1 Kuɛ̈n 16 - RUAC KUƆTH IN RƐL RƆ

Läth thandukä matdä ruac Kuɔth rɛy kɛmɛkä

¹ Kä cukɛ thanduk matdä ruac Kuɔth naŋ rɛy kɛmɛkä, min ci Dee-bid ɛ la̱t kɛ kui̱dɛ. Kä cukɛ muc mi waŋkɛ kɛnɛ muc malä thöp nhiam Kuɔth.

² Kä min cɛ thuɔ̱k kɛ tho̱p mucä min waŋkɛ kɛnɛ muc malä, cuɛ naath poth kɛ ciöt Kuɔth Nhial.

³ Kä cuɛ ji̱ I-thɛ-rɛl diaal ka̱m juray wutni kɛ män ramɔ kɛ ramɔ, kɛnɛ pat pat kɛ dhuɔn ri̱eŋ kɛ mi ce̱tkɛ pat buɔ̱wkä.

⁴ Kä cuɛ tekɛ ji̱ Lii-bay ti cuɛ kuany ala la̱a̱t nhiam thandukä matdä ruac Kuɔth Nhial, kɛ kui̱ ti̱mädɛ kɛnɛ lärɛ tɛ̈th lɔaac kɛ puɔnydɛ, ɛn Kuoth I-thɛ-rɛl.

⁵ Kä cu A-thap a kuäär, kä cua guɔ̱ɔ̱r ɛ Dhɛ-kar-yaa, kä cu Yi-el kɛ Cɛ-mi-ra-moth kɛnɛ Yɛ-ɣe-li kɛ Mɛ̈-tith-yaa kɛnɛ Ɛli-ab kɛ Bɛ-na-yaa kɛnɛ O-bed-ɛ-dom kɛ Yi-el a pua̱a̱t thuɔmni. Kä cu A-thap jiööth la̱t.

⁶ Kä cu Bɛ-na-yaa kɛnɛ Ya-dhi-el bo̱o̱th palä kaaŋ koth a thil cuɔ̱ŋ nhiam thandukä matdä ruac Kuɔth Nhial.

Dit puɔnyä Dee-bid

⁷ Ɛn cäŋ ɛmɔ cua jɛn cäŋ in nhiam mëë cu Dee-bid A-thap kɛnɛ ji̱ Lii-bay ka̱m ɣöö ba Kuoth Nhial puany kɛ diit.

⁸ La̱tdɛ Kuoth Nhial tɛ̈th lɔaac, kä cɔalɛ ciötdɛ, kä la̱tdɛ döör tin cɛ cak.

⁹ Këtdɛ jɛ diit, puanyɛ jɛ kɛ diit, latdɛ lätkɛ diaal tin ga̱ykɛ naath!

¹⁰ Ɛ liak tekɛ yɛ kɛ kui̱ cio̱tädɛ. Kä a lo̱ckun tɛ̈th yɛn tin palkɛ Kuoth Nhial!

¹¹ Go̱rɛ Kuoth Nhial kɛnɛ buɔ̱mdɛ, go̱rɛ jɛ athil pek!

¹² Tiɛmɛ lätkɛ tin ga̱ykɛ naath tëë cɛ la̱t, lätkɛ tin ga̱ykɛ naath, kɛnɛ lukdɛ mëë cɛ lat,

¹³ lö kuay jäŋädɛ ni A-bɛ-ram, lö gaat Je-kɔb raandɛ mëë cɛ mɛk!

¹⁴ Jɛn ɛ Kuoth Nhial, Kuothdan, lukdɛ tëë wi̱i̱ muɔ̱ɔ̱n kɛɛliw.

¹⁵ Kä jɛn bɛ guk ruacdɛ tim amäni cäŋ kɛl. Ruac ëë cɛ la̱t ri̱c ti bathdɔɔr,

¹⁶ mat ruac ëë cɛ lat kɛnɛ A-bɛ-ram, ya̱c ëë cɛ guɔ̱k Ay-dhɛk,

¹⁷ mëë cɛ lat kɛ Je-kɔb, guk mi thil pek kɛ I-thɛ-rɛl,

¹⁸ cɛ wee i̱, “Ɣän bä ji̱ ka̱m mun Kɛ-naan, ala kui̱du mi rɛli.”

¹⁹ Kä mëë kui̱c pekdiɛn, kä kɛ ja̱a̱l rɛy rööl Kɛ-naan,

²⁰ yi̱ckɛ kam dööri, yi̱ckɛ kam kua̱ri.

²¹ /Kenɛ kɛ nhök ɣöö bakɛ ciɛŋ a jiäk. Cɛ kua̱r luek kɛ kui̱diɛn,

²² wee i̱, “/Cuarɛ duŋdä min ca mɛk gueer, kä /cuarɛ gökdä lät kä mi jiääk!”

²³ Ɣɔw kɛɛliw, këtdɛ Kuoth Nhial diit! Latdɛ jɛ ni ciaŋ ɛn ɣöö cɛ kɔn kän.

²⁴ La̱tdɛ döör diaal liakdɛ, lätkɛ tin bum la̱tdɛ kɛ nɛy diaal!

²⁵ Kɛ ɣöö bum Kuoth Nhial ɛlɔ̱ŋ, ba jɛ puany ɛlɔ̱ŋ, kä ba luɔ̱th ni jɛ kä kuth diaal.

²⁶ Kɛ ɣöö kuth nɛɛni diaal kɛ guäy. Duundɛ ɣöö Kuoth Nhial, ɛ jɛn cak nhialɔ.

²⁷ Luth kɛnɛ wuɔ̱t tekɛ kɛ jɛ. Kä buɔ̱m kɛnɛ tɛ̈th lɔaac kɛ nyinkɛ.

²⁸ Liakɛ Kuoth Nhial yɛn ji̱ wec muɔ̱ɔ̱n diaal, liakɛ wuɔ̱t Kuɔth Nhial kɛnɛ buɔ̱mdɛ!

²⁹ Liakɛ Kuoth Nhial kɛ kui̱ cio̱tkädɛ. Nöŋɛ jɛ muc kä bia nhiamdɛ! Palɛ Kuoth Nhial rɛy gɔɔyädɛ min rɛl rɔ.

³⁰ Dualɛ nhiamdɛ, yɛn wi̱c muɔ̱ɔ̱n kɛɛliw, kä wi̱c muɔ̱ɔ̱n ca la̱t, /cɛ rɔ dëë wany.

³¹ A pua̱a̱r kɛnɛ piny lo̱ckiɛn tɛth, akɛ larkɛ jɛ i̱, “Kuoth Nhial ɛ Kuäär!”

³² Kä a yier ruac kɛnɛ tin diaal tin te thi̱n, kä ɛ dɔr lɔcdɛ tɛth kɛnɛ nyinkɛ diaal!

³³ Kä a jiɛɛn diaal kiɛtkɛ diit tɛthkä lɔaac nhiam Kuɔth Nhial, kɛ ɣöö bɛ wi̱c muɔ̱ɔ̱n ben luk.

³⁴ La̱rɛ Kuoth Nhial tɛ̈th lɔaac, kɛ kui̱ gɔɔyädɛ, kɛ kui̱ nho̱kädɛ min thil pek!

³⁵ Kä larɛ bä i̱, “Kän nɛy, lö Kuoth käända, rol nɛy kä kän kɔ rɛy dööri, kä bi lo̱ckɔ cu tɛth, kä ba̱kɔ ciötdu cu liak.

³⁶ A puɔ̱th tekɛ Kuoth Nhial Kuoth I-thɛ-rɛl, puanyɛ jɛ amäni cäŋ kɛl!” Kä cu nɛy diaal wee i̱, “Nɔnɔ!” Ɛ liak wä kä Kuoth Nhial.

Ta̱a̱ palä min wen thi̱n

³⁷ Inɔ cu Dee-bid A-thap kɛnɛ gaatman ni ji̱ Lii-bay ka̱m pal nhiam thandukä matdä ruac Kuɔth Nhial, kɛ ɣöö bikɛ la pal ɛn wi̱ni cäŋ kɛ cäŋ.

³⁸ Kä cuɛ O-bed-ɛ-dom gat Yɛ-du-thun kɛnɛ ji̱ thuɔk duëëlɛ ti jiɛɛn bäkɛl wi̱cdɛ bädäk jak kä lua̱kɛ kɛ. Kä cu jɛn O-bed-ɛ-dom kɛnɛ Otha a ga̱a̱ŋ thuɔk rɛ̈ɛ̈k.

³⁹ Kä cuɛ bo̱o̱th palä ni Dha-dok kɛnɛ bööth palä tin kɔ̱ŋ ka̱m la̱t palä Kuɔth Nhial guäth palä min te wi̱c kä Gib-yon,

⁴⁰ kɛ ɣöö bikɛ muc tin waŋkɛ thöp Kuoth Nhial kɛ runwaŋ kɛnɛ thiaŋ wi̱i̱ yi̱kä min la waŋkɛ muc thi̱n, ce̱tnikɛ min ca gɔ̱r kä ŋuɔ̱t Kuɔth Nhial tëë cɛ la̱t ji̱ I-thɛ-rɛl.

⁴¹ Kä cu Ɣe-man kɛnɛ Yɛ-du-thun kɛ duɔth nɛɛni tëë ca kuany kɛ ɣöö ba Kuoth Nhial la̱r tɛ̈th lɔaac, kɛ kui̱ nhökdɛ min thil pek te kɛɛl kɛ kɛ.

⁴² Kä cu Ɣe-man kɛnɛ Yɛ-du-thun tekɛ kaaŋ, thuɔmni kët din. Kä cua gat Yɛ-du-thun kuany thok rɛ̈ɛ̈k.

⁴³ Kä cu nɛy diaal däk piny, cu ramɔ wä dhɔrɛ, kä cu Dee-bid wä cieŋ kɛ ɣöö bɛ ji̱ dhɔaarɛ wä poth.