1 Kua̱r 8 - RUAC KUƆTH IN RƐL RƆ

No̱o̱ŋ Thandukä Matdä Ruac rɛy luaak Kuɔth

¹ Kä cu Thɔ-lo-mon bööth thuk duëli ji̱ I-thɛ-rɛl diaal kɛnɛ ruëëc I-thɛ-rɛl ciööl nhiamdɛ kä Jɛ-ru-tha-lɛm, kɛ ɣöö ba thanduk matdä ruac Kuɔth wä nööŋ kä Dha-yɔn, wec Dee-bid.

² Kä cu ji̱ I-thɛ-rɛl diaal rɔ̱ duɔl nhiam kua̱r ni Thɔ-lo-mon kɛ gua̱th ti̱mä kɛ bärɔw päthni kä pay yietni.

³ Kä ci bööth I-thɛ-rɛl diaal cop, cu bööth palä thanduk matdä ruac ka̱n.

⁴ Kä cukɛ thanduk matdä ruac Kuɔth nööŋ, kɛnɛ kɛmɛ Kuɔth Nhial kɛn kuakɛ diaal tin rɛl gɔɔydiɛn rɔ̱ tëë rɛy kɛmɛkä. Cu bööth palä kɛnɛ ji̱ Lii-bay kɛ nööŋ.

⁵ Kä cu kuäär ni Thɔ-lo-mon kɛnɛ ji̱ I-thɛ-rɛl diaal rɔ dol nhiam thandukä matdä ruac Kuɔth, thöpkɛ muc deet ti ŋuan kɛnɛ thääk ti ca dëë luäŋ kɛ kuën.

⁶ Kä cu bööth palä thanduk matdä ruac Kuɔth nööŋ gua̱a̱thdɛ, rɛy duëël rɛci guäth in rɛl gɔɔydɛ rɔ, piny gɔ̱ɔ̱k pua̱nyni tin ce̱tkɛ pua̱ny ja̱a̱kni.

⁷ Kä ci kɛn pua̱ny tin ce̱tkɛ pua̱ny jaakni gɔ̱kiɛn ɣär nhial guäth thandukä matdä ruac Kuɔth, ci gɔ̱kiɛn thanduk kum kɛnɛ jiɛn tin kapkɛ jɛ.

⁸ Kɛn jiɛn tɔ̱tɔ̱ bärkɛ ala kɛ a nɛ̈nkɛ a /keni ni wä rɛy duëël in rɛl gɔɔydɛ rɔ. Duundɛ ɣöö /ca kɛ dëë nɛn raar. Kɛn a thi̱n amäni walɛ.

⁹ Kä thilɛ mi te rɛy thandukä matdä ruac Kuɔth, ɛ ni pääm da̱ŋ rɛw tin pat paat tëë läth Muthɛ kɛ thi̱n pääm Thi-nay, gua̱a̱th ëë lät Kuoth Nhial mat ruac thi̱n kɛnɛ ji̱ I-thɛ-rɛl, mëë bäkɛ raar muun I-jëp.

¹⁰ Kä min ci bööth palä ben raar guäth in rɛl gɔɔydɛ rɔ, cu buay luak Kuɔth Nhial thieŋ ce̱tkɛ pua̱r,

¹¹ a cäŋɛ bööth palä /ca la̱tdiɛn dëë la̱t kɛ kui̱ kä ɣöö ci buay Kuɔth Nhial luak thieŋ.

¹² Kä cu Thɔ-lo-mon wëë, “Ci Kuoth Nhial wee bä cieŋ rɛy puɔ̱rä mi col.

¹³ Kä ɣän cä ji̱ ta̱th luak mi gɔaa, mi bi cieŋ thi̱n amäni cäŋ kɛl.”

Ruac Thɔ-lo-mon kɛ naath

¹⁴ Kä min te duɔl ji̱ I-thɛ-rɛl diaal cuŋä ɛn wi̱ni, cu kuäär rɔ rietkɛ kä cuɛ kɛ poth.

¹⁵ Kä cuɛ wëë, “Ɛ puɔ̱th tekɛ Kuoth Nhial min la, Kuoth I-thɛ-rɛl, min ci ruacdɛ mëë cɛ la̱r gua̱a̱r ni Dee-bid tit, wëë i̱,

¹⁶ ‘Nikɛ cäŋ ëë cä nɛɛkä ni ji̱ I-thɛ-rɛl nööŋ raar muun I-jëp, thilɛ wec mi cä mɛk rɛy thuk duëli ji̱ I-thɛ-rɛl diaal mi bi luak täth kɛ ciötdä mi bi waŋdä te thi̱n. Duundɛ ɣöö cä Dee-bid kuany ala kuäär nɛɛnikä ni ji̱ I-thɛ-rɛl.’

¹⁷ Kä ɛn täämɛ tëë lɔɔc gua̱a̱r ni Dee-bid ɛn ɣöö bɛ luak la̱t kɛ kui̱ cio̱tdä Kuɔth Nhial, min la Kuoth I-thɛ-rɛl.

¹⁸ Duundɛ ɣöö cu Kuoth Nhial gua̱a̱r ni Dee-bid jio̱k i̱, ‘Ɛ ca̱r mi gɔaa ɛn ɣöö bi ɣä ta̱th luak, ɛ mi gɔaa ɛn ɣöö tëë lɔɔcdu.

¹⁹ Duundɛ ɣöö /ci jɛ bi la̱t ɛ ji̱n ɛn luak kɛ kui̱dä, bi jɛ la̱t gatdu min bi di̱eth.’

²⁰ Kä täämɛ ci Kuoth Nhial ruacdɛ mëë cɛ lat cuɔ̱p. Ɣän täämɛ cä gua̱a̱th gua̱a̱r ni Dee-bid guäl, cä nyuur wi̱i̱ kɔam kuäärä I-thɛ-rɛl, ce̱tkɛ mëë ci Kuoth Nhial ɛ lar, kä cä luak la̱t kɛ kui̱ cio̱tdä Kuɔth Nhial min la, Kuoth I-thɛ-rɛl.

²¹ Kä ɣän cä gua̱a̱th rialikä kɛ kui̱ thandukä matdä ruac Kuɔth, min la mat ruac Kuɔth mëë cɛ la̱t kɛ gua̱nikɔn mëë cɛ kɛ nööŋ raar muun I-jëp.”

Pal Thɔ-lo-mon

²² Ɛ Jɛn cu Thɔ-lo-mon cuɔ̱ŋ nhiam yi̱kä Kuɔth Nhial nhiam dolä ji̱ I-thɛ-rɛl diaal, kä cuɛ tetkɛ tar nhial.

²³ Kä cuɛ wee, “Aɣ Kuoth Nhial min la, Kuoth I-thɛ-rɛl, thilɛ Kuoth mi päär kɛ ji̱, puɔ̱rä nhial kiɛ wi̱c muɔ̱ɔ̱n piny, mi tiit gukdɛ, kä nyuth nɛɛkɛ tin guɔ̱ɔ̱rkɛ jɛ kɛ lɔcdiɛn kɛɛliw nhök mi thil pek.

²⁴ Ci ruacdu mëë ci lat kɛ gua̱a̱r ja̱ŋdu ni Dee-bid tit. Ɛn walɛ ci laat diaal a thuɔ̱ɔ̱k.

²⁵ Kä täämɛ lö Kuoth Nhial, Kuoth I-thɛ-rɛl, tit ruac ëë ci lat kɛ gua̱a̱r ja̱ŋdu ni Dee-bid, mëë wi̱i̱ i̱, ‘/Ci bi met thil raan mi la kuäär nhiamdä kä I-thɛ-rɛl, mi wä gaatku duɔ̱ɔ̱pdiɛn tit, a bikɛ cieŋ nhiamdä ce̱tkɛ min cieŋi nhiamdä.’

²⁶ Kɛ kui̱c ɛ mɔ täämɛ lö Kuoth I-thɛ-rɛl, ku ruac ëë ci la̱r ja̱ŋdu gua̱a̱r ni Dee-bid jak kä thuɔ̱k.

²⁷ “Kä ɛ thuɔ̱k Kuoth dërɛ cieŋ piny? Nɛn ɛ, pua̱a̱r nhial kɛnɛ nhial /ci dëë ro̱ŋ thi̱n. Kä ku kuɛ̈ɛ̈ luaak ɛ cä täthɛ lɛ ni̱n di!

²⁸ Kä lö Kuoth Nhial Kuothdä liŋ pal jäŋädu kä käm ni ɣä mi cä thiecɛ nhiamdu ɛn walɛ.

²⁹ A waŋdu guic luak ɛ mi kɛ wäär kɛnɛ cäŋdäär, gua̱a̱th in ci lar i̱, ‘Bi ciötdä te thi̱n,’ kɛ kui̱c ɛmɔ liŋ pal jäŋädu mi palɛ a cɛ wi̱cdɛ luɔc guäth ɛmɛ.

³⁰ Liŋ palä kɛnɛ pal nɛɛniku ni ji̱ I-thɛ-rɛl mi palkɛ a ca wuɔ̱thkiɛn riet ɛn guäth ɛmɛ. Liŋɛ nhial guäth cieŋädu, kä mi wi̱i̱ jɛ liŋ päli nɛy ikä.

³¹ “Kä mi ci raan gua̱n thieekädɛ lät kä duer, kä ca jɛ thiec kɛ ya̱c kä bɛ ben ya̱c nhiamdu yi̱kädu ɛn luak ɛmɛ,

³² kuɛ liŋ ni nhial lö Kuoth Nhial, kä luk kam ja̱a̱ŋniku, ku gua̱n dui̱rä duerɛ la̱th ni wi̱cdɛ, kä ku gua̱n cuŋä ka̱m cuɔ̱ŋdɛ.

³³ “Kä mi wa nɛɛku ni ji̱ I-thɛ-rɛl joc ɛ ji̱ tɛ̈riɛn kɛ ɣöö ca ji̱ duer duer, mi wäkɛ luny kä ji̱ kä bikɛ pal latkɛ dueriɛn nhiamdu luaak ɛ mi.

³⁴ Liŋɛ ni nhial, kä päl duer nɛɛniku ni ji̱ I-thɛ-rɛl, kä loc nikɛ muun ëë ci ka̱m gua̱ni.

³⁵ “Kä mi wä ɣɔw wä thil nhiaal kɛ ɣöö ca ji̱ duer duer ɛ nɛɛku, mi wäkɛ pal luɔckɛ nhiamdiɛn ɛn luaak ɛ mi, kä ba dueerkiɛn lat, kɛ ɣöö cikɛ moc riɛk,

³⁶ Liŋɛ ni nhial, kä päli ja̱a̱ŋku ni ji̱ I-thɛ-rɛl dueriɛn, nyuth nikɛ duɔ̱ɔ̱p in dëë guɔ̱ɔ̱r. Kä mockɛ nhiaal muɔ̱ɔ̱ndiɛn in ci ka̱mkɛ ala duŋdiɛn.

³⁷ “Kä mi ci muun tekɛ buɔth, kiɛ kɔ̱m kiɛ kɔryɔm, kiɛ rak, kiɛ mi ca nɛɛku go̱l ɛ ji̱ tɛ̈riɛn, kiɛ liaw rɛydiɛn,

³⁸ mi wëë tekɛ pal kiɛ thiec mi ba la̱t ɛ raan kä nɛɛku ni ji̱ I-thɛ-rɛl diaal ɔ, kɛ lɔc mi jiɛth, kä bɛ tetdɛ cuɔ̱ŋ lotdä luaak ɛ mi.

³⁹ Liŋɛ ni nhial gua̱th cieŋädu, pälikɛ ikä, kä lätni raan ce̱tnikɛ ciɛŋ lɔaacdɛ diaal (kɛ ɣöö ɛ ji̱n kärɔa ŋäc ciɛŋ lo̱cni nɛɛni diaal ɔ).

⁴⁰ Inɔ ba ji̱ luɔ̱th kɛ ni̱n teekädiɛn muun in ci ka̱m gua̱a̱ri.

⁴¹ “Inɔ bä kä ram mi juɔ̱r mi /ci mɔ a raan nɛɛniku ni ji̱ I-thɛ-rɛl, mi bä guäth mi nɔ̱a̱n kɛ kui̱ cio̱tädu

⁴² (kɛ ɣöö cɛ di̱t cio̱tädu liŋ kɛnɛ buɔ̱mdu) mi wëë ben pal lotdä luaak ɛ mi.

⁴³ Liŋɛ ni nhial guäth cieŋädu. Kä lätni mɔ cɛ thiec kä ji̱ mɔ. Kɛ ɣöö bi döör wec muɔ̱ɔ̱n diaal ji̱ ŋa̱c, kä ba ji̱ luɔ̱th, ce̱tkɛ min la̱tkɛ ɛ nɛɛku ni ji̱ I-thɛ-rɛl, kɛnɛ ɣöö ba luak ɛ cä la̱tdɛ ŋa̱c ɛn ɣöö cɔalkɛ jɛ kɛ ciötdu.

⁴⁴ “Kä mi wä nɛɛku nyiëëny kɛ gua̱n tɛ̈riɛn, kɛ duɔ̱ɔ̱p ɛ ci jäk nikɛ mɔ, mi wa ji̱ pal ɛ ca nhiamdiɛn luɔc ɛn wi̱c ɛ ci mɛk kɛnɛ luak ɛ cä täth kɛ kui̱ cio̱tädu,

⁴⁵ liŋ paliɛn ni nhial kä kämnikɛ min ca thiec.

⁴⁶ “Kä mi wa ji̱ duer duer (Kɛ ɣöö thilɛ ram mi ci duer) kä ci gaak kɛ kɛ kä bikɛ la̱th tetdä gua̱n tɛ̈r, kä cɛ kɛ pɛ̈c muun mi te nɔ̱a̱nä kiɛ thiekä ala pɛ̈ɛ̈c muun gua̱n tɛ̈r.

⁴⁷ Mi wäkɛn ɛ rɔm kɛ lɔcdiɛn muun in cakɛ pɛ̈c thi̱n, kä cikɛ rɔ ri̱t ji̱ ɛn muun nɛɛni tin cakɛ pɛc, lar kɛ ja i̱, ‘Ca̱kɔ duer, ca̱kɔ mi jiäk la̱t,’

⁴⁸ mi cikɛ rɔ ri̱t kɛ lɔcdiɛn kɛɛliw, kɛnɛ ca̱riɛn kɛɛliw muun ji̱ tɛ̈riɛn, mëë cakɛ pɛc ala pɛ̈ɛ̈c, mi wäkɛ ji̱ pal luɔtkɛ ni mundiɛn ëë ci ka̱m gua̱ni, wec ɛ ci mɛk, kɛnɛ luak in cä täth kɛ kui̱ cio̱tädu,

⁴⁹ liŋ paliɛn ni nhial guäth cieŋädu, kä käm nikɛ min ca thiec.

⁵⁰ Kä päli nɛɛku tin ca ji̱ duer duer, dueerkiɛn. Kä moc nɛy tin cakɛ pɛc kɛ gɔy, kɛ ɣöö dëë gɔɔy jek kä kɛ.

⁵¹ (Kɛ ɣöö kɛ nɛɛku ti di̱eelku, tëë no̱o̱ŋi raar kä I-jëp, rɛy tha̱t maac yieethä mi bɛc.)

⁵² Lö Kuoth Nhial a waŋdu te kä kuanydu kɛnɛ nɛɛku ni ji̱ I-thɛ-rɛl, kä liŋkɛ guäth ɛ ba ji̱ cɔlɔ kɛ luäk.

⁵³ Kä curi kɛ kuany rɛy dööri diaal wi̱i̱ muɔ̱ɔ̱n kɛ ɣöö bikɛn a nɛɛku ti rɛli, ce̱tnikɛ mëë ci lar kɛ kuanydu ni Muthɛ, mëë kämi gua̱a̱ri raar kä I-jëp.”

Pal in jɔak

⁵⁴ Täämɛ min ci Thɔ-lo-mon thuɔ̱k kɛ pali ti diaal ti̱ti̱, kɛnɛ thiecni ti̱ti̱ kä Kuoth Nhial, cuɛ rɔ jiɛc nhiam yi̱kä Kuɔth Nhial guäth in cɛ rɔ ka̱m mua̱l thi̱n kä cɛ tetkɛ tar nhial.

⁵⁵ Cuɛ rɔ jiɛc, kä cuɛ duɔl I-thɛ-rɛl kɛɛliw poth kɛ jɔw mi di̱i̱t wëë i̱,

⁵⁶ “Ɛ puɔ̱th tekɛ Kuoth Nhial mëë käm nɛɛkɛ ni ji̱ I-thɛ-rɛl mal, ce̱tnikɛ tëë diaal te cɛ lat. Thilɛ riet kɛl mi ci dueer kä rieetkɛ diaal tëë cɛ la̱t kuanydɛ ni Muthɛ.

⁵⁷ Kä ɛ Kuoth Nhial Kuothdan te kɛɛl kɛ kɔn, ce̱tkɛ mëë te kɛɛl kɛ gua̱nikɔn. /Cɛ kɔn bi ba̱ny piny kä cɛ kɔn bi pa̱l ruëëc.

⁵⁸ Kä bɛ lo̱ckɔn riet rɔ, kä banɛ guɔ̱ɔ̱r ni duɔ̱ɔ̱pdɛ, kä banɛ tit ni ŋuɔ̱tkɛ, kɛnɛ luëëkɛ, tëë cɛ la̱t gua̱nikɔn.

⁵⁹ Kä ɛ rieetkä tin palkɛ ɣä nhiam Kuɔth Nhial wëë kä Kuoth Nhial Kuothdan kɛ wäär kɛnɛ cäŋdäär, kä a lɔcdɛ kɔ̱c kɛ ja̱ŋdɛ kɛnɛ nɛɛkɛ ni ji̱ I-thɛ-rɛl, ce̱tkɛ min görkɛ ni ciaŋ.

⁶⁰ Kä bi nɛy diaal ɛ ŋa̱c wi̱i̱ muɔ̱ɔ̱n ɛn ɣöö Kuoth Nhial ɛ Kuoth. Thilɛ Kuoth mi dɔ̱ŋ.

⁶¹ Kɛ kui̱c ɛmɔ a lo̱ckun la thuɔ̱ɔ̱k kɛ Kuoth Nhial Kuothdan, luɔ̱kɛ ni dupkɛ, kä tiɛtdɛ luëëkɛ ce̱tkɛ walɛ.”

Lëy luaak Kuɔth

⁶² Ɛ jɛn cu kuäär kɛnɛ ji̱ I-thɛ-rɛl diaal tin te kɛɛl kɛ jɛ Kuoth Nhial thöp muc.

⁶³ Kä cu Thɔ-lo-mon muc Thääkni malä ti bathdɔɔri ti jiɛn rɛw wi̱cdɛ rɛw thöp Kuoth Nhial kɛ muc deet ti bathdɔɔri ti kuɔ̱r kɛl wi̱cdɛ jiɛn da̱ŋ rɛw. Inɔ cu kuäär kɛnɛ ji̱ I-thɛ-rɛl diaal luak Kuɔth Nhial lɛy.

⁶⁴ Kä kɛ jɛn cäŋ ɛmɔ cu kuäär där kal min lot ni thok luaak Kuɔth Nhial, lɛy. Kɛ ɣöö cɛ muc tin waŋkɛ thöp thi̱n kɛnɛ muc bɛɛl, kɛ thio̱o̱l mucni malä, kɛ ɣöö kuiy yi̱k cikä min yian mëë cɛ la̱t, /Ci muc tin waŋkɛ, kɛnɛ muc bɛɛl, kɛ thiɔl mucä malä dëë ro̱ŋ thi̱n.

⁶⁵ Ɛn guäth ɛmɔ cu Thɔ-lo-mon kɛnɛ ji̱ I-thɛ-rɛl diaal rɔ dol kɛ kui̱ mi̱eth ti̱mä luaak nhiam Kuɔth Nhial kɛ ni̱n bärɔw kɛ ni̱n bärɔw ti kɔ̱ŋ, kɛn diaal ni̱n wäl ŋuaan. Känɛ jɛ ni dup Ɣa-math a wä cu mäni tɔ̱ɔ̱r I-jëp.

⁶⁶ Kɛ bädäk ni̱ni cuɛ naath jak kä wä. Kä cukɛ kuäär poth, kä cu ka wä cieeŋdɛ kɛ tɛ̈th lɔaac kɛ kui̱ gɔyni diaal tin ci Kuoth Nhial kɛ nyuɔ̱th ja̱ŋdɛ ni Dee-bid kɛnɛ nɛɛkɛ ni ji̱ I-thɛ-rɛl.