1 Kua̱r 7 - RUAC KUƆTH IN RƐL RƆ

Ta̱th Thɔ-lo-mon kɛ duel kuäärädɛ

¹ Kä cu Thɔ-lo-mon duel kuäärädɛ lɛni täth, kä cuɛ jɛ täth kɛ run wäl diɔ̱k.

² Kä cuɛ duel mi cɔali Rup Lɛ-ba-nɔn täth, te bär jɔakdɛ kɛ jua̱th tetni ti kuɔ̱r, kä di̱tdɛ ɛ jua̱th tetni ti jiɛn dhieec, kä bärɛ nhial ɛ jua̱th tetni ti jiɛn diɔ̱k, ca ta̱th wi̱i̱ bëëri thieeri ŋuër da̱ŋ ŋuaan, wi̱i̱ ri̱i̱wni ti ca la̱th wi̱i̱ thieeri ŋuër.

³ Kä ca wi̱cdɛ pap kɛ jiɛn nhial ri̱i̱wni ŋuer tin te wi̱i̱ thieeri ti jiɛn ŋuaan wi̱cdɛ dhieec, te wäl dhieec bëër kɛl.

⁴ Kä tëë kɛ wernyini ti ca la̱t bëëri kui̱ni luaak da̱ŋ rɛw.

⁵ Kä thiekni kɛnɛ do̱o̱pni kɛ puɔ̱r puɔ̱ɔ̱r ti päär, lot mɔ ni mɔ kɛ bëër da̱ŋ diɔ̱k.

⁶ Kä cuɛ duel thieeri la̱t. Mi bärɛ ɛ jua̱th tetni ti jiɛn dhieec, kä di̱tdɛ ɛ jua̱th tetni ti jiɛn diɔ̱k. Kä cuɛ lɛ tekɛ duel thieeri mi dɔ̱ŋ nhial mi ca wi̱cdɛ kum.

⁷ Kä cuɛ duel kuäärä min bɛ luɔ̱ɔ̱k a lat ɛ thi̱n la̱t, cuɛ jɛ pap kɛ jiɛn ni kä ro̱o̱thdɛ cu mäni wi̱cdɛ

⁸ Kä cu duel cieŋädɛ te kui̱c in dɔ̱ŋ jɔk duëël luɔ̱ɔ̱kni, ce̱tkɛ duël tin kɔ̱ŋ, kä cuɛ duel mi ce̱tkɛ jɛ lät kä ciekdɛ nya Pɛro.

⁹ Cua kɛn ti diaal ti̱ti̱ täth kɛ päm mi gɔaa mi ca kuac ɛ päär cu mäni kal a känɛ ni piny duëël cu mäni wi̱cdɛ, ni duëël rɛci cu mäni duel in di̱i̱t.

¹⁰ Kä cua piny täth kɛ pääm ti di̱t ti gɔw ti ca kuac, tha̱a̱ŋkiɛn tekɛ jua̱th tetni da̱ŋ bädäk kä te tha̱a̱ŋkiɛn kɛ jua̱th tetni da̱ŋ wäl.

¹¹ Kä wi̱cdiɛn tëë kɛ pääm ti ca kuac ɛ päär, kɛ jiɛn ŋuër ti ri̱i̱wni.

¹² Kä cu duel in di̱i̱t tekɛ bëër diɔ̱k kä pääm kɛ ber kɛl jiɛn mi wil jɛ ce̱tkɛ duel rɛci kɛnɛ duel in te thok luaak Kuɔth.

La̱t Ɣi-ram rɛy luaak Kuɔth

¹³ Kä cu kuäär ni Thɔ-lo-mon Ɣi-ram jäk kä ram wä jɛ cɔl kä Dhor.

¹⁴ Ɛn Ɣi-ram ɛ gat ciek jɔkä thok duëël Nap-ta-li, gua̱n ɛ raan Dhor, ɛ bël yieethä min yian. Jɛn ɛ ram mi ŋäc ta̱th mi gua̱n tiitdä. Cuɛ ben kä kuäär ni Thɔ-lo-mon, cuɛ lätkɛ diaal ben la̱t.

¹⁵ Kä cuɛ wääthni da̱ŋ rɛw la̱t kɛ yiëëth in Yian. Bär kä kɛl nhial ɛ jua̱th tetni da̱ŋ wäl bädäk, kä ri̱ewdɛ ɛ Jua̱th tetni da̱ŋ wäl rɛw. Kä dëlɛ ce̱tdɛ kɛ pät tetdä. Ɛ jɛn ta̱a̱ wääthä min dɔ̱ŋ.

¹⁶ Kä cuɛ kɛ lät kä wuɔ̱th da̱ŋ rɛw kɛ yiëëth in yian, kä cuɛ jɛ la̱th wi̱i̱ wääthni da̱ŋ rɛw, bär kä kɛl ɛ jua̱th tetni da̱ŋ dhieec, cua jɛn bär kä min dɔ̱ŋ bä.

¹⁷ Kä cuɛ wi̱c wääthni kɛt, kä cuɛ jɛ ŋɛ̈p ce̱tkɛ la̱t kuatdä te mɔ kɛ bärɔw.

¹⁸ Kä cuɛ ti ce̱tkɛ dɛy nöör la̱t. Kɛ ɣöö ba wi̱c wääthä kum, cuɛ kɛ lät bëër rɛw ti cɛ rɔk kɛɛl. Kä cuɛ lät kä wääth in dɔ̱ŋ bä.

¹⁹ Kä täämɛ ɛn ŋuäk in ca la̱th wi̱i̱ wääthä ca la̱t ce̱tkɛ gaak tualä tëë kɛ jua̱th tetni da̱ŋ ŋuaan.

²⁰ Kä kɛn ŋua̱k tin te wuɔ̱thni wääthni nhial, cakɛ ŋëp ti ce̱tkɛ dɛy nöör ti tëë jua̱th tetni ti kur rɛw, tekɛ bëër rɛw, cakɛ wil ni jɛ. Kä cua lät kä min dɔ̱ŋ bä.

²¹ Kä cuɛ wääthni cuŋ raar thok luaak, kä cuɛ wääth kɛl la̱th kui̱c cuëëc luaak kä cuɛ jɛ cɔl i̱ Ya-kin. Kä cuɛ min dɔ̱ŋ la̱th kui̱c caam luaak kä cuɛ jɛ cɔli Bo-ɛ̈dh.

²² Kä cuɛ wi̱c wääthni lät kä gaakni tualä. Inɔ cu la̱t wääthni thuɔ̱k.

²³ Kä cu Ɣi-ram dhaar puɔɔkä mi gul gul täth kɛ yiëëth min yian, tëë kɛ jua̱th tetni da̱ŋ wäl ŋɛpnikɛ, kä luëŋ jiɛcdɛ tëë kɛ jua̱th tetni da̱ŋ dhieec. Kä te buɔ̱lɛ kɛ bëër ti tekɛ jua̱th tetni ti jiɛn diɔ̱k.

²⁴ Kä te thɛɛr wi̱cdɛ kɛ jua̱th tetni da̱ŋ wäl ti go̱o̱l dhaar. Kä ca kɛ la̱t kɛ bëër rɛw ca kɛ ta̱th puɔ̱ɔ̱nydɛ mëë ta̱th kɛ jɛ.

²⁵ Kä ca dhaar la̱th jɔk thääkni da̱ŋ wäl rɛw, ci diɔ̱k nhiamdiɛn riet kui̱c caam kä ci diɔ̱k tin kɔ̱ŋ nhiamdiɛn riet kui̱c cuëëc, kä ci diɔ̱k tin kɔ̱kiɛn nhiamdiɛn riet kui̱c känyä ca̱ŋ, kä ci diɔ̱k tin kɔ̱ŋ nhiamdiɛn riet kui̱c konyä ca̱ŋ. Kä cikɛ jio̱kiɛn riet kä dhaar puɔɔkä kɛn diaal.

²⁶ Kä ce̱t dëlɛ dhar kɛ pät tetdä. Kä ca ŋɛ̈pdɛ la̱t ce̱tkɛ ŋɛ̈p lirä ce̱tdɛ kɛ gaak tualä, tëë kɛ gua̱th puɔɔkä ti bathdɔɔri rɛw.

²⁷ Kä cuɛ cuŋni yieethä min yian da̱ŋ wäl la̱t. Tekɛ jua̱th tetni da̱ŋ ŋuaan bärɛ, kä tëë kɛ jua̱th tetni da̱ŋ ŋuaan di̱tdɛ, kä bäriɛn nhial ɛ jua̱th tetni da̱ŋ diɔ̱k.

²⁸ Nɔmɔ cua jɛn la̱t cuuŋni. Kä cakɛ lät kä këët ti ca la̱t puɔ̱ɔ̱nydiɛn.

²⁹ Kä kuɛ̈ɛ̈t tin te puɔ̱ny cuŋni, ce̱tkɛ kɛ lony, kɛ thääk, kɛ pua̱ny ti ce̱tkɛ pua̱ny jaakni. Kä piny lonyni kɛnɛ thääk kɛ nhialiɛn, ca lät kä mi ce̱tkɛ tak thaac.

³⁰ Kä kɛn cuuŋni te mɔ kɛ ciök da̱ŋ ŋuaan yieethä min yian kɛ jiɛn ti wi̱el cio̱k thi̱n. Kä tuɔ̱ŋni da̱ŋ ŋuaan tekɛ ro̱o̱m thaak, ɛn ro̱o̱m ca la̱t kɛ yiëëth, kä cakɛ kɛt gëëkni kɛ kët mi ce̱tkɛ thac.

³¹ Kä ɣöŋ thuɔkdɛ min wä nhial ce̱tdɛ kɛ kum kuäärä tëë kɛ juäth tetdä kɛl kä thokdɛ ɛ gul gul kä tharɛ ɛ juäth tetdä kɛ nuth. Kä thokdɛ tekɛ kɛ̈t, kä kääpnikɛ kɛ puɔ̱r puɔ̱ɔ̱r /cikɛ guɔ̱l guɔ̱l.

³² Kä kɛn ciök da̱ŋ ŋuaan tekɛ piny kääpni. Kä yiëëth in wi̱el cio̱k thi̱n kɛ kɛl kɛnɛ cuuŋni. Kä bär ciökä ɛ juäth tetdä kɛ nuth.

³³ Kä kɛn ciök cakɛ la̱t ce̱tkɛ ciök thurbiɛɛl ɛn min wi̱elɛ thi̱n, kɛnɛ jicdɛ, kɛ kääpdɛ, kɛn diaal la̱tkɛ kɛ kɛ yiëëth.

³⁴ Kä te cuuŋ kɛl kɛ kääpni ŋuaan kä tuɔ̱ŋ da̱ŋ ŋuaan. Kɛn kääpni kɛ kɛl kɛ cuuŋni.

³⁵ Kä nhial kääpä tëë kɛ yio̱m mi gul gul bärɛ tëë kɛ nuth jua̱th tetdä. Kä ɛn nhial kääpä kɛnɛ cuuŋdɛ kɛ kɛl.

³⁶ Kä piny cuuŋädɛ kɛnɛ kääpdɛ, cɛ kɛ kët pua̱ny ti ce̱tkɛ pua̱ny jaakni, kɛnɛ lony, kɛ dɛy nöör ce̱tnikɛ kam kä mɔ, kɛ tak thaac mi wilkɛ.

³⁷ Kɛ kɔr kä nɔmɔ cuɛ cuuŋni da̱ŋ wäl la̱t, kä kɛn diaal ca kɛ la̱t ala ti cäät, kɛ jɛn ta̱a̱ ɛ kɛlɔ, kä päärkɛ.

³⁸ Kä cuɛ gua̱th puɔɔkä da̱ŋ wäl täth kɛ yiëëth in yian. Te gua̱th kɛl kɛ thääk puɔɔkä ti jiɛn ŋuaan, kä te kɛl kɛ jua̱th tetni da̱ŋ ŋuaan, kä cuuŋni da̱ŋ wäl te mɔ kɛ gua̱a̱th puɔɔkä.

³⁹ Kä cuɛ cuuŋni da̱ŋ dhieec la̱th kui̱c cuëëc luaak, kä cuɛ dhieec tin kɔ̱ŋ la̱th kui̱c caam luak. Kä cuɛ dhaar puɔɔkä la̱th buɔ̱lä kui̱c känyä ca̱ŋ cuëëc luaak kuɔth.

Tin la̱tkɛ rɛy luaak

⁴⁰ Kä cu Ɣi-ram took kɛnɛ cuɔ̱ɔ̱k kɛ kueŋni maac lɛni täth bä. Inɔ cuɛ cu thuɔ̱k kɛ lät diaal tëë lätdɛ kä kuäär ni Thɔ-lo-mon rɛy luaak Kuɔth Nhial.

⁴¹ Wääthni da̱ŋ rɛw, kɛ took da̱ŋ rɛw tin te wi̱i̱ wääthni, kɛ wuɔ̱th da̱ŋ rɛw ti ca kɛt kɛ tak tin kuɔ̱mkɛ wuɔ̱th wääthni piny.

⁴² Kɛ dɛy nöör ti kur ŋuaan tin ca kɛ̈t takni da̱ŋ rɛw, kä ca ka car kɛ bëër rɛw ŋuääk kä kɛl, kɛ ɣöö bɛ took da̱ŋ rɛw tin kuɔ̱mkɛ wuɔ̱th wääthni piny kum.

⁴³ Kä cuɛ cuuŋni da̱ŋ wäl kɛ took puɔɔkä da̱ŋ wäl wi̱i̱diɛn la̱t bä.

⁴⁴ Kä cuɛ dhaar puɔɔkä, kɛnɛ thääk da̱ŋ wäl rɛw täth pinydɛ.

⁴⁵ Kɛ took kɛnɛ cuɔ̱ɔ̱k, kɛ kueenyni maac, kɛn kuak ti diaal ti̱ti̱ tekɛ luaak Kuɔth Nhial, kɛn tëë ci Ɣi-ram kɛ ta̱th kuäär ni Thɔ-lo-mon, kɛ yiëëth in yian mi riaw.

⁴⁶ Cu kuäär kɛn ti diaal ti̱ti̱ täth rɛy tɔ̱ɔ̱rä Jɔr-dɛn kɛ mun ta̱th, kam Cu-koth kɛnɛ Dha-rɛ-than.

⁴⁷ Kä cu Thɔ-lo-mon kuak päl a /ka̱n thɛm, kɛ ɣöö ŋuan kɛn ɛlɔ̱ŋ. /Ka̱n pek yieethä min yian min la̱tkɛ kɛ ŋa̱c.

⁴⁸ Kä cu Thɔ-lo-mon kuak diaal tin te rɛy luaak Kuɔth Nhial täth, amäni yi̱k dääpä, kɛnɛ tharbët dääpä, kɛ kui̱ jurayä nhiam Kuɔth,

⁴⁹ kɛ cuuŋni lɛmbärni dääpä ti kök köök, te dhieec kui̱c cuëëc luaak, kä te dhieec tin kɔ̱ŋ kui̱c caam luaak, nhiam duëël in te rɛci. Kɛ gaakni juaacni, kɛ lɛmbärni, kɛ kueenyni maac, kɛn diaal kɛ da̱a̱p mi ko̱k ko̱o̱k.

⁵⁰ Kɛ lieeri, kɛ took tin la̱thkɛ wal tin kuɔ̱r kuɔ̱ɔ̱r thi̱n, kɛ kueenyni maac, kɛ cuɔ̱ɔ̱k dääpä ti kök köök kɛ go̱o̱ni dääpä kɛ kui̱ thiekni duëël rɛci gua̱th in rɛl ni gɔɔydɛ rɔ, kɛnɛ thiekni luaak in di̱i̱t.

⁵¹ Kä min ci kuäär ni Thɔ-lo-mon lät diaal tëë lätdɛ rɛy luaak Kuɔth thuk. Cuɛ tëë diaal tëë ci gua̱n ni Dee-bid kɛ lëy Kuoth Nhial nööŋ rɛy luaak, da̱a̱p, ciɛk in bo̱r, kɛ kuak diaal, cuɛ kɛ ben tɔ̱w duëël tɔ̱wä luaak Kuɔth Nhial.