1 Kua̱r 3 - RUAC KUƆTH IN RƐL RƆ

Thiec Thɔ-lo-mon kɛ ŋäc

¹ Kä cu Thɔ-lo-mon kuɛɛn kɛnɛ Pɛro kuäär I-jëp. Cuɛ nya Pɛro kuɛn, kä cuɛ jɛ nööŋ därwec Dee-bid, amäni mëë cɛ thuɔ̱k kɛ ta̱th duëëlɛ, kɛnɛ luak Kuɔth, kɛ päny mi go̱l Jɛ-ru-tha-lɛm.

² Kä la naath muckiɛn wa̱a̱ thöp gua̱thni palä kuthni guäyni, kɛ ɣöö thilɛ luak mi ca ni la̱t kɛ ciöt Kuɔth Nhial.

³ Kä cu Thɔ-lo-mon Kuoth Nhial nhɔk, kä cuɛ guɔ̱ɔ̱r ni ciɛŋ gua̱n ni Dee-bid. Ɛ ni ɣöö la thöpɛ muc, kä waaŋɛ wal tin ŋuäny gua̱thni pali kuthni guäyni.

⁴ Kä cu kuäär wä kä Gib-yon wëë muc thöp ɛn wi̱ni, kɛ ɣöö ɛ gua̱th Palä mi di̱i̱t. La Thɔ-lo-mon muc tin waŋkɛ ti bathdɔɔri a tho̱p ɛn wi̱i̱ yi̱kä nɔmɔ.

⁵ Kä cu Kuoth Nhial ben kä Thɔ-lo-mon kä Gib-yon kɛ la̱k kɛ wäär. Kä cu Kuoth ɛ jiök i̱, “Thiec mɔ dëë ka̱m ji̱ mɔ.”

⁶ Kä cu Thɔ-lo-mon wëë, “Ci gua̱a̱r ni Dee-bid nyuɔ̱th nhökdu in di̱i̱t in thil pek, kɛ ɣöö cɛ cieŋ kɛɛl kɛ ji̱ kɛ ŋa̱th, kɛnɛ cuŋ, kɛ gɔɔy lɔaac kɛ ji̱. Kä ci jɛ lät kä gɔɔy ɛ di̱i̱t ɛ mi kɛnɛ nhök mi thil pek, kä ci jɛ moc gat mi bi ruëc kɛ gua̱a̱thdɛ ɛn walɛ.

⁷ Kä täämɛ, lö Kuoth Nhial Kuothdä, ci ɣä jak kä kuäär kɛ gua̱th gua̱a̱r ni Dee-bid, kä ɛ ɣän gat, mi kui̱c ruec.

⁸ Kä täämɛ ta̱a̱ rɛy nɛɛni ti ci mëk rɔ, nɛy ti ŋuan, ti ca dëë luäŋ kɛ kuën kɛ ŋuandiɛn.

⁹ Kɛ kui̱c ɛmɔ mocä kɛ ŋäc mi dëë ruac ni nɛɛku, mi bä ŋäc mi gɔaa kɛnɛ mi jiäk. Kɛ ɣöö dëë nɛɛku ti ŋuan ti̱ti̱ kulɛ ruac.”

¹⁰ Cuɛ lɔc Kuɔth nhɔk ɛn ɣöö ci Thɔ-lo-mon thiec niɛ nɛmɛ.

¹¹ Kä cu Kuoth ɛ jiök i̱, “Kɛ ɣöö ci thiec niɛ nɛmɛ. Ɛ jɛn /keni thiëc ni rɔ tëk mi bäär, kɛnɛ ria̱ŋ, kɛ tëk ji̱ tɛ̈ru, kä ci thiec ni ŋäc mi bi ŋäc mi cuɔ̱ŋ.

¹² Nɛnɛ, ɣän täämɛ bä la̱t ni ruacdu. Ɣän bi ka̱m ŋäc ŋɔaani kɛnɛ ca̱r, kɛ ɣöö thilɛ ram mi /ci kɔn ce̱tkɛ ji̱, kä thilɛ ram mi bi rɔ jiɛc ce̱tkɛ ji̱ kɔɔru.

¹³ Kä bä ji̱ ka̱m min /keni thiec bä. Ci ka̱m ria̱ŋ kɛnɛ luth, kɛ ɣöö thilɛ kuäär mi ba lɛ ca̱a̱t kɛ ji̱, ni̱niku diaal.

¹⁴ Kä mi wi̱i̱ lot ni dupkä, a bi ŋuɔ̱tkä kɛnɛ luëëkä tit ce̱tkɛ mëë ci guur ni Dee-bid ɛ la̱t, bä ni̱nku rep.”

¹⁵ Kä cu Thɔ-lo-mon keer, kä nɛn ɛ, cua la̱k. Kä cuɛ ben kä Jɛ-ru-tha-lɛm, kä cuɛ cuɔ̱ŋ nhiam thandukä matdä ruac Kuɔth Nhial, kä cuɛ muc tin waŋkɛ kɛnɛ muc malä thöp, kä cuɛ ji̱ kɔaarɛ diaal lät kä mi̱eth.

Luk Thɔ-lo-mon mi gɔaa

¹⁶ Kɛ cäŋ kɛl cu lëër mään da̱ŋ rɛw ben kä kuäär, kä cukɛ cuɔ̱ŋ nhiamdɛ.

¹⁷ Cu ciek kɛl wëë, “Kuäärä, ɣän kɔnɛ ciek ɛ mi ciëŋkɔ duëël kɛl kä ɣän cä dap kɛ gat a tëë duëël.

¹⁸ Kä kɛ diɔ̱ɔ̱k ni̱ni kɛ kɔr kä min cä dap, cuɛ dap ɛn ciek ɛmɛ. Kä kɛ kɔn kä rɔ. Thilɛ radɔ̱diɛn mi te kɛɛl kɛ nɛy, ɛ ni kɔn da̱ŋ rɛw kä rɔ ɛn cieŋ.

¹⁹ Kä cu gat ciek ɛmɛ li̱w kɛ wäär, kɛ ɣöö cɛ tɔa̱a̱c.

²⁰ Kä cuɛ rɔ jiɛc kɛ wärdäär, kä cuɛ gatdä ka̱n nhiamdä, min ta̱a̱ ni̱n, kä cuɛ jɛ tɔa̱a̱c baapdɛ kä cuɛ gatdɛ min ci li̱w tɔa̱a̱c baapdä.

²¹ Kä min cä keer kɛ runwaŋ kɛ ɣöö bä gatdä luëëth, nɛn ɛ, cua jek cɛ li̱w. Kä min cä di̱el guec kɛ runwaŋ, cua jek ɛn ɣöö, /ciɛ jɛn gatdä min cä dap.”

²² Kä cu ciek in dɔ̱ŋ wëë, “Eey, ɛn gat in tëk ɛ gatdä, kä gat ɛ ci li̱wɛ ɛ gatdu.” Kä cu ciek in nhiam wëë, “Eey, ɛn gat in ci li̱w ɛ gatdu, kä gat in tëk ɛ gatdä.” Cukɛ ruac inɔ nhiam kua̱r.

²³ Kä cu kuäär wëë, “Ci ram kɛl kä yɛ wëë, ‘Ɛn gat ɛ gatdä, kä min ci li̱w ɛ gatdu.’ Kä cu min dɔ̱ŋ wëë, ‘Eey, ɛ gatdu ci li̱w ɔ, kä ɛ gatdä tëk ɔ.’ ”

²⁴ Kä cu kuäär wëë, “Nöŋɛ ɣä mut.” Kä cua mut nööŋ nhiam kua̱r.

²⁵ Kä cu kuäär wëë, “Ŋuɔkɛ gat in tëk kä rɛw, kä ka̱mɛ ram kɛl tha̱a̱ŋdɛ, kä bia duɔth in dɔ̱ŋ ka̱m ram in dɔ̱ŋ.”

²⁶ Kä cu ciek in tëk gatdɛ kuäär jiök kɛ ɣöö nhɔk lɔcdɛ gatdɛ i̱, “Kuäärä käm ni jɛ gat in tëk, cu jɛ näk.” Duundɛ ɣöö cu ciek in dɔ̱ŋ wëë, “Cu jɛ käm raan kä nɛy. Dääkni jɛ.”

²⁷ Kä cu kuäär ɛ loc wëë i̱, “Käm ni gat ɛ tëkɔ ciek in nhiam, cu jɛ näk ɛ jɛn man gatdä.”

²⁸ Kä cu ji̱ I-thɛ-rɛl diaal ŋuk luɔ̱k in ci kuäär ɛ lat liŋ. Kä cukɛ kuäär luɔ̱th, kɛ ɣöö ci kɛn ɛ ŋa̱c ɛn ɣöö te ŋäc Kuɔth kɛ jɛ, kɛ ɣöö bɛ cuŋ lat.