1 Kuɛ̈n 14 - RUAC KUƆTH IN RƐL RƆ

Dee-bid kɛnɛ ji̱ dhɔaarɛ

¹ Kä cu Ɣi-ram kuäär Dhor Dee-bid jäk kä naath, naŋkɛ jiɛɛn luɔ̱ɔr kɛ nɛy ti ta̱a̱th kɛ ŋa̱a̱t jiɛɛn, ti ba jɛ wä lät kä duel kuäärä.

² Kä cu Dee-bid ɛ ŋa̱c ɛn ɣöö ci Kuoth Nhial jɛ jak kä kuäär I-thɛ-rɛl, kä cuɛ kuäärɛ kap nhial kɛ kui̱ nɛɛnikɛ ni ji̱ I-thɛ-rɛl.

³ Kä cu Dee-bid kuɛɛn kɛ män ti ŋuan kä Jɛ-ru-tha-lɛm, cuɛ tekɛ dhɔɔl ti ŋuan kɛnɛ nyi̱er ti cua da̱p jɛ.

⁴ Kä cu ti̱ti̱ a ciööt gankɛ kä Jɛ-ru-tha-lɛm. Cä-muwä kɛnɛ Co-bab kɛ Na-than kɛnɛ Thɔ-lo-mon,

⁵ kɛ Yib-ɣar kɛnɛ Ɛli-cuwa kɛ Ɛl-pa-lɛt,

⁶ kɛnɛ No-gaa kɛ Nɛ-pɛg kɛnɛ Ya-pia,

⁷ kɛ Ɛli-cama kɛnɛ Bɛɛl-yada kɛ Ɛ-li-pa-lɛt.

Juc Dee-bid kɛ ji̱ Pi-li-thɛt

⁸ Mëë ci ji̱ Pi-li-thɛt ɛ liŋ ɛn ɣöö ca Dee-bid kuany ala kuäär I-thɛ-rɛl, cu kɛn diaal jiɛɛn wa Dee-bid go̱r kä cu Dee-bid ɛ liŋ kä cuɛ ben röm kɛ kɛ.

⁹ Täämɛ cu ji̱ Pi-li-thɛt ben pɛɛc lo̱o̱lä ji̱ Rɛpa.

¹⁰ Kä cu Dee-bid Kuoth thiec i̱, “Ɣän bä wä nyiëëny kɛ ji̱ Pi-li-thɛt? Kä bikɛ ka̱m ɣä?” Kä cu Kuoth ɛ loc i̱, “Wër nyieenyni kɛ kɛ, bäkɛ ka̱m ji̱.”

¹¹ Kä cu wä kä Baal-pɛ-ra-dhim, kä cu Dee-bid kɛ joc ɛn wi̱ni. Kä cu Dee-bid wee “Ci Kuoth ji̱ tɛ̈rä joc kɛ ɣä, ce̱tnikɛ pul mi lɛny pi̱kɛ.” Kɛ kui̱c ɛmɔ cua gua̱a̱th ɛ mɔ cɔli Baal-pɛ-ra-dhim.

¹² Kä cukɛ kuthkiɛn ba̱ny ɛn wi̱ni, kä cu Dee-bid kɛ jak kä waŋkɛ.

¹³ Kä cu ji̱ Pi-li-thɛt rɔ̱ nyɔk kɛ pëc lo̱o̱lä.

¹⁴ Kä mëë ci Dee-bid Kuoth thiec, kä cu Kuoth ɛ loc i̱, “/Cu wä lotdi ni kɔriɛn. Win rɔ, kä mak nikɛ kɛ kui̱c in lot ni jiɛɛn baltham.

¹⁵ Kä mi wi̱i̱ jɔw wä liŋ mi wä kɛ wuɔ̱th jiɛɛn baltham, ku wä nyieenykɛ kɛ. Kɛ ɣöö ɣän ca wä nhiamdu bä rɛm ji̱ Pi-li-thɛt wä joc.”

¹⁶ Kä cu Dee-bid ɛ la̱t ce̱tnikɛ min ci Kuoth ɛ la̱r jɛ, kä cukɛ rɛm ji̱ Pi-li-thɛt näk nikä Gib-yon ca mäni Gɛ-dhɛr.

¹⁷ Kä cu kɛ̈k Dee-bid räth wi̱i̱ muɔ̱ɔ̱n kɛɛliw, kä cu Kuoth Nhial döör diaal jak kä dual kɛ jɛ.