⁷ Kɛ kui̱c ɛmɔ täämɛ thiëcä ji̱ mi nhɔki jɛ, deri kuaykä poth, kɛ ɣöö dëë kɛ te nhiamdu amäni cäŋ kɛl. Kɛ ɣöö min ci poth lö Kuoth Nhial, la puɔth jɛ amäni cäŋ kɛl.”