1 Kua̱r 4 - RUAC KUƆTH IN RƐL RƆ

Kua̱r Thɔ-lo-mon

¹ Kuäär ni Thɔ-lo-mon ɛ kuäär kä I-thɛ-rɛl kɛɛliw,

² Kä ti̱ti̱ kɛ kua̱r kɔaarɛ tin di̱t, Ä-dhar-yaa gat Dha-dok ɛ bo̱o̱th palä.

³ Kä cu Ɛ-li-ɣo-rɛp kɛnɛ Ä-ɣi-yaa gaat Cica a bolithni. Kä cu Yɛ-ɣo-ca-pat gat Ä-ɣi-lud a bulkamiin.

⁴ Kä cu Bɛ-na-yaa gat Yɛ-ɣo-ya-da a kuäär rɛ̈m. Kä cu Dha-dok kɛnɛ Ɛb-ya-thar a bööth palä.

⁵ Kä cu Ä-dhar-yaa gat Na-than te wi̱i̱ kua̱ri kɔaar kua̱r. Kä cu Dha-bud gat Na-than a bo̱o̱th palä kä ɛ määth kua̱r.

⁶ Kä cu Ä-ɣi-car a läät cieŋ kua̱r. Kä cu Ä-do-ni-ram gat Ɛ̈bda a läät rɛ̈m.

⁷ Kä cu Thɔ-lo-mon tekɛ kua̱r kɔaarɛ da̱ŋ wäl rɛw kä I-thɛ-rɛl kɛɛliw, ti mockɛ kuäär mi̱eth kɛnɛ ji̱ dhɔaarɛ. La ram kɛl a lät kɛ pay kɛl kɛ ruɔ̱n.

⁸ Kä ti̱ti̱ kɛ kɛn ciöötkiɛn: Bɛn-ɣur raan wec päämni Ɛ-pa-rim,

⁹ kɛ Bɛn-dɛ-kɛr raan Ma-kɛ̈dh, kɛ Cɛ̈ɛ̈l-bim. Kɛ Beth-cɛ-mɛc, kɛ E-lon-beth-ɣa-nan.

¹⁰ Kɛ Bɛn-ɣɛ-thɛd kä Ä-ru-both (min ciɛŋ ni tho-ko kɛnɛ mun Ɣe-pɛr)

¹¹ Kɛ Bɛn-ä-bi-na-dab mun Na-path-dor kɛɛliw (Min ci Ta-pɛ̈th nya Thɔ-lo-mon kuɛn).

¹² Kɛ Bäna gat Ä-ɣi-lud kä Ta-nak, kɛ Mɛ-gi-do, kɛ Beth-can kɛɛliw min te gekä Dha-rɛ-than piny Yidh-rɛɛl, a känɛ ni kä Beth-can a wä nikä A-bel-mɛ-ɣola, a räth ni kui̱ Yɔk-mam in dɔ̱ŋ.

¹³ Kɛ Bɛn-gɛ-bɛr kä Ra-moth-gil-yad (Jɛn tekɛ wi̱i̱ Ya-ir gat Ma-na-thɛ, tin te kä Gil-yad, kä tekɛ ro̱o̱l Ar-gob, min te kä Ba-can, wi̱i̱ ti jiɛn bäkɛl tin di̱t tin tëë pa̱nyni kɛnɛ thiekni yieethä.)

¹⁴ Kɛ Ä-ɣi-na-dab gat Ido kä Ma-na-yim.

¹⁵ Kɛ Ä-ɣi-madh raan Nap-ta-li (min ci Ba-thɛ-math nya Thɔ-lo-mon kuɛn).

¹⁶ Kɛ Bäna gat Ɣu-cay raan A-cɛr, kɛ Baa-loth.

¹⁷ Kɛ Yɛ-ɣo-ca-pat gat Pa-ru-ɛ̈k raan Yi-tha-kar.

¹⁸ Kɛ Cimi gat Ela raan Ben-ya-min.

¹⁹ Kɛ Gɛ-bɛr gat Uri, mun Gil-yad, ro̱o̱l Thi-yon kuäär Ɛ-mor kɛnɛ Ög kuäär Ba-can. Kä te raan kɔaar kua̱r kɛl kä Juda.

Ti̱el ruëc Thɔ-lo-mon

²⁰ Ji̱ Juda kɛnɛ ji̱ I-thɛ-rɛl ŋuankɛ ce̱tnikɛ liɛt yiëër. Kä tɛth lɔcdiɛn kɛ mi̱ethdiɛn.

²¹ Kä cu Thɔ-lo-mon I-thɛ-rɛl ruac kɛɛliw a känɛ jɛ ni kiir Yu-pɛ-ree-tidh amäni mun ji̱ Pi-li-thɛt, a räth ni keth I-jëp. Cukɛ Thɔ-lo-mon lätikä kä nöŋkɛ jɛ tho̱lbo̱k kɛ ni̱n teekädɛ diaal.

²² Kä mi̱eth Thɔ-lo-mon kɛ cäŋ kɛl, kɛ cuali nuɔ̱p ti jiɛn bäŋuan, kɛ gua̱th mi̱thni ti jiɛn bäkɛl.

²³ Kɛ thääk da̱ŋ wäl ti ci cuath, kɛ ɣɔ̱k ti jiɛn da̱ŋ rɛw ti ci laak, kɛ det ti kuɔ̱r, kɛ ley, kɛnɛ muɔ̱mni, kɛ kɛɛw kɛ ŋɛcni ti ci kuɔ̱t.

²⁴ Kɛ ɣöö ruaacɛ jɔk ɣɔaa kiɛɛr Yu-pɛ-ree-tidh kɛɛliw a känɛ nikä Tip-thɛ̈ a wä ni kä Gadha, te kua̱r jɔak kiɛɛr Yu-pɛ-ree-tidh diaal pinydɛ, kä cuɛ tekɛ mal kɛ ji̱ thieekädɛ diaal.

²⁵ Kä cu Juda kɛnɛ I-thɛ-rɛl tekɛ mal, a känɛ nikä Daan a wä kä Ber-cɛ-ba, cu ramɔ te ni thaar jiath ŋɔa̱a̱pdɛ. Kɛ ni̱n teekä Thɔ-lo-mon diaal.

²⁶ Kä cu Thɔ-lo-mon tekɛ nɛy ti bathdɔɔri ti jiɛn ŋuaan kɛ kui̱ jio̱o̱kni thurbiɛɛlikɛ, kɛnɛ ji̱ jiöŋkööri ti bathdɔɔri da̱ŋ wäl rɛw.

²⁷ Kä kɛn ji̱ kɔaar kua̱r tɔ̱tɔ̱ mockɛ kuäär mi̱eth kɛnɛ nɛy diaal tin ci ben wi̱i̱ tokä kua̱r ni Thɔ-lo-mon, te ramɔ kɛ paydɛ lät. La kɛn ti diaal a jak kä te wa̱nɔ.

²⁸ Kä la kɛn wal a nöŋ jiöŋkööri bä gua̱thnikiɛn, lät ramɔ jɛ kɛɛl kɛ la̱tdɛ.

²⁹ Kä cu Kuoth Thɔ-lo-mon ka̱m ŋäc mi ci ba̱l, kɛ ca̱r mi /ca dëë thɛm.

³⁰ Kä cu ŋäcdɛ ŋäc ji̱ käny ca̱ŋ diaal leny, kɛnɛ ŋäc ji̱ I-jëp diaal.

³¹ Kɛ ɣöö lenyɛ nɛy diaal tin kɔ̱ŋ kɛ pɛl, pɛli jɛn kä E-than raan Ɛdhra, kɛnɛ Ɣe-man, kɛ Kɛ̈l-kol, kɛnɛ Dar-dɛ̈, gat Ma-ɣol. Kä cu kɛ̈kdɛ räth kä ji̱ thieekädɛ.

³² Kä jɛn cuɛ cäätni ti bathdɔɔri diɔ̱k lat. Kä cuɛ diit ti bathdɔɔr kɛl wi̱cdɛ dhieec cak.

³³ Kä cuɛ ruac kɛ kui̱ jiɛn, kɛ kui̱ ŋuer in te kä Lɛ-ba-nɔn amäni lath in la do̱ny puɔ̱ny pa̱a̱ny. Kä cuɛ ruac bä kɛ kui̱ leeyni, kɛnɛ diit, kɛ muɔl piɛny, kɛnɛ rɛc.

³⁴ Kä cu naath ben dööri diaal ba ŋäc Thɔ-lo-mon ben liŋ, amäni kua̱r wec muɔ̱ɔ̱n tin ca ŋäcdɛ liŋ cukɛ ben.