1 Kua̱r 5 - RUAC KUƆTH IN RƐL RƆ

Rialikä Thɔ-lo-mon kɛ kui̱ ta̱th luaak Kuɔth

¹ Täämɛ cu Ɣi-ram kuäär Dhor kuaanykɛ jäk kä Thɔ-lo-mon, mëë cɛ liŋ i̱ ca kuany ala kuäär kɛ gua̱a̱th gua̱n. Kɛ ɣöö nhɔk Ɣi-ram Dee-bid.

² Kä cu Thɔ-lo-mon ruac jäk kä Ɣi-ram i̱,

³ “Ŋäci jɛ ɛn ɣöö /ken gua̱a̱r ni Dee-bid luak la̱t kɛ kui̱ ciötdä Kuɔth Nhial Kuothdɛ kɛ kui̱ ko̱o̱ri tëë cɛ tɛ̈r kɛ ji̱ tɛ̈rɛ tëë thiëëk kɛ jɛ, amäni mëë ci Kuoth Nhial ɛ ka̱m juc ji̱ tɛ̈rɛ.

⁴ Kä täämɛ ci Kuoth Nhial Kuothdä ɣä ka̱m mal kui̱ni diaal. A cä thil ji̱ tɛ̈r, kä cɛ thil nɛy ti ma̱kɛ ɣä.

⁵ Kɛ kui̱c ɛ mɔ cä car ɛn ɣöö bä luak Kuɔth Nhial ni Kuothdä la̱t, ce̱tkɛ mëë ci Kuoth Nhial ɛ la̱r gua̱a̱r ni Dee-bid i̱, ‘Bi gatdu min bä jak kä kuäär gua̱a̱thdu, ɣä lät kä Luak.’

⁶ Kɛ kui̱c ɛmɔ täämɛ ku nɛɛku jak kä jiöpkɛ ɣä ŋuër Lɛ-ba-nɔn. Kä bi nɛɛkä kɛ wä luäk, kä bä nɛɛku ka̱m mɔ bi larɔ. Kä ŋäci jɛ agɔaa ɛn ɣöö nɛɛkä /kuec kɛ jiöp jiɛn /cikɛ ce̱tkɛ nɛɛku.”

⁷ Kä min ci Ɣi-ram ruac Thɔ-lo-mon liŋ, cu lɔcdɛ tɛɛth ɛlɔ̱ŋ, kä cuɛ wëë, “Ɛ puɔ̱th tekɛ Kuoth Nhial ɛn walɛ, mëë käm Dee-bid gat mi pɛl, kɛ ɣöö bɛ nɛy ti ŋuan ti̱ti̱ ruac.”

⁸ Kä cu Ɣi-ram Thɔ-lo-mon jäk kä raan wëë i̱, “Ɣän cä ruac in ci jäk kä ɣä liŋ. Kä ɣän cä rɔ rialikä kɛ ɣöö bä min go̱o̱ri la̱t. Bä ŋuer kɛnɛ luɔ̱ɔ̱r jɔp.

⁹ Kä bi nɛɛkä kɛ nööŋ thok yiëër kä Lɛ-ba-nɔn. Kä bäkɛ yian bikɛ wä kɛ thiɛɛk kɛ rɛy yiëër ni guäth ɔ ci lar ɔ, kä bäkɛ ka̱m raar thi̱n, kä bikɛ cu lor. Kä min bi la̱t ɛ ɣöö bi nɛɛkä moc mi̱eth.”

¹⁰ Inɔ cu Ɣi-ram Thɔ-lo-mon moc kɛ jiɛn diaal tin go̱o̱rɛ, ŋuer kɛnɛ luɔ̱ɔ̱r.

¹¹ Kä cu Thɔ-lo-mon Ɣi-ram moc kɛ cuali bɛɛl ti bathdɔɔri ti jiɛn bäkɛl wi̱cdɛ dhieec ala mi̱eth kɛ kui̱ nɛɛnikɛ, kɛnɛ ɣöökni liɛth ti bathdɔɔri bädäk, la kɛ a kämɛ Ɣi-ram run kä run.

¹² Kä cu Kuoth Nhial Thɔ-lo-mon ka̱m ŋäc ce̱tnikɛ mëë cɛ la̱r jɛ. Kä cu mal te kam Ɣi-ram kɛnɛ Thɔ-lo-mon, kä cukɛ mat ruac la̱t.

¹³ Kä cu kuäär ni Thɔ-lo-mon la̱a̱t ti bathdɔɔri ti jiɛn diɔ̱k kuany kä I-thɛ-rɛl kɛɛliw.

¹⁴ Cuɛ kɛ dääk kä bun diɔ̱k, te buɔ̱n ɔ kɛ nɛy ti bathdɔɔri da̱ŋ wäl, kä cuɛ kɛ jäk kä Lɛ-ba-nɔn, la buɔ̱n ɛ te kä Lɛ-ba-nɔn kɛ pay kɛl, kä bikɛ päth rɛw thuk dho̱rikiɛn. Kä cu Ä-do-ni-ram a bo̱o̱thdiɛn.

¹⁵ Kä cu Thɔ-lo-mon tekɛ nɛy ti bathdɔɔri ti jiɛn bädäk ti kuackɛ pääm rɛy dɔaar, kɛnɛ dëëthkiɛn ti bathdɔɔri ti jiɛn bärɔw bä.

¹⁶ Kä cuɛ lɛ tekɛ kua̱r lätni ti bathdɔɔri diɔ̱k wi̱cdɛ kur diɔ̱k ti guɛckɛ la̱t thi̱n.

¹⁷ Kɛ ruac kua̱r ni Thɔ-lo-mon, cua pääm ti gɔw ti di̱t kuac kɛ kui̱ pa̱ny luaak Kuɔth.

¹⁸ Inɔ cu ta̱a̱th Thɔ-lo-mon kɛnɛ ta̱a̱th Ɣi-ram kɛ ji̱ Gi-bɛl pääm kuac kä cua jiɛn jɔp kɛ ɣöö ba luak Kuɔth la̱t.