1 Kuɛ̈n 11 - RUAC KUƆTH IN RƐL RƆ

Kuäär I-thɛ-rɛl ni Dee-bid

¹ Ɛ jɛn cu ji̱ I-thɛ-rɛl diaal rɔ̱ duɔ̱l Dee-bid kä Ɣɛb-ron, kä cukɛ wee, “Nɛnɛ, kɛ kɔn ri̱ŋdu kä riɛmdu.

² Ni wal, cu mäni mi Thɔɔl ɛ kuäär ɛ, ɛ ji̱n ɛ nëë bo̱o̱th ji̱ I-thɛ-rɛl ko̱o̱r. Kä cu Kuoth Nhial ni Kuothdu ji̱ jiök i̱, ‘Bia̱ yieen nɛɛnikä ni ji̱ I-thɛ-rɛl, kä bia̱ rueecdiɛn.’ ”

³ Inɔ cu bööth I-thɛ-rɛl diaal ben kä kuäär kä Ɣɛb-ron. Kä cu Dee-bid ruac mat kɛ kɛ kä Ɣɛb-ron nhiam Kuɔth Nhial, kä cukɛ Dee-bid kuany ala kuäär kä I-thɛ-rɛl, nikɛ ruac Kuɔth Nhial mëë cɛ lat kɛ Tha-muɛl.

⁴ Kä cu Dee-bid kɛnɛ ji̱ I-thɛ-rɛl diaal Jɛ-ru-tha-lɛm wä mak, min la Yɛ-buth, kä ciaŋ kɛ jɛ ɛ ji̱kɛ ni ji̱ Yɛ-buth.

⁵ Kä cu ji̱ Yɛ-buth Dee-bid jiök i̱, “/Ci bi ben ɛn wa̱nɛ.” Duundɛ ɣöö cu Dee-bid wecdiɛn in bum ni Dha-yɔn ka̱n, min ci ku la wec Dee-bid.

⁶ Kä cu Dee-bid wee i̱, “Ɛn ramɔ bi ji̱ Yɛ-buth näk ɔ kɛ nhiam ba kuäär kä ba bööth rɛ̈m.” Kä cu Yo-ab gat Dhɛ-ru-yaa wä kɛ nhiam, kä cua kuäär.

⁷ Kä cu Dee-bid wä ciɛŋ ni wec mi bum bum. Kɛ kui̱c ɛmɔ cua jɛ cɔli wec Dee-bid.

⁸ Kä cuɛ wec täth a go̱lɛ jɛ a känɛ jɛ ni kä Milo a go̱o̱lɛ jɛ. Kä cu Yo-ab duɔth wec buɔt.

⁹ Kä cu Dee-bid buɔ̱m ɛlɔ̱ŋ, kɛ ɣöö te Kuoth Nhial in la Ruey Ɣɔaa kɛɛl kɛ jɛ.

Nɛɛ Dee-bid tin buɔ̱m buɔ̱ɔ̱m

¹⁰ Täämɛ cu ti̱ti̱ a kua̱r nɛɛni Dee-bid tin buɔ̱m buɔ̱ɔ̱m, tëë ca luäk kɛ buɔ̱m kuäärädɛ, kɛɛl kɛ ji̱ I-thɛ-rɛl diaal kɛ ɣöö ba kuäär, ce̱tnikɛ ruac Kuɔth Nhial kɛ kui̱ I-thɛ-rɛl.

¹¹ Ti̱ti̱ kɛ nɛɛ Dee-bid tin buɔ̱m buɔ̱ɔ̱m. Ya-cɔ-bam raan rɛ̈ɛ̈k Ɣak-mo-ni, a bo̱o̱th nɛɛni ti jiɛɛn diɔ̱k. Cuɛ nyiëëny kɛ nɛy ti kur diɔ̱k kɛ mutdɛ kä cuɛ kɛ näk ɛn guäth ɛmɔ.

¹² Kä cu ram in guur jɛ rɛy nɛɛni diɔ̱k tin buɔ̱m buɔ̱ɔ̱m a Ɛl-a-dhar gat Do-day kä kuay Ä-ɣo-ɣi,

¹³ tëë kɛɛl kɛ Dee-bid kä Pɛ̈th-dɛ̈-mim mëë mat ji̱ Pi-li-thɛt rɔ ɛn wi̱ni kɛ ko̱r, tëë rɛy kakä bɛɛl mëë bar ji̱ I-thɛ-rɛl rɔ kɛ ji̱ Pi-li-thɛt.

¹⁴ Duundɛ ɣöö cukɛ cuɔ̱ŋ däär kakä, cukɛ jɛ gaŋ, kä cukɛ ji̱ Pi-li-thɛt näk. Cu Kuoth Nhial kɛ ka̱m juc nath.

¹⁵ Kɛ cäŋ kɛl cu bööth diɔ̱k kä kua̱r bööthni ti jiɛn da̱ŋ diɔ̱k wä kä Dee-bid rɛy kɔ̱kä pääm Ä-du-lam, kä ci rɛm ji̱ Pi-li-thɛt pua̱t rɛy lo̱o̱lä ji̱ Rɛpa.

¹⁶ Ɛn wa̱nɔ te Dee-bid rɛy pa̱a̱m. Kä te buɔ̱n ji̱ Pi-li-thɛt kä Beth-lɛ-ɣɛm.

¹⁷ Kä cu Dee-bid pi̱ go̱r wëë i̱, “Aɣ duŋ mi tëë kɛ ram no̱ŋä pi̱ ti dëë math rɛy jiɛw in te thok wec kä Beth-lɛ-ɣɛm!”

¹⁸ Kä cu wutni ti bum da̱ŋ diɔ̱k rɛt ni wec ji̱ Pi-li-thɛt, kä cukɛ pi̱ wä jɔm rɛy jiɛw in te thok wec kä Beth-lɛ-ɣɛm, kä cukɛ kɛ nöŋ Dee-bid. Duundɛ ɣöö /kenɛ math thi̱n. Cuɛ kɛ muɔc piny kämɛ kɛ Kuoth Nhial.

¹⁹ Kä cuɛ wee i̱, “/A jɛ na̱n kɛ ɣä, ca nɛ mi dëë la̱t nhiam Kuɔthdä. /Cä riɛm nɛɛni ti̱ti̱ de̱e̱ math kɛ ɣöö ca thöp ni tëkdiɛn.” Kɛ kui̱c ɛmɔ /kenɛ kɛ math. Cua tɔ̱tɔ̱ la̱t ɛ wutni da̱ŋ diɔ̱k tin buɔ̱m buɔ̱ɔ̱m.

²⁰ Täämɛ cu Ä-bi-cay däman Yo-ab a bo̱o̱th nɛɛni da̱ŋ diɔ̱k. Cuɛ nyiëëny kɛ nɛy ti kur diɔ̱k kɛ mutdɛ, kä cuɛ kɛ näk, kä cu tekɛ kɛ̈k ce̱tkɛ nɛy da̱ŋ diɔ̱k.

²¹ Cu jɔɔc ni kɛ̈kdɛ ɛlɔ̱ŋ kä nɛy da̱ŋ diɔ̱k, kä cua bo̱o̱thdiɛn. Duundɛ ɣöö /kenɛ la ram kɛl kä kɛn nɛy da̱ŋ diɔ̱k.

²² Kä cu Bɛ-na-yaa gat Yɛ-ɣo-ya-da a wääth ko̱o̱r kä Kɛ̈b-dhel, cuɛ nyin wääthä la̱t. Cuɛ wäth ko̱o̱r Mo-ab da̱ŋ rɛw näk. Kä cuɛ lony lɛ wä näk rɛy waŋ kɛ cäŋ nhial guiiyni mi cäät naath.

²³ Kä cuɛ raan rööl I-jëp mi di̱i̱t mi tekɛ jua̱th tetni da̱ŋ dhieec kɛ bärɛ lɛni näk. Kä ɛn raan I-jëp tëë kɛ mut mi di̱i̱t. Duundɛ ɣöö cu Bɛ-na-yaa wä kä jɛ kɛ kɛɛt, kä cuɛ mut mac tetdä ran I-jëp, kä cuɛ jɛ näk kɛ mutdɛ.

²⁴ Tɔ̱tɔ̱ cua kɛ la̱t ɛ Bɛ-na-yaa gat Yɛ-ɣo-ya-da kä cuɛ tekɛ kɛ̈k ce̱tkɛ wutni ko̱o̱r da̱ŋ diɔ̱k.

²⁵ Kä cu te ni jɛn kɛ kɛ̈k kä nɛy ti jiɛɛn diɔ̱k, duundɛ ɣöö /kenɛ a ram kɛl kä nɛy da̱ŋ diɔ̱k. Kä cu Dee-bid ɛ jak kä bo̱o̱th yiëënikɛ.

²⁶ Kä cu nɛy tin buɔ̱m buɔ̱ɔ̱m kä rɛm a, Ä-tha-el däman Yo-ab kɛ Ɛl-ɣa-nan gat Do-day kä Beth-lɛ-ɣɛm.

²⁷ Kɛ Cɛ̈-moth kä Ɣä-rod, kɛ Ɣɛ-ledh kä Pɛ-lon.

²⁸ Kɛ Ira gat I-kec kä Tɛ-kowä kɛ Ä-bi-ɛ-dhɛr kä Ä-na-thoth.

²⁹ Kɛ Thi-bɛ-kay kä ji̱ Ɣu-cay, kɛ Ilay kä ji̱ Ä-ɣo-ɣi.

³⁰ Kɛ Mɛ̈-ɣɛ-ray kä ji̱ Nɛ-to-paa, kɛ Ɣe-lɛd gat Banaa kä ji̱ Nɛ-to-paa.

³¹ Kɛ Ithay gat Ri-bay kä Giba wec ji̱ Ben-ya-min, kɛ Bɛ-na-yaa raan Pi-ra-thon.

³² Kɛ Ɣu-ray raan lo̱o̱lä Gac, kɛ Ä-bi-el raan Ä-ra-ba.

³³ Kɛ Ɛ̈dh-ma-wɛth raan Bar-ɣu-mi, kɛ Ɛl-yɛ̈-ba raan Cɛ̈ɛ̈l-bon.

³⁴ Gaat Ɣa-cɛm raan Gɛ-dho, kɛ Jo-na-than gat Cagee raan Ɣa-rar.

³⁵ Kɛ Ä-ɣi-am gat Tha-kar raan Ɣa-rar, kɛ Ɛ-li-pal gat Ur.

³⁶ Kɛ Ɣe-pɛr raan Mɛ-ke-raa, kɛ Ä-ɣi-yaa kä Pɛ-lon.

³⁷ Kɛ Ɣɛdh-ro raan Kar-mɛl, kɛ Naa-ray gat Ɛdh-bay.

³⁸ Kɛ Yo-el däman Na-than, kɛ Mi-bar gat Ɣɛ̈g-ri.

³⁹ Kɛ Dhɛ-lɛk raan A-mon, kɛ Nɛ̈-ɣɛ-ray kä Bɛ-roth, ro̱o̱m muɔ̱t Yo-ab gat Dhɛ-ru-yaa.

⁴⁰ Kɛ Ira raan Kir-yath-ya-rim, kɛ Ga-reb raan Kir-yath-ya-rim.

⁴¹ Kɛ U-ri-yaa raan Ɣɛ̈th, kɛ Dha-bad gat Ɛ̈k-lay.

⁴² Kɛ Ä-di-na gat Ci-dha raan Rɛ-u-ben mëë la kuäär ji̱ Rɛ-u-ben. Kä tëë kɛɛl kɛ nɛy ti jiɛɛn diɔ̱k.

⁴³ Kɛ Ɣa-nan gat Maakaa, kɛ Yo-ca-pat raan Me-thɛn.

⁴⁴ Kɛ U-dhi-ya kä Äc-tɛ-ra, kɛ Camä kɛnɛ Yɛ-i-el gaat Ɣo-tham raan Ä-ro-er.

⁴⁵ Kɛ Yɛ-di-ä-el kɛnɛ Yoɣa gaat Cim-ri kä Ti-dha.

⁴⁶ Kɛ Ɛ-li-el raan Ma-ɣa-we, kɛ Yɛ-ri-bay kɛnɛ Yo-cab-yaa gaat Ɛl-nam, kɛ Yith-maa raan Mo-ab.

⁴⁷ Kɛ Ɛ-li-el, kɛ O-bɛd kɛnɛ Yä-thi-el ji̱ Dho-baa.