1 Kua̱r 9 - RUAC KUƆTH IN RƐL RƆ

Nyɔak Kuɔth kɛ nyuth rɔ Thɔ-lo-mon

¹ Kä mëë ci Thɔ-lo-mon thuɔ̱k kɛ ta̱th luaak Kuɔth Nhial kɛnɛ duël kua̱r kä cɛ tëë diaal tëë go̱o̱rɛ la̱t,

² cu Kuoth rɔ nyɔk kɛ nyuth jɛ, ce̱tkɛ mëë cɛ rɔ nyuɔ̱th jɛ kä Gib-yon.

³ Kä cu Kuoth Nhial ɛ jiök i̱, “Ɣän cä palu liŋ kɛnɛ thiecniku, tin ci la̱t nhiamdä. Ɣän cä luak ɛ mi mɛk kä cä lɛy kɛ ɣöö bä te thi̱n amäni cäŋ kɛl. Bä guic kä bä gaŋ ni ciaŋ.

⁴ Kä kɛ kui̱du, mi wi̱i̱ guɔ̱ɔ̱r ni dupkä, ce̱tkɛ mëë ci guur ni Dee-bid, guɔ̱ɔ̱r ni duɔ̱p mi cuŋ kɛ lɔc mi gɔaa, kä bi la̱t ni tin diaal tin cä la̱t ji̱, kä bi tit ni ŋuɔ̱tkä kɛnɛ luëëkä.

⁵ Bä kuääru jak kä te kä I-thɛ-rɛl amäni cäŋ kɛl, ce̱tnikɛ mëë cä la̱r guur ni Dee-bid i̱, ‘Ci kuääru bi thil ram mi nyuur thi̱n kä I-thɛ-rɛl.’

⁶ Duundɛ ɣöö mi wi̱i̱ rɔ wä ri̱t kɔɔrä, ji̱n kiɛ gaatku, kä /cia ŋuɔ̱tkä kɛnɛ luëëkä tin cä la̱th nhiamdun bi tit, kä bi wä pal ni kuth ti kɔ̱ŋ,

⁷ ɛni ɣöö bä ji̱ I-thɛ-rɛl woc muun in cieŋä thi̱n in cä ka̱mkɛ. Kä bä luak in cä lɛy rɔ mi woc waaŋdä. Kä bi ji̱ I-thɛ-rɛl cua̱ cäät rɛy nɛɛni diaal.

⁸ Kä ɛn luak ɛmɛ ba di̱r kä ti jiäk. Kä bi nɛy diaal tin wä rët kɛ gëëkdɛ ga̱a̱c, kä bikɛ ŋɛ̈ɛ̈r kä bikɛ wee i̱, ‘Ɛŋu ci Kuoth Nhial nɛmɛ lɛ lät kä mun ɛmɛ kɛnɛ luak ɛmɛ ɔ?’

⁹ Kä bi naath ɛ loc i̱, ‘Ɛ ɣöö cikɛ Kuoth Nhial ni Kuothdiɛn päl, mëë no̱o̱ŋ gua̱ni raar mun I-jëp, kä ca wä käp ni kuth kɔ̱kiɛn, kä palkɛ nikɛ. Kɛ kui̱c ɛmɔ ɛ jɛn ci Kuoth Nhial kɛ nöŋ jiäk diaal ti̱ti̱ mɔ.’ ”

Mat ruac kam Thɔ-lo-mon kɛnɛ Ɣi-ram

¹⁰ Kɛ thuɔ̱k runi ti jiɛn da̱ŋ rɛw, tëë täth Thɔ-lo-mon duël da̱ŋ rɛw thi̱n, duel Kuɔth Nhial kɛnɛ duel kua̱r,

¹¹ cu kuäär ni Thɔ-lo-mon kuäär Dhor ni Ɣi-ram moc kɛ wi̱i̱ ti jiɛn da̱ŋ rɛw muun Gɛ̈-lɛ-li, mëë ci Ɣi-ram Thɔ-lo-mon moc kɛ jiɛn ŋuër kɛnɛ luɔ̱ɔ̱ri, kɛ da̱a̱p ce̱tkɛ min go̱o̱r Thɔ-lo-mon jɛ.

¹² Duundɛ ɣöö mëë ci Ɣi-ram jiɛɛn kä Dhor bëë wi̱i̱ tin ca ka̱m jɛ ɛ Thɔ-lo-mon ben nɛn, /Ka̱n lɔcdɛ nhɔk.

¹³ Kɛ kui̱c ɛmɔ cuɛ wëë, “Kɛ wi̱i̱ ti tëë di kɛn ti ci ka̱m ɣä ti gatmaar?” Inɔ cua kɛ cɔli mun mi ci rɔ lot amäni walɛ.

¹⁴ Kä cu Ɣi-ram kuäär jäk kä da̱a̱p mi leny ki̱lu ni ti bathdɔɔri ŋuaan.

Lät Thɔ-lo-mon tin kɔ̱ŋ

¹⁵ Kä cu kuäär ni Thɔ-lo-mon naath la̱a̱t kɛ buɔ̱m kɛ ɣöö ba luak Kuɔth Nhial täth kɛnɛ duelɛ kɛ duel mi tɔt, kɛ päny Jɛ-ru-tha-lɛm, kä cuɛ Ɣa-dhor, kɛnɛ Mɛ-gi-do, kɛ Gɛ-dhɛr nyɔk kɛ ta̱th.

¹⁶ (Cu kuäär I-jëp ni Pɛro Gɛ-dhɛr ma̱k kä cuɛ ka̱n kä cuɛ waŋ, kä cuɛ ji̱ Kɛ-naan tin cieŋ thi̱n näk, kä cuɛ jɛ ka̱m nyaadɛ ciek Thɔ-lo-mon ala muc.

¹⁷ Kä cu Thɔ-lo-mon Gɛ-dhɛr nyɔk kɛ ta̱th.) Kä cuɛ piny wec Beth-o-ron täth

¹⁸ kɛnɛ Bää-lath, kɛ Ta-mar rɛy dɔaar muun Juda,

¹⁹ mäni wi̱i̱ tɔ̱wä tin te jɛ, kɛnɛ wi̱i̱ thurbiɛɛlikɛ, kɛ wi̱i̱ jiöŋköörikɛ, nikɛ tin diaal tin go̱o̱r Thɔ-lo-mon ta̱thdiɛn kä Jɛ-ru-tha-lɛm, kɛnɛ Lɛ-ba-nɔn, kɛ gua̱th diaal tëë ruaacɛ.

²⁰ Kä nɛy diaal tëë ci duɔth kä ji̱ Ɛ̈-mor, kɛnɛ ji̱ Ɣɛ̈th, kɛ ji̱ Pɛ-rii-dhi, kɛ ji̱ Iwi, kɛ ji̱ Yɛ-buth, tëë /ci tɔ̱a̱ ji̱ I-thɛ-rɛl

²¹ (tëë ci karkiɛn duɔth muun, tëë /ken ji̱ I-thɛ-rɛl kɛ näk) cu Thɔ-lo-mon kɛ jak kä kuaany kɛ buɔ̱m amäni walɛ.

²² Duundɛ ɣöö /kenɛ ji̱ I-thɛ-rɛl jak kä kuaany kɛ. Cuɛ jak nikɛ kä rɛmdɛ, kɛnɛ ji̱ kɔaarɛ, kɛ bööth rɛ̈m, kɛnɛ thurbiɛɛli, kɛ jiöŋkööri.

²³ Kä cu ti̱ti̱ a bööth wuɔ̱th lätni Thɔ-lo-mon. Nɛy ti kur dhieec wi̱cdɛ jiɛn dhieec ti guɛckɛ nɛy tin la̱tkɛ la̱t.

²⁴ Kä cu nyaa Pɛro ciek Thɔ-lo-mon jiɛɛn wi̱c Dee-bid wëë duëëlɛ min ca lät kä jɛ ɛ Thɔ-lo-mon, ɛ duel mi tɔt mi ca la̱t nhial.

²⁵ Kä diɔ̱ɔ̱k kɛ ruɔ̱n la Thɔ-lo-mon muc tin waŋkɛ, kɛnɛ muc malä a tho̱p wi̱i̱ yi̱kä min cɛ ta̱th Kuoth Nhial, kä la wal tin kuɔ̱r kuɔ̱ɔ̱r a waaŋɛ kɛɛl kɛ kɛ nhiam Kuɔth Nhial. Inɔ cuɛ luak thuk kɛ ta̱th.

²⁶ Kä cu kuäär ni Thɔ-lo-mon babuuri täth kä Ɛ-dhon-ga-bɛr, min thieek kɛ E-loth thok Bar in tith, muun Ɛ-dɔm.

²⁷ Kä cu Ɣi-ram ji̱ kɔaarɛ tin ŋa̱ckɛ rɛy yiëër ja̱k kɛɛl kɛ babuur, kɛɛl kɛ ji̱ kɔaar Thɔ-lo-mon.

²⁸ Kä cukɛ wä kä O-për, cukɛ da̱a̱p wä nööŋ ɛn wi̱ni, mi leny ki̱luni ti bathdɔɔri da̱ŋ wäl ŋuaan. Kä cukɛ jɛ nöŋ Kuäär ni Thɔ-lo-mon.