1 Kuɛ̈n 12 - RUAC KUƆTH IN RƐL RƆ

Ji̱ Kɔar Dee-bid tëë nhiam thok duëël Ben-ya-min

¹ Kä cu ti̱ti̱ a nɛy tëë cu ben kä Dee-bid kä Dhik-lag, mëë cɛ rɔ bar kɛ Thɔɔl gat Kic. Cukɛ te rɛy nɛɛni tin buɔ̱m buɔ̱ɔ̱m tëë lua̱kɛ jɛ kɛ ko̱r.

² Tekɛ kɛ bääri, luäŋkɛn kui̱r kɛ tet caamdiɛn kɛnɛ tet cueecdiɛn. Kä kɛ ji̱ thuɔk duëël Ben-ya-min ji̱ maarä Thɔɔl.

³ Kä cu kua̱rkiɛn a A-ɣi-ɛ-dhɛr kɛnɛ Yo-ac gaat Cɛ-maa raan Giba. Kä cu rɛm Yɛ-dhi-el kɛnɛ Pɛ-lɛt gaat Ɛ̈dh-ma-wɛth kɛ Bɛ-ra-kaa kɛnɛ Yeɣu kä Ä-na-thoth.

⁴ Kɛ Yic-ma-yaa raan Gib-yon, ɛ ram kɛl kä nɛy tin buɔ̱m buɔ̱ɔ̱m tin jiɛɛn diɔ̱k, min la bööth jiɛɛn diɔ̱k. Kɛ Yir-mɛ-yaa, kɛ Yä-dhi-el, kɛ Yo-ɣa-nan kɛ Yo-dha-bad kä Gä-de-ra,

⁵ kɛ Ɛl-u-dhay kɛnɛ Yɛ-ri-moth kɛ Bal-yaa, kɛ Cɛ-mar-yaa kɛ Cɛ-pɛ̈t-yaa kä Ɣa-rup.

⁶ Kɛ Ɛl-ka-na kɛnɛ Yi-ci-yaa kɛ Ä-dhar-el, kɛ Yo-dhɛr kɛ Ya-cɔ-bam raan Kora.

⁷ Kɛ Yo-e-laa kɛ Dhɛ-bɛ̈d-yaa gaat Yɛ-ro-ɣaam raan Gɛ-dhor.

Ji̱ Kɔar Dee-bid thok duëël Gad

⁸ Kä cu tha̱a̱ŋ ji̱ Gad rɔ̱ ma̱t Dee-bid mëë tëë rɛy dɔaar rɛy kɔ̱a̱kni. Kɛ nɛy ti buɔ̱m buɔ̱ɔ̱m ti ŋa̱ckɛ ko̱r. Ce̱t ta̱diɛn kɛ lony, kä puɔlkɛ ce̱tnikɛ kɛ̈w dɔaar.

⁹ Kä cu E-dhɛr a kuäär, kä cu rɛwdɛ a O-bad-yaa, kä cu diɔ̱ɔ̱kdiɛn a Ɛli-ab.

¹⁰ Kä cu Mic-manaa a ŋuaandiɛn, kä cu Yir-mɛ-yaa a dhieecdiɛn,

¹¹ kä cu bäkɛliɛn a Ɛ̈-tay, kä cu bärɔwdiɛn a Ɛ-li-el,

¹² kä cu bädäkdiɛn a Yo-ɣa-nan, kä cu bäŋuandiɛn a Ɛl-dha-bad.

¹³ Kä cu wäliɛn a Yir-mɛ-yaa, kä cu wälkɛliɛn a Mak-ba-nay.

¹⁴ Kɛn ji̱ Gad ti̱ti̱ kɛ bööth rɛ̈m ti di̱t, ram in kui̱c ni jɛn rɛydiɛn ɛ bo̱o̱th kuri, kä ram in di̱t ni jɛn ɛ bo̱o̱th bathdɔɔri.

¹⁵ Kä cu ti̱ti̱ a nɛy tëë jiath kɛ kir Jɔr-dɛn kɛ pay in jio̱l, mëë ŋotdɛ kɛ thia̱ŋ. Cukɛ nɛy tëë cieŋ rɛy lööli jak kä barkɛ rɔ̱ kui̱c känyä ca̱ŋ kɛnɛ kui̱c konyä ca̱ŋ.

Ji̱ Kɔar Dee-bid thok duëël Ben-ya-min kɛnɛ Juda

¹⁶ Kä cuɛ lɛ tekɛ wutni ti cu ben kä Dee-bid kä ji̱ Ben-ya-min kɛnɛ ji̱ Juda rɛy kɔ̱a̱kni.

¹⁷ Kä cu Dee-bid wä röm kɛ kɛ, kä cuɛ kɛ jiök i̱, “Mi bä yɛn kɛ ɣöö bia ɣä ben luäk, kä bia. Kä mi ba yɛn kɛ ɣöö bia ɣä no̱ŋ ji̱ tɛ̈rä, cäŋ ni mi thilɛ ɣä mi jiääk mi ca la̱tdɛ, bi Kuoth gua̱nikɔn ɛ guic kä bɛ yɛ luk.”

¹⁸ Ɛn wa̱ŋɛ mɔ cu yiëë ben kä Ä-ma-thay bo̱o̱th jiɛn diɔ̱k, kä cuɛ wee i̱, “Kɛ kɔn nɛɛku lö Dee-bid gat Jɛthi. Ɛ mal tekɛ ji̱, kä ɛ mal tekɛ nɛy tin lua̱kɛ ji̱! Kɛ ɣöö ci Kuothdu ji̱ luäk.” Ɛ jɛn cu Dee-bid kɛ lor, kä cuɛ kɛ jak kä bööth rɛ̈mdɛ.

Ji̱ Kɔar Dee-bid thok duëël Ma-na-thɛ

¹⁹ Kä cu tha̱a̱ŋ nath ben kä Dee-bid kä ji̱ Ma-na-thɛ mëë cɛ ben kɛɛl kɛ ji̱ Pi-li-thɛt mëë wëë nyiëëny kɛ Thɔɔl. (Kä cuɛ ŋot /kenɛ ji̱ Pi-li-thɛt luäk kɛnɛ nɛɛkɛ, kɛ ɣöö mëë cɛ ruac kɛ kɛ, cu bööthkiɛn jɛ jak kä loc jɔk, wä kɛ i̱, “Bɛ kua̱rkɔn näk mi wëë wä loc kä kuäär ni Thɔɔl.”)

²⁰ Kä min locɛ kä Dhik-lag cu ji̱ Ma-na-thɛ ti̱ti̱ ben kä jɛ. Ad-naa kɛnɛ Yo-dha-bad kɛ Yɛ-di-ä-el kɛ Mi-ka-el kɛ Yo-dha-bad kɛnɛ Ɛ-liɣu kɛ Dhi-lɛ-thay bo̱o̱th bathdɔɔri ji̱ Ma-na-thɛ.

²¹ Kä cu kɛ Dee-bid luäk kɛ nɛy tin la pɛ̈ckɛ naath. Kä kɛn diaal kɛ ji̱ ko̱o̱r, kä kɛ bööth rɛmni.

²² Ni ciaŋ la naath rɔa mät Dee-bid ba jɛ ben luäk, kä cuɛ tekɛ rɛm mi di̱i̱t mi ce̱tnikɛ rɛm Kuɔth.

Rɛm Dee-bid kä Ɣɛb-ron.

²³ Kä cu ti̱ti̱ a pek rɛm ëë bä kä Dee-bid kä Ɣɛb-ron, kɛ ɣöö ba jɛ riet kuäär Thɔɔl ce̱tnikɛ mëë ci Kuoth Nhiaal ɛ lar.

²⁴ Kä cu rɛm ji̱ Juda a nɛy ti bathdɔɔri bäkɛl wi̱cdɛ kur bädäk ti ji̱ ko̱o̱r.

²⁵ Kä cu rɛm ji̱ Cim-on a nɛy ti bathdɔɔri bärɔw wi̱cdɛ kuɔ̱r kɛl ti ji̱ ko̱o̱r.

²⁶ Kä cu rɛm ji̱ Lii-bay a nɛy ti bathdɔɔri ŋuaan wi̱cdɛ kur bäkɛl.

²⁷ Kä cu bo̱o̱th ni Yɛ-ɣo-ya-da thok duëël Ä-ron tekɛ nɛy ti bathdɔɔri diɔ̱k wi̱cdɛ kur bärɔw.

²⁸ Kɛ Dha-dok kɛnɛ nɛy ti jiɛn da̱ŋ rɛw wi̱cdɛ rɛw dhɔr gua̱ndiɛn.

²⁹ Kä cu rɛm ji̱ Ben-ya-min ji̱ maarä Thɔɔl a nɛy ti bathdɔɔri diɔ̱k, kä cu ri̱wdiɛn ŋot kɛɛl kɛ Thɔɔl.

³⁰ Kä cu rɛm ji̱ Ɛ-pa-rim a nɛy ti bathdɔɔri ti jiɛn da̱ŋ rɛw wi̱cdɛ kur bädäk, ti tekɛ kɛ̈k dho̱ri gua̱ni.

³¹ Kä cu rɛm tha̱a̱ŋ ji̱ Ma-na-thɛ nɛy ti ca kuany ciöötni kɛ ɣöö ba Dee-bid ben jak kä kuäär ɛ nɛy ti bathdɔɔri wäl bädäk.

³² Kä rɛm Yi-tha-kar nɛy tin tiɛkɛ cäŋ kä ŋa̱ckɛ min dëë ji̱ I-thɛ-rɛl jɛ la̱t, a bööth ti kur rɛw ti guɔ̱ɔ̱rkɛ ɛ ji̱ maarädiɛn.

³³ Kä rɛm ji̱ Dhɛ-bu-lun ti ji̱ ko̱o̱r ti ca rɔ rialikä kɛ yio̱w ko̱o̱r diaal ti guɔ̱ɔ̱rkɛ ni riet kɛl, a nɛy ti bathdɔɔri ti jiɛɛn dhieec.

³⁴ Kä rɛm ji̱ Nap-ta-li cua bööth rɛm ti bathdɔɔr kɛl kɛɛl kɛ rɛm ti ji̱ ko̱o̱r ti bathdɔɔri ti jiɛɛn diɔ̱k wi̱cdɛ bärɔw, ti tekɛ kötni kɛnɛ mutni.

³⁵ Kä rɛm ji̱ Daan kɛ nɛy ti bathdɔɔri ti jiɛn da̱ŋ bädäk wi̱cdɛ kur bäkɛl ti ji̱ ko̱o̱r.

³⁶ Kä rɛm ji̱ A-cɛr kɛ nɛy ti bathdɔɔri ti jiɛɛn ŋuaan ti ca rɔ rialikä kɛ ko̱r.

³⁷ Kä rɛm ji̱ Rɛ-u-ben kɛnɛ ji̱ Gad kɛ tha̱a̱ŋ ji̱ thuɔk duëël Ma-na-thɛ kui̱c kiɛɛr Jɔr-dɛn, a nɛy ti bathdɔɔri ti kuɔ̱r kɛl wi̱cdɛ jɛ da̱ŋ rɛw ti ji̱ ko̱o̱r.

³⁸ Kɛn nɛy ti̱ti̱ diaal cikɛ rɔ rialikä kɛ ko̱r, kä cu kɛ ben kä Ɣɛb-ron, kɛ ɣöö ba Dee-bid ben jak kä kuäär I-thɛ-rɛl kɛɛliw. Inɔ bä cua jɛn ca̱r ji̱ I-thɛ-rɛl tin kɔ̱ŋ, ɛn ɣöö ba Dee-bid jak kä kuäär.

³⁹ Kä cu kɛ tey ɛn wi̱ni kɛ Dee-bid kɛɛl kɛ ni̱n diɔ̱k mi̱thkɛ kä mäthkɛ, kɛ mi̱th ti ca lät kä kɛ ɛ cieŋmani.

⁴⁰ Kä cu mäni ji̱ thieekädiɛn tin na̱n ce̱tkɛ ji̱ Yi-tha-kar kɛnɛ ji̱ Dhɛ-bu-lun kɛ ji̱ Nap-ta-li. Cu kɛ mi̱th ti ŋuan nööŋ kɛ jɔk thɔ̱a̱rɔa̱a̱li kɛnɛ muɔ̱li kɛ jio̱o̱k tuɔ̱ruɔ̱k kɛ thääk. Cua patni buɔ̱ɔ̱ni, kɛ nup, kɛ kɔaŋ, kɛ liɛɛth kɛ ɣɔ̱k kɛ det. Kɛn tɔ̱ diaal tɔ̱tɔ̱ cua kɛ no̱o̱ŋ kɛ ɣöö ter rɛy cieŋ I-thɛ-rɛl kɛɛliw kɛ tɛ̈th lɔaac.