1 Kuɛ̈n 10 - RUAC KUƆTH IN RƐL RƆ

Lia̱a̱ kua̱r ni Thɔɔl

¹ Täämɛ cu ji̱ Pi-li-thɛt nyiëëny kɛ ji̱ I-thɛ-rɛl. Kä cua ji̱ I-thɛ-rɛl joc, kä cua kɛ näk ɛlɔ̱ŋ Pääm Gil-bwä.

² Kä cu ji̱ Pi-li-thɛt Thɔɔl cop kɛnɛ gaatkɛ. Kä cukɛ Jo-na-than kɛnɛ Ä-bi-na-dab kɛ Mal-ki-cuwa gaat Thɔɔl näk.

³ Kä ko̱r cuɛ bɛc bɛ̈c ɛlɔ̱ŋ kä Thɔɔl, kä cua jɛ moc buɔ̱t mi di̱i̱t kɛ bäär.

⁴ Kä cuɛ ro̱o̱m muɔ̱tdɛ jiök i̱, “Käni mutdu, kä näk ɣä kɛ jɛ, kɛ ɣöö /ci nɛy ti thil Kuoth ti ɣä bi ben yak.” Duundɛ ɣöö /ken ro̱o̱m muɔ̱tdɛ jɛ la̱t. Kɛ ɣöö cɛ dual ɛlɔ̱ŋ. Kɛ kui̱c ɛmɔ cu Thɔɔl mutdɛ ka̱n kä cuɛ rɔ pi̱em thi̱n.

⁵ Kä mëë ci ro̱o̱m muɔ̱tdɛ jɛ nɛn a ci Thɔɔl li̱w, cuɛ rɔ pi̱em muɔ̱tdɛ bä, kä cuɛ li̱w.

⁶ Inɔ cu Thɔɔl li̱w kɛnɛ gaatkɛ da̱ŋ diɔ̱k kɛ ji̱ dhɔaarɛ diaal kɛɛl.

⁷ Kä mëë ci ji̱ I-thɛ-rɛl diaal tin cieŋ rɛy lo̱o̱lä ɛ nɛn ɛn ɣöö ci kɛ rɔ bar, kä ca Thɔɔl kɛnɛ gaatkɛ näk, cukɛ wi̱i̱kiɛn päl lukɛ rɔ bar. Kä cu ji̱ Pi-li-thɛt ben cieŋ thi̱n.

⁸ Mëë ruɔ̱ndɛ, mëë ci ji̱ Pi-li-thɛt ben ba nɛy tin ci li̱w ben guic, cukɛ Thɔɔl kɛnɛ gaatkɛ jek cikɛ li̱w Pääm Gil-bwä.

⁹ Kä cukɛ wi̱cdɛ ŋok, kä cua giwgiwdɛ ka̱n, kä cukɛ naath jäk kä rɛy cieŋ ji̱ Pi-li-thɛt diaal nöŋkɛ thok kuthkiɛn kɛnɛ nɛɛkiɛn.

¹⁰ Kä cukɛ giwgiwdɛ la̱th rɛy duëël kuthnikiɛn, kä cua wi̱cdɛ naŋ duëël kuɔthdiɛn ni Da-gon.

¹¹ Duundɛ ɣöö mëë ci ji̱ Ya-bec-gil-yad diaal min ca lät kä Thɔɔl ɛ ji̱ Pi-li-thɛt liŋ,

¹² cu wutni ko̱o̱r diaal jiɛɛn, cukɛ ri̱ŋ Thɔɔl kɛnɛ ri̱ŋ gankɛ wä ka̱n, kä cu kɛ nööŋ kä Ya-bec. Kä cukɛ cɔ̱wkiɛn ben kony thar lua̱l kä Ya-bec, kä cukɛ thɛɛk kɛ ni̱n bärɔw.

¹³ Inɔ cu Thɔɔl li̱w kɛ thil ŋäthädɛ kɛ Kuoth Nhial. /Kenɛ luek Kuɔth Nhial tit, kä cuɛ wä thiec ni gua̱n kolaaŋni kɛ ca̱r,

¹⁴ /kɛnɛ ca̱r thiec kä Kuoth Nhial. Kɛ kui̱c ɛmɔ ci Kuoth Nhial jɛ näk, kä cuɛ kuäär riet Dee-bid gat Jɛthi.