1 Kuɛ̈n 15 - RUAC KUƆTH IN RƐL RƆ

No̱o̱ŋ thandukä matdä ruac Kuɔth kä Jɛ-ru-tha-lɛm

¹ Ɛ jɛn cu Dee-bid rɔ lät kä duel därwec Dee-bid. Kä cuɛ kɛmɛ yiath piny kɛ kui̱ thandukä matdä ruac Kuɔth.

² Kä cu Dee-bid wee i̱, “Thilɛ raan ɛ ni raan Lii-bay ɛnɔ bi thanduk matdä ruac Kuɔth kapɔ, kɛ ɣöö ci Kuoth Nhial kɛ mɛk kɛ ɣöö ba thanduk matda ruacdɛ kap kä bikɛ jɛ lät ikä amäni cäŋ kɛl.”

³ Kä cuɛ ji̱ I-thɛ-rɛl diaal dol kä Jɛ-ru-tha-lɛm, kɛ ɣöö ba thanduk matdä ruac Kuɔth nööŋ gua̱thdɛ min cɛ la̱t.

⁴ Kä cuɛ gaat Ä-ron kɛnɛ ji̱ Lii-bay dol kɛɛl.

⁵ Kä gaat Kɛ-ɣath. Cua bo̱o̱th ni U-ri-el kɛnɛ ji̱ maarädɛ ti kuɔ̱r wi̱cdɛ jiɛn da̱ŋ rɛw.

⁶ Kä gaat Mɛ-ra-ri. Cua bo̱o̱th ni Ä-tha-yaa kɛnɛ ji̱ maarädɛ ti kur rɛw wi̱cdɛ jiɛn da̱ŋ rɛw.

⁷ Kä gaat Ger-com. Cua bo̱o̱th ni Yo-el kɛnɛ ji̱ maarädɛ ti kuɔ̱r wi̱cdɛ jiɛn da̱ŋ diɔ̱k.

⁸ Kä gaat Ɛli-dha-pan. Cua bo̱o̱th ni Cɛ-mɛ̈-yaa kɛnɛ ji̱ maarädɛ ti kur rɛw.

⁹ Kä gaat Ɣɛb-ron. Cua bo̱o̱th ni Ɛ-li-el kɛnɛ ji̱ maarädɛ ti jiɛɛn bädäk.

¹⁰ Kä gaat U-dhi-el. Cua bo̱o̱th ni A-mi-na-dab kɛnɛ ji̱ maarädɛ ti kuɔ̱r kɛl wi̱cdɛ nɛy da̱ŋ wäl rɛw.

¹¹ Ɛ jɛn cu Dee-bid bööth palä ni Dha-dok kɛnɛ Ɛb-ya-thar kɛ ji̱ Lii-bay ni U-ri-el kɛnɛ Ä-tha-yaa kɛ Yo-el kɛnɛ Cɛ-mɛ̈-yaa kɛ Ɛ-li-el kɛnɛ A-mi-na-dab cɔl.

¹² Kä cuɛ kɛ jiök i̱, “Kɛ yɛn bööth thuk duëli ji̱ Lii-bay. Lɛ̈yɛ rɔ̱ kɛ gaatmanikun, kɛ ɣöö bia thanduk matdä ruac Kuɔth Nhial min la Kuoth I-thɛ-rɛl wä nööŋ guäth ɛ ca la̱t kɛ kui̱dɛ mi.

¹³ Kɛ ɣöö /ken yɛnɛ wä nööŋ ɛ yɛn kɛ nhiam yɛn ji̱ Lii-bay, ɛ jɛn ci Kuoth Nhial min la Kuothdan gaak kɛ kɔnɔ.”

¹⁴ Inɔ cu bööth palä kɛ ji̱ Lii-bay rɔ lɛy, kɛ ɣöö ba thanduk matdä ruac Kuɔth Nhial Kuoth I-thɛ-rɛl wä nööŋ.

¹⁵ Kä cu ji̱ Lii-bay thanduk matdä ruac Kuɔth kap kɛ jiɛɛn kɛ wuɔ̱ɔ̱kiɛn. Ce̱tnikɛ ruac Kuɔth Nhial mëë ci Muthɛ jɛ lar.

¹⁶ Kä cu Muthɛ bööth ji̱ Lii-bay lɛni jiök kɛ ɣöö ba naath ti bia̱ këët din kuany kä gaatmani, ti bi diit puɔ̱nydä kɛt kɛ thuɔmni.

¹⁷ Kä cu ji̱ Lii-bay Ɣe-man gat Yo-el kɛnɛ A-thap gat Bɛ-rɛk-yaa kä gaat Mɛ-ra-ri kɛ E-than gat Ku-ca-yaa kuany.

¹⁸ Kä cu lua̱a̱kiɛn a Dhɛ-kar-yaa kɛnɛ Ya-dhel kɛ Cɛ-mi-ra-moth kɛnɛ Yɛ-ɣi-el kɛ Uni kɛnɛ Ɛli-ab kɛ Bɛ-na-yaa kɛnɛ Mä-the-yaa kɛ Mɛ̈-tith-yaa kɛnɛ Ɛ-li-pɛ-le-ɣu kɛ Mik-ne-yaa kɛ gääŋ thuɔk rɛ̈ɛ̈k ni O-bed-ɛ-dom kɛnɛ Yi-el.

¹⁹ Kä cu këët din a Ɣe-man kɛnɛ A-thap kɛ E-than, pua̱a̱t thuɔmni yieethä min yian.

²⁰ Kä cu Dhɛ-kar-yaa Ä-dhi-el kɛ Cɛ-mi-ra-moth kɛnɛ Yɛ-ɣi-el kɛ Uni kɛnɛ Ɛli-ab kɛ Mä-the-yaa kɛnɛ Bɛ-na-yaa la pua̱a̱t bä.

²¹ Kä cu Mɛ̈-tith-yaa kɛnɛ Ɛ-li-pɛ-le-ɣu kɛ Mik-ne-yaa kɛnɛ O-bed-ɛ-dom kɛ Yi-el kɛ Ä-dhɛ̈dh-yaa a pua̱a̱t thuɔmni bä.

²² Kä cua Kɛ-nan-yaa kuany ala bo̱o̱th ji̱ Lii-bay tin pua̱tkɛ thuɔmni, kɛ ɣöö ŋäcɛ puɔ̱t thuɔm agɔaa.

²³ Kä cu Bɛ-rɛk-yaa kɛnɛ Ɛl-ka-na a ga̱a̱ŋ thuɔk duëël thandukä matdä ruac.

²⁴ Kä cu Cɛ-bɛ̈n-yaa kɛnɛ Yo-ca-pat kɛ Nɛ-tan-el kɛnɛ Ä-ma-thay kɛ Dhɛ-kar-yaa kɛnɛ Bɛ-na-yaa kɛ Ɛ-li-dhɛr bo̱o̱th palä a kuɔ̱ɔ̱th kaaŋä nhiam thandukä matdä ruac Kuɔth. Kä O-bed-ɛ-dom kɛnɛ Yɛ-ɣi-yaa a ga̱a̱ŋ thuɔk duëël thandukä matdä ruac bä.

Naŋ thandukä matdä ruac kä Jɛ-ru-tha-lɛm

²⁵ Ɛ jɛn cu Dee-bid kɛnɛ bööth I-thɛ-rɛl kɛ bööth bathdɔɔri wä wa thanduk matdä ruac Kuɔth Nhial nööŋ dhɔr O-bed-ɛ-dom kɛ tɛ̈th lɔaac mi di̱i̱t.

²⁶ Kä kɛ ɣöö ci Kuoth ji̱ Lii-bay tëë kapkɛ thanduk matdä ruac Kuɔth Nhial luäk, cukɛ thääk bärɔw kɛnɛ rueeth rɔɔmni da̱ŋ bärɔw thöp ala muc.

²⁷ Kä cu Dee-bid kɛnɛ ji̱ Lii-bay tin kapkɛ thanduk matdä ruac tekɛ bieyni ti gɔw, kä cu ji̱ Lii-bay tin këët din kɛ Kɛ-nan-yaa bo̱o̱th pua̱a̱t thuɔmni këët din cu Dee-bid bieyni kath la̱th.

²⁸ Inɔ cu ji̱ I-thɛ-rɛl diaal thanduk matdä ruac Kuɔth Nhial nööŋ kɛ diit kɛnɛ buɔ̱l kɛ kaaŋ kɛ ŋar mi di̱i̱t.

²⁹ Kä min ci thanduk matdä ruac Kuɔth Nhial cop däärwec Dee-bid, cu nya Thɔɔl ni Mi-kal guic kɛ wernyin, cuɛ kuäär ni Dee-bid nɛn duthɛ kä tɛth lɔcdɛ. Kä cuɛ jɛ lat jɔ̱ɔ̱r kɛ rɛy lɔaacdɛ.