1 Kuɛ̈n 13 - RUAC KUƆTH IN RƐL RƆ

Nööŋ thandukä matdä ruac Kuɔth jɔk kä Kir-yath-ya-rim

¹ Kä cu Dee-bid ruac kɛ bööth diaal, bööth bathdɔɔri kɛnɛ bööth kuri, cuɛ ruac kɛ ramɔ kɛ̈l kɛ̈ɛ̈li.

² Kä cuɛ duɔl I-thɛ-rɛl kɛɛliw jiök i̱, “Mi nhɔk yɛnɛ kä ɛ ruac Kuɔth Nhial min la Kuothdan, ja̱knɛ ruac kä raar kä gaatmani kɔn tin cieŋ rɛy rööl I-thɛ-rɛl kɛɛliw, kɛnɛ bööth palä kɛ ji̱ Lii-bay tin te kɛɛl kɛ kɛ rɛy wi̱i̱nikiɛn kɛnɛ wi̱i̱ la̱k ɣɔ̱ɔ̱k, kɛ ɣöö bikɛ rɔ ma̱t kɔn.

³ Inɔ banɛ thanduk matdä ruac Kuɔth wä luɔ̱c jɔk. Kɛ ɣöö /ken kɔnɛ tit mëë Thɔɔl ɛ kuäär.”

⁴ Kä cu duɔl kɛɛliw ɛ nhɔk i̱ ba la̱t inɔ, kɛ ɣöö lotdɛ rɔ waaŋ nɛɛni diaal.

⁵ Kä cu Dee-bid ji̱ I-thɛ-rɛl diaal dol, a känɛ jɛ ni këth rööl I-jëp kui̱c cuëëc a wä nikä Lɛbo-ɣä-mat kui̱c caam, kɛ ɣöö ba thanduk matdä ruac Kuɔth wä nööŋ kä Kir-yath-ya-rim.

⁶ Kä cu Dee-bid kɛnɛ ji̱ I-thɛ-rɛl diaal wä kä Bääla min wä kä Kir-yath-ya-rim rɛy cieŋ Juda, kɛ ɣöö ba thanduk matdä ruac Kuɔth wä nööŋ, min cɔalkɛ kɛ ciöt Kuɔth Nhial, min te kɔm kuäärädɛ wi̱i̱ pua̱nyni tin cäät kɛ pua̱ny jaakni.

⁷ Kä cukɛ thanduk matdä ruac Kuɔth ka̱n dhɔr Ä-bi-na-dab min te wi̱i̱ pa̱a̱m, kä cua la̱th rɛy thurbiɛɛl mi pay la̱t, kä cu Udha kɛnɛ Äyo thurbil gɛr.

⁸ Kä cu Dee-bid kɛnɛ ji̱ I-thɛ-rɛl diaal ŋar nhiam Kuɔth Nhial kɛ buɔ̱mdiɛn kɛɛliw, pua̱tkɛ thuɔmni, kä kuɔthkɛ kaaŋni, kä tiɛŋkɛ lööth.

⁹ Kä min cikɛ cop do̱o̱r kɔa̱m Ki-don, cu Udha tetdɛ la̱th käpɛ thanduk matdä ruac Kuɔth, kɛ ɣöö ci thääk cuuc.

¹⁰ Kä cu kɛ̈c Kuɔth Nhial ben kä Udha, kä cuɛ jɛ näk kɛ ɣöö cɛ tetdɛ la̱th kä thanduk matdä. Kä cuɛ li̱w ɛn wi̱ni nhiam Kuɔth.

¹¹ Kä cu Dee-bid gaak kɛ ɣöö ci kɛ̈c Kuɔth Nhial ben kä Udha. Kä cua gua̱a̱th ɛmɔ cɔli Pɛ-rɛdh-udha amäni walɛ.

¹² Kä cu Dee-bid dual kɛ Kuoth ɛn cäŋ ɛmɔ. Kä cuɛ wee i̱, “Kä bä thanduk matdä ruac Kuɔth ku lɛ naŋ kɛɛl kɛ ɣä i̱di täämɛ?”

¹³ Kä /ken Dee-bid thanduk matdä ruac Kuɔth naŋ kɛɛl kɛ jɛ däärwec Dee-bid, duundɛ ɣöö cuɛ jɛ naŋ gekä dhɔr O-bed-ɛ-dom raan Gɛ̈th.

¹⁴ Kä cu thanduk matdä ruac Kuɔth te dhɔr O-bed-ɛ-dom kɛ päth diɔ̱k. Kä cu Kuoth dhɔr O-bed-ɛ-dom poth amäni nyinkɛ diaal tin tekɛ jɛ.